Spirited Away (2001) | අමනුෂ්‍යයෝ ගොඩයි, මං විතරයි !!! [සිංහල උපසිරැසි සමඟ]

IMDb දර්ශකය අනුව ලොව විශිෂ්ටතම චිත්‍රපට 250 අතුරින් 41වෙනි ස්ථානයේ වැජඹෙන අරුමැසි මායා යථාර්ථවාදී චිත්‍රපටයක් වන Spirited Away තුළින් යටිපෙළින් කතාබහට ලක් කරලා තියෙන්නේ මනුෂ්‍ය බලපෑම් මත ඇති වී තිබෙන පාරසරික දූෂණයයයි.

ජපානය තුළ හා විදේශීය රටවලදීද මෙතෙක් වැඩිම ආදායමක් ලැබූ ජපන් චිත්‍රපටිය වන්නේද මෙයයි. Academy Award for Best Animated Feature ඔස්කාර් සම්මානයෙන් පිදුම් ලද සිනමාපටය අවුරුදු 14 වන විටදී නරඹා තිබිය යුතු චිත්‍රපට 50 අතරටද ඇතුළත් වෙන අතර ලොව මෙතෙක් බිහිවූ විශිෂ්ටතම සජීවීකරන චිත්‍රපටයක් සේ සැලකෙනවා. මේ සිනමා සිත්තම අධ්‍යක්ෂණය කර ඇත්තේ Hayao Miyazaki නම් ජපන් ජාතික කාටුන් ශිල්පියා විසින්.

සාමාන්‍යයෙන් අපි අහලා තියෙන්නේ අමනුෂ්‍ය බලපෑම් නිසා මිනිසුන් ආතුර වෙනවා කියලනේ. ඒත් මේ කතාවේ සිද්ධ වෙන්නේ ඒකේ අනිත් පැත්ත. මිනිස් ක්‍රියාකාරකම් නිසා ආතුර වෙලා තියෙන්නේ ගංගාවට අධිපති දේවතාවා, භූමියට අධිගෘහිත යක්ෂයා වගේ අමනුෂ්‍ය බලවේග. එහි යටි අරුතනම් මිනිසා විසින් පරිසරයට කර ඇති විනාශයයි.

අළුත් නිවසක් බලා යන චිහිරෝ හා ඇයගේ දෙමව්පියන් අතරමගදී හමුවෙන අතහැර දෑමු උද්‍යානයකට යනවා. ඒ යන්නේ හිදී ගිය ගංගාවකින් එතර වෙලා. කාත් කවුරුත් නැති ඒ උද්‍යානයේ රසමසවුළු, ප්‍රනීත ආහාර පිරිලා. චිහිරෝගේ අම්මයි තාත්තයි ඉවක් බවක් නැතිව ඒවා ගිල දමන්නට පටන් ගන්නවා. හැබැයි පුංචි චිහිරෝ නම් එවා කන්නේ නැහැ. කෙමෙන් කෙමෙන් අඳුර වැටෙනවා. හැම තැනින්ම අමනුෂ්‍ය ආත්ම වලින් පිරී යනවා. එතන අමනුෂ්‍ය ආත්ම වලට ස්නාන පහසු කම් සපයන තැනක් ඒ කියන්නෙ Bathhouse එකක්. නොයෙක් ඖෂධීය ස්නාන ලබා ගන්න විවිධ යක්කු, පිසාචයෝ, දේවතාවන් මෙහෙට එනවා. මේක අයිති යුබාබා කියන මන්ත්‍රකාරියටයි. දවල් කාලේ පාර වැරදිලා මෙතනට එන මිනිසුන් එහි තියෙන ප්‍රනීත ආහාර කාලා රෑ වෙනකොට ඌරන් බවට පත් වෙනවා. චිහිරෝගෙ දෙමව්පියන්ට වෙන්නෙත් ඒ දෙයිමයි. දැන් ඔවුන් එගොඩ වෙලා ආපු හිදී ගිය ගඟ වතුරින් පිරිලා නැවත් මිනිස් ලෝකයට කවදාවත් යන්න බැරි වෙනවා.

චිහිරෝ මේ අමුතු ලෝකේ තනි වෙනවා. දහස් ගනන් අමනුෂ්‍යන් වාසය කරන ඒ ලෝකේ ඉන්න එකම මනුෂ්‍ය ජීවියා චිහිරෝ විතරයි. ඉතිං එයාට හිතෙනවා ඇති අමනුෂ්‍යයෝ ගොඩයි, මං විතරයි කියලා. කොහොමෙන් හරි තමන්ගේ දෙමව්පියන්වත් බේරගෙන චිහිරෝ මනුෂ්‍ය ලෝකයට ආපහු එන හැටි තමයි මේ කතාවේ තියෙන්නේ. මේකට චිහිරෝට අත් හයක් තියෙන කමාජි, ලින්, හකූ නම් මකර වේශයෙන් ඉන්න දේව කුමාරයා වගේ කිහිප දෙනෙක්ම චිහිරෝට උදව් කරනවා.

බොහොම ලස්සන චිත්‍රපටයක්. ඒ වගේම ජාත්‍යන්තරව ඇගයීමට ලක් වුන චිත්‍රපටයක්. ඔබටත් නරඹන්නට ආරාධනා කරමින් නවතින්නම්.

මේ ලබා දී ඇති සිංහල උපසිරැසි පිළිබද “හිරුෂාන් ෆර්නෑන්ඩු” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.