The Boys (2019-) [S01: E01] Sinhala Subtitles | වීරයින් සොයා යන දඩයමේ ඇරඹුම (18+) [සිංහල උපසිරසි] 18+

“සුපිරි වීරයෝ” මේ වචනේ ඇහුවම අපි හැමෝගෙම ඔලුවෙ මැවෙන ප්‍රතිරූපයක් තියෙනවා. පියාඹන්න පුලුවන්, අධි මානුශික ශරීර ශක්තියක් තියෙන, ඇස්වලින් ලේසර් විදින්න පුලුවන්, ඕනම සතුරෙක් එක ක්ෂණයෙන් පරද්දන්න පුලුවන් හරි අපූරු කට්ටියක් තමයි මේ සුපිරි වීරයින් කියල නිර්වචනය කරන්නේ. ඔවුන් ගැන කියද්දි හැම දේකටම වඩා වටින්නේ සුපිරිවීරයෙක් හැම මොහොතකම හරි දේ කරන්න උත්සහ කරන එකයි. ඔවුන් තමන් ගැනවත් හිතන්නෙ නැතුව මුලු ලෝකයක් වෙනුවෙන් තමන්ගෙ ජීවිතේ ඕනම මොහොතක කැප කරන්න සූදානම්. අපි නිතර බලන Marvel, DC, Ben10 ඇතුලු සුපිරිවීරයින් පාදක කරගත් හැම කතාවකම හිටියේ මෙහෙම චරිත.

ඒත් ඇත්ත ලෝකෙදි සුපිරි බලයක් ලැබුණු පලියට මිනිස්සු එච්චරම පරාර්ථකාමී වෙයිද? ඔවුන් ජීවිත පවා කැප කරලා ලෝකය සුරක්ෂිත කරන්න පෙළබෙයිද? එහෙම නැත්තන් ඔවුන් තමන්ගේ බලවලින් උපරිම ප්‍රයෝජන අරන් සතුරන්ටත් වඩා දූෂිත රැවටිලිකාරයින් වුණොත්? සාමය සහ ශ්‍රේෂ්ටත්වය වෙනුවට රුධිරය සහ බලය ඔවුන්ගේ ඉලක්කය වුණොත්?

ඔය ප්‍රශ්නවලට හරිම උත්තරේ ඔයාලගෙ ඇස්වලින්ම දැක බලාගන්න පුලුවන් සුපිරිම ටීවි සීරීස් එකක් තමයි අද අපි මේ අරන් එන්නේ. සමහර අය දැනටමත් මේක බලල ඇති. සමහර අය බලන්න ලිස්ට් එකේ සෑහෙන කාලයක් මේක තියන් ඉන්න ඇති. ඉතිං ඔය එකී නොකී හැමෝම වෙනුවෙන් තමයි බයිස්කෝප් අපි මේ අපූරු සීරීස් එක කරගෙන යන්න භාරගත්තේ. මේ අරන් එන්නේ ලෝකයෙ හැදුණු හොඳම කොමික් සීරීස් එකක් වෙන “The Boys”

2006 අවුරුද්දේ Garth Ennis කියන සුප්‍රකට කොමික් රචකයාට හරි අපූරු අදහසක් එනවා. ඒ තමයි නිතර ප්‍රේක්ෂකයින් දකින සුපිරිවීර කතාවලට වඩා වෙනස්ම සංකල්පයකට යන චිත්‍රකතාවක් නිර්මාණය කරන එක. ඒ අදහසේ ප්‍රතිපලයක් විදිහටයි “The Boys” කොමික් සීරීස් එක කල එලි දකින්නේ.

Garth තමන්ගේ චරිත හදන්නත් යොදාගන්නේ අපූරු උපක්‍රමයක්. සම්පූර්ණයෙන්ම අලුතින්ම චරිත නිර්මාණය කරනවට වඩා Garth ට ඕන වෙන්නේ ඒ වෙද්දිත් ජනප්‍රිය වෙලා උන්නු සුපිරිවීරයින්ගේ parody වර්ශන්ස් හදන්න. මේකෙන් ඒ චරිතවල ෆෑන්ස්ලා තව තවත් Garth ගෙ කොමික්ස්වලට ඇදී එන එකයි පොරට ඕන වෙන්නේ.

නිකමට හිතන්න ඔයාගේ කැමතිම සුපිරි වීරයාව පට්ටම ප්‍රචණ්ඩකාරී, හතුරොන්ටත් අන්ත ඩයල් එකක් විදිහට බලාගන්න ලැබුණොත් එහෙම? ඒක වෙනමම ලෙවල් එකක අත්දැකීමක්නේ. ඕකම තමා Garth මේ විදිහෙ අමුතුම කොමික් එකක් ලියල බලාපොරොත්තු වුණෙත්. ඕකෙන් Superman, Wonder Woman, Flash, Aquaman වගේ තමන් වැඩ කරපු Wildstorm කොමික් ප්‍රකාශකයින්ගේ මවු සමාගම වෙන DC හීරෝස්ලවම සම්පූර්ණයෙන්ම කන පිට ගහලයි The Boys ස්ටෝරි ලයින් එකට හෝම්ලෑන්ඩර්, ක්වීන් මේව්, A- Train, ඩීප් වගේ චරිත එකතු වුණේ. DC විතරක් නෙවෙයි, පොර Marvel චරිතවලට පවා පැරොඩි වර්ශන් දීලා තියේ. Captain America ව පාදක කරගෙන හදල තියෙන Soldier Boy ඒකට හොඳම උදාහරණයක්.

කොහොම හරි Garth තමන්ගෙ ගෙදරටම වෙලා තමන්ගෙම චරිත යොදාගෙන කරපු මේ ආන්දෝලානාත්මක වැඩේට Wildstorm ඇතුලු DC කොමික්ස් සමාගම නම් වැඩිය කැමති වෙන්නෙ නැහැ. ඉතිං The Boys කොමික්වල අධික ලිංගිකත්වය, අසභ්‍යය වචන භාවිතය ඇතුලු ටෝන් එකේ තිබුණ ලක්ෂණ පිට දාලා 2007 දි මුලු සීරීස් එකම කැන්සල් කරල දාන්න DC ලා තීරණය කරනවා. එතකොට Garth නිකුත් කරල තිබ්බෙ ඉශූස් 6 ක් විතරයි… කතාවේ හොඳම හරිය කියන්න එහෙම්මම ඉතුරු වෙලා තියෙද්දියි DC ලා වැඩේ කපලා දැම්මේ. ඒ දෙයින් සැලුනෙ නැති Garth ගිහිල්ලා වෙනත් කොමික් ප්‍රකාශකයින් පිරිසක් වෙන Dynamite ලා එක්ක එකතු වෙලා තමන්ගෙ කතාව දිගටම කරගෙන යන්න පාර සොයාගන්නවා ඉතිං The Boys තව අවුරුදු කිහිපයක්ම ඇදිලා සමාප්ත වෙන්නේ කවුරුත් බලාපොරොත්තු නොවූ තරම් ඉහළ සාර්ථකත්වයක් ළඟා කරගෙනයි.

ඉතිං කිව්වත් වගේ The Boys වල කටක් ඇරලා වීරයෙක් කියන්න තරම් 100% පිරිසිදු/ උතුම් චරිත නෑ. මේකේ ඉන්න ප්‍රධාන චරිතයේ ඉඳන් සුලු චරිතවලට යනකන් හැමෝම දූෂිත, කෲර, අනුකම්පා විරහිත ආත්මාර්තකාමියො සෙට් එකක්. සල්ලිවලට, බලයට උන් ඕනම දෙයක් කරයි. 🙂 මේ අමුතු යුනිවර්ස් එකේ සාමාන්‍යය මිනිස්සුන්ටත් වඩා වැඩියෙන්ම දූෂිත වෙන්නේ තමන්ට “සුපිරි වීරයෝ” කියල කියාගන්න පිරිස බව කතාව දිගටම බලාගෙන යද්දී ඔයාලටත් තේරේවි.

Marvel, DC වලට වඩා වෙනස් වුණාට මොකෝ The Boys තුළත් ඒකටම කියාපු විශාල ලෝකයක් මෙන්ම චරිත ගොන්නක් ඉන්නවා. ඉතිං එක පාරම සබ් එකට නොයා ඒ ටික ගැනත් කෙටි පැහැදිලි කිරීමක් කරන්න හිතුණා. ඉතිං යුනිවර්ස් එක ගැන යම් තාක් දුරට දැනීමක් ලබාගන්න ඕන කෙනෙක් නම් ලිපියේ ඉතුරු ටිකත් මෙහෙම්ම කියවගෙන ගියා නම් හොඳයි…

The Vought

ඇවෙන්ජර්ස්ලට නික් ෆියුරිගෙ S.H.I.E.L.D එක ඉන්නව වගේ The Boys වල සුපිරි වීරයින් වෙනුවෙ ඉන්නේ The Vought International කියන සමාගම. වෝට් එක තමා කතාවට එද්දී යටින් වැදගත්ම හරිය කරන්නේ.

වෝට් එක ලෝකයේ සුරක්ෂාව වෙනුවෙන් පිහිටපු දෙයක් වගේ පෙන්නුවට ඇත්තටම මේක ලෝකය වටේම ප්‍රසාරණය වුණු ව්‍යාපාර ආයතනයක්. මෙයාලාගේ ප්‍රධානම බිස්නස් එක වෙන්නේ ඖෂධ. (කතාව ස්පොයිල් වෙන නිසා ඒ ගැන වැඩිය මුකුත් මම නොකිය ඉන්නම් 😉)

The Boys එකේ සුපිරි වීරයින් කෙටියෙන් හඳුන්වන නම වෙන්නේ “Supes” (සූප්ස්). වෝට් එක ලෝකය ඉස්සරහ පෙන්වන ප්‍රධානම ව්‍යාපාරය වෙන්නේ මේ සූප්ස්ලාව කළමනාකරණය කරන එක.

සුපිරි වීරයින්ට අදාල සෑම දෙයක්ම වෝට් එකයි පාලනය කරන්නේ. සුපිරි වීරයින්ගෙ පුහුණු වීම්, ඔවුන් වෙනුවෙන් අවශ්‍යය කායික සහ මානසික සහය, නිවාස, මාකටින් පැත්ත ඇතුලු සෑම කුඩා කටයුත්තක්ම කෙරෙන්නේ මේ වෝට් එකෙන්. ඒ වගේම සුපිරි වීරයින්ට අදාල චිත්‍රපට, කතා මාලා, චිත්‍රපට, කොමික්ස්, ක්‍රීඩා භාණ්ඩ ඇතුලු හැමදෙයක්මත් පාලනය කරන්නේ මෙයාලා. තව වෝට් එක වෙනුවෙන්ම රූපවාහිනි නාලිකා, ස්ට්‍රීමින් ප්ලැට්ෆෝම්ස් එහෙමත් තියෙනවා.

කළමනාකරණය ගැන කතා කරද්දී වෝට් එක කරන වැදගත්ම වැඩක් තමයි සූප්ස්ලගෙ කුණු හෝදන එක. බලයන් තියෙන අය කරන ඕනම දූෂිත වැඩක් මකලා දාන්න හෝ ඒක තනිකරම වෙනස් පැත්තකට හරවන්න වෝට් එකට සුපිරිම හැකියාවක් තියේ.

මේ වෙද්දී වෝට් එකේ ප්‍රධානියා වෙන්නේ ස්ටැන් එඩ්ගා. ස්ටැන්වත් ඔයාලට ඉස්සරහට මුණගැහේවි.

The Seven

 

(The Seven කණ්ඩායම | වමේ සිට දකුණට: ස්ටාලයිට්, ඩීප්, මේව්, හෝම්ලෑන්ඩර්, බ්ලැක් නොයර්, A- ට්‍රේන්, ට්‍රාන්ස්ලූසන්ට්)

ඕනම සුපිරි වීරයින් ඉන්න විශ්වයක වීරයෝ කිහිප දෙනෙක් එකතු වෙලා හදාගත්ත කණ්ඩායම් තියෙනවනේ. උදාහරණයකට ගත්තොත් Marvel යුනිවර්ස් එකට ඉන්නවා ඇවෙන්ජර්ස්, X-Men වගේ කණ්ඩායම්. එතකොට DC ලගෙ යුනියෙ ඉන්නවා Justice League, Teen Titans, JSA ටීම්ස්. ඒ වගේ The Boys යුනිවර්ස් එකේ ඉන්න ප්‍රධානම සුපිරි වීරයින් කණ්ඩායම තමයි “The Seven.” (තව ටීම්ස් තියේ. ඒත් ප්‍රධානම සහ ජනප්‍රියම එක වෙන්නේ මෙයාලා)

The Seven ටීම් එකත් සම්පුර්ණයෙන්ම අයිති වෙන්නේ වෝට් ආයතනයට. The Seven එකේ කළමනාකරණයේ ඉඳන් අලුත් සාමාජිකයින් බඳවා ගැනීමට අදාල හැමදේකටම වෝට්ලා බලපෑම් කරනවා. The Seven එකට අලුත් කෙනෙක්ට ජොයින් වෙන්නත් එහෙම ලේසි නැහැ. ඒක ඕනම සුපිරි වීරයෙක්ට කලාතුරකින් ලැබෙන අවස්තාවක්. The Seven එක සමග එකතු වෙලා විශාල ජනාදරයක් සහ ගෞරවයක් දිනාගන්න එකයි අනිත් හැමෝගෙම හීනය වෙන්නේ.

නමේ හැටියටම මේ ටීම් එකේ සාමාජිකයින් හත් දෙනෙක් ඉන්නවා. සීරීස් එකේ ආරම්ඹය වෙද්දී ඉන්න සාමාජිකයින් හත් දෙනා මෙහෙමයි 👇

Homelander
Queen Maeve
Black Noir
Deep
Translucent
A- Train
Starlight

Homelander

The Seven එකේ නායකයා සහ The Boys යුනියේ ඉන්න වැදගත්ම සූප් වෙන්නේ හෝම්ලෑන්ඩර්. හෝම්ලෑන්ඩර්ව නිර්මාණය කරන්න සම්පූර්ණ ආභාෂයම අරන් තියෙන්නේ අපි කවුරුත් ආදරය කරන Superman ගෙන්. සුපර්මෑන් තරම්ම බලවත් නොවුණට හෝම්ලෑන්ඩර්ගේ බලයන් සුපර්මෑන්ගෙ ඒවාට ගොඩක් සමානයි.

The Boys විශ්වයේ ඉන්න ශ්‍රේෂ්ටතම (කියල මවාපාන 😂), ජනප්‍රියම සහ බලවත්ම සූප් වෙන්නෙත් හෝම්ලෑන්ඩර්. මූ තමා සූප්ස්ලගේ “ෆේස්” එක. සුපර්මෑන් DC විශ්වයට වෙනවා වගේම මේ ලෝකෙ ඉන්න අයට උතුම්ම වීරයත් මෙයයි. මේ ලෝකේ ඉන්න මිනිස්සු හෝම්ලෑන්ඩර්ව දකින්නේ ශාන්තුවරයෙක් විදිහට… පොරව අදහන පිරිසක් පවා ඉන්නවා. ඒත් පොර ඇත්තම එච්චර හොඳ කෙනෙක්ද?

හෝම්ලෑන්ඩර්ගේ ඇත්තම දෙමවුපියන් කවුද කියලා හාංකවිස්සියක් පළවෙනි සීසන් දෙකේ කියන්නෙ නැහැ. ඒ දේවල් පසුවට. ඒත් පොර ඉපදුණු දවසෙ ඉඳන් දකින්නෙ එච්චර හොඳ දේවල් නෙවෙයි. හෝම්ලෑන්ඩර් මෙලොව දැකපු දවසෙ ඉඳන්ම පොරට ලැබ් එක්ස්පෙරිමන්ට් එකක් වෙන්න සිද්ද වෙනවා. හය හතර තේරෙන කාලෙ ඉඳන් අම්මෙකුගේ ආදරේවත් ලැබුන් නැති නිසාම හෝම්ලෑන්ඩර් හැම තැනින්ම ඒ ආදරේ හොයාගෙන යනවා. ඒ දේ පොරට වැඩියෙන්ම ලැබෙන්නේ තමන්ගෙ ෆෑන්ස්ලගෙන්. ඒ ආදරේ වෙනුවෙන් ෆෑන්ස්ලා තමන්ව දකින ප්‍රතිරූපය ඉතාම වැදගත් නිසා හෝම්ලෑන්ඩර් තමන්ගෙ අඳුර සඟවලා ලෝකය ඉස්සර ශාන්තුරවරයෙක්ගේ ප්‍රතිරූපයක් පෙන්වන්න සෑහෙන මහන්සියක් ගන්නවා. හැබැයි මිනිස්සු තමන් දිහා නොබල ඉන්න එක ක්ෂණයෙන් මිනිහගෙ ඇත්තම මූණ එළියට එන්නේ.

විවාදාත්මකව හෝම්ලෑන්ඩර් තමා The Boys ලයිව් ඇක්ශන් විශ්වයේ ඉන්න බලවත්ම සූප්. හෝම්ලෑන්ඩර් අනිත් සූප්ස්ලාට වඩා සෑහෙන බලවත්. පියාසර කිරීමේ හැකියාව, හීට් විශන්, ඉහළ ශරීර ශක්තිය, ඉහළ දරාගැනීමේ ශක්තිය ඇතුලු බලයන් ගොඩකින් සැදුම්ලත් කෙනෙක්. හෝම්ලෑන්ඩර්ගේ තරම දැනගන්න කතාවෙ චරිතයක් කියන මේ වචන ටිකම ඇති 👇

“There isn’t a weapon on Earth that they haven’t thrown at him. They have all failed.”

(මිනිහට පහර නොදුන්න ආයුධයක් මේ ලෝකේ නැහැ. ඒ හැම එකක්ම අසාර්ථක වුණා.)

The Boys (team)

(The Boys කණ්ඩායම | වමේ සිට දකුණට: බිලී බුචර්, හියුවී, කිමිකෝ, ෆ්‍රෙන්චී, මදර්ස් මිල්ක්)

මේ ලොකෙ ඉන්න වීරයෝ කොච්චර නරක වැඩ කරන අපතයො ටිකක් වුණත් මිනිස්සු ඉස්සරහා උන් පෙන්වන්නේ ඇතුලාන්තයේ ඉඳන්ම පිවිතුරු ශුද්දවන්තයො ටිකක් කියලයි. ඉතිං මේක වෝට් එකත් උපරිම බලයක් දීලා තව තව උලුප්පලා පෙන්වන නිසා මිනිස්සුත් ඒක ඔලුව උඩින් පිළිගන්නවා.

හැබැයි සූප්ස්ලා නිසා අසාධාරණයට ලක් වුණු මිනිස්සු ටිකක් අවසානයේදී යුක්තිය අතර ගන්න තීරණය කරනවා. ඒ වගේ මිනිස්සු හය දෙනෙක්ගෙන් සැදුම්ලත් කණ්ඩායමක් තමයි මේ “The Boys.” සුපිරි වීරයින් නිසා අසාධාරණයන්ට මුහුණ දුන්න රහස් නියෝජිතයෙක් (බිලී බුචර්), මත්ද්‍රව්‍යය ජාවායම්කාරයෙක් (ෆ්‍රෙන්චී) කලු ජාතිකයෙක් (මදර්ස් මිල්ක්/ M.M), තරුණ කොල්ලෙක් (හියුවී) සහ සුපිරි බල තියෙන එක කෙල්ලෙක්ගෙන් (කිමිකෝ) සැදුම් ලත් මේ “බෝයිස්” වටායි සීරීස් එක ගලාගෙන යන්නේ…

2019 ජූලි 26 වෙනිදා මුලින්ම විකාශය වුණු මේ සීරීස් එක විකාශය වෙන්නේ Amazon Prime ස්ට්‍රීමින් සර්විස් එක හරහායි. කතාවෙ එක එපිසෝඩ් එකක් වෙනුවෙන් Sony Television ලා සහ Amazon Studios ලා ඩොලර් මිලියන 12 කට වඩා වියදම් කරන බවයි සඳහන් වෙන්නේ. අනික මේ සීරීස් එක ක්‍රියේට් කරන්නේ ජනප්‍රිය Supernatural සීරීස් එකත් නිර්මාණය කරපු Eric Kripke මයි. ඒ නිසාම Supernatural සීරීස් එකේ රංගන ශිල්පීන්වත් ඉදිරියේදි ඔයාලට මේ සීරීස් එකෙන් බලාගන්න ලැබෙනවා. කොමඩි එක්ක මදි නොකියන්න ඇක්ශනුත් පිරුණු මේ සීරීස් එක සුපිරි වීරයො ගෑවුණු පලියට පොඩි අය වෙනුවෙන් හදපු එක නම් නෙවෙයි ඔන්න. දෙබසක් පාසා එන ප්‍රචණ්ඩ වචන, ඕනෑවටත් වඩා ග්‍රැෆික් ලිංගික දර්ශන, අතිශයින්ම ප්‍රචණ්ඩකාරී දර්ශන නිසා මේ 18 වඩා අය බැලුවොත් තමා වඩා හොඳ. (අනිත් සුපර්හීරෝ කතා වගේ මේකත් ඇති කියලා පවුලෙ හැමෝම එක්ක මේක බලන්න දාගෙන වැඩේ වැරදුණොත් එහෙම අපි නම් නෑ ඔන්න 😏)

සීරීස් එකේ කාස්ට් එකත් එසේ මෙසේ සෙට් එකක් නෙවෙයි. Karl Urbun, Anthony Starr, Jack Quaid, Erin Moriarty, Dominique McElligott, Jesse T. Usher, Laz Alonso ඇතුලු ජනප්‍රිය රංගන ශිල්පීන් සෑහෙන ප්‍රමාණයක් මේ කතා මාලාව වෙනුවෙන් එකතු වෙලා ඉන්නවා. ඒ වගේම ඉස්සරහ සීසන්වල ඉඳන් ඔයාලට Giancalo Espacito, Jensen Ackles ඇතුලු තවත් හුරු පුරුදු මුහුණු සෑහෙන ප්‍රමාණයක් මුනගැසේවි.

සීරීස් එක කොච්චර සුපිරිද කියනව නම් IMDB මීටරේ 8.7 ක ඉහළ අගයක් අරන් හොඳම සීරීස් 250 ලැයිස්තුවේ 88 වෙනි තැන The Boys රැඳිල ඉන්නවා. දැන සීසන් තුනක් විකාශය වෙලා අවසන් වගේ හතර වෙනි සීසන් එක බොහෝ දුරට මේ වසරේ හෝ ලබන වසරේ විකාශය වේවි. ඒ වගේම The Boys: Diabolical කියල ඇනිමේශන් සීරීස් එකක් දැනටමත් Amazon ලා විකාශය කර අවසන්. එතනිනුත් නොනැවතී GenV නමින් තව ලයිව් ඇක්ශන් ටීවි සීරීස් එකකුත් විකාශය කරන්න සියලු කටයුතු මේ වෙද්දිත් සූදානම්. ඉතිං කතාව බලන්න ගන්න කෙනෙක්ට මේ කරුණු ටිකම ඇති.

ඉතිං මේ සීරීස් එක සබ් කරන අදහස ඇති වැඩේ භාරගත්තේ අපේ ඔලිවර් අයියා. අයියම තමා වැඩේට මාවත් සෙට් කරගත්තේ. මම, ඔලිවර් අයියා එක්ක දිනිදු සම්පත්, මයුර සුරාජ්, නිර්මාල් විමුක්ති, රොශාන් සමීර, සන්ජන චමෝද්, සුභාෂිණී මල්ලව ආරච්චි සහෝදර සහෝදරියො ටිකත් එකතු වෙනවා. පළවෙනි සීසන් තුනම මේ වෙනකොටත් සබ් කරලා ඉවරයි. ඉතිං අද ඉඳන් පිළිවෙලට සයිට් එකේ සබ් ටික පෝස්ට් වෙන්න පටන් ගනියි. එහෙනම් මම ආයෙ ඔයාලව හමුවෙන්න එන්නේ දෙවෙනි සීසන් එකේ පළවෙනි එපිසෝඩ් එකෙන්. ඊළඟ එපිය දිනිදු අයියා අරන් ඒවි. අවසන් වශයෙන් මේ අපූරු ගමන අපි එක්ක යන්න ඔයාලා හැමෝටම ආරාධනා කරනවා. එහෙනම් අදට සමුගන්නම්. ඉක්මණින්ම ආයෙත් හමුවෙමු. සුබ දවසක්…!