Goldfinger (1964) Sinhala Subtitles | රත්තරන්! රත්තරන්! [සිංහල උපසිරැසි සමඟ]

එහෙමනම් ඔන්න 007 තුන්වැනි එකත් අරගෙන ආවා. මෙච්චර කලක් මේ රස වෑහෙන සිනමා පෙළ සිංහල සිනමා රසිකයා අතරට ගියේ බොහොම සීමිතව. අලුත ආපු ඒවා මිසක් මේ පරණ ඒවා ගැන හුඟ දෙනෙක් උනන්දුවක් දැක්වුවෙ නෑ. සමහරු දන්නෙත් නෑ මෙච්චර චිත්‍රපට ගොන්නක්ම Bond ට අයිති බව. මමත් මේ සිනමා පෙළ ගැන හිත යොමු කළේ බයිස්කෝප් හා එකතු වුණායින් පස්සෙයි. මේ එකමුතුවෙන් දැනටම තුනක්ම ගෙන ආවා වගේ ඉතිරි සියල්ලමත් ගෙන එන්නටයි අපගේ බලාපොරොත්තුව. කලින් දීපු දෙකම 60-70 කාලේ වුණත් 1000 කට ආසන්න පිරිසක් අරගෙන තියෙන බව පේනවා. ඒකෙන්ම පේනවා මේ චිත්‍රපට පෙළ අපෙන් වහං වෙලා තිබුණට කොයිතරම් නම් අගනා සිනමා පෙළක් ද කියන වගත්. ඒ අස්සෙම කියන්ඩ ඕනෙ මේකෙ අලුත්ම චිත්‍රපට දෙකකට දැන් ලහි ලහියේ මුල් කටයුතු කෙරීගෙන යනවා කියන එකත් 😉

හරි මේ තුන්වැනි චිත්‍රපටයෙත් විශේෂත්වයන් ‍රැසක්ම තියෙනවා කියන්ඩ. කතාව ගැන බලන්ඩ කලින් ඒ ගැන බලල ඉමු එහෙනම්. ජේමිස් බණ්ඩා චරිතය ‍රැගත් චිත්‍රපට අතරින් ප්‍රථම වටාවට HIT එකක් වුණ චිත්‍රපටිය තමයි මේක. Blockbuster Movie කියන්නෙ. තව විදිහකට කිව්වොත් සිනමා ලෝකය හොල්ලපු, ප්‍රේක්ෂක ආන්දෝලනයක් ඇති කරවපු, ශාලාවන් අතුරු සිදුරු නැතිව පුරවපු, මුල්ම Bond සිනමා පටය වුණේ මේ චිත්‍රපටය. ඇයි Bond සිනමා පෙළෙහි ප්‍රථම Oscar සම්මානලාභියා වුණේත් මේ චිත්‍රපටය. ඔබට හිතාගත හැකිද ඒ සම්මානෙ මොකද්ද කියලා? Skyfall මේ පාර දිනපු එකමයි. Best Sound Effects Editing. හැබැයි Goldfinger මේකට හිමිකම් කීවේ හවුලේ නොවෙයි. තනිවමයි. ඉතිං හිතාගත හැකිනේ මේ චිත්‍රපටයේ ශබ්ද සංකලනය ගැන! (මේ සිනමා පෙළෙහිම ශබ්ද තාක්ෂණය ගැන හොඳ තක්සේරුවක් ඒකෙන් ලැබෙනවා කියලයි මගේනම් අදහස) තව දුරටත් සලකද්දී මේක හදන්ඩ වැය කළේ මුල් චිත්‍රපට දෙකේම වියදමේ එකතුවට සමාන මුදලක් ($ 3 m) වුණාට මේක ($ 125 m) හෙව්වා. කොහොමද පහර? ඒ ඇරුණම මුල්වරට Bond ගැජට් කාර් එක තියෙනවා මේකේ. Aston Martin DB5. ඒ කාලේ තිබ්බ අලුත්ම මෝස්තරේ. මේ චිත්‍රපටිය වෙනුවෙන්ම ගැජට් බැජට් එක්කාසු කරපු වාහනයක් එක්ක මේ ජාතියෙ වාහන දෙකක් හදවලා තියෙනවා. 1964 වැඩියෙන්ම අලෙවි වුණ සෙල්ලම් කාරය බවට මේ මොඩල් එකේ ආකෘතියක් පත් වෙච්චි බවටත් වාර්තා වෙනවා. හිතාගන්ඩකො වාහනේ ගතිය ඒකෙන්ම. පොතේ තියෙනවට වඩා ‍ෆිල්ම් එකට එද්දී ගැජට් සහ වාහනේ වෙනස්. මුල්ම වතාවට Laser Beam එකක් ආයුධයක් ලෙස යොදාගැනෙන අවස්ථාවක් අඩංගු වෙච්චි චිත්‍රපටයක් බවටත් මේක පත් වෙලා තියෙනවා. ඒ විතරද? Bond චිත්‍රපටවල අඩංගු හොඳම සටන් ජවනිකාවක් මේකේ තියෙනවා. නිකම්ම නෙමෙයි සිනමා ඉතිහාසයේ දක්නට ලැබෙන හොඳම සටන් ජවනිකා කිහිපය අතරින් එකක් ලෙසත් එය අගය කෙරෙනවා. සියලුම ජේමිස් බණ්ඩා චිත්‍රපට අතරින් ඉහළින්ම අගය කෙරෙන චිත්‍රපටය. Bond සිනමා ලෝකයේ මහා දැවැන්ත වීරයෙක් බවට පත් කළේ මේ චිත්‍රපටය තමයි. මේකෙන් පස්සෙ Bond වීරයෙක් වුණා කිව්වොත් තමා වැඩිපුරම හරි. ඇද්ද මන්දා…??? තව කියන්ඩනම් දේවල් ඕනෙ තරම්. ඒත් මේ මදෑ. ඕනෑවට වඩා ඕනෙත් නෑනෙ මේ විස්තර. ආ තව එකම එකක්. IMDbයෙ දෙවෙනි ඉහළතම අගය දරන Bond චිත්‍රපටය මේක. මේකට උඩින් තියෙන්නෙ Casino Royale (2006) සහ Skyfall (2012) පමණයි. ඒ 7.9ක් අරන්. මේක 7.8ක්! (අම්මට සිරි තව ඩිංගෙන් මිස් වෙනවා. මේකට ගිනස් වාර්තාවකුත් හිමියි. fastest grossing film of all time! හොඳම එකද මන්දා? 😛 ! ඒ ඇරුණහම රටවල් බොහෝමයකම අලෙවි වාර්තා බිඳ හෙළාපු බවකුත් කියැවෙනවා…)

හරි, දැන් කතාව දිහාට…චිත්‍රපටියෙ නම වගේම තමා කතාවත්. මේ පාර හොරා රන් ජාවාරම්කරුවෙක්. රත්තරන් හොරාට පන්නන මිනිහෙක්. මිනිහගෙ නම Goldfinger. මේකා රත්තරන් පැන්නුවට ඒක කොහොම කරනවද කවුරුත් දන්නෙ නෑ. හැබැයි මෙයා මේ පන්නන රත්තරන් හංගලා යන ජාතියෙ මිනිහෙක්නම් නෙමෙයි. යන යන තැන අරගෙන යන කෙනෙක්. ඒක කරන හැටිත් හරි අපූරුයි. දන්නවද දන්නෙ නෑ Fort Knox ගැන. ඒ තමා ඇමෙරිකාවේ රාජ්‍ය භාණ්ඩාගාරයේ රන් තැන්පතු ඒකකය. රජය සන්තක වටිනා දේවල් තියෙන්නෙ මේකෙ තමයි. ගෝල්ඩ්‍ෆින්ගරයා හදන්නෙ මේකට ගහන්ඩයි. හොරකම් කරන එක ලේසි වෙන තැනක් නෙමේ. හැබැයි මෙයා යන්නෙ හොරකමේ නෙමෙයි. එයාගෙ අදහසේ හැටියට වැඩේ සිද්ධ වුණොත් ලෝකෙ හොඳම රත්තරන් සැපයුම්කරුවා වෙන්නෙ එයා. ඒ මදිවට ඇමෙරිකාවෙ රන් තැන්පතු දශක ගාණකට නොවටිනා දේ බවට පත්වෙනවා. ඒ කොහොමද? ඒ හරිය බලලම බලමු. හැබැයි මෙයා ඒකට න්‍යෂ්ඨික තාක්ෂණික උපකරණයක් පාවිච්චි කරන්ඩ යන බවනම් කිව්වහැකි. මේ පාර අපේ බණ්ඩාට තියෙන්නෙ මෙයා පස්සෙ පන්නන එක තමයි. මෙයාට ඉන්නවා හොඳ කොරියානු හාදයෙක්, Oddjob කියලා. මිනිහා එක්ක මේ වැඩේ හිතන තරම් පාසු වෙන්නෙ නෑ. Bond මොකක්මහරි කරන්ඩ ගියොත් Oddjob ඇවිදින් ඒක කඩාකප්පල් කරනවා. මේ Oddjob ළඟ තියෙනවා හරි අපූරු තොප්පියකුත්. (මේකත් Hit වෙච්ච තොප්පියක් :D) ඊටත් මේකේ ඉන්න සතුරො හරිම ප්‍රබලයි මෙච්චර දස්සයෙක් වෙලත් Bondගෙ වැඩ කිඩ ඵල දෙන්නේම නැති තරමයි මේ බලගතු සතුරො ඉස්සරහ-පිටදි. කතා තේමාවටම හරියන විදිහට වර්ණ යොදා ගෙන නැද්ද කියලත් බලන්ඩකො මේක බලන ගමන්ම එහෙනම්… තව කියන්ඩනම් දේවල් ඕනි තරම්. ඒත්… එකම එකක් කියන්නම් Sean Connery චරිතයට පණ දෙන හොඳම Bond චිත්‍රපටිය මේකලු. ඒ මදෑ, තව මොකටද…

Due to copyright issues, we do not provide any torrent link.

මෙම ලබා දී ඇති උපසිරැසි BR / DVD පිටපත් සඳහා අදාළ වේ.

මේ ලබා දී ඇති සිංහල උපසිරැසි පිළිබද “සමීර කරුණාරත්න” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

Subtitle Contributor Rank
BRONZE MEMBER
JOINING DATE – 2013/02/12

<< 007 – 02

007 – 04 >>