Game of Thrones [S5E02 – The House of Black and White] (18+) | අපොයි අපොයි ඩැනේරිස්… [සිංහල උපසිරැසි සමඟ]

කොහොමද කට්ටියටම? එච්චරම කොලිටියෙන් නම් හොඳ නැති වුණත් බලන අය වෙනුවෙන් ස්ක්‍රීනර් කොපි වලට සබ් දෙන්න තීරණය කළා. හැබැයි තියෙන වෙලාවත් එක්ක තමා කරන්න වෙන්නෙ. ලිපි මේ කොටස් හතරෙන් පස්සෙ විස්තර ඇතුව ලියන්නම්කෝ. මුලින්ම පහුගිය කොටස මතක් කරගෙන ඉම්මු.

කතාව පටන් ගත්තෙ අවුරුදු 25 කට කලින් සර්සි පොඩි කාලෙ යාලුවෙක් එක්ක අනාගතය දැනගන්න මායාකාරියෙක් ගාවට. ඇය හරියටම වෙන දේ කියනවා. බඳින්න පොරොන්දු වෙච්ච කුමාරයා වෙනුවට රජෙක් බඳින බවත්, රජුට ළමයින් 20 ක් උන්නත්, රජුට දාව නූපන් ළමුන් තිදෙනෙක් සර්සිට ලැබෙන බවත්, ඒ තිදෙනාම මියයන බවත් පවසනවා. ඒ වගේම සර්සිට වඩා ලස්සන කුමාරියෙක් ඇයව පාගල දාන බවත් කියනවා. මේ අනාවැකියට තමා සර්සි දැනටත් බියවෙන්නෙ. 🙂

කිංග්ස් ලෑන්ඩින් වල.

සර්සි ප්‍රධාන දේවස්ථානයට එනවා තම පියාට අවසන් ගෞරව දැක්වීමට. ඒ ඇවිල්ල තම සහෝදර ජේමිට බනිනවා කොට ආදිපාදව නිදහස් කරවලා වක්‍රාකාරයෙන් පියාව ඝාතනයට හවුල් වෙච්ච එක ගැන. ඊට පස්සෙ ඇය යනවා තම ඥාති සොහොයුරු ලාන්සල් ලැනිස්ටර් ළඟට. ඔහු දැන් ආගමෙ එක්තරා කොටසකට බෙහෙවින් කැපවෙලා ඉන්න හින්දා සමාව ඉල්ලනවා ඔහු හා ඇය අතර ඉස්සර තිබ්බ නොහොඹිනා සම්බන්ධයට වගේම රොබට් බ්රැතියන් රජු මැරුණ දා වස දාපු වයින් දීපු එකට. හැබැයි මේ එකක්වත් සර්සි නොදන්න ගානට ලිස්සල යනවා.

පෙන්ටෝස් වල…

ලෑලි පෙට්ටියක හැංගුන කොට ආදිපාද තුමයි වාරිසුයි එනවා පෙන්ටෝස් කියන නිදහස් නගරයට. එහෙදි වාරිස් හෙළි කරනවා ඔහු ඩැනේරිස් ට ආපහු සිංහාසනයට එන්න උදව් කරපු බවත් වෙච්ච වැරදි හින්දා අන්තිමේ එයාලට මෙහාට එන්න වෙච්ච බවත්. ඊට පස්සෙ කොට ආදිපාදතුමාට යෝජනා කරනවා මෙරීන් වලට ගිහින් ඩැනේරිස්ට උදව් කරන්න. ඔහු වෙන කරන්න දෙයක් නැති හින්දා යන්න එනවා.

වහල් බොක්ක ප්‍රදේශයේ…

මෙරීන් වල පිරමීඩයේ තිබ්බ රත්‍රං හාපි ප්‍රතිමාවක් නිකැළල් භටයන් විසින් කඩා දමනු ලබනවා. ඊට පස්සෙ එක් නිකැළැල් භටයෙක්ව හාපිගේ පුතණුවන් නම් කණ්ඩායමක් විසින් ඝාතනය කරනු ලබනවා. ඔවුන් රත්‍රං වෙස්මුහුණුනක් මළ මිනිය ළඟ දමා යනවා ඒකෙ වගකීම කණ්ඩායම භාරගන්නා බවට ඉඟියක් ලෙසින්. ඩැනේරිස් අණ කරනවා වගකිව යුත්තන්ව අල්ලාගන්නා ලෙසත් මියගිය සොල්දාදුවා ගෞරව සහිතව භූමදාන කරන ලෙසත්.

මේ අතර යුන්කායි වල තත්වය සමනය කරන්න ගිය සො ලොරාක් දූත මෙහෙයුම සාර්ථක බවත්, පාලන මණ්ඩලයක් ස්ථාපිත කළ බවත් පවසමින් ආපහු පැමිණෙනවා. හැබැයි ඔවුන්ගේ ඉල්ලීමක් තියෙනවා එම සමාජයේ මුල් බැහැල ගිය සටන් වළවල් ආපහු ඇතිකරන ලෙස. හැබැයි ඩැනේරිස් ඊට විරුද්ධ වුණත්, ඩාරියෝ ඇයට උදක්ම කියනවා ඒවා ආපහු පටන් ගන්නා ලෙස. ඔහුට අනුව ඔහු සටන් පුරුදු වී දැන් සිටින තත්වෙට පැමිණ තියෙන්නෙ එම සටන් නිසායි. මේ අහර ඩැනේරිස් ඇය සිර කල මකරුන් දෙදෙනා ළඟට ගියත් උන් ඇයට පහර දෙන්න හදනවා.

වේල් වල…

මෙච්චර කල් මවගේ තුරුලේ ඇති දැඩි වුණ රොබින් අමාරුවෙන් සටන් පුරුදු වෙන හැටි පීටර් බේලිෂ් හා සන්සා ස්ටාක් බලා සිටිනවා. වංශාධිපති රොයිස්ට අනුව නම් ඔහුට මෙලෝ දෙයක් බැහැ. මේ අතර බේලිෂ් හට පණිවිඩයක් ලැබෙන අතර ඔහු එය ඉක්මනින් සඟවා ගන්නවා. මීට පස්සෙ ඔහු මුලි යනව කියපු තැනට නොව වෙන තැනකට පිටත් වෙනවා. සන්සා හේතුව විමසන විට ඔහු කියන්නෙ ලැනිස්ටර්වරුන්ට හොයාගන්න බැරි තැනකට ඇයව ගෙනයන බවයි.

මේ අතර පොඩ්‍රික් හට යන තැනකට යන ලෙස බ්‍රියෙන්නෙ කියනවා. මොකද ඇයට කාවවත් අවශ්‍ය නැති බවත්, ආර්යා හට ඇයගේ උදව්ව අවශ්‍ය නැති වූ බවත්. මේ දෙන්නා කතා කර කර ඉන්න කොට පීටර් බේලිෂ් හා සන්සා රැගත් අශ්ව කරත්තය ඒ ලඟින් යනවා.

ප්‍රාකාරය අසල…

සැම්වෙල් බයෙන් ඉන්නවා අලුත් ප්‍රධානියා ලෙස සර් ඇලිසර් ත්‍රෝන් පත්වුව හොත් ගිලී හා ළමයාව එලවයි කියලා. මේ අතර ස්ටැනිස් ජෝන් හට පවසනවා මෑන්ස් රෙයිඩර්ගේ සහය ඔහුගේ යුද්ධයට දිනා දෙන ලෙස. රූස් බෝල්ටන් ගෙන් උතුර මුදාගත් පසු වනචාරි හමුදාවට එහි වාසයට ඉඩ සලස්වන බව ඔහු පවනවා. හැබැයි මෑන්ස් එකඟ වෙන්නෙ නෑ ස්ටැනිස් ගාව දණ නමලා ඔහුගේ යුද්ධයට දායක වෙන්න. ඉතින් ස්ටැනිස් ඔහුව පණපිටින් පුළුස්සනවා. හැබැයි ඔහු වේදනාවෙන් විලාප කියනකොට ජෝන් ඊතලයක් විද ඔහුට ඉක්මන් මරණයක් ළඟා කර දෙනවා.

එහෙනම් තුන්වෙනි කොටසෙන් ලබන සතියෙ හමුවෙමු, සඳුදා වෙද්දි නියම කොපියට යාවත්කාලීන කරන්නම්.

පසුබිම් විස්තර ලිපි.
1) අදාල භූමියේ සිතියම් සමඟ විස්තරය.
2) මේ වන තෙක් සම්පූර්ණ ඉතිහාස කතාව සරලව.
3) ඇදහීම් හා නයිට්වරු.
4) ප්‍රබල වංශවත් පවුල් – පළමු කොටස.
5) ප්‍රබල වංශවත් පවුල් – දෙවන කොටස.
6) ඓතිහාසික යුද්ධ හා කැරළි – පළමු කොටස.
7) ඓතිහාසික යුද්ධ හා කැරළි – දෙවන කොටස.
8) ඓතිහාසික යුද්ධ හා කැරළි – තෙවන කොටස.
9) තරිඳු සහෝගේ යූටියුබ් කුප්පි ටික.378

 

 

Due to copyright issues, we do not provide any torrent links.

 

<< Previous Episode                      All Episodes                        Next Episode >>