Bombshell (2019) Sinhala Subtitles | නිරුවත් කරන්නා නිරුත්තර කිරීම [සිංහල උපසිරසි] (18+)

අවවාදයයි – මෙම චිත්‍රපටයේ පසුබිම 2016 වසරේ ඇමෙරිකා එකසත් ජනපදයේ සුප්‍රසිද්ධ “Fox News” ජාලය තුල සිදු වූ ආන්දෝලනාත්මක සිදුවීමක් සමඟ බැඳී පවතී. කතාවේ බොහෝමයක් නම් ගම්, සත්‍ය සිදුවීමට අදාළ පුද්ගලයන්ගේ නම් ගම් වලට සමාන වේ. මෙය ලිංගික අල්ලස් සහ ලිංගික හිරිහැර සම්බන්ධව කියවෙන චිත්‍රපටයක් බැවින් වැඩිහිටි ප්‍රේක්ෂකයන්ට පමණක් නිර්දේශ කළ හැක. එනම් ළමා මනසට නුසුදුසු චිත්‍රපටයකි. තවද ඇතැම් දෙබස් පරිවර්තනය කිරීමේදී ඒ ඒ චරිත වල මානසික මට්ටම නිරූපණය කිරීම සඳහා එදිනෙදා ව්‍යවහාර වන සිංහල වචන යොදාගෙන ඇත.

ඇමෙරිකා එක්සත් ජනපදය කිව්වම හැමෝම පිළිගන්නවා ඒක ලෝකයේ බලවත්ම රට කියලා. මේ දවස් වල වසංගතයක් නිසා අන්ත අසරණ වෙලා තිබ්බට සමස්ථයක් වශයෙන් හැමදේම අතින් ඉස්සරහින් ඉන්න රටක් තමයි ඇමෙරිකා එක්සත් ජනපදය කියන්නේ. ඒ වගේ ක්‍රියාකාරී, තරඟකාරී රටක ක්‍රියාත්මක වන ප්‍රවෘත්ති නාලිකා අතර තියෙන්නෙත් හිතාගන්න බැරි තරඟයක්.

මේ ප්‍රවෘත්ති නාලිකා අතරින් “Fox News” ජාලයට හිමි වෙන්නේ විශේෂ තැනක්. “Fox News” ආරම්භ කලේ 1996 අවුරුද්දේ නිව්යෝක් ප්‍රාන්තයේදී යි. ඒකට මූලිකත්වය ගත්තේ ඔස්ට්‍රේලියානු ජාතික Rupert Murdoch.

ඉතින් Rupert Murdoch, “Fox News” එක පටන් ගන්න හිතුවම එයාට ඕන උනා CEO/ Chairman එහෙම නැත්නම් සිංහලෙන් කියනවා නම් ප්‍රධාන විධායක නිලධාරී/ සභාපති තනතුර හසුරවන්න කෙනෙක්. එයා ඒ වෙනුවෙන් තෝර ගත්තේ මේ චිත්‍රපටයේ වස්තු බීජය වගේම විෂබීජය උන හැට පැන්න Roger Ailes ව.

කාමාතුර Roger Ailes (වම් පස) සහ ඔහුට චිත්‍රපටයේ පණ පොවන John Lithgow (දකුණු පස)

අපේ රටේ ප්‍රවෘත්ති නාලිකා දේශපාලන පක්ෂ අතරේ බෙදිලා යනවා වගේම ඇමෙරිකා එක්සත් ජනපදයේ ප්‍රවෘත්ති නාලිකාත් තමන්ට වාසිදායක දේශපාලන පක්ෂ වලට කඩේ යනවා. Roger Ailes, “Fox News” එකේ වැඩ භාර ගන්න කලින් ඇමෙරිකා එක්සත් ජනපදයේ ප්‍රධාන දේශපාලන පක්ෂයක් වන රිපබ්ලිකන් පක්ෂයේ මාධ්‍ය උපදේශක වරයෙක් විදිහට වැඩ කරා. ඉතින් මේ හේතුව නිසා “Fox News” ජාලය ස්වභාවයෙන්ම කඩේ යන්නේ රිපබ්ලිකන් පක්ෂයට. ඒ කියන්නේ මේ දවස් වල ලෝකෙටම පච වෙලා ඉන්න Donald Trump ගෙ පක්ෂය.

දැන් අපි Bombshell චිත්‍ර පටයේ හරය ගැන කතා කරමු. මං කලින් කිව්වා වගේ මේ ප්‍රවෘත්ති නාලිකා අතර තියෙන තරඟය නිසා හැම නාලිකාවක්ම ප්‍රේක්ෂකයන් ආකර්ෂණය කර ගන්න උපක්‍රම භාවිතා කරනවා. Roger Ailes කියන්නේ සරලවම සල්ලාල චරිතයක්. එයා “Fox News” එකේ එයාට වැඩ කරන චීස් කෑලි වගේ ඉන්න නිවේදිකාවන්ව ප්‍රේක්ෂකයන් ආකර්ෂණය කර ගන්න සූක්ෂම විදිහට පාවිච්චි කරනවා. ඒ එයාලට කොට ඇඳුම් නිර්දේශ කිරීමෙන් සහ රුපවාහිනී වැඩසටහන් වලදී එයාලගේ කකුල් ප්‍රදේශය ලෝකෙටම පෙන්වීමෙන්. ඉතින් මිනිස්සු මේ ලස්සන ගෑණු ළමයින්ගේ හැඩ බලන්න “Fox News” එක වටේ රැස් වෙනවා.

Roger Ailes ගෙ අඩුවක් නැති මනමාල කමයි සල්ලාල කමයි “Fox News” වල වැඩ කරන අයට නුපුරුදු දෙයක් නෙමෙයි. ලස්සන ගෑණු ළමයෙක් වැඩට ආවම පුරුද්දක් විදිහට ඒ ගෑණු ළමයා Roger Ailes තමන්ගේ කාමරයට හොරෙන් ගෙන්න ගන්නවා. ඊට පස්සේ ලිංගික අල්ලස් දීලා/ හිරිහැර කරලා තමන්ගේ ආශාවන් සපුරාගෙන ඒ ගෑණු ළමයාගේ ජීවිතය විනාශ කරනවා. ඉතින් රස්සාව නැති වෙයි කියන බයටයි ලැජ්ජාවටයි මේ වගේ ගෑණු ළමයින් ගොඩ දෙනෙක් සද්ද නැතුව ඉන්නවා. හැබැයි එහෙම ලිංගික අල්ලස් දීලා/ හිරිහැර කරලා ඒ ගෑණු ළමයින්ට උසස්වීම් පවා ලබා දෙන්නත් Roger Ailes අමතක කරන්නෙ නෑ.

කාලයත් එක්ක වයසට යන ගෑණු අයට පහල මට්ටමින් සලකලා, අලුතින් එන ඇහැට කණට පේන කෙල්ලන්ට කියලා ආශාවන් සපුරගන්න Roger Ailes, ඒ තරුණ අයට පරණ අයට වඩා හොඳින් සලකනවා. ඒක “Fox News” එක ඇතුලේ ප්‍රසිද්ධ රහසක්. මේ සමහර කෙල්ලන්ව තමන්ගේ යාළුවන් එක්ක බෙදා ගන්නත් Roger Ailes අමතක කරන්නේ නෑ. ඒ අසහනකාර යාළුවන් අතර Bill O’Reilly, Jack Abernethy, Doug McKelway, Francisco Cortes ප්‍රධානයි.

කොට්ටෝරුවා කෙහෙල් ගහට කොටන්න ගිහින් හොට පටල ගන්නවා වගේ Roger Ailes ගෙ මේ සල්ලාලකම්, අසාධාරණකම්, හිරිහැර ඉවසන්නේ නැති නිර්භීත ගෑණු කෙනෙක් “Fox News” එකේ ඉන්නවා. එයා නමින් Gretchen Carlson. සරලවම කිව්වොත් Roger Ailes ට Gretchen Carlson ව පේන්න බෑ, Gretchen Carlson ට Roger Ailes ව පේන්න බෑ. ලිංගික අල්ලස් වලට/ හිරිහැර වලට මුල ඉඳන්ම Gretchen Carlson විරුද්ධ නිසා Roger Ailes පුළුවන් තරම් එයාව කපන්න බලනවා. ඒක අවසන් වෙන්නේ Gretchen Carlson ගෙ රස්සාව බඩු බනිස් වීමෙන්.

Gretchen Carlson (වම් පස) සහ ඇයට චිත්‍රපටයේ පණ පොවන Nicole Kidman (දකුණු පස)

තමන්ගෙ රස්සාව අවධානමක තියෙන්නේ කියන එක Gretchen Carlson මුල ඉඳන්ම වගේ දැනන් ඉන්නවා. රස්සාව නැති උනාට පස්සේ වැඩිවන වෛරය නිසා එයා Roger Ailes ට විරුද්ධව නඩුවක් දානවා. ඒ Roger Ailes, “Fox News” එකේ ඉන්න ගෑණු අයට කරන අඩත්තේට්ටම් වලට එරෙහිවයි. මේ නඩු සිද්ධිය රට පුරා ලැව් ගින්නක් වගේ පැතිරෙනවා. මොන දේ උනත් Roger Ailes ට පණ උනත් දෙන්න කැමති ගෑණු අය ඒ චෝදනාවට විරුද්ධ වෙනවා. මේ අතරින් Jeanine Pirro, Greta Van Susteren, Harris Faulkner, Kimberly Guilfoyle, Ainsley Earhardt ප්‍රධානයි. කොටින්ම Roger Ailes ව බේරගන්න ඉදිරිපත් වෙන නීතීඥයා වෙන්නෙත් Susan Estrich කියල ගෑණු කෙනෙක්.

අනිත් පැත්තට, බලාපොරොත්තු නොවෙන විදිහෙන් Gretchen Carlson වටේ එකතු වෙන Roger Ailes නිසා අසරණ වූ වැඩිහිටි/ තරුණ ගැහැණුන් ගණන වැඩි වෙනවා. මේ අතරින් වැදගත්ම චරිතය වෙන්නේ Donald Trump එක්ක “Fox News” හරහා සීතල යුද්ධයක පැටලුන Megyn Kelly.

Megyn Kelly (වම් පස) සහ ඇයට චිත්‍රපටයේ පණ පොවන Charles Theron (දකුණු පස)

Megyn Kelly ට අමතරව Juliet, Alisyn, Julie, Marsha, Diane, Pat, Jane, Kellie, Susan ඇතුළු කාන්තවන් විසි ගණනක් Gretchen Carlson ට සහය දක්වනවා. මේ බහුතරක් දෙනාව චිත්‍රපටය පුරා නියෝජනය කරන්න Kayla Pospisil (Margot Robbie විසින් පණ පොවන) කියලා ඉතා වැදගත් මනකල්පිත චරිතයක් ඔයාලට දකින්න පුළුවන්. මේ සටනින් දිනන්නේ Roger Ailes ද නැත්නම් Gretchen Carlson ද කියල ඔයාලම බලන්නකෝ.

Drama වර්ගයට වැටෙන Lionsgate නිර්මාණයක් වන Bombshell චිත්‍රපටය තිරගත උනේ 2019 දෙසැම්බර් මාසයේ. මේක අපේ රටේ පවා ප්‍රදර්ශනය උන චිත්‍රපටයක්. චිත්‍රපටය අධ්‍යක්‍ෂණය කලේ Jay Roach. IMDb අගය 6.8 ක් සහ Rotten Tomatoes අගය 70% ක් ගන්න මෙම නිර්මාණය පහත සඳහන් සම්මාන ජයග්‍රහණය කරලා තියෙනවා.

1. Academy Awards, USA (2020) Oscar – Best Achievement in Makeup and Hairstyling
2. BAFTA Awards (2020) – Best Makeup and Hairstyling
3. AACTA International Awards (2020) – Best Supporting Actress (Margot Robbie)
4. Awards Circuit Community Awards (2020) – Best Makeup and Hairstyling
5. Broadcast Film Critics Association Awards (2020) – Best Makeup and Hairstyling
6. Chicago Independent Film Critics Circle Awards (2020) – Best Makeup
7. Gold Derby Awards (2020) – Best Makeup and Hairstyling
8. Heartland Film (2019) – Truly Moving Picture Award
9. Hollywood Critics Association (2020) – Best Makeup and Hairstyling
10. Hollywood Makeup Artist and Hair Stylist Guild Awards (2020) – Best Makeup and Hairstyling (3 awards)
11. Las Vegas Film Critics Society Awards (2019) – Best Supporting Actress (Margot Robbie)
12. Latino Entertainment Journalists Association Film Awards (2020) – Best Makeup and Hairstyling
13. Nevada Film Critics Society (2019) – Best Actress (Charlize Theron)
14. North Texas Film Critics Association, US (2019) – Best Actress (Charlize Theron)
15. Online Film & Television Association (2020) – Best Makeup and Hairstyling
16. Palm Springs International Film Festival (2020) – International Star Award (Charlize Theron)
17. PGA Awards (2020) – Stanley Kramer Award
18. St. Louis Film Critics Association, US (2019) – Best Supporting Actress (Margot Robbie)
19. The Queerties (2020) – Queerty
20. Women Film Critics Circle Awards (2019) – Adrienne Shelly Award

ඔය තියෙන්නෙ දිනපු සම්මාන විතරයි. නිර්දේශිත ඒවා සඳහන් කරන්න ගත්තොත් මේ ලිපිය නව කතාවක් වගේ වෙයි. එහෙනම් ඔච්චරයි.

ලිපිය වෙනදට වඩා ටිකක් දිග වැඩියි. ඒත් විස්තරාත්මකව ලියන්න ඕන කියල හිතුණා. ඇත්තටම මේ පරිවර්තනය මම දෙපාරක් කලා පළවෙනි සැරේ කරපු උපසිරැසි ෆයිල් එක අවාසනාවන්ත විදිහට මගෙ අතින් මැකිලා ගියාට පස්සෙ. මං විශ්වාස කරනවා මේ මං වැඩිපුරම මහන්සි උන උපසිරැසිය කියලා. ඒ වගේම මගේ අතින් පරිවර්තනය උන පළවෙනි ඔස්කාර් සම්මාන ලාභී බොක්ස් ඔෆිස් චිත්‍රපටයත් මේකයි. බලාපොරොත්තු වෙනවා මේ මහන්සියට ඔයාලා චිත්‍රපටය නැරඹීම තුලින් සාධාරණයක් කරයි කියලා. අති විශිෂ්ට නිර්මාණයක් කියලා අවංකවම කියන්න පුළුවන්.

ඊළඟට නම් කරන්න හිතන් ඉන්නේ TV series එකක්. එහෙනම් මේ වෙනස් චිත්‍රපට අත්දැකීම ලබා ගන්න කියල ඔයාලට ආරාධනා කරනවා.

ජය වේවා!

 

 

 

Due to copyright issues, we do not provide any torrent links.

මෙම ලබා දී ඇති උපසිරැසිය BR පිටපත් සඳහා අදාළ වේ.

 

Subtitle Contributor Rank

BRONZE MEMBER
JOINING DATE – 2015-02-03
SUBMAKER RATING BY ADMINS