හෝම් (2021) Sinhala Subtitles | සෙනෙහෙ පිරුණු කැදැල්ල [සිංහල උපසිරසි]

සුබ දවසක් වේවා බයිස්කෝප් එක්ක එකතු වෙලා ඉන්න හැමෝටම. අද මං අරන් ආපු උපසිරැසිය, ‌මේ වෙද්දි නම් බොහෝ දෙනෙක්ගේ ධනාත්මක ප්‍රතිචාර දිනාගත්ත අඩු වැඩි වශයෙන් අපි හැමෝම ජීවමාන වෙන සිනමා නිර්මාණයක් වන Home (2021) උපසිරැසි අරගෙනයි මං අද බයිස්කෝප් සිංහලෙන් වෙබ් අඩවියට ගොඩ වැදුනේ.

අපේ ගෙදර, අපි හැමෝම නිවෙන තැන. අපි ලෝකෙට සර්ව සම්පූර්ණ මිනිස්සු කියලා පෙන්නන්න උත්සාහ කරනවා. ඒත් අපි අපේ ගෙදර ඉන්නේ අපි විදියටමයි. අපිට ගෙදර අයට පේන්න අමුතු චරිතයක් රඟපාන්න ඕනේ නෑ. අපි මොන විදියට හිටියත් ඒ අය අපිව පිළිගන්නවා. අපිට ආදරය කරනවා. මේ ලෝකේ කොහේ කරක් ගැහුවත් අපිට ගෙදර ආවම තියෙන සැනසීම වෙන තැනකදි අත්විඳින්න බෑ. මේ ලෝකේ කවුරු අපිට දොස් කිව්වත්, අපිව ප්‍රතික්ෂේප කරත් දෑත් දිගු කරන් අපිව වැළඳ ගන්න. අපේ දුක, වේදනා, සතුට දරා ගන්න අපි වෙනුවෙන් අපේ පවුලේ අය බලන් ඉන්නවා. ඒක අපි හැමෝටම පොදු දෙයක්.

– සැරින් සැරේ ෆ්‍රිජ් එක ඇරලා බලන්නේ මොකද?
– ෆ්‍රිජ් එකේ වුණත් ෆෝන් එකේ වුණත්, ඇතුලේ මොනවත් නෑ කියලා දන්නවා වුණත් නිතරම බැලුවේ නැත්නම් හිතට හරි නෑ.

අපිට දැනෙන දේවල් අඩු වැඩි වශයෙන් එකතු කරලා මේ තරම් ලස්සන පවුලේ කතාවක් නිර්මාණය කරන්න Rojin Thomas මහත්තයාට කොහෙන් මේ සිතුවිලි පහල වුණාද කියලා මං දන්නේ නෑ. ‌කෙටියෙන් කිව්වොත් මේක අපේම කතාවක්. පැයයි විනාඩි හතලිස් එකක් මොනවා බලන්නද කියලා හිතුවත් එක තත්පරේකට ඇස් අහකට ගන්න හිතුනේ නැති කතාවක්. කෙටියෙන්ම කිව්වොත් මලයාලින්ගේ තවත් එක මායාවක්. 2021 අවුරුද්දේ මේ වෙනකල් නිකුත් වූ මලයාලම් සිනමා නිර්මාණ අතරින් හොඳම චිත්‍රපටියක්. 8000+ අධික ප්‍රේක්ෂක මනාපයෙන් මේ වෙද්දි IMDb දර්ශකයේ 9.1/10 ක් වගේම 99% ගූගල් පරිශීලක අගයක් දිනා ගත්තු සිනමා නිර්මාණයක්. තවත් මේ ගැන වර්ණනා කිරීම් කරන්න අවශ්‍ය වෙන්නේ නැති වෙයි. මලයාලම් සිනමාවට ආදරය කරන අය මඟ ‌අරින්නේ නැතිව බලන්නම ඕනේ සිනමා නිර්මාණයක්.

කතාව ගැන කියනවා නම්,
ඔලිවර් ට්විස්ට් මහත්තයාටයි (Indrans) එයාගේ නෝනා කුට්ටියම්මාටයි (Manju Pillai) දරුවෝ දෙන්නෙක් ඉන්නවා. ලොක්කා ඇන්තනී (Sreenath Bhasi), ගෘහ නිර්මාණ ශිල්පියෙක්. ගෘහ නිර්මාණ ශිල්පය අත ඇරලා අන්තිමේ චිත්‍රපටි අධ්‍යක්ෂකයෙක් වෙනවා. පළවෙනි චිත්‍රපටිය සුපර් හිට් එකක් වුණ හින්දම ටිකක් අහංකාරකමින් ඉන්න කොලුවෙක්. එතකොට බාලයා චාල්ස් (Naslen K Gafoor), කුට්ටියම්මා කියන විදියට මහ ලොකු යූ ටියුබ් කාරයෙක්. මේ හතර දෙනාට අමතරව ඔලිවර් ට්විස්ට් මහත්තයාගේ තාත්තත් (Kainakary Thangaraj) මෙයාලා එක්ක ඉන්නවා.

ඇන්ටනීගේ පළවෙනි චිත්‍රපටිය සාර්ථක වුණත්, පිට තැනක ඉදන් දෙවෙනි චිත්‍රපටියේ පිටපතේ වැඩ කටයුතු අවසන්ව කරන්න අවධානය යොමු කරන්න ‌අපහසු හින්දා, ඇන්ටනී ගෙදර ඇවිත් පිටපත ඉවර කරන්න තීරණය කරනවා. ගෙදර ආව ඇන්තනීගේ වැඩේ ඇත්තටම සාර්ථක වෙයිද?

මගේ වැරදි පිළිනොගන්න එක, තරහා යන එක, අහංකාරකම
මානසික අවපීඩනය, වැඩිහිටියෝ එක්ක රණ්ඩු වෙන එක
මං මේ සේරම දේවල් කරන සාමාන්‍ය මිනිහෙක්.
මං සර්ව සම්පූර්ණ මිනිහෙක් නෙමේ…
ඒත් මං මේ සේරම කරන්නේ…
මේ ලෝකේ මට නිදහස තියෙනවා කියලා මං විශ්වාස කරන තැනකයි….
මගේ ගෙදරදි….
මොකද එහේ ඉන්න අය මං වැරැද්දක් කරොත්….
කේන්ති ගන්නෙවත්, මට විහිළු කරන්නෙවත්….
මට දොස් කියන්නෙවත් නෑ…..
ඒ වෙනුවට එයාලා ඒ වැරැද්ද නිවැරදි කරයි….
මගේ ගෙදරදි මං හැමවෙලේම අසම්පූර්ණයි.

මේ සිනමා නිර්මාණය මේ වෙද්දි ගොඩක් අය නරඹලා ඇති. මොකද දැන් චිත්‍රපටිය නිකුත් වෙලා සති කීපයක් වෙනවා. උපසිරැසිය අරන් එන්න පමා වුණාට සමාව ඉල්ලනවා. බලපු නැති අය අනිවාර්යෙන්ම බලන්න කියලා ආයෙමත් පාරක් මතක් කරනවා.

තවත් සිංහල උපසිරසියකින් මුණ ගැහෙමු. සුබ දවසක් වේවා.

 

 

 

 

 

 

Due to copyright issues, we do not provide any torrent links.

මෙම ලබා දී ඇති උපසිරසි HD පිටපත් සඳහා අදාළ වේ.

 

Subtitle Contributor Rank

SILVER MEMBER
JOINING DATE – 2020-02-12
SUB-MAKER RATING BY ADMINS