Escape from Planet Earth (2013) | පෘතුවියෙන් පණ බේරා ගමු…[සිංහල උපසිරැසි සමඟ]

ඔන්න අපේ ඇනිමේෂන් ලෝලීන්ට තවත් නිර්මාණයක් ගෙනෙන්නයි අද මේ සූදානම. මේ මගේ පස් වෙනි ඇනිමේෂන් චිත්‍රපටි උපසිරැස ඒ වගේම මට වැඩිම වෙලාවක් ගිය උපසිරසත් මේක තමයි. ඒ නම් මට මේකට යොදවන්න ලැබුණු කාලය අඩු කම නිසා සිද්ධ උන දෙයක්. මෙහි හොඳ පිටපතක් නිකුත් වෙලානම් සතියක් විතර වෙනවා. ඒ උනාට හැමෝම වෙනුවෙන් ඒ කියන්නේ පොඩිහිටි වැඩිහිටි දෙගොල්ලන්ගේම රසාස්වාදය වෙනුවෙන් මම මේ උපසිරැස තිලිණ කරන්නම්.

එහෙනම් මම කියන්නම් කතාව ගැන, නමෙන්ම තේරෙනවා ඇතිනේ වැඩේ මොකද්ද කියලා අපේ ලෝකෙන් බේරිලා යන කතාවක් තියෙන්නේ. පොඩි හැඳින්වීමක් කරන්නම් එහෙනම්. පෘතුවියෙන් ආලෝක වර්ෂ 400 ක් එහායින් තියෙනවා ග්‍රහලෝකයක් බාබ් කියලා. මෙහෙ ඉන්න කට්ටිය නිල් පාටයි. මෙයාලගේ ඔක්කොම නිල්. මෙයාලගේ තියෙන්නේ බ්ලු ටියුබ් අපේ යු ටියුබ් වෙනුවට, අපේ ප්ලූටෝනියම් වෙනුවට එයාලට තියෙන්නේ බ්ලුබෝනියම් ඒ වගේම ගොඩක් ලොකු තාක්ෂණයක් තියෙන ග්‍රහලෝකයක් අපේ ලෝකේ NASA එක වගේ මෙයාලට තියෙනවා BASA කියලා එකක් අභ්‍යවකාශ ගමන් සම්බන්ධව. ඉතින් මෙයාලගේ ඉන්නවා සුපිරි වීරයෙක් ස්කොච් සුපර්නෝවා කියලා මෙයා තමා ලොකු ලොකු වැඩ වලට වෙන ග්‍රහලෝක වලට ගොඩ බහින්නේ. නියම වැඩකාරයා ඒ උනාට පොඩි මාන්නේකුත් තියෙනවා. මෙයා මොන දේ කලත් මෙයාගේ වැඩ වලට සහය දෙන්නේ එයාගෙම අයියා ගැරී සුපර්නෝවා මෙයා තමයි මෙහෙයුම් පාලනය කරන්නේ. ඒ කියන්නේ මහමොළකරු. ඒ උනාට ස්කොච් කියන්නේ ගැරී කියන්නේ නිකන් බොත්තම් ඔබ ඔබ ඉන්න රොබෝ කෙනෙක් කියලා. මේ නිසා දෙන්න අතර පොඩි ගැටුමකුත් තියෙනවා. ඒ අතරේ BASA ආයතනයේ ලොක්කා ලීනා ඇය අලුත් මෙහෙයුමක් දෙනවා ගැරී සහ ස්කොච් සහෝදරයන්ට අඳුරු ග්‍රහලෝකයට යන්න. මේ ග්‍රහලෝකෙට මේ නම වැටෙන්න හේතුව තමා අඩිය ගහපු කිසි කෙනෙක් ආපහු එයාලගේ ලෝකෙට අඩිය ගහලා නැහැ.

එයාලගේ පරිගණක වාර්තා කියන්නේ මෙන්න මෙහෙමයි අඳුරු ග්‍රහලෝකය ගැන, අමුතු බිය උපදවන සුළු පරිසරයක් තිබෙන සහ දියුණුවෙන් පසුපසට යන එකම ග්‍රහලෝකය. ඒ වගේම බුද්ධිමත් සහ මනස්කාන්ත දේ වලින් ආරම්භ වෙලා මෝඩ සහ අවලක්ෂණ ආක්‍රමණශීලි සත්තු පිරිසක් විසින් යටත් කරගෙන තිබෙනවා. එයාල ළඟ එකිනෙකා වෙන් කර ගන්න ක්‍රමයක් තිබෙනවා රටවල් කියලා. ඒවගේ මායිම් වල නිතරම ගැටළු නිසා යුද්ධ ඇති වෙනවා. ඒ යුද්ධ වලින් දිනන අය පරිහාණියට පත් වෙන අතර පරාද වෙන අය දියුණුවට පත් වෙනවා. ඒ වගේම ඒ ග්‍රහලෝකේ පාලකයෝ පත් කරගන්නේ මුහුණේ ස්වරූපයට සහ කොන්ඩ විලාසිතා වලට. එයාල වන්දනා මාන කරන්නේ මුදල් සහ ආහාර වලට.

ග්‍රහලෝකේ මොකද්ද කියලා කියන්න ඕනේ නැහැනේ ඉතින් නේ, දන්නවා ඇතිනේ ස්කොච් එන්න හදන්නේ කොහෙටද කියලා. ආවට පස්සේ වෙන දේ ඔයාලටම තමා බලන්න වෙන්නේ. මේ සුපිරි වීරයාට වෙන්නේ මොකද කියලා.

චිත්‍රපටියේ වටපිටාව ගැන කියන්න අමතක උනානේ, IMDb දර්ශකයේ ලකුණු 5.3 ලබා තිබෙන මෙම සජීවී ත්‍රිමාණ චිත්‍රපටය Cal Brunker විසින් අධ්‍යක්ෂණය කර තිබෙන්නේ. ඒ වගේම හඬ දායකත්වයෙන් Brendan Fraser, Rob Corddry, Jessica Alba, Sarah Jessica Parker යන නළු නිලියන් දායක වෙලා තිබෙනවා. ආදායම් අතින් බැලුවත් ඇමෙරිකානු ඩොලර් මිලියන 40 වැයවූ මෙම චිත්‍රපටයට මැයි මාසය වෙනකොට ඩොලර් මිලියන 55ක අදායමක් ලබා ගන්නත් සමත් වෙලා තියෙනවා.

එහෙනම් නැවත හමුවෙන කන් හැමදෙනාටම ජයෙන් ජය ප්‍රාර්ථනා කරනවා !!!

Due to copyright issues, we do not provide any torrent links.

මෙම ලබා දී ඇති උපසිරැසි BR පිටපත සඳහා අදාළ වේ.

මේ ලබා දී ඇති සිංහල උපසිරැසි පිළිබද “හසන්ත වික්‍රමරත්න” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.