Love Happens (2009) | දෙයක අවසානය තවෙකක ඇරඹුමයි!

බෲක් රයන් කියන්නේ කවුද? සෑහෙන ප්‍රසිද්ධියක් ලබා තිබෙන ධනාත්මක චින්තනය පිළිබඳ දක්ෂ දේශකයෙක් වගේම ගත් කතුවරයෙක්. ඔහුගේ දේශනයන් ඉලක්ක වන්නේ කා සඳහාද? තම තමුන් වඩාත්ම ආදරය කළ අයවලුන් ගේ හදිසි වියෝ වීම් නිසා තවමත් සිත් තැවුලෙන් සිටින අය උදෙසා. ඔහුගේ සාර්ථකත්වයට හේතුව කුමක්ද? ඔහුත් සමඟ කාරයේ ගමන් ගනිමින් සිටියදී හදිසි අනතුරකින් වියෝ වූ තම ආදරණීය බිරිඳ නැති ශෝකයෙන් විඳ, එයින් එතෙර වූවෙක් නිසා හා ඔහුගේ සුවිශේෂ මෙහෙය වීමේ දක්ෂතාවය නිසා. ඔහු මෙවර දේශනය පවත්වන නගරය කුමක්ද? සියැට්ල්.  ඔහු එම නගරයට පැමිණීමේදී සිදුවන්නේ කුමක්ද? තම ඇඳුම් සහිත ගමන් මල්ල නැතිවීම. ඔහු එම නගරයට ඒමට අකමැතිම නගරය වන්නේ ඇයි? එය තම බිරිඳගේ මව්පියන් වාසය කරන නගරය වීම. ඇයගේ මව්පියන්ට ඔහු අකමැති ඇයි? ඔවුන් ඔහුට කෛරාටිකයා හා බොරුකාරයා ලෙසින් හැඳින්වීම හා දුවගේ මරණයෙන් ඔහු මුදල් හම්බකරන බව පැවසීම.

ලිපිය – රොයිලි ප්‍රනාන්දු