අපගේ නිල ඩවුන්ලෝඩ් වෙබ් අඩවිය තවදුරටත් baiscopedownloads.co නොවේ. කරුණාකර අපගේ උපසිරසි සඳහා ගැලපෙන ලින්ක් බාගත කරගැනීමට https://baiscopedownloads.link/ හෝ https://baiscopedownloads.xyz/ වෙත පිවිසෙන්න.

MENU

The Monster Squad (1987) with Sinhala Subtitles | රාක්ෂ සමාජය [සිංහල උපසිරසි සමඟ]

Rating: 9.0/10. From 1 vote.
Please wait...

The Monster Squad (1987)ආයුබෝවන් යාළුවො ඔක්කොටම. ඔන්න ඉතින් මගේ අසු හය වන උපසිරැසිය අරගෙන ආවා. එත් කියන්න ඕන පොඩ්ඩක් නෙවි ගොඩක් පරක්කු උනා මේක අරන් එන්න. එත් වැඩ වලින් නිදහස් වෙච්ච ගමන්ම තමා මේ උපසිරැසිය ඔයාලට අරගෙන එන්නේ. රුමේෂ් නිලන්ත ජයවීර කියන සහෝදරයාගේ ඉල්ලීමක් තමා මේ. Action, Comedy, Family ගණයට අයිතිවෙන මේ චිත්‍රපටය IMDb අගය 7.2 ක් අරන් තියන සුපිරි එකක් කියන්න ඕන.

කතාව නම් ඔයාලට නමෙන්ම හිතා ගන්න පුළුවන් නේ. යක්ෂයෝ, භූතයෝ මෙන්ම පිසාචයොත් මේ චිත්‍රපටයේ ඉන්නවා. ඒ කියන්නේ ඔයාලට හොරර් ගනයේ චිත්‍රපට වල දක්නට ලැබිච්ච ඩ්‍රැකියුලා, නරවෘකයා, ඊජිප්තු මමියක් මෙන්ම ෆ්රන්ක්ස්ටයින් යක්ෂයා පවා දකින්න පුළුවන්. අවුරුදු සියකට පාරක් නපුර බලවත් වෙන වෙලාව පැමිණෙන බව දැනගන්නා කුඩා ළමයින් කණ්ඩායමක් ලෝකය එම නපුරෙන් බේරා ගන්න කරන උත්සාහය තමා චිත්‍රපටයේ දක්නට ලැබෙන්නේ. ඔක්කොටම කම්මැලි නැතිව බලන්න පුළුවන් චිත්‍රපටයක් කියල කියන්න පුළුවන්.

මගේ උපසිරසි වලට කමෙන්ට් දාන යාලුවන්ගේ ඉල්ලීම් ලබාදෙමින් ඉන්න මේ කාලේ මම ඊළඟට අරන් එන්නේ මිතුන් කියන සහෝදරයා මගෙන් ඉල්ලපු චිත්‍රපටය. ඉතින් මම ඒක ඉක්මනට අරන් එන්න බලන්නම්.

මේ ගමන්ම මම ඔයාලට වැදගත් දෙයක් කියන්න අවස්ථාවක් කර ගන්නවා. ඔයාලට දකින්න ලැබෙන්න ඇති දෙසැම්බර් මාසයේ බයිස්කෝප් සිංහලෙන් වෙබ් අඩවියට පොඩි කරදර කිහිපයක් ආව. ඇඩ්මින් සහෝදරයන් ඒකට විසදුම් සෙවීමේදී අහම්බෙන් මටත් දායක වෙන්න ලැබීම හින්ද මම හිතුවා මේගැන ඔයාලට කියන්න සුදුසුම පුද්ගලයා මම කියල. ඒවගේම මේ මම කියන්න යන සමහර දේවල් ටික කලක ඉඳන් මම කියන්න හිටියා වගේම මේ ලිපිය අවසානේ ගොඩක් අයට ප්‍රශ්න ගොඩක් විසඳගන්න පුළුවන් වේවි කියල හිතෙනවා.

මේකතාව කියන්න කලින් මම ඔයාලට පොඩි පරිගණක පාඩමක් කියල දෙන්නම්. විකාරයක් කියල හිතන්න එපා. මම හිතනවා ඔයාලට ගොඩක් වැදගත් වේවි කියල. ඉස්සෙල්ලම මම ඔයාලට පරිඝනක සහ අන්තර්ජාලයේ දක්නට අසන්න ලැබෙන වචන කිහිපයක් තේරුම් කරන්නම්. එත් ඔයාලගේ දැනගැනීම සඳහා මම මේක ඉදිරිපත් කරන නිසා බොහොම සරල ලෙස තේරුම් කරනවා කියල කියන්න ඕන.

අන්තර්ජාලය කියන්නේ මොකක්ද?
ඇත්තම කියනවා නම් ලෝකයේ තියන ලොකුම පරිගණක ජාලය තමා මේ. එක පරිගණකය ඉඳල තවත් පරිගණකයට තොරතුරු යැවීම ලබා ගැනීම තමා සරලවම සිදුවෙන්නේ. වෙබ් අඩවි, ඊමේල් වැනි මාද්‍ය මේ සඳහා බාවිතා වෙනවා. ඔයාලගේ පරිගණයක යුසර් පරිගණකය ලෙස හඳුන්වන අතරේ ඔයාල හොයන වෙබ් අඩවිය තියන පරිගණකය සර්වරය ලෙස හඳුන්වනවා.

IP Address ( Internet Protocol)
ඇත්තටම ඔයාල අන්තර්ජාලයේ ඇතුල්වෙන පරිගණකයේ සැබෑ ස්ථානය හඳුනා ගන්නා ලිපිනය තමා මේ. ඔයා ඇතුල්වෙන පරිගණකය කොතනද තියෙන්නේ, ඔයා සොයන වෙබ් අඩවිය මොන පරිගණකයේද තියෙන්නේ කියන එක සරලවම සඳහන් වන ස්ථානය මෙහෙම හදුන්වනවා.

Domain (වෙබ් ලිපිනය)
මම කලින් කියුව IP Address එක අපට තේරුම් ගන්න සහ සරලව මතක තියාගන්න ඒ වෙබ් අඩවියක් වැනි ස්ථානයක් සඳහා ලබාදෙන නම තමා මේ. තේරෙන්න කියනවා නම් ඔයාල හොඳින් දන්නා ගුගල් වෙබ් අඩවියේ IP එක තමා 8.8.8.8 කියන්නේ. එකේ අපි දන්නා නම තමා www.google.com කියන්නේ.

වෙබ් අඩවියක් කියන්නේ මොකක්ද?
සරලවම කියනවා නම් අන්තර්ජාලයේ තියන තොරතුරු ගොනුවක් තමා මේ වෙබ් අඩවියක් කියන්නේ. ඒ තොරතුරු අකුරු, රුප, ශබ්ද මෙන්ම වීඩියෝ දර්ශන වෙන්න පුළුවන්. ඉතින් මේ වෙබ් අඩවි නිර්මාණය කරනා පරිගණක මෘදුකාංගය අනුව HTML5, Php, Css, Word press වගේ වර්ග කරන්න පුළුවන්. ඔයාල අන්තර්ජාලයේ දකින බොහෝ වෙබ් අඩවි මේ HTML5, Php වගේ ඒවායින් නිර්මාණය වෙලා තිබ්බත් ඉක්මනින් වෙනස් වෙන තොරතුරු ඇතුලත් කරනා බ්ලොග් වර්ගගේ වෙබ් අඩවි Word press වැනි මෘදුකාංග හරහා තමා නිර්මාණය වෙන්නේ.

සාමාන්‍යයෙන් වෙබ් අඩවියක තාක්ෂණිකව කොටස් දෙකක් තියනවා. ඒ ෆ්රෝන්ට් එන්ඩ් සහ බැක් එන්ඩ් යනුවෙන්. ෆ්රෝන්ට් එන්ඩ් කියන්නේ අන්තර්ජාලයේ ඔයාලට පෙන්නුම් කරනා වෙබ් අඩවිය. බැක් එන්ඩ් කියන්නේ ඒ වෙබ් අඩවියේ දත්ත පවත්වාගෙන යන ඩේටා බේස් එක. මේ ඩේටා බේස් එක අපිට නොපෙනුනත් ඇත්තටම අපි පරිශීලනය කරන්නේ එහි තියන දත්ත. මේ ඩේටා බේස් එක බොහෝ වෙබ් අඩවි වල My SQL, Php හෝ Mariya DB වැනි මෘදුකාංග හරහා තමා නිර්මාණය වගේම වෙබ් අඩවිය සමග සම්බන්ද කරලා තියෙන්නේ. මෙයිනුත් Mariya DB කියන්නේ SQL මෘදුකාංගය හරහාම නිර්මාණය උනත් ලොකු දත්ත ප්‍රමාණයක් ගබඩා වෙන ඩේටා බේස් නිර්මාණයට යොදා ගන්නා මෘදුකාංගක්.

Name Servers
වෙබ් අඩවියේ ඩොමේනයට වෙබ් අඩවිය පවත්වාගෙන යන සර්වරය තිබෙනා තැන ලබාදීම තමා මෙමගින් හඳුන්වන්නේ. (CDN) Content Delivery Network , (DNS) Domain Name System වැනි ක්‍රම මගින් මේවා සරලවම ලබාදීම සිදු කරන්න පුළුවන්. CDN මගින් වෙබ් අඩවිය තිබෙනා සර්වරයේ IP එක ලබාදීම සිදුවන අතරේ DNS මගින් එම සර්වරයේ IP එක ඩොමේන් එකක් ලෙස ලබාදීම සිදුවෙනවා.

සර්වරය (Servers)
අපි අන්තර්ජාලයේ පරිශීලනය කරනා වෙබ් අඩවි ගබඩා කරලා තියන පරිගණකය ලෙස සරලවම මේ Servers හඳුන්වන්න පුළුවන්. ඒවා බාවිතා වෙන ආකාරය අනුව ප්‍රධාන වර්ග කිහිපයකට බෙදා දක්වන්න පුළුවන්. පලවෙනි එක තමා වෙබ් සර්වර්. Godaddy වැනි ආයතනය මගින් ඔයාල ලබා ගන්නේ ගොඩක් වෙලාවට මේ ආකාරයේ හොස්ට් සර්වර් තමා. සාමාන්‍යයෙන් අපි දකිනා බොහෝ වෙබ් අඩවි තැම්පත් කිරීම මේ ආකාරයේ සර්වර් වල සිදු වෙනවා. මිල අතින් ගොඩක් අඩු සර්වර් කියල කියන්න පුළුවන්. ඒත් වැඩි ඇතුලත් වීම් ප්‍රමාණයක් තියන, බැක් එන්ඩ් එකේ වෙනස් ඩේටා බේස් තිබෙන වෙබ් අඩවි ඇතුලත් කරන්න ප්‍රායෝගිකව අපහසුයි මේ සර්වර් වලට.

ඊළඟට අපිට Cloud Server කියල සර්වර් විශේෂයක් හඳුනා ගන්න පුළුවන්. ඇත්තටම මේවා එක සර්වරයක් නෙවි. සර්වර් කිහිපයක එකතුවක්. විශාල වෙබ් අඩවි ප්‍රමාණයක් එකම තැන තියන මේ සර්වර් මිල අඩු ඒවගේම එච්චර පුද්ගලයන් ඇතුලත් නොවෙන හෝ බ්ලොග් වෙබ් අඩවි ගබඩා කරන්න යොදා ගන්නවා. ඒවගේම ඒ සියලු සර්වර් වල රැම්, හාර්ඩ් ඩිස්ක් වල ක්‍රියාවලියන් සියලුම ඇතුලත් කරලා තියන වෙබ් අඩවි වලට බෙදී යනවා.

ඊළඟට අපිට (VPS) Virtual Private Server යනුවෙන් සර්වර් විශේෂයක් හඳුනා ගන්න පුළුවන්. ඇත්තටම මේකත් Cloud Server හා සමානයි. ඒත් සැබෑවට නොතිබුනත් පරිගණක වැඩසටහනක් හරහා රැම් හාර්ඩ් ඩිස්ක් සහ ප්‍රොසෙසර් මට්ටම් බෙදා වේන් කර එක සර්වරයක් ලෙස වැඩ කරන්න පුළුවන් ඉඩක් ලබාදීම තමා සරලවම සිදුවෙන්නේ. එම පද්දති වල ක්‍රියාකාරිත්වය එහි ඇතුලත් කරලා තියන වෙබ් අඩවි අතරේ පමණක් බෙදී යනවා. තරමක් මිල වන මෙම සර්වර් ඇතුලත් වීම් වැඩි වෙබ් අඩවි ගබඩා කරන්න යොදා ගන්නවා.

Dedicated servers තමා ඊළඟ සර්වර් වර්ගය. මේක හරියට අන්තර්ජාලයේ අදාල වෙබ් අඩවියටම වෙන්වූ පරිගණකයක් කියුවොත් නිවැරදියි. වෙනත් කිසිදු වෙබ් අඩවියක් හෝ වැඩසටහනක් ඇතුලත් නොවෙන අදාල සර්වරය ලබා ගන්නා අයට අවශ්‍ය දේ පමණක් ගබඩා කරලා තියන සර්වර් මෙලෙස හඳුන්වනවා. සාමාන්‍යයෙන් රැම් එක 4gb සිට 32gb වගේ වෙනකම් මෙම සර්වර් දක්නට පුළුවන්. වෙන්වූ අන්තර්ජාල සම්බන්දතාවක් වේගවත් ප්‍රොසෙසර් වලින් මේවා නිර්මාණය වෙලා තියෙන්නේ. මේ සර්වර් වලම වඩා වැඩි දෘඩාංග ඇතුලත් Enterprise Servers කියල වර්ගයකුත් තියනවා. මේවත් Dedicated වර්ගයේම සර්වර් උනත් සාමාන්‍යයෙන් රැම් එක පටන් ගන්නෙම 32gb වලින්. ඒවගේම ලොකු ගබඩා දරිතාවක්, අන්තර්ජාල සම්බන්දතා කිහිපයක් මෙන්ම ප්‍රොසෙසර් කිහිපයක් පවා දැකගන්න පුළුවන්. වඩා වැඩි ඇතුලත් වීම් (login) තිබෙනා වෙබ් අඩවි ගබඩා කරන්න මේ ආකාරයේ සර්වර් යොදා ගන්නවා.

මේ මොන වර්ගයේ සර්වරය ගත්තත් වින්ඩෝස් සහ ලිනක්ස් කියන මෙහෙයුම් පද්දති වලින් අපට සර්වරය ලබා ගන්න පුළුවන්. Dedicated සර්වර් වල ඕනෑම වෙලාවක අපිට අදාල මෘදුකාංග වෙනස් කරන්න පුළුවන් උනත් අනිකුත් ඒවගේ තියන ඒවා තමා බාවිතා කරන්න ඕන. Dedicated සහ සමහර VPS සර්වර් වල පමණක් root Access ලබාදෙන හින්ද බැක් එන්ඩ් එක අපිට ඕන ඩේටා බේස් වර්ගයක් සම්බන්ද කරන්න අවස්ථාව දෙනවා. සාමාන්‍යයෙන් ලිනක්ස් සර්වර් තමා වේගවත්.

Server Root කියන්නේ මොකක්ද?
ඔයාලගේ ගෙදර පරිගණකය ගැන හිතන්න. එහි හාර්ඩ් ඩිස්ක් එකට ඔයාලට ඕනෑම දෙයක් දාගන්න පුළුවන් නේ. ඕනනම් ෆෝමැට් කරන්නත් පුළුවන්. අන්න ඒ හැකියාව සර්වර් වල තිබීම තමා මේ Server Root Acess කියන්නේ. ගොඩක් වෙලාවට Dedicated සර්වර් වල තමා මේ හැකියාව තියෙන්නේ. ඒත් සමහර VPS වර්ගයේ සර්වර් ආයතනත් මේ හැකියාව ලබා දෙනවා. Root Acess තිබේනම් අපිට ඕන පරිගණක වැඩ සටහනක් ඇතුලත් කර ගැනීම සිදු කරන්න පුළුවන්. බැරිනම් ඉතින් එම ඇතුලත් කරලා තියන වැඩ සටහනේ සුළු වෙනස් කම් විතරයි කරන්න දෙන්නේ. හරියට ඔයාල ගන්න ලැප්ටොප් එකයි ටැබ් එකයි වගේ. ලැප් ටොප් එකට ඕනෑම මෙහෙයුම් පද්දතියක් ඇතුලත් කරගන්න පුළුවන් උනත් ටැබ් එකට එහෙම බැනේ.

Bandwidth කියන්නේ මොකක්ද?
ඇත්තටම සර්වර් ගැන කතා කරනකොට වර්ග දෙකක බෑන්ඩ් විත් ගැන කතා කරන්න ඕන. එකක් තමා සර්වර් එක අන්තර්ජාලය හා සම්බන්ද කරලා තියන ලින්ක් එකේ වේගය. මේක තත්පරයට මෙගා බයිට් (Mbps) හෝ තත්පරයට ගිගා බයිට් (Gbps) ලෙස ගණනය කරනවා. සමහර සර්වර් වල මෙම ලින්ක් කිහිපයක් තියෙන්න පුළුවන්. ලින්ක් ගාන වැඩිවෙන්න සර්වරය වේගවත් වෙනවා.

අනිත් බෑන්ඩ් විත් වර්ගය තමා සර්වරයේ බාවිතා වන දත්ත ප්‍රමාණය මනින මිම්ම. ගොඩක් වෙලාවට ක්ලවුඩ් සර්වර් සහ VPS සර්වර් වල තමා මේක දක්නට ලැබෙන්නේ. සර්වරයෙන් බාගත කරනා සහ සර්වරයට ඇතුලත් කරනා දත්ත අප් සහ ඩවුන් ලෙඩ වර්ග කරන්න පුළුවන්. ගිගා බයිට් හෝ ටෙරා බයිට් වලින් මේවා මනින අතරේ මේ ලබාදෙන සීමාව පැන්නම සර්වරය මන්දගාමී වෙනවා. හරියට ඔයාලගේ ඉන්ටර්නෙට් පැකේජ් එකේ ඩේටා ඉවර උනාම වෙන්නේ. අන්න ඒ වගේ.

සර්වර් වලට එල්ලවන සයිබර් ප්‍රහාර
සමාන්‍යයෙන් සර්වර් එකකට දරන්න පුළුවන් ඇතුලත් වීම් (login) සහ හුවමාරු කරගන්න පුළුවන් දත්ත ප්‍රමාණයක් තියනවා. සර්වරයක ප්‍රොසෙසර් එකට පාලනය කරන්න ලැබෙන මෙහෙයුම් ප්‍රමාණය සර්වර් ලෝඩ් එක කියල හඳුන්වනවා. සාමාන්‍යයෙන් වේගය වැඩි සර්වර් වල ලෝඩ් එක ඉතාමත් අඩුයි. මොකද ඉක්මනට ප්‍රොසෙස් කරලා ඉවර කරන හින්ද. ඔයාලට සරලව මේක තේරුම් කරන්න පුළුවන් මෙහෙම. හිතන්න බැංකුවක්. එකේ කවුන්ටර් 10 ක් විතර තියනවා කියල හිතන්න. එතකොට බැංකුවට එන ඕනෑම අයෙක්ට ඉක්මනට වැඩ කරන් පිට වෙන්න පුළුවන්. ඒත් කවුන්ටර් අඩුවෙන්න පෝලිම වැඩි වෙනවා. පෝලිම වැඩි වෙනකොට ඔයාල දන්නවගේ රණ්ඩු වගේ දේවල් වෙනවා. අන්න එක හින්ද තමා සර්වර් වල ලෝඩ් එක අඩු වෙන තරමට වෙබ් අඩවිය අවුලක් නැතුව දුවන්නේ.

සර්වර් වලට එල්ලවන බොහෝ සයිබර් ප්‍රහාර මගින් වෙන්නේ මේ පෝලිම වැඩි කරන එක. එක ස්ථානයකින් එකවර බොහෝ ඇතුලත් වීම් ප්‍රමාණයක් සර්වරයට ලබාදීම dos attak (denial-of-service attack) එකක් ලෙස හඳුන්වන අතරේ ස්ථාන කිහිපයකින් එම ඇතුලත් වීම් ප්‍රමාණයක් ලබාදීම distributed denial-of-service (DDoS) attack ලෙස හඳුන්වනවා. මේ දෙකෙන්ම වෙන්නේ සර්වරයට දරාගන්න බැරි තරම් login ප්‍රමාණයක් ලබාදී ලෝඩ් එක වැඩි කර සර්වරය අස්ථායි කිරීම. මේක නවත්තන්න තමා ඔයාල හොදටම දන්නා ක්ලවුඩ් ෆ්ලේයාර් හෝ සයිට් ලොක් වැනි ආරක්ෂණ පද්දති යොදා ගන්නේ.

Cloudflare කියන්නේ මොකක්ද?
පහුගිය කාලේ ඔයාල වැඩිපුරම බැන්න ආයතනය තමා මේ මම දැක්ක විදියට. මොකද බයිස්කෝප් අඩවිය මන්දගාමි වෙනකොට ඔයාලට මේ වෙබ් පිටුව දක්නට ලැබෙන්න ඇති. සමහරු මේක අයින් කරන්න කියනවත් දැක්කා මම. ඇත්තටම යාලුවනේ Cloudflare කලේ වෙබ් අඩවිය බේරා ගැනීම. සරලව කියනවා නම් Cloudflare කියන්නේ domain එකත් සර්වරයත් අතරට යොදනා ආරක්ෂණ පද්දතියක්. එමගින් සැකසහිත login වළක්වනවා මෙන්ම සර්වරයේ ලෝඩ් එක පාලනය කිරීම සිදු කරනවා. ඒවගේම Name Servers පාලනය කිරීම වැනි කටයුතුත් සිදුවෙනවා. සරලවම කියනවා නම් බ්ලොග් අකාරයේ වෙබ් අඩවියක් DDoS ප්‍රහාරයක් එල්ලවෙන්න තියන ඉඩකඩ වැඩි හින්ද ඒ ආරක්ෂාවට යොදා ගන්නා ආරක්ෂණ පද්දතියක් කියුවොත් හරි.

ඔන්න ඉතින් මම දැන් බයිස්කෝප් වෙබ් අඩවියේ පසුගිය මාසයේ වෙච්ච දේ කියන්න යන්නේ. ඒක පැහැදිලි කරන්න ඕන සියලුම තාක්ෂණික තොරතුරු මම ඔයාලට පැහැදිලි කළා. ඉතින් ඔයාලට දැන් මේ කතාව හොඳට තේරුම් ගන්න පුළුවන්. ඉස්සෙලම කියන්න ඕන බයිස්කෝප් අඩවිය වර්ඩ් ප්‍රෙස් මගින් නිර්මාණය කරලා තියන එකක්. ඩේටා බේස් එක Mariya DB මගින් නිර්මාණය කරලා තියනවා. පසුගිය කාලේ ඔයාල බයිස්කෝප් අඩවියට ඇතුලත් වෙනකොට දකින්න ලැබෙන්න ඇති වෙබ් අඩවිය ගොඩක් මන්දගාමී වෙනවා. සබ් ඩවුන්ලෝඩ් වෙන්න වෙලා යනවා. ඒ වගේම ක්ලවුඩ් ෆ්ලයාර් පේජ් එක එනවා. එකට ප්‍රධාන හේතු දෙකක් බලපාල තිබුනා. පලවෙනි එක තමා බැක් එන්ඩ් එකේ තිබ්බ Mariya DB වර්ගයේ ඩේටා බේස් එකේ නිවැරදි ක්‍රියාකාරිත්වයක් නොතිබීම. කොඩින් වල අවුල් වගේම වර්ෂන් ගැටළුවක් තිබබා. එකයි වෙබ් අඩවියෙන් සබ් ගන්න වෙලා ගියේ. ඊළඟට වෙබ් අඩවිය ලෝඩ් වෙන්න පරක්කු උනේ සහ ක්ලවුඩ් ෆ්ලයාර් එරර් ආවේ ලෝඩ් එකේ ගැටළුවක් හින්ද. මම හිතන්නේ වෙබ් අඩවිය ගබඩා කරලා තිබුනේ Cloud Server හෝ VPS සර්වරයක. ඒ හින්ද බයිස්කෝප් එකේ login වැඩිවෙන කොට හරි අපේ සයිට් එකත් එක්ක දලා තියෙන්න පුළුවන් වෙන වෙබ් අඩවියක login වැඩි උනාම හරි සයිට් එක ස්ලෝ වෙනවා. ඒ වගේම ක්ලවුඩ් ෆ්ලයාර් එක මගින් සර්වරය ආරක්ෂා කරන්න උත්සාහ කරනවා. එක හින්ද තමා කාර්ය බහුල නොවන වෙලාවට සයිට් එක වේගවත් වෙන්නත් අනිත් වෙලාවට සරලව කියනවා නම් පිස්සු කෙලින්නත් හේතුව.

ඉතින් හසන්ත සහෝදරයා ප්‍රමුක ඇඩ්මින් මඩුල්ල පිළිතුරු සෙවුවේ මේකට. ඉතින් ඉසේල්ලම ඕන උනේ පැය විසි හතරේම වැඩ කරනා සර්වර් පාලන ආයතනයක් හොයා ගන්න එක. මොකද ලංකාවේ ගොඩක් සර්වර් ආයතන උදේ අටේ ඉඳන් හවස පහ වෙනකම් විතරයි වැඩ. එකත් සතියේ දින පහේ විතරයි. කොහොමින් හරි සර්වර් ආයතනය සොයා ගත්තම ඊළඟට කලේ ඩේටා බේස් එක ඔප්ටිමයිස් කරපු එක. ටේබල් හැත්තෑ ගණනක් තිබ්බ ගිගාබයිට් එකකට කිට්ටු ඩේටා බේස් එකක් බලන්න ඉතින් දවස් පහ හයක් යනවා. ඊට පස්සේ තමා ඕන කරන සර්වරයක් හොයන්න ගත්තේ. ඉසේල්ලම ලංකාවේ ඒවා බැලුව. ඒත් ලංකාවේ සමහර සර්වර් ආයතන සර්වරය ලබා දෙන්න පයින් චීනෙට ඇවිදන් ගිහින් බඩු ගෙනත් හදන්න තරම් කාලය ඉල්ලුව. ඒක හින්ද ලොව ප්‍රසිද්ද සර්වර් ආයතන මගින් සර්වරය ලබා ගන්න උත්සාහ කළා. ඒ අනුව මම කලින් සඳහන් කරන ලද සියලුම වර්ගයේ සර්වර් වල බයිස්කෝප් බැකප් එක ස්ථාපනය කරලා බලන්න කටයුතු කළා. එතැනදී 20GB විතර වෙන බයිස්කෝප් වෙබ් අඩවිය ගෝඩැඩි වැනි අඩුමිල වෙබ් සර්වර් එකක ඉඳල Dedicated සර්වර් දක්වා සර්වර් 5ක ස්ථාපනය කරලා පරික්ෂා කළා. ඒ හින්දා තමා ඔයාලට සති දෙකකට වැඩි කාලයක් උපසිරසි ලැබුනේ නැත්තේ.

ඔන්න ඔහොම ගිහින් අවසානේ ජනවාරි දෙවනදා බයිස්කෝප් වෙබ් අඩවිය වෙනුවෙන්ම වෙන්වූ බයිස්කෝප් වෙබ් අඩවිය පමණක් ක්‍රියාත්මක වන බයිස්කෝප් වෙබ් අඩවියට හිමි Enterprise වර්ගයේ Dedicated සර්වරයක් මත බයිස්කෝප් වෙබ් අඩවිය ඔයාල වෙත අරගෙන එන්න පුළුවන් උනා. මෙම සර්වරය Intel® Xeon® මාදිලියේ core 6 ක් සහිත සහ threads 8 කින් සමන්විත ප්‍රොසෙසර් එකකින් පන ගැන්වෙන අතරේ රැම් එක 64gb පමණ වෙනවා. දත්ත ගබඩා කිරීම සඳහා ටෙරාබයිට් දෙකක හාර්ඩ් ඩිස්ක් දෙකක් තිබෙන අතරේ දත්ත බැකප් කිරීමට අමතර 500GB හාර්ඩ් ඩිස්ක් එකකින් සමන්විත වෙනවා. දත්ත ඕනෑම ප්‍රමාණයක් ඇතුලත් කිරීම හෝ ලබා ගැනීම සිදු කරන්න පුළුවන් අතරේ ඒ සඳහා 1Gbps ලින්ක් දෙකක් මෙම සර්වරයට ඇතුලත් වෙනවා. ක්ලවුඩ් ෆ්ලයාර් පද්දතිය සර්වරයේ ආරක්ෂාවට යොදාගෙන තියන අතරේ ඊට අමතරව සයිට් ලොක් ආරක්ෂණ පද්දතියත් බයිස්කෝප් අඩවියේ ආරක්ෂාවට යොදා තියනවා. සාමාන්‍යයෙන් බයිස්කෝප් වෙබ් අඩවිය සර්වර් ලෝඩ් එක 4.6 ක මට්ටමට පැමිණිය හැකි වෙබ් අඩවියක් උනත් මෙම සර්වරය එම ලෝඩ් එක 8ක ප්‍රමාණයක් දක්වා ගැටළුවක් නැතුව දරාගන්න පුළුවන් එකක්.

මේ සම්පුර්ණ ක්‍රියාවලියට හසන්ත සහෝදරයා සහ සමන් සහෝදරයා ගේ ක්‍රියාකාරිත්වය නොමදව ලැබුනා. කොහොම හරි අවසානයේ සම්පුර්ණ ඇඩ්මින් මඩුල්ල සිංහල උපසිරසි ලබා ගන්නා ඔයාලට තිබ්බ ලොකුම ගැටලුව වෙච්ච වෙබ් අඩවිය මන්දගාමී කියන ප්‍රශ්නයට පිළිතුර ලබා දී තියනවා. සරලව කියනවා නම් ලේලන්ඩ් බස් එකක ගියපු ඔයාලට දැන් බුලට් දුම්රියක් ලබාදී තියනවා. ඒ වෙනුවෙන් එයාල තමන්ගේ සාක්කුවෙන් තමා වියදම් කලේ. ඒ හින්ද මම ඔයාලගෙන් දෙයක් ඉල්ලන්න කැමතියි. ඉදිරියේ වෙබ් අඩවිය දැන්වීම් වලට විවෘත වේවි. ඉතින් ඔයාලට පුරුදු ඇතිනේ පාසල් කාලේ සුවිනියර් වලට දැන්වීම් හෙවුවා. ඉතින් පුළුවන් නම් බයිස්කෝප් අඩවිය වෙනුවෙනුත් ඒ දෙය කරන්න. සාදාරන ගණනකට ලක්ෂ දහයකට වැඩි පුද්ගලයන් පිරිසකට ප්‍රචාරය කරන්න එම දැන්වීම් ලබා දෙන අයට හැකියාව ලැබෙන අතරේ වෙබ් අඩවිය පවත්වාගෙන යන්න ඕන මුදල් සොයා ගන්න ඇඩ්මින්වරුන්ට එමගින් හැකියාව ලැබෙනවා.

ලිපිය නම් ගොඩක් දික් උනා. ඒත් මම හිතනවා ඔයාලට මම කියපු දේ ප්‍රයෝජනවත්ව් වේවි කියල. ඉතින් ඉක්මනට මිතුන් සහෝදරයාගේ ඉල්ලීමත් අරන් එනවා කියන ගමන් සමුගන්නවා.

බුදු සරණයි….!

The Monster Squad (1987) on IMDb

 

 

 

Due to copyright issues, we do not provide any torrent links.

 

The.Monster.Squad.1987.720p.BluRay.x264-[YTS.AG]

The.Monster.Squad.1987.720p.BluRay.x264-[YTS.PE]

මෙම ලබා දී ඇති උපසිරැසි සියළුම Blu-Ray පිටපත් සඳහා අදාළ වේ.

 

මේ ලබා දී ඇති සිංහල උපසිරැසි පිළිබද “අසංක ප්‍රදීප් රණතුංග” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

හසන්ත වික්‍රමරත්ත

Admin Baiscopelk

18 thoughts on “The Monster Squad (1987) with Sinhala Subtitles | රාක්ෂ සමාජය [සිංහල උපසිරසි සමඟ]

  • ඇත්තෙන්ම අසංක සහෝට ස්තූති කරල විතරක් මදි. ප්‍රසිද්දියේ කියන්න බැරි දේවල් වලින් අපේම අය ගැන දැනගත්ත දේවල් අනික් අයත් දැනගත්ත නම්, ඔයා කරපු උදව්වේ අගය හොඳට තේරුම් ගන්න පුළුවන්. ඉතින් වෙනද වගේම ස්තූතියි කියනවා සිංහල උපසිරැසියටත්. ජය෴෴ 😛 😛

    Reply
  • Thanks mchn lipiyata. me lipiyen danne neti dewal godak denagatta

    Reply
  • සිංහල උපසිරැසියට ගොඩාක් ස්තූතියි සහෝ! ඒ වගේම බයිස්කෝප් වෙබ් අඩවියේ අභිවෘද්ධිය වෙනුවෙන් ඔබ සිදුකරන වටිනා මෙහෙවරටත් මගේ ප්‍රණාමය පුද කරනවා.
    ජයෙන් ජය වේවා!
    බුදු සරණයි!

    Reply
  • niayamai…thanks saho..sub ekata..digatama sub demu.baiscope adaviya idiriyatath wada hodin pawathwagena yama wenuwen oba krnaladha sewaya ayaga karami…jaya wewa……

    Reply
  • බයිස්කෝප් අඩවියේ උන්නතිය වෙනුවෙන් කරන ලද මගඟු සේවය වෙනුවෙන් හිස නමා ආචාර කරනවා.

    Reply
  • ealama saho thanks
    paata lipiya
    aadambaryi apita dan apema sever ekak thyenawa ne
    jaya wewa!!!

    Reply
  • අසංක ප්‍රදීප් රණතුංග සොහොයුරාට ගොඩක් ස්තූති උපසිරසට මේ ෆිල්ම් එක ටිකක් පරක්කු උනාට කමක් නැ. baiscopelk නැවත නගා සිටුවන්නට ඔබ කල සුවිසාල මෙහෙවර අන්ගිබවනියී. Bandwidth Server Root මේවා ගැන විස්තර කරලා තියන එකටත් ස්තූති. ඔබ ගැන කියන්න වදන් නැ. සුපිරි ඇ. Picnic at Hanging Rock 1975 imdb 7.6 උපසිරස දෙන්න.. මගෙ නම ලීපියේ සදහන් කලාට ස්තූති

    Reply
  • උපසිරැසියට වගේම වෙබ් අඩවිය පවත්වා ගෙන යාම පම්බන්ධයෙන් ඔබ ලබා දී ඇති තොරතුරුවලටත් බොහොම ස්තුතියි. ඔබගේ සියවන උපසිරැසිය අපට ලඟදීම දකින්නට ලැබේවා කියලා ප්‍රාර්ථනා කරනවා.

    Reply
  • ඇත්තටම අසංක සහෝ ඔයාගේ දිගු ලිපියට බොහොම ස්තුතියි!
    ඒක ගොඩක් වටිනවා, මට නම්.. 🙂
    සමහර නොදන්නා කරුණුත් දැනගත්තා කියල කියන්න පුලුවන්.
    මම හිතනවා මේක බයිස්කෝප් අඩවියට එන කාටවුනත් වැදගත් දෙයක් වෙයි කියලා.
    නිතරම comment නොකලට net ආවොත් මේ පැත්තෙ ඇවිත් යන්න නම් අමතක කරන්නේ නෑ.
    ඒ එන වෙලාවට මේ තියෙන ad 1ක් 2ක් අනිවාර්යයෙන්ම බලනවාමයි..
    මොකද ඒක බයිස්කෝප් අඩවියට ගොඩක් ලොකු ශක්තියක් කියල දන්න නිසා.
    මම හිතන්නේ බයිස්කෝප් අඩවිය වෙනුවෙන් අපි වගේ ගොඩක් දෙනාට කරන්න පුලුවන් ලොකුම දේ ඒක තමයි.
    මේ වෙලාවෙදි මම පොඩි යෝජනාවක් කරන්නම්. මම මේ දේ කියන්න හිටියේ නම් ගිය අවුරුද්දේ. පමාවට සමාවෙන්න.. 🙂
    පුලුවන් නම් මේ ads වගේම donate කරන්න පුලුවන් ක්‍රමයකුත් බයිස්කෝප් අඩවියේම පැත්තක සඳහන් කරන්න.
    ඒක බයිස්කෝප් අඩවියට උදව් කරන්න ආසාවෙන් ඉන්න, පුංචි හරි හැකියාවක් තියෙන කාටවුනත් ගොඩක් වටින දෙයක් වේවි.
    ඒවගේම ඔන්න ප්‍රමාද වෙලා හරි බයිස්කෝප් ඇඩ්මින් මඩුල්ල ඇතුළු සියලුම සබ්කරුවන්ටත් ලෝකවාසී සියලුම දෙනාටත්
    ලැබුවා වූ 2017 වසරම සාර්ථක වසරක් වේවායි හදවතින්ම සුභපතනවා.. 😀
    බොහොම ස්තුතියි සබ් එකටත්.
    පැරණි දේ අගය කරන කෙනෙක් හැටියට මගෙත් පුංචි ඉල්ලීමක් තියෙනවා.
    Maine Pyar Kiya (1989)
    http://www.imdb.com/title/tt0100095/
    IMDb අගයත් ඉතා හොඳ මට්ටමක තියෙන මේ film එකටත් පුලුවන් නම් සබ් දෙන්න බලන්න.
    ජයවේවා!

    Reply
  • අසංක රණතුංග සොයුර,
    ඔබේ ඉහත ලිපිය කියවා නොදැන සිටි බොහෝ දේ දැන ගත්තා. අනෙක් අයට ඔබේ වටිනා දැනුම භාවිතකර බොහෝ උදවු කරනා සොහොයුරෙක් බව මා පෙරසිටම දන්නවා. උපසිරසි නිර්මාණය කිරීම පිළිබඳවද ඔබ පුද්ගලිකවම මට වටිනා උපදෙස් බොහොමයක් ලබා දී තිබෙනවා, ඒ වගේම මා දන්නා අයටද එම දැනුම මා විසින් තවදුරටත් බෙදා දෙනවා. මෙම සිනමාපටය මා නැරඹීමට කැමැත්තෙන් සිටි එකක්. එයට දැන් අවස්ථාව ලැබී තිබෙනවා. මීට පෙර ඔබ පැරණි අගනා සිනමාපට බොහොමයකට උපසිරසි ලබා දුන්නා. ඒ අනුව පැරණි කලාත්මක සිනමාපට නරඹන්නන් බොහෝ දෙනෙක් කැමති වේවි ලොව මහා සිනමාකරු “චාලි චැප්ලින්” රඟපෑමෙන් දායක වූ The Great Dictator” සිනමාපටයට සිංහල උපසිරසි ලබා දෙනවා නම්. මේ කරන්නාවූ මෙහෙයට ඔබට මාගේ අවංක ස්තුතිය පුද කරන්නෙමි!!!

    Reply
  • උපසිරසට තැන්ක්ස්
    සුබ අලුත් අවුරුද්දක් වේවා
    ලිපියට ගොඩක් ස්තුතියි

    Reply
  • The rundown 2003
    මෙකට සබ් එකක් දාන්නකො සහෝ ඇයි දන් නෑ මෙච්චර ෆිල්ම් දෙනව මෙවගෙ සුපිරි ෆිල්ම් වලට සබ් නැත්තෙ උපසිරැසි ගන්වල නෑ කවුරුත්

    ඔයා සයිඩ් එක ගොඩ ගන්න සෑහෙන වෙහෙසක් දැරුව කියල අරාන්චි උනා සතුටුයි එ ගැන

    Reply
  • අළුත් ඒවාට උපසිරැසි ගොඩ දෙනෙක් දෙනවා. ඒත් පරණ ඒවාට දෙනවා අඩුයි. අනේ මේ වගේම king kong පරණ ඒවා වලට සිංහල සබ දෙන්නකො .
    අළුත් ඒවාට උපසිරැසි ගොඩ දෙනෙක් දෙනවා. ඒත් පරණ ඒවාට දෙනවා අඩුයි. අපි තවම දැකලා නැති පැරණි ලෝක ප්රලකට චිත්රපපට ඕනෑ තරම් තියනවා. එවැනි නිර්මාණ වලටත් කැමති පිරිස් සිටිනවා. ඒ නිසා මමනම් අළුත් එවාට වගේම ගොඩාක් පරණ එවාටත් මෙහෙම සබ් දෙන එකට කැමතියි. උපසිරැසියට බොහෝම ස්තුතියි මචන්! ජයෙන් ජයම වේවා!

    Reply
  • බොහොම ස්තූතියි සහෝ උපසිරැසියට.

    Reply
  • අප සියළුදෙනා වෙනුවෙන් කරන සේවය
    ඉතා ගෞරවයෙන් අගය කරනවා..
    ඔබගේ සියලු කටයුතු සාර්ථක වේවා..!
    ස්තූතියි…….

    අපගේ මෙම ජනප්‍රිය වෙබ් අඩවිය
    යථා තත්වයට පත්කරදීමට සහයදෙන
    ඔබ සැමට මාගේ ප්‍රණාමය……..!

    Reply
  • බොහෝම ස්තුතියි සබ් එකට සහෝ
    ලිපියටත් ස්තුතියි.ජය වේවා!

    Reply

Leave a Reply to KAVINDA GAMAGE Cancel reply

Your email address will not be published. Required fields are marked *