Avatar: The Last Airbender [S02 : E16 – E17] Sinhala Subtitles | ලෝක යුද්ධය [සිංහල උපසිරැසි සමඟ] (50)

අද මට හරිම විශේෂ දවසක්! ඒ වගේම මම හරිම වාසනාවන්තයි! රොයිලි අයියා සහ දිදුල අයියාගෙන් පස්සෙ බයිස්කෝප් සයිට් එකෙන් උපසි‍රැසි 50ක් සම්පූර්ණ කරන මුල්ම කෙනා මමනෙ! ඉතිං ඒක එහෙම නොවෙන්නෙ කොහොමද? ඒ කියන්නෙ තුන්වෙනියා… හරිම සතු‍ටුයි. මම තවම සිංහල උපසි‍රැසිකරණයට එක්කාසු වෙලා මහ ලොකු කාලයක් වුණේ නෑ. හරියටම කිව්වොත් මාස 06කට අඩුයි. මගේ මුල්ම උපසි‍රැසිය වෙච්ච Prince of Persia: The Sands of Time (2010) චිත්‍රපටයේ උපසි‍රැසිය බයිස්කෝප් එකේ පළවුණේ 2012 සැප්තැම්බර් මාසෙ 30 වෙනිදා. මාසෙ අන්තිම දවස! මුලින්ම දීපු උපසි‍රැසියේ ඉදන් මේ වෙද්දි මම ඔක්කොම චිත්‍රපට 6ක උපසි‍රැසි කරලා තියෙනවා. TV series දෙකක් සම්පූර්ණ කරලා මේ වෙද්දි තුන්වැනි එක ලබා දෙමින් ඉන්නෙ. ඒ අතරෙ රොයිලි අයියා උපසි‍රැසි ගෙනාපු Band of Brothers හි ම තවත් කොටසක් වගේ තියෙන The Pacific කතා මාලාව වගේම Avatar-The Last Airbender කා‍ටුන් කතාවත් අඩංගු වෙනවා. The Pacific හි කොටස් දහයම සහ Avatar කාටූන් කතා මාලාවේ කොටස් 20කින් යුතු පළවෙනි සීසන් එකත් සම්පූර්ණ කරලා උපසි‍රැසි ලබාදෙන්ඩ මට හැකි වුණා. මම මේ වෙද්දි Avatar කාටූන් කතාවෙ දෙවෙනි සීසන් එකෙනුත් අඩකට වැඩි ගණනක උපසි‍රැසි ලබා දීලා අවසන්. ඒ වගේම දැනටමත් එය නිම කරලා අවසන්. ඉදිරියේදී තෙවැන්නත් ලබා දෙන්නම්.

ඇත්තටම මට සතු‍ටුයි මෙච්චර කෙටි කලකින් මේ වගේ හපන්කමක් කරන්ඩ හැකි වීම ගැන. උපසි‍රැසිකරණය කියන එක මම දකින්නේ තමන්ට වගේම අනුන්ටත් වැඩක් වෙන දෙයක් විදිහටයි. මුලදි මුලදි අමාරුවෙන් මේ වැඩේට අතගැහුවත් පස්සෙ පස්සෙ මේ වැඩේ ඇබ්බැහියක් ගාණටම වුණා. නැතිනම් මෙච්චර පරණ කාටූන් එකක් සිංහල හදන්නෙ නෑනෙ මහන්සි වේගෙන. අනික ඒක අරගත් පිරිසත් හරිම සීමිතයි වගේම, ඒ වෙනුවෙන් ලැබුණු ඇගයීමුත් හරිම සීමිතයි. නමුත් ඒ විදිහට මම ඒ කතාව සිංහල හදාපු එකෙන් සෑහෙන දේවල් ඉගෙන ගත්තා. ඒ විතරක් නෙමේ, ඒ වෙනුවෙන් සිංහල ලබාදෙන්න කියලා ඉල්ලීම් කළ අයටත් මගේ ඒ මහන්සියෙන් ප්‍රයෝජනයක් වුණා කියල මම හිතනවා. ඇරත් මේ වගේ කාටූන් එකක් බලල මම ලබපු වින්දනේ තව කෙනෙකුට ලබාදෙන්ඩ මට හැකිවුණානම් ඒක තමා මගේ සතුට වෙන්නෙත්. මේ කතාව දෙනකොට දිගටම මට කමෙන්ට්වලින් සහය පළ කළ, අගය කළ කිහිප දෙනෙක් සිටියා. ඒ අයට බොහොම ස්තුතියි. ඒ වගේ කෙනෙකුගේ මහන්සියේ අගය වැටහෙන පිරිසක් අන්තර්ජාලයෙන් හෝ හමුවීම සතුටක්. ඇත්තෙන්ම මම මේ වෙද්දිත් තෙවැන්න අවසන් කරමින් යනවා. ඉතින් දෙවනි එක ඉවර වුණු වහාම ඒකත් ඔබ අතට පත් කරන්නට අපේ බයිස්කෝප් ඇඩ්මින් කට්ටිය කටයුතු කරාවි.

බයිස්කෝප් අඩවියේ උපසි‍රැසි 50ක් සම්පූර්ණ කරන තුන්වැන්නා හැටියට; රොයිලි, දිදුල අයියලා කළා වගේම මටත් ඒ හැම එකක්ම තනිවම කරන්නට පුළුවන්වීම ගැන ලොකු තෘප්තියක් තියෙනවා මට! 50 වැනි උපසි‍රැසිය සමරන අය අතුරින් ඒ 50ම තනිවම කරපු මුල්ම කෙනා වෙන්ඩ ලැබීමත් හිතට පුදුම සතුටක් තමයි. රොයිලි සහ දිදුල අයියලාට වගේම උපසි‍රැසි 50 අභිමානය මටත් හිමිවෙලා අද! ඉතින් බයිස්කෝප් අඩවිය එක්ක එකතුවෙලා සුළු කාලෙකින් මෙච්චර දුරක් එන්ඩ ලැබීම ඉබේ වෙච්චි දෙයක් නෙමෙයි. ඒකට හුඟාක් දෙනෙකුගේ සහයෝගය දිගටම මට ලැබුණා. නම් වශයෙන් කියන්ඩ යන්නෙ නෑ මම. ඒ වුණත් මුල්ම උපසි‍රැසියේ ඉඳන්ම මට ලොකු සහයක් ලබා දීපු විකියා අයියව විශේෂයෙන්ම සිහිපත් කරනවා මේ වෙලාවෙ. ඔහු ඇතුළු ඇඩ්මින්වරුන්ටත් අනෙකුත් හැම ආකාරයකින්ම සහය දක්වපු හැමකෙනෙක්ටමත් ස්තුතියි. බයිස්කෝප් සිංහලෙන් වගේ යහපත් පිරිසක් එක්ක එක්කාසු වෙන්ඩ ලැබීමත් මම ලබපු ලොකු භාග්‍යයක් බව මේ වෙලාවේ නොකියාම බෑ.

එහෙනම් යාළුවනේ අද මේ දෙන Avatar කාටූනයේ දෙවෙනි සීරීස් එකේ කොටස් දෙකෙන් පස්සෙ තව කොටස් තුනයි ඉතුරු. ඉවසීමෙන් ඉමු ඒ ටික ඉවර කරලා තුන්වෙනි එකත් මේ පිම්මටම ලබාදෙනකම්. ඒකත් මේ විදිහටම දෙනවා. ඒ ගැන බය වෙන්ඩ එපා. අද විශේෂ දවසක් නිසා බයිස්කෝප් ඇඩ්මින්ලා තීරණය කළා එකවර කොටස් දෙකක්ම දෙන්ඩ. ඒක නිසා අද ගේන කොටස් දෙක ගැන ටිකක් බලමුකෝ එහෙනම් දැන්:

16 වෙනි කොටස මෙහෙමයි:
මතකනේ අවතාර් සහ පිරිවර මේ ලෝක යුද්ධය නවතා දමන ක්‍රමයක් සොයන්නට ලෝකයේ ඇති සියලු දැනුම අඩංගු පුස්තකාලයකට ගිය දවස. අවතාර්ගෙ සුරතලා වගේම මිතුරා වන ‘අප්පා’ සහ ටෆ් පිටතම ‍රැඳුණේ ඔවුනට ඇතුළට යන්නට නොහැකි හින්දා බව මතක ඇති එහෙනම්. එහෙමනම් ඔවුන් අමාරුවෙ වැටිච්ච වෙලාව බලලා අප්පාව සොරාගෙන ගිය හැටිත් මතක ඇති! අමතක වෙන්නෙ කොහොමද පසුගිය කොටසිනුත් අප්පා නැති සොවින් තැවෙන අය ඔහුගේ හෝඩුවාවන් සෙවූ හැටි දු‍ටුවනේ ඉතින්. හරි! එදා අප්පා ඒ විදිහට සොරාගැනුණායින් පස්සෙ එයාට මොකද වුණේ? කියල තමයි අද ගෙනෙන මේ 16 වෙනි කොටසින් දිගහැරෙන්නේ. අප්පා ගියේ කොහේද? කවුරුන් ඔහුව ගෙන ගියත් ඔහු ගිය මග ගැන සුළු හෝඩුවාවක් ගියවර මෝමෝට හම්බුණා. ඒ බා-සිං-සේ නගරය ඇතුළෙමයි. එහෙනම් අප්පා මේ දැනුත් නගරයේම සැඟවුණු කොටසක ඉන්නවා වෙන්ඩ බැරිද? බලමු මේකෙන් ඒ ගැන වැටහීමක් ලැබෙයි.

17 වෙනි කොටස මෙහෙමයි:

ඇත්තටම අප්පා වගේ ලොකු සතෙක් කාටවත් ඇහැ නොගැටෙන්ඩ හංගන්නේ කොහේද? එහෙමනම් මේ නගරයේ සැංගිච්ච රහස් නගරයක් තියෙනවාවත් ද? එතකොට ඇයි එකම කෙනා නොවුණත් ඔවුන් හමුවට එන සේවිකාව හැමතිස්සෙම එකම නමක් කියන්නේ? එකම නම තියෙන උදවිය මේ තරම් ගාණක් එකම නගරයක ඉන්ඩ පුළුවන්ද? නැතිනම් කොහොමද වෙන වෙන අය ඇවිදින් එක නමින් පෙනී හිටින්නෙ? ඇයි එහෙම කරන්නෙ? ඒ අයවත් ඒ ගැන දන්නෙ නෑ. ඔවුනට මතකයක් නෑ. එතකොට ජෙට්’ට හදිස්සියෙම මොකද්ද වුණේ? ටෆ්ට හසුනොවී බොරු කියන්ඩ ඔහුට බෑ. නමුත් ඔහුගෙම සගයින් ඔහු කියන්නෙ බොරු බව කියද්දි කොහොමද ඔහු ඇත්ත කියන්නේ? හරිම පැටළිල්ලක්. එහෙනම් මේ නගරෙ මොකක්දෝ ගුප්ත ගැඹුරු රහසක් තියෙනවාමයි. කට්ටියත් එක්ක හොයාගෙන යමු එහෙනම් අපිත් ඒ රහස ගැන.

ඉතින් යාළුවනේ; අද විශේෂ දවසක්නෙ! මමත් අද මේ සයිට් එකට ආවේණික ක්‍රමය අනුවම යමින් සිංහල උපසි‍රැසි 50ක් සම්පූර්ණ කරනවා. ඒ වගේම මේ සයිට් එකෙන් උපසි‍රැසි 50 සම්පූර්ණ කරන තුන්වැන්නා ලෙසින් මම ඒ ජයග්‍රාහී කඩඉම පසු කරනවා. මේ වගේ වෙලාවක ඔබේ අදහස් උදහස් අපට හරිම වැදගත්. ඔබ දැකපු හොඳ/ නරක, අඩුපාඩු වගේම වෙනත් යෝජනා සහ චෝදනා ඇත්නම් ඒ හැම එකක් ගැනම කමෙන්ට් එකකින් අපට කියන්ඩ අමතක කරන්ඩ එපා. ඒ වගේම මෙතෙක් කියන්ඩ බැරි වුණ අදහසක් තියෙනවානම් ඒ අදහස අකුරු කරන්ඩත් මේක හොඳ අවස්ථාවක් වේවි හැමකෙනෙකුටම. එහෙමනම් ඊගාව උපසි‍රැසියෙන් යළිත් හමුවෙමුකෝ අපි! එතෙක් හැමෝටම ආයුබෝවන්!

Due to copyright issues, we do not provide any torrent link.

මේ ලබා දී ඇති සිංහල උපසිරැසි පිළිබද “පුබුදු සුපුන්” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

Subtitle Contributor Rank
SILVER MEMBER
JOINING DATE – 2012/09/30