කොහොමද හැම කෙනෙක්ටම? ඔන්න එහෙනම් The Fellowship of the Ring (2001) එක්ස්ටෙන්ඩඩ් පිටපත සඳහා සිංහල උපසිරසි අරගෙන එනකොට වෙච්ච පොරොන්දුව මෙතනින් අවසන් වෙනව. කෘතියක් ඇසුරින් මෙතෙක් ලොව නිමවුණ හොඳම සිනමාපට ත්‍රිත්වය සඳහා සිංහල උපසිරසි ලබා දෙන්න මේ අයුරින් දායක වෙන්න ලැබීම මහත් භාග්‍යයක්. මිට පෙර අපගේ ප්‍රවීණ උපසිරසිකරුවෙකු වෙන නිලන්ත අයිය විසින් තමයි මෙහි මුල් කාලීනව නිකුත් වූ එක්ස්ටෙන්ඩඩ් නොවූ, සාමාන්‍යය පිටපත සඳහා සිංහල උපසිරසිය අරගෙන ඇවිල්ල තිබ්බේ. එතුමන්ටත් කෘතඥ පුර්වක ස්තුතිය පිරිනමනව. මම සබ් හදන්න බයිස්කෝප් එකට එකතු වෙන්න කලින් එතුමන්ගේ උපසිරසි එක්ක තමයි මේ සිනමාපටය නැරඹුවේ. එහෙම නම් පොඩ්ඩක් සිනමාපටය ගැන කෙරෙන කෙටි විස්තරය දිහාවට හැරෙමු. 🙂

LOTR සිනමාපට පෙළ අතරින්, හොබිට් කතා මාලාවද ඇතුළුව, මේ සිනමාපටයට තමයි IMDB වැඩිම මනාප අගයක් හිමිවෙන්නෙ. එනම් 8.9ක් වැනි උපරිමතම අගයක් හිමි වෙනවා. ඒ අනුව IMDB Top 250 අතරින් දශක දෙකක් පුරාවට #7 වැනි ස්ථානයේ වැජඹෙනව. මෙහි අධ්‍යක්ෂනයත් වන් ඇන්ඩ් ඔන්ලි “පීටර් ජැක්සන්” නමැති විස්මිත නිමැවුම්කරුවාගෙ. ටෝල්කින්ගෙ මනසෙහි මැවුණු ලෝකය රිදී තිරය මත අපට සිතුවම් කර දුන්නේ ඔහුගේ අධ්‍යක්ෂණයෙන්. ඒ විතරක් නෙමෙයි 2001 වසරේ සිට 2003 වසර දක්වා පැවති ප්‍රධාන පෙලේ සම්මාන උළෙලයන්හි ජය කෙහෙළි නංවන්නේ LOTR සිනමාපට ත්‍රිත්වය විසින්. 2003 වසරේ පැවති ඔස්කා සම්මාන උළෙලේ නිර්දේශ 11ක් ලබාගෙන, ඒ නිර්දේශ 11ම දිනාගන්න මේ අනගිභවනීය සිනමාකෘතිය සමත් වෙනව. ඒ වගේම ඒක අදටත් නොබිදුණු වාර්තාවක් ලෙසින් පවතිනවා. ඒ වගේම නිව්ලයින් සිනමා ආයතනය විසින් මේ සිනමාපටයට කල වියදම මුල් සතිය ඇතුලතම නැවත ලැබිල තියෙනව විතරක් නෙමෙයි 1B අධික බොක්ස් ඔෆිස් ආදායමකුත් ලබා දෙනවා. අද වගේ නෙමෙයි (මම මේ සඳහා අලුත් ලිපිය ලියන්නේ 2020 වසරේ, පඳුරකට පයින් ගැහුවත් බිලියනයේ බොක්ස් ඔෆිස් ෆිල්ම් පහ හයක් විසි වෙනවනෙ මේ කාලේ 😛  ) ඒ යුගය වෙනකොට බිලියනයක බොක්ස් ඔෆිස් ආදායමක් කියන්නේ ටිකක් විරල දෙයක්.

ඉතිං තව ගොඩක් විස්තර තියෙනව මේ සිනමාපට පෙළ ගැන කියන්න නම්. දවසක් තිස්සේ කියවන්න තරම් ලිපියක් ලියන්න පුළුවන් ඇත්තටම. කොහොම උනත් මැරෙන්න කලින් ලෝඩ් ඔෆ් ද රින්ග්ස් සහ හොබිට් සිනමාපට පෙළ රූගත කෙරුණ නවසීලන්තයේ දර්ශණ තල නරඹන්න යන්න අවස්ථාවක් ලබාගන්න එක මගේ බකට් ලිස්ට් එකේ තියෙන එකක්. ඒ සිහින නම් “පහන ලඟයි ආලෝකේ දුරයි ” ජාතියේ ඒවා තමයි ඉතිං කොහොම උනත් 🙁 .ඒ කොහොම උනත් වැඩි වෙහෙසක් නැතුව කතාව පොඩ්ඩක් මතක් කරන්න නිලන්ත අයියගේ ලිපියට ඉඩ දෙමින් මම සමුගන්නම්. කොරෝනා වසංගත සමයේ වැටුණු ඇඳිරි නිතිය හොඳ විදියට යොදා ගනිමින් මේ සිනමාපට ත්‍රිත්වයටම කල හැකි සාධාරණම ආකාරයෙන් සිංහල උපසිරසි ලබා දෙන්න හැකිවීම සම්බන්ධව මම මහත් සතුටට පත්වෙනවා. මොකද ටෝල්කින් වගේ භාෂා ප්‍රවීනයෙක් අවුරුදු ගණනාවක් තිස්සේ ගොඩ නැගු වෙනම ලෝකයක් සිංහල බසින් ඔබට සමීප කිරීම බොහම අමාරු දෙයක්. මං හිතනවා ඔබ අපේක්ෂා කරන මට්ටමින්, ඊට ආවේනික වචන සමුදායක් සමගින්, මට මේ සිනමාපට ත්‍රිත්වය ඔබට සමීප ක‍රන්න හැකියාව ලැබුණා කියල. ඒ කොහොම උනත් කුඩා හෝ අඩුපාඩුවක් දුටුවහොත් කමෙන්ට් එකක් දාල දැනුවත් කරන්න. වහාම ඒ අඩුපාඩුව නිවැරදි කරගන්න සුදානම්. එහෙම නම් ගිහින් එන්නම්.  🙂

ශාන් විමුක්ති [විමා]