The Spectacular Spider-Man [S02 : E12 & E13] Sinhala Subtitles | ග්‍රීන් ගොබ්ලින්ගේ අවසානය…? [සිංහල උපසිරැසි]

ඔන්න ඉතින් The Spectacular Spider-Man කතා මාලාවේ අවසාන කොටස් දෙකේ උපසිරැසි අරගෙන තමයි අද එන්නේ. ඉතින් කලින් එපිසෝඩ් බලලා ඇති කියලා හිතනවා. ඉතින් කලිනුත් කිව්වා වගේ මේක තමයි මේ කතා මාලාවේ අවසානය, ඒවගේම මම උපසිරැසි හදන පළවෙනි කාටූන් එකත් මෙතනින් අවසන් වෙනවා. එහෙනම් වැඩි කතා නැතුව අපි මේ එපිසෝඩ් දෙකේ කතා ගැන බලමු. මොකද මේක මම මෙච්චර කාලෙකට ලියපු දිගම ලිපිය වෙන්නයි යන්නේ.

එපිසෝඩ් 12 ගැන මට කියන්න තියෙන පළවෙනි ම දේ තමයි මේක තමයි මම මෙච්චර කාලෙකට කරපු අමාරුම උපසිරැසිය කියන එක. මොකද මේකේ තමයි පීටර්ගේ ඉස්කෝලේ පාසල් නාට්‍යය වේදිකාගත කරන්නේ. ඉතින් ඒක ෂේක්ස්පියර්ගේ The Mid-Summer Night’s Dream කියලා ඇත්තම නාට්‍යක්. ඒ නාට්‍යයේ ඇත්තටම තියෙන වාක්‍යය, කතාවේ තැනටත් ගැළපෙන විදියට අරගෙන බොහොම දක්ෂ විදියට කතාව ගොතලා තියෙනවා. Greg Weisman කතාව ලියලා තියෙනවා කිව්වාම ඒක පුදුමයක් නෑ. ඉතින් මම මේක අමාරුයි කිව්ව හේතුව තමයි මේ නාට්‍යයේ තියෙන්නේ Archaic එහෙම නැත්නම් පෞරාණික ඉංග්‍රීසි. ඉතින් ෂේක්ස්පියර්ගේ නාට්‍යයේ විග්‍රහයන් බල බල තමයි පරිවර්තනය කරන්න වුණේ. ඉතින් මේකේ දෝෂ තියෙන්න පුළුවන්. ඒක නිසා එහෙම තිබුණොත් සමාවෙන්න.

ඉතින් මේකේ කතාව ගැන කියනවා නම් ස්පයිඩර්-මෑන් ඉතාම අධිආරක්ෂිත හිර කූඩුවක හිර කරලා තියෙන්නේ. ඉතින් කොහොමහරි එයා හිරෙන් පැනගන්නවා. මේ අතරේ ග්‍රීන් ගොබ්ලින් ස්පයිඩර්-මෑන්ව විනාශ කරන්න කියලා හිතාගෙන එයා මෙච්චර කල් ගහගත්ත ඔක්කොම හතුරෝ ටික නිදහස් කරනවා! ඒත් ස්පයිඩි ඉන්නේ තනියම නෙමෙයි. තමන්ගේ තාත්තා වෙන කැට්-බග්ලර් බේරගන්න හිරේට පැනපු බ්ලැක්-කැට්ත් ස්පයිඩර්-මෑන්ගේ සහයට ඉන්නවා. ඉතින් ඇයි ස්පයිඩි හිර ගෙයක් ඇතුළේ දාලා තියෙන්නේ? එයා මොකක්ද කරපු වැරැද්ද? එයාට තමන් මෙච්චර කල් සටන් කරපු ඔක්කොම හතුරෝ ටික පරද්දන්න පුළුවන් වේවිද? තමන්ගේ බෙන් මාමව මරපු කැට්-බග්ලර්ට ස්පයිඩි බේරිලා යන්න ඉඩ දේවිද? එහෙනම් මේක බලලම උත්තර හොයාගන්නකෝ.

ඉතින් අවසාන එපිසෝඩ් එක ගැන කියනවා නම් මේකේ තමයි අපට හැමදේකම අවසානය බලාගන්න පුළුවන් වෙන්නේ. ඒවගේම එපිසෝඩ් එක ඉවර වෙන්නේ අලුත් ආරම්භයක්, එහෙමත් නැත්නම් cliffhanger එකක් එක්ක. ඒක මේ සීරීස් එක මෙතනින් ඉවර වුණාට කවුරුත් කැමති නැති වෙන්න එක හේතුවක්. ඉතින් කොහොමහරි මේකේ අපට දැනගන්න ලැබෙනවා ග්‍රීන් ගොබ්ලින් කියන්නේ කවුද කියලා. ඒ හැරී මද? නෝමන් ඔස්බෝන්ද? ඩොනල්ඩ් මෙන්කන් ද? නැත්නම් වෙනත්ම කෙනෙක්ද? පීටර් පාකර්ට තමන්ගේ ජීවිතේ හරිගස්සගන්න පුළුවන් වේවිද? මේ ග්‍රීන් ගොබ්ලින්ගේ අවසානයද? නැත්නම් ස්පයිඩිගේ අවසානයද?

(තව දෙයක් තියෙනවා, මේ එපිසෝඩ් එකට උපසිරැසි දාගෙන යන අතරේදී මට හම්බවුණා ‘ගාගන්’ කියලා නමක්. කොමික්ස් වල නම් ‘මැක් ගාගන්’ කියන්නේ ‘ස්කෝපියන්’ (ගෝනුස්සා) කියලා ස්පයිඩර්-මෑන්ගේ හතුරෙක්. මම කලින් ලිපියකත් කිව්වා වගේ මේ කතා මාලාව එකපාරටම නැවතුණු නිසා අපට කානේජ්, හයිඩ්‍රෝමෑන් වගේ හතුරෝ කවදාවත් දකින්න ලැබුණේ නෑ. ඉතින් මෙයත් ඒ වගේ එක්කෙනෙක් වෙන්න පුළුවන්. ඒත් මට මතක විදියට නම් මම ස්කෝපියන්ව මේ කතා මාලාවට හඳුන්වාදෙන්න හිතාගෙන හිටිය බවක් කොහෙවත් කියවලා නෑ. ඉතින් ඒක එහෙම වෙන්නත් පුළුවන්, නැති වෙන්නත් පුළුවන්.)

The Spectacular Spider-Man කතා මාලාව කියන්නේ බොහෝ අය, මාත් ඇතුළුව, හිතන විදියට ස්පයිඩර්-මෑන්ගේ මෙච්චර කාලෙකට නිර්මාණය වුණු හොඳම කාටුන් එක. ඒක කොමික්වල තියෙන දේවල් කෙලින්ම අරගන්නේ නැතුව දේවල් වෙනස් කරලා හොඳ ස්පයිඩර්-මෑන් ලෝකයක් මැව්වා. කාටූන් එක ද්විමාන වුණාට චරිතවල පෞර්ෂත්ව ත්‍රිමාණ විදියට දැනුනා. ස්පයිඩර්-මෑන් වැඩ පෙන්නනවා විතරක් පෙන්නන්නේ නැතුව පීටර් පාකර්ගේ ජීවිතේ පැත්තත් පෙන්නුවා. පීටර් පාකර් කියන්නේ දෙබිඩි ජීවිතයක් ගත කරන කෙනෙක්. එකක් එයාගේ සාමාන්‍ය ජීවිතේ. අනිත් එක එයා ස්පයිඩර්-මෑන් විදියට ගත කරන ජීවිතේ. සමහර වෙලාවට, මේ ජීවිත දෙක එකිනෙකට හරස් වෙනවා. ඉතින් ඒ වෙලාවට පීටර්ට ඒවා විසඳගන්න සිද්ධ වෙනවා. ඒක තමයි මේ කතා මාලාවේ තියෙන හොඳම දේ: ඒක පීටර්ව හරියට නිරූපණය කරනවා. පීටර්ව විතරක් නෙමෙයි, අනිත් චරිතත් එහෙමයි. කතාව ලියන අයට තේරෙනවා ස්පයිඩර්-මෑන් ගොඩක් ජීවිත බේරගත්තත්, එයාට බේරගන්න බැරි එකම ජීවිතේ පීටර් පාකර්ගේ ජීවිතේ කියලා. ඒවගේම කොමික්වල දේවල් වෙනස් කළාට ඒවා කළේ කතාව තවත් හොඳ කරගන්න. උදාහරණයක් විදියට එඩී බ්‍රෝක්ව ගන්න. කොමික්වල එඩී බ්‍රෝක් කියන්නේ පත්තර වාර්තාකාරයෙක්. එයා ලියපු ලිපියක් බොරුවක් කියලා ස්පයිඩර්-මෑන් ඔප්පු කරපු නිසා තමයි මෙයා වෙනම් වුණාට පස්සේ ස්පයිඩර්-මෑන්ව හොයාගෙන ගියේ. ඒත් මේ කතා මාලාවට වෙනම්ව ගන්නකොට එයාලා වෙනම දෙයක් කළා. එඩී බ්‍රෝක් සහ පීටර් පාකර් අතරේ යාළුකමකට වඩා සහෝදරකමක් තියෙනවා කියලා එයාල පෙන්නුවා. ඉතින් ඒක නිසා එඩී බ්‍රෝක් වෙනම් බවට පත් වෙලා ස්පයිඩර්-මෑන්ව ඉවර කරන්න හදනකොට ඒක අපට වැඩියෙන් හිතට දැනෙනවා. ඉතින් මේ වගේ දේවල් නිසා තමයි ඒක IMDb දර්ශකයේ ලකුණු 8.2ක් සහ Rotten Tomato දර්ශකයේ 100%ක් අරගෙන තියෙන්නේ.

මේ වගේ හොඳ කතාවක් සීසන් 2කින් නැවතුණා කියලා විශ්වාස කරන්නත් බෑ. ඒත් ඒක එහෙම වුණා. ඒ කොහොමද?

ඒ මෙහෙමයි.

The Spectacular Spider-Man Cancellation
ස්පෙක්ටැකියුලර් ස්පයිඩර්-මෑන් අවලංගු කිරීම

ඉතින් ස්පෙක්ටැකියුලර් ස්පයිඩර්-මෑන් රසිකයෝ කියන විදියට – ඒවගේම මාත් විශ්වාස කරන විදියට – මේ කාටූන් එකේ එපිසෝඩ් 65ක් එන්න තිබිලා තියෙනවා සීසන් 5ක් විදියට. ඒත් හැදුනේ සීසන් දෙකයි. කොහොම වුණත් Greg Weisman ම කියලා තියෙනවා එයාලට හදන්න කියලා තිබුණේ එපිසෝඩ් 13යි කියලා. ඒත් ඒකේ සාර්ථකත්වයත් එක්කම තවත් එපිසෝඩ් 13ක් හදන්න කිව්වා කියලා.

ඒත් මම හිතන්නේ නැහැ ඒක ඇත්තක් කියලා. මොකද කියනවා නම් පළවෙනි සීසන් එකේ හඳුන්වලා දීපු සමහර කරුණු දෙවෙනි සීසන් එකට වැදගත් වෙනවා. උදාහරණයක් විදියට ග්‍රීන් ගොබ්ලින් සම්බන්ධ කරුණු. මට ඒක විස්තර කරන්න විදියක් නැහැ මොකද එහෙම වුණොත් මේ එපිසෝඩ් දෙකේ හොඳම කෑල්ල ස්පොයිල් වෙන නිසා. කොහොම වුණත් Greg Weisman ඔහොම තමයි කියල තියෙන්නේ. අනිත් කාරණේ තමයි සම්මුඛ සාකච්ඡාවලදී එයාම කියලා තියෙන විදියට තුන් වෙනි සීසන් එකකටත් සැලසුම් තිබිලා තියෙනවා. ඉතින් ඒක නිසා මම මේක විශ්වාස කරන්නේ නෑ.

ඉතින් මේක අවලංගු වුණු හේතුව මම පුළුවන් තරම් සරල විදියට කියන්නම්. මම මෙතනදී වැරදි වෙන්නත් පුළුවන් මොකද මේ ව්‍යාපාරික ගනුදෙනු බලන්න ගියාම ටිකක් ඔළුව අවුල් වෙනවා. මෙහෙමයි. සෝනි සමාගමෙන් තමයි ස්පෙක්ටැකියුලර් ස්පයිඩර්-මෑන් හැදුවේ. ඒක නිසා සෝනි එක ළඟ තමයි ස්පෙක්ටැකියුලර් ස්පයිඩර්-මෑන් කාටූන් එකේ අයිතිය තියෙන්නේ. ඒත් මාවල් එක ළඟ තමයි ස්පයිඩර්-මෑන්ගේ ටීවී අයිතිය තියෙන්නේ. සෝනි, මාවල් එකට ස්පයිඩර්-මෑන්ගේ ටීවී අයිතිය විකුණුවා. ඉතින් ඩිස්නි එක ඇවිල්ලා මාවල් එක මිලට ගත්තා. එතකොට ප්‍රශ්න ගොඩක් මතු වුණා. මොකද කිව්වොත් ස්පෙක්ටැකියුලර් ස්පයිඩර්-මෑන් කාටූන් එකේ අයිතිය තියෙන්නේ සෝනිලට. ඒත් ටීවී අයිතිය තියෙන්නේ මාවල්/ඩිස්නිලට. ඒ කියන්නේ සෝනිලට කාටූන් එකේ අයිතිය තියෙනවා, ඒත් කාටූන් එක හදන්න ඕන කරන අයිතිය නෑ. ඉතින් මේ වගේ නීතිමය ප්‍රශ්න ගොඩක් සංකීර්ණ වුණු නිසා කාටූන් එක නැවැත්තුවා.

ආපහු එන්න අවස්ථාවක් තියෙනවද?

සරලම උත්තරේ: නෑ… සහ ඔව්.

මෙහෙමයි. Greg Weisman ම කියලා තියෙනවා එහෙම අවස්ථාවක් නැහැ කියලා. ඒත් එයා අන්තිම පාර එහෙම එකක් කිව්වාම ඒක ඇත්තක් නෙමෙයි කියලා අපි දැක්කනේ. කොහොම වුණත් Twitter එකේ කෙනෙක් තව සීසන් තියෙනවද කියලා ඇහුවාම මෙන්න මේකයි Greg Weisman දුන්න උත්තරේ:

[කණගාටුදායකව, නෑ. ඒත් මට සතුටුයි ඔයා ඒකට කැමති වුණු එක ගැන]

ග්‍රෙග් ගේ මේ ප්‍රතිචාරය ටිකක් අධෛර්යයමත් කරවන සුළු වුණත් රසිකයෝ නම් ඒක ගණනකටවත් අරගෙන නැහැ. ඇත්තම කියනවා නම් Change.org කියන වෙබ් පිටුවේ දැනටමත් පෙත්සමක් පටන් අරගෙන තියෙන්නේ මේ කාටූන් එක ආපහු ගේන්න කියලා. ඒක දැන් 19,000කට වඩා අත්සන් කරලයි තියෙන්නේ. ඒක 25,000ට ළඟා වුණොත් ඒක තමයි අන්තර්ජාලයේ වැඩියෙන්ම අත්සන් කරපු පෙත්සම වෙන්නේ. ඉතින් ඒකෙන්ම පේනවානේ මේකට කොච්චර ලොකු රසික ආදරයක් තියෙනවද කියලා. දැන් තියෙන ප්‍රශ්න තමයි: රසිකයෝ ඉල්ලුවා කියලා මේ කාටූන් සීරීස් එක ආපහු ඒවිද? ඒක නීත්‍යානුකූලව කරන්න බෑ නේද? ඒවට උත්තර මෙන්න මෙහෙමයි එන්නේ.

1. රසිකයෝ ඉල්ලුවා කියලා මේ කාටූන් සීරීස් එක ආපහු ඒවිද?

ඔව්, රසිකයෝ සෑහෙන ගාණක් ඉල්ලුවොත් ආපහු ගේන්න පුළුවන්. ඒවා මීට කලින් සිද්ධ වෙලා නැති දේවල් නෙමෙයි. හොඳම උදාහරණ තමයි Young Justice සහ Clone Wars. Young Justice සීසන් දෙකෙන් නැවතුණා, ඒත් රසිකයෝ ඉල්ලපු නිසා DC එක ඒක ආපහු ගෙනාව. දැන් සීසන් 4ත් යනවා. Clone Wars කියන්නෙත් අවලංගු වෙලා ආපහු ආව ඒ වගේ කතාවක්. ඉතින් Spectacular Spider-Man කතාවටත් ආපහු එන්න පුළුවන්. ඒකට බාධා වුණොත් බාධා වෙන්නේ නීත්‍යානුකූල වැඩවලින් තමයි.

2. ඒක නීත්‍යානුකූලව කරන්න බෑ නේද?

බෑ. හැබැයි පුළුවන්. මෙහෙමයි, කලින් නම් අපි හිතාගෙන හිටියේ ඒක වෙන්න කොහෙත්ම අවස්ථාවක් නැහැ කියලා. ඒත් ළඟකදී ඉඳන් සෝනි එක සහ මාවල් එක අතර හොඳ සම්බන්ධතාවයක් දකින්න පුළුවන්. කොටින්ම කිව්වොත් එයාලා Spider-Man: No Way Home එකේ ස්පයිඩර්-මෑන්ලා තුන් දෙනාම ගේනවා නම් ඒ විදියට ගිවිසුමක් තියෙන්න ඕනේ. ඉතින් මෙයාලට ගිවිසුමක් ගහලා Spectacular Spider-Man ආයෙමත් අරගෙන එන්න කලින් කවදාවත් තිබුණට වඩා හොඳ අවස්ථාවක් තියෙනවා.

ස්පෙක්ටැකියුලර් ස්පයිඩර්-මෑන් 10වන සංවත්සරය

2018 මාර්තු 10 වෙනිදා මේ කාටූන් එකේ 10 වන සංවත්සරය වෙනුවෙන් කාටූන් එක හදපු අය එකට රැස් වුණා. ඒකෙදී බලාපොරොත්තු ඇති කරගන්න පුළුවන් දේවල් කීපයක්ම කියවුණා.

“It’s a character that’s very near and dear to my heart”

– Josh Keaton

[ස්පයිඩර්-මෑන් කියන්නේ මගේ හදවතට ඉතාම සමීප, මම ආදරය කරන චරිතයක්]

– ජෝෂ් කීටන් (පීටර් පාකර්ට හඬ කැවූ කෙනා)

ඉතින් මේක නිසා ආපහු කවදාහරි සීසන් 3ක් ආවොත් ජෝෂ් කීටන් ඒකේ ඉඳීවි කියලා හිතන්න පුළුවන්.

“I wish we could’ve done more seasons”

– Walter Gatus (Character Designer)

[මට හිතෙනවා අපට තව සීසන් කරන්න තිබුණා නම් කියලා]

 

“I hope that everybody continues to love the show… maybe one day

We’ll get a chance to do it again”

– Wade Wisinski (Line Producer)

[මම හිතනවා හැමෝම මේ ෂෝ එකට දිගටම ආදරේ කරාවි කියලා… සමහරවිට

දවසක අපට ඒක ආපහු කරන්න අවස්ථාවක් ලැබේවි]

“It’s been 10 years so it’s about time for more episodes, right?”

– Art Lee (Prop Designer)

[දැන් අවුරුදු 10ක්ම ගියා ඉතින් දැන් තව එපිසෝඩ්වලට කාලෙ හරි, නේ?]

“Let’s get a season 3 and 4 outta this!”

– Sean Galloway (Supervising Character Designer)

[අපි මේකෙන් සීසන් තුනකුයි හතරකුයි හදලා ගමු!]

ඉතින් මේ වගේ ගොඩක් දේවල් ඒකේ කියවුණා. ඉතින් අපට හිතන්න පුළුවන් පුංචිම හරි අවස්ථාවක් ලැබුණොත් Spectacular Spider-Man Season 3 හැදේවි කියලා.

සීසන් 3ට තිබුණු සැලසුම්

ඉතින් මම කලිනුත් කිව්වා වගේ 3වෙනි සීසන් එකකුත් හදන්න සැලසුම් තිබිලා තියෙනවා. ඉතින් වාසනාවට මගේ මට ඒවා හොයාගන්න පුළුවන් වුණා මේ Remarkage කියලා Blog එකකින්. ඉතින් එයාලට ස්තුතියි පළකරනවා මේ තොරතුරු ලබා දීම සම්බන්ධයෙන්. ඉතින් අපට සීසන් 3ක් ලැබුණා නම් මෙන්න මේවා ඒකේ වෙන්න ඉඩ තිබුණා කියලා Greg Weisman කියලා තියෙනවා:

චරිත

1. පීටර් පාකර්

· ස්පයිඩර්-ට්‍රේසර් (ලුහුබඳින් උපාංගයක්) හඳුන්වා දෙන්න තිබුණා.

· “වැදගත් කතාවකදී” ස්පයිඩර්-මෑන් එයාගේ දැල් විදින හදාගත්තේ කොහොමද කියලා පෙන්වන්න තිබුණා.

· වයිස්මන් සීසන් 3 හෝ 4දී ස්පයිඩර්-මොබියල් එක හඳුන්වලා දෙන්න තිබුණා.

· වයිස්මන්ට පීටර්ගේ දෙමව්පියන්ට සැලසුම් තිබුණා.

2. මේරි ජේන් වොට්සන්

· පීටර් සහ මේරි ජේන් විවාහ වෙන්න තිබුණා.

3. ෆ්ලෑෂ් තොම්ප්සන්

· ෆ්ලෑෂ්ගේ චරිතය තවත් වර්ධනය කරන්න තිබුණා.

· Amazing Spider-Man #8දී ෆ්ලෑෂ් සහ පීටර් අතර වෙන බොක්සින් සටන වයිස්මන්ට ගන්න ඕන වෙලා තිබුණා.

4. බෙටී බ්‍රෑන්ට් සහ නෙඩ් ලී

· බෙටී බ්‍රාන්ට් සහ නෙඩ් ලී ගේ සම්බන්ධය සීසන් 3දී වැදගත් එකක් වෙන්න තිබුණා.

5. කර්ට් කොනර්ස්

· සීසන් 3දී කර්ට් ඉලෙක්ට්‍රෝ වෙනුවෙන් බෙහෙතක් හදනවා ෆ්ලොරිඩාවෙදී.

6. එඩී බ්‍රෝක්

· එඩී රේවන්ක්‍රාෆ්ට් යන එක සීසන් 3දී දකින්න ලැබේවි.

· පීටර් වෙනම්ට එරෙහිව පාවිච්චි කරපු ජාන පිරිසිදුකාරකයෙන් වෙනම්ට මොනවත් වුණේ නෑ.

7. හැරී ඔස්බෝන්

· හැරීගේ උත්තේජක භාවිතය නිසා සීසන් 3දීත් තරඟයේ ජයග්‍රහණය ගැන තාමත් පරීක්ෂණ කරමින් පවතීවි.

8. රොඩ්රික් කින්ග්ස්ලි (කොමික්වල හොබ්ගොබ්ලින්)

· රොඩ්රික් කින්ග්ස්ලිට නිවුන් සහෝදරයෙක් ඉන්න පුළුවන්. (කොමික්වල වගේම)

· මෙයා කොමික්වලට වඩා වෙනස් විදියට සෙන්ට් සමාගමක් පවත්වාගෙන යන කෙනෙක් කළේ ලොකු සැලසුම් ඇතුව කියලයි කියන්නේ.

9. ක්‍රේවන් නම් දඩයක්කාරයා

· ක්‍රේවන් ගැන තිබූ සැලසුම් ජෝන් ජේමසන්ට (ජොනාගෙ පුතා) සම්බන්ධ ඒවා.

· ක්‍රේවන්ගේ වෙනස්වීම ගැන ලොකු සැලසුම් තිබිලා තියෙනවා.

10. කැලිප්සෝ

· කැලිප්සෝගේ චරිතය තවදුරටත් ගවේෂණය වෙන්නට තිබුණා.

මම මේකට පරිවර්තනය කළේ නැති චරිත කීපයක් තියෙනවා මේ එපිසෝඩ් එකේ කතාව ස්පොයිල් වෙන නිසා, නැත්නම් ඒවා එච්චර වැදගත් චරිත නොවන නිසා. ඉතින් ඔයාලට ඒවත් දැනගන්න කැමති නම් ඒ බ්ලොග් එක කියවලා බලන්න.

අලුත් හතුරෝ

ඔන්න ඉතින් දැන් අපට බලාගන්න පුළුවන් හඳුන්වලා දෙන්න හිටිය, ඒත් හඳුන්වලා දෙන්න ඉඩක් ලැබුණේ නැති හතුරෝ කවුද කියලා. මේ තොරතුරුවලට ආයෙමත් මම Remarkage blog එකට ස්තුතිවන්ත වෙනවා.

1. ස්කෝපියන්

· මෙයා සීසන් 3දී හඳුන්වා දෙනවා කියලා ස්ථිර කරලා තියෙනවා. ඒ කියන්නේ මම හිතපු විදිය හරි. මේ එපිසෝඩ්වලදී අපට නම කියනවා ඇහෙන ‘ගාගන්’ ඉදිරි එපිසෝඩ් එකකදී ස්කෝපියන් වෙන්න තිබුණා.

2. හොබ්ගොබ්ලින්

· කොමික්වල නම් මෙයා බවට පත් වෙන්නේ කලින් එපිසෝඩ්වල අපට හම්බවුණු රොඩ්රික් කින්ග්ස්ලි. මෙයත් සීසන් 3දී හඳුන්වා දෙනවා කියලා ස්ථිර කරලා තියෙනවා.

3. මෝබියස්

· ඉතින් මෙයත් හඳුන්වා දෙනවා කියලා ස්ථිර කරලා තියෙනවා. කොහොමද කියන එක හරියටම දන්නේ නැති වුණාට මට අනුමානයක් කරන්න පුළුවන්.

ඉතින් එපිසෝඩ් 13දී අපි දකිනවා කොනර්ස් පවුල ෆ්ලොරිඩාවලට යනවා. මේක කොමික් වල එහෙමම වෙච්ච දෙයක්. ඉතින් කොමික්වල නම් ඊළඟට සිද්ධ වුණේ ස්පයිඩර්-මෑන්ට අත් හයක් ඇවිල්ලා කර්ට් කොනර්ස් ළඟට යනවා ඒකට බෙහෙතක් හොයාගෙන. ඒ අතරතුරේදි තමයි කොමික්වල නම් මෝබියස් හම්බවෙන්නේ. මෝබියස් කියන්නේ වැම්පයර් කෙනෙක් වගේ එක්කෙනෙක්. 2022දී මෙයා ගැන Sony සමාගමෙන් චිත්‍රපටයකුත් එන්න සූදානම් කරලා තියෙනවා. ඉතින් ගොඩක් වෙලාවට මෝබියස්ව හඳුන්වාදෙන්න සැලසුම් කරලා ඇත්තේ මෙහෙම තමයි.

හඳුන්වා දෙනවා කියලා සහතික කරලා තියෙන අය මෙච්චරයි. කොහොම වුණත් සීසන් 2 අවසාන වෙනකොට අපට ගොඩක් චරිත හඳුන්වලා දුන්නා. කොමික්වල ඒ චරිත සුපර්විලන්ලා බවට පත්වෙනවා. පහළින් තියෙන්නේ ඒ ලයිස්තුව.

· මොරිස් බෙන්ච් – හයිඩ්‍රෝ-මෑන්
· හෝබි බ්‍රවුන් – ප්‍රවුලර්
· ස්ටැන් කාටර් – ද සින්-ඊටර්
· මැක් ගාගන් – ස්කෝපියන්
· ක්ලීටස් කෑසෙඩි – කානේජ්
· රොඩ්රික් කින්ග්ස්ලි – හොබ්ගොබ්ලින්
· මයිල්ස් වොරන් – ද ජැකල්

කතා සැලසුම්

1. වයිස්මන්ට ඕන කරලා තිබුණා සංගීතමය එපිසෝඩ් එකක් කරන්න.

2. හැම සීසන් එකේම වෙනස් වෙනස් සිනිස්ටර් සික්ස් එන්න තිබුනා.

3. පීටර් උපාධිධාරියෙක් වෙනකන් එපිසෝඩ් 65ක් සහ එතැන් සිට එයාගේ කොලේජ් වසරවල් DVD වලින් කියන්න වයිස්මන්ට ඕන කරලා තිබුණා.

4. Direct-to-DVD චිත්‍රපට එන්න තිබුණා.

ඉතින් මේ තියෙන තොරතුරු දිහා බැලුවාම කවදාහරි අපට සීසන් 3ක් ලැබෙන්න බැරි නෑ. ඉතින් කවදාමහරි අපට ඒක ලැබුනොත්, මම ඒවටත් උපසිරැසි හදන්නම්. මේ ස්පයිඩිගේ හොඳම කාටූන් එක ගැන ලියන ලිපිය ඉවර කරන්න කලින් පොඩි බලාපොරොත්තු දනවන දෙයක් තියෙනවා. මේක Twitter එක භාවිතා කරන කෙනෙක් සහ ග්‍රෙග් වයිස්මන් අතර වූ පොඩි සංවාදයක්. ඒක මෙහෙමයි:

User: “Every night I pray to the good lord above that this show gets finished and that u come back to write it.”

[හැම රෑකම මම උඩ ඉන්න දෙවියන්ට ප්‍රාර්ථනා කරනවා මේ ෂෝ එක හරියට අවසාන වේවා සහ ඔයා ඒක ලියන්න ආපහු පැමිණේවා කියලා]

ඉතින් මේකට ග්‍රෙග් වයිස්මන් පිළිතුරු දීලා තිබුණේ මෙහෙම:

Greg Weisman: 🙂

ඉතින් මේකෙන් කියවෙන්නේ සීසන් 3කුත් එන්න තියෙන බවද? නැත්නම් ග්‍රෙග් වයිස්මන්ට මේක දැකලා සතුටු හිතිලා මේ එයා ඒ සතුට පළ කරපු ආකාරයද? ඔයාලට කැමති දෙයක් හිතාගන්න පුළුවන්.

එහෙනම් දැන් මේ ලිපිය අවසාන කරනවා. The Spectacular Spider-Man කතා මාලාව මෙතනින් අවසානයි. හැමදාම කියනවා වගේ සිංහල උපසිරැසිය ගැන ඔයාලගේ අදහස යටින් කමෙන්ට් කරන්න. ඒවගේම ඔයා මේ කාටූන් සීරීස් එක ගැන හිතන දේත් කියන්න. එහෙම නම් ආයෙමත් මේ වගේ උපසිරැසියකින් හමුවෙමු. සුබ දවසක්.

 

 

 

 

Due to copyright issues, we do not provide any torrent links.

 

Subtitle Contributor Rank

NEW MEMBER
JOINING DATE – 2021-08-01
SUBMAKER RATING BY ADMINS