Hamari Adhuri Kahani (2015) | අසම්පූර්ණ ආදර අන්දරය… [සිංහල උපසිරසි සමඟ]

මාස ගාණකට පස්සේ චිත්‍රපටයක් වෙනුවෙන් සිංහල උපසිරැසි අරගෙනයි මේ ආවේ. කට්ටියට අපිව අමතක වෙලාද දන්නෙත් නැහැ. අරන් අවේ හින්දි චිත්‍රපටයක්. ගොඩක් දෙනා මේ චිත්‍රපටයේ හොඳ පිටපතක් නිකුත් වෙනකන් බොහොම නොඉවසිල්ලෙන් බලාගෙන හිටියේ. එකවරම හිටු කියලා හොඳ පිටපත් කීපයක්ම නිකුත් වුනා. ඉතින් වැඩ රාජකාරි අස්සේ හැකි ඉක්මනට ඔන්න අරගෙන ආවා. චිත්‍රපටයේ නම Hamari Adhuri Kahaani (2015). නම කිව්ව ගමන් කවුරුත් දන්නවා. Mohit Suri ගේ අධ්‍යක්ෂණයෙන් හැඩගැන්වුනු මේ සිනමා සිත්තමේ ප්‍රධාන චරිත සඳහා රංගනයෙන් දායක වෙනවා Vidya Balan (වසූදා ප්‍රසාද්), Emraan Hashmi (ආරව් රූපරෙල්) සහ Rajkummar Rao (හරී ප්‍රසාද්). මුලින්ම චරිත ටික කියලා දැම්මේ, අමතක වුනු අයට චිත්‍රපටය මතක් වෙන්නත් එක්ක.

බොලිවුඩයේ Bhatt පවුල ගැන බොලිවුඩ් රසිකයින් නොදැන ඉන්න විදියක් නැහැ. Nanabhai Bhatt, Shirin Mohammad Ali සහ ඔහුගේ සුළු මව සම්බන්ධ සැබෑ ආදර අන්දරයක් පදනම් කරගනිමිනුයි මේ චිත්‍රපටය නිර්මාණය වන්නේ. ආදරය, විවාහය, තනිකම, දුගී බව, බලපුළුවන්කාරකම, කැපකිරීම ආදී වශයෙන් පුද්ගලයින් සතු විවිධාකාර වූ ගතිගුණ එක කතාවකට කැටිකර නිර්මාණය කළ සිනමා සිත්තමක් හැටියට හඳුන්වන්න පුළුවන්. IMDb දර්ශකයේ 6.7 ක අගයක් ලබා ගෙන තියෙන මේ නිර්මාණය Mahesh Bhatt හා Mukesh Bhatt විසින් නිෂ්පාදනය කරන්නේ, Vishesh Film සහ Fox Star Studios බැනරය යටතේ. ආදායම් අතින් එතරම් සාර්ථක නොවුනත් ප්‍රේක්ෂක හද බැඳ ගන්නට මේ චිත්‍රපටය සමත් වන බව නම් නොඅනුමානයි.

ස්වකැමැත්තකින් තොරව හරී සමඟ විවාහ වන වසූදාට, විවාහයෙන් අවුරුද්දකට පසු තනි වන්නට සිදු වන්නේ තම සැමියා අතුරුදන්වීම නිසාවෙන්. වසර පහක් තම පුතු සමඟ ජීවන අරගලයට තනිව ඇය මුහුණ දෙන්නේ, සුඛෝපභෝගී හෝටලයක මලින් ගෘහ අලංකරණය කරන්නියක් (Florist) හැටියට සේවය කරමින්. හෝටල් 108 ක හිමිකරුවෙක් වන ආරව් රූපරෙල් මේ හෝටලයට පැමිණෙන්නේ එයත් මිලට ගැනීමේ අදහසින්. දුටු සැනින් වසූදා සතු වූ චාම් ගති ගුණ කෙරෙහි ආරව් පැහැදෙන්නේ, ඇය සතු ගෘහ අලංකරන හැකියාවත් මැනවින් අවබෝධ කරගනිමින්. සිද්දීන් කීපයක් ඔස්සේ මොවුන් දෙදෙනා අතර ගොඩනැඟෙන හොඳ හිත හේතු කොටගෙන ඩුබායිහි හෝටලයක රැකියාව කරන්නට ඇයට ආරව්ගෙන් ආරාධනයක් ලැබෙනවා. තම පුංචි පුතු දමා ඇය ඩුබායි බලා ගමන් කරන්නේ, තම පුතුගේ අනාගතය වෙනුවෙන් හරි හම්බ කරන්නටයි. මේ අතර මුම්බායි අපරාධ විමර්ශන අංශයෙන් වසූදාට කැඳවීමක් ලැබෙන්නේ, ඇයගේ සැමියා සම්බන්ධ තොරතුරක් එළිදරවු කිරීමටයි. අවුරුද පහක් තිස්සේ අතුරුදන් වුනු හරී ප්‍රසාද් ත්‍රස්තවාදියෙක් බවට පත් වෙලා. ඔහු නැවත වසූදාගේ ජීවිතයට හරස් වෙයිද? වසූදා සහ රූපරෙල් අතර ඇති වන බැඳීමට කුමක් සිදු වෙයිද? ඇත්තටම මේ ආරව් රූපරෙල් කියන්නේ කවුද? ඔය සියලු කරුණු කාරණා ඔස්සේ දිවෙන චිත්‍රපටය තුළින් ආදරය වෙනුවෙන් මිනිසුන් තමන්ගේ සීමාව කොතරම් දුරට පුළුල් කරගන්න උත්සහ දරන්න පුළුවන්ද යන්න ගෙන හැර දක්වනවා. කියන්නම ඕන කාරණාවක් තමයි මේ ප්‍රධාන චරිත තුනට පණ පොවන රංගන ශිල්පීන් ඉතාමත් දක්ෂ විදියට චිත්‍රපටයේ හැඟීම් දනවන්න සමත් වෙලා තියෙනවා. චිත්‍රපටයේ අවසාන දර්ශන කීපය ඉතාමත් හැඟීම්බරයි.

මේ චිත්‍රපටයේ සංගීතය ගැන නම් සුළුවෙන් හෝ යමක් නොකියා බැහැ. Jeet Ganguly, Mithoon, Ami Mishra, Sahir Ali Bugga යන සංගීත අධ්‍යක්ෂකවරුන්ගේ සංගීත රසයෙන් හැඩගැන්වෙන මේ චිත්‍රපටය ඔයාලට අමතක නොවන සංගීතමය අත්දැකීමක් වෙයි. ගායන ශිල්පීන් වශයෙන් Arjith Singh, Papon, Deepali Sathe, Zubeen Garg, Shreya Goshal, Rahat Fateh Ali Khan දායක වෙනවා. මෙහි එක් ගීතයකට හැරෙන්නට සියලුම ගීත වලට සිංහල උපසිරැසි සකස් කරලා තියෙනවා. ගීත වල කාල රාමු සම්බන්ධයෙන් වගේම සම්පූර්ණ උපසිරැසිය සම්බන්ධයෙන් ලොකු සහයෝගයක් දුන්න සමීර චතුරංග අයියව මතක් කරන්න ඕනේ. අවසාන වශයෙන් අඩවියට එන, උපසිරැසි බාගත කරන, අදහස් දක්වන ඊමේල් මඟින් අඩවියේ ඉදිරිපැවැත්ම වෙනුවෙන් යෝජනා, චෝදනා ඉදිරිපත් කරන සියලුම සහෝදර සහෝදරියන්ට ස්තූතිය පළ කරන ගමන් සමුගන්නවා. ජයම වේවා..! එලස්ස්ස්ස්…

800 MB (720p x265 HEVC BR) කොපිය මෙතනින් බාගන්න

1.2 GB (720p BR) කොපිය මෙතනින් බාගන්න

2.3 GB (1080p BR) කොපිය මෙතනින් බාගන්න

මේ ලබා දී ඇති සිංහල උපසිරැසි පිළිබද “යශෝධ ශ්‍රීමාල් අතුරැලියගේ” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.