Rear Window (1954) | හිත ඇත්නම් පත කුඩාද… [සිංහල උපසිරැසි සමඟ]

මේ චිත්‍රපටයට පාදක වෙන්නේ අනතුරකින් පාදය බිඳීගොස් ඇඳට සීමාවී සිටින මැදිවියේ වෘත්තීය ඡායාරූප ශිල්පියෙක්ට මුහුණපාන්නට සිදුවෙන සිදුවීමක්. තමාට සිදුවූ අකරතැබ්බය නිසා සමාජ ඇසුර මගහැරීගිය ඡායාරූප ශිල්පි ජෙෆර්ජිව හමුවෙන්නට පැමිණෙන්නේ රක්ෂණ සමාගම් හෙදියක් වන ස්ටෙලා සහ ඔහුව විවාහ කරගැනීමේ අදහසින් ඔහුව හමුවීමට එන සුරූපී නිරූපිකාව ලීසා පමණයි. ඉතින් අපේ වීරයා කාන්සිය මගහරවා ගැනීමට කරන්නේ තම කුටියේ ජනේලයෙන් දකින්නට ලැබෙන අසල්වැසියන්ගේ තොරතුරු තම දුරදක්නයෙන් විපරම් කිරීමයි.

ඉතින් මෙහෙම අසල්වැසියන් ගැන ඔත්තු බලන අපේ වීරයාට මිනීමැරුමක් ගැන සැක පහලවෙනවා. මේ ගැන මුලදී නොසලකා හැරියත් තම මිතුරියන් දෙදෙනාටත් මේ බව එත්තුගන්වන්නට අපේ වීරයාට හැකිවෙනවා. මේ අභිරහස විසඳීමට තම පැරණි මිත්‍රයකු වන රහස් පරීක්ෂක ඩොයිල්ගේ සහය පැතුවත් ඔහුගෙන් ලැබෙන්නේ අවඥාසහගත කරුණු දැක්වීම් විතරයි. රහස් පරීක්ෂකයා උදවු ලබාදීම ප්‍රතික්ෂේප කලවිට ජෙෆ්ගෙ සහයට එන්නේ අපේ වීරවරිය ලීසා. ඉතින් ලීසාගෙ සහයෙන් අපේ වීරයා කොහොමද රෝදපුටුවක් උඩට වෙලා මේවගේ භයානක අපරාධයක් විසඳන්නේ, ඔයාලට බලාගන්න පුළුවන් වේවි “Rear Window” රසවින්දොත්.

IMDB දත්ත සමුදායේ ලකුණු 8.7ක් ලබාගෙන හොඳම චිත්‍රපට 250 අතර 28වන තැන රැඳී සිටින මේ චිත්‍රපටය Rotten Tomatoes වෙබ් අඩවියේ 100%ක විචාරක ආකර්ෂණයක් දිනාගෙන කුණුතක්කාලි අතර නැවුම් බව රඳවාගෙන තිබෙනවා. ඒ වගේම වසර 100ක ඇමෙරිකානු සිනමා ඉතිහාසයේ වඩාත්ම ත්‍රාසජනක චිත්‍රපට සියය අතරින් 14 වන ස්ථානය දිනාගෙන තිබෙනවා.