Friday , August 6 2021
Breaking News

Titanic: The Final Word with James Cameron (2012) Sinhala Subtitles | ටයිටැනික්, සියවස් සමාලෝචනය ජේම්ස් කැමරන් සමඟින් [සිංහල උපසිරසි]

Rating: 8.3/10. From 15 votes.
Please wait...

මෙවර මම උපසිරැසි ගෙන ආවේ ටයිටැනික් හා බැඳුනු තවත් වාර්තා වැඩසටහනකට. ඒ ටයිටැනික් නෞකාව මුහුදුබත් වීමෙන් පසු සියවස් සංවත්සරය නිමිත්තෙන් නැෂනල් ජියෝග්‍රැෆික් නාලිකාව ඔස්සේ විකාශනය කෙරුණු Titanic The Final Word With James Cameron (2012) වාර්තා වැඩසටහනයි. සුප්‍රකට සිනමා අධ්‍යක්ෂකවරයෙක් මෙන්ම ගවේශකයෙකු ද වන ජේම්ස් කැමරන් ලොව ප්‍රමුඛ පෙළේ ටයිටැනික් විශේෂඥයන් වන ඉංජිනේරුවන්, නාවික නිර්මාණශිල්පින්, ඉතිහාසඥයන්, චිත්‍රශිල්පින්, කණ්ඩායමක් සමඟින් මෙහිදී උත්සාහ කරන්නේ අදින් වසර 108 කට පෙර, එනම් මෙම වැඩසටහන විකාශය වීමට වසර සියයකට පෙර උතුරු අත්ලාන්තික් සාගරයේ ගිලි ගිය, ‘නොගිල්ලවිය හැකි නැව’ ලෙස විරුදාවලිය ලත් සුප්‍රකට ටයිටැනික් නෞකාව මුහුදුබත් වීමට බලපෑ සත්‍ය හේතුන් සහ එසේ ගිලීගිය ආකාරය ගැන සොයාබැලීමටයි. ඉතා රසවත් වාර්තා වැඩසටහනක් ලෙස මෙය නිර්දේශ කළ හැකියි.

ටයිටැනික් (1997) සිනමාපටය නිර්මාණයෙන් නො නැවතී, යාවජීව ටයිටැනික් රසිකයෙක් සහ ගවේෂකයෙක් ලෙස කැමරන්, ටයිටැනික් හා බැඳුනු අබිරහස් විසඳීමට දරණ ලද මේ ප්‍රයත්නය තරම් මහාපරිමාණ ගවේෂණයක් ඉන් පෙර කිසිදිනෙක සිදු කෙරී තිබුනේ නැහැ. උතුරු අත්ලාන්තික් සාගරයේ අඩි 12,000කට අධික ගැඹුරේ ටයිටැනික් ගිලුණු ස්ථානය වෙත 33 වතාවක් කිමිදී ඇති කැමරන්, ටයිටැනික් සත්‍ය නෞකාව තුළ ගතකළ තරම් කාලයක් එහි ගමන්කළ කිසිම මගියෙක් නෞකාව තුළ ගත කර නැහැ! ටෝනි ග්‍රෙබර්ගේ අධ්‍යක්ෂණයෙන් ඔපවත් වුණු මේ වාර්තා වැඩසටහන, මුල්වරට නැෂනල් ජියෝග්‍රැෆික් නාලිකාවේ විකාශය කළ දිනයේ මිලියන 1.7 කට වඩා වැඩි ප්‍රේක්ෂකයන් ගණනක් සජීවීව නරඹා තිබුණා. ඒ වගේම IMDb දර්ශකයේ 7.6/10 ක අගයක් ලබාගන්නට මෙම වාර්තා වැඩසටහන සමත්ව තිබෙනවා.

සත්‍ය ටයිටැනික් නෞකාව ගැන කතන්දරයෙන් මදක් බැහැරව 1997 නිර්මාණය වුණු ටයිටැනික් නෞකාව ගැන රසවත් තොරතුරු කිහිපයක් සලකා බලමු. මේ කරුණු එක්ක ලිපිය තරමක් දීර්ඝ වේවි. ටයිටැනික් සිනමාපටය නිර්මාණයෙන් වසර ගණනාවකට පසුවත් එහි නිරවද්‍යතාවය ගැන සොයාබැලීම් කිරීමේ දැඩි අවශ්‍යතාවයක් ජේම්ස් කැමරන් තුල තිබුණා. ඔහු එම සිනමාපටය නිර්මාණය කලේ 1996 වනවිට නෞකාව ගැන දැනසිටි සියලුම තොරතුරු හැකි උපරිම නිරවද්‍යතාවයෙන් යුතුව පිළිබිඹු කරමින්. කැමරන්ට ටයිටැනික් චිත්‍රපටය සඳහා අදහස ඇතිවුණේ ගිලුණු නැව් පිළිබඳව ඔහුගේ ඇති ආකර්ෂණය තුළිනුයි. ඛේදජනක නැවේ සුන්බුන් අධ්‍යයනය කළ ඔහුට, මෙහි සත්‍ය සිදුවීම සමගින් ආදර කතාවක් ප්‍රබන්ධ කර චිත්‍රපටයක් නිර්මාණය කළ හැකි නම්, මේ මහා ඛේදවාචකය ගැන ලෝකයාට වඩා තීව්‍රව දැනෙන ලෙස ඉදිරිපත් කළ හැකි බව හැඟුණා. ඒ සඳහා අගනා පිටපතක් ඔහු විසින්ම රචනා කළා. වඩා තාත්විකව ටයිටැනික් අත්දැකීම ප්‍රේක්ෂකයන්ට දායාද කරන්නට අතිශය නිවැරදි, ජීවමාන පසුතල දර්ශන ඉදිකිරීමට අවශ්‍ය බව කැමරන් කල්පනා කළා. ඒ වෙනුවෙන් සැලසුම් කර ඉදිකෙරුණු දැවැන්ත දර්ශන තල සිනමා ඉතිහාසයේම විස්මයජනක ඉදිකිරීම් අතරින් එකක් ලෙස සැළකිය හැකියි. ඒ වෙනුවෙන් මෙක්සිකෝවේ රෝසරිටෝ වෙරළාසන්නව Baja Studiosට අයත් අක්කර 40ක පමණ භූමියක දැවැන්ත තටාකයක් ඉදිකෙරුණු අතර, එය තුළ සත්‍ය ටයිටැනික් නෞකාවේ සැබෑ ප්‍රමාණයෙන් 90%ක පමණ විශාලත්වයෙන් යුතුවන, දැවැන්ත ආකෘතියක් ද ඉදිකළා.

ටයිටැනික් චිත්‍රපටය වෙනුවෙන් මෙක්සිකෝවේ වෙරළාශ්‍රිතව ඉදිකළ දැවැන්ත ආකෘතිය. නැවේ ඉදිකෙරුණු දකුණු පස(වමේ) සහ නොපෙනෙන වම්පස (දකුණේ)

කාලවේලාව සහ වියදම් පාලනය ගැන සැළකිලිමත් වූ නිසා නැවේ දකුණු පස (Starboard Side) පමණක් නිර්මාණය කර තිබුණු අතර වම් පස දර්ශන සඳහා එම රූපරාමු ම පාර්ශ්වික අපවර්තනය කර, එනම් වම දකුණ මාරු කර සකසා ගනු ලැබුවා. ඒ ආකාරයට නිෂ්පාදකයන්ට ඩොලර් මිලියන ගණනක් ඉතිරි කරගත හැකිවුණු බවයි අධ්‍යක්ෂක කැමරන් පවසන්නේ. සත්‍ය වශයෙන්ම සවුත්හැම්ටන් වරායේ ටයිටැනික් නවතා තිබුනේ එහි වම්පස (Portside) වරාය දෙසට වන්නට වුවද, රූගත කෙරුණේ ආකෘතියේ දකුණු පැත්ත වරාය සිටින දෙසට වන්නටයි. චිත්‍රපටයේ ආරම්භයේදී, නැව දියත් කිරීමට ආසන්න අවස්ථාවේ පෙන්වන දර්ශන එළෙස රූගත කර පසුව පාර්ශ්වික අපවර්තනය කර ඇති අතර, ඒ වෙනුවෙන් එහි දැක්වෙන නාමපුවරු සහ ඇඳුම් වල සටහන් වුණු නම් ද වම දකුණ මාරු කරමින් නිර්මාණය කර තිබුණා. ආරම්භක ජවනිකා වල රෝස්ගේ මුහුණේ වම්පස තිබුණු කුඩා ලපය අනෙක් දර්ශන වලදී දකුණට මාරු වී තිබීමේ අබිරහස අපට විසඳා ගත හැක්කේ ඒ ආකාරයටයි!

1912 ආරම්භක ජවනිකා වෙනුවෙන් වම දකුණ මාරු වන ලෙස සැකසු නාමපුවරු සහ ඇඳුම් නිර්මාණ

වෙරළාශ්‍රිතව ආකෘතිය ඉදිකිරීමට හේතු වුණේ නැවේ ලබාගන්නා දර්ශන වලට මුහුද පසුබිමක් වන පරිදි රූගත කිරීමේ පහසුව නිසායි. එය ඉතා නිරවද්‍යව ඉදිකිරීමට කැමරන්ට අවශ්‍ය වුණු නිසා, ආකෘතිය නිර්මාණයට සැබෑ ටයිටැනික් නැවේ ඉදිකිරීම් කළ හාලන්ඩ් සහ වුල්ෆ් සමාගමේ සැළසුම් පාදක කරගනු ලැබුවා. එම ඉදිකිරිම තුළම ජැක් සිරගත කර තැබුණු කාමරය ඇතුළුව නෞකාවේ තවත් පසුතල කිහිපයක් ඉදිකෙරුණු අතර, නැවේ අනෙක් අභ්‍යන්තර දර්ශන වෙනත් ස්ථාන වල සැකසූ දර්ශන තල වල රූගත කරනු ලැබුවා. මේ මහාපරිමාණ ආකෘතියට අමතරව වෙනත් විවිධ දර්ශන සඳහා කුඩා ප්‍රමාණ ටයිටැනික් අනුරු ගණනාවක් යොදාගනු ලැබුවා. ගිල්වීමේ ජවනිකා සඳහා යොදාගත් නැවේ අවර පෙති නළු නිළියන්ගේ ආරක්ෂාව වෙනුවෙන් රබර් වලින් සාදා තිබුණා. වෙරළේ සුළං හමන දිශාව සළකා නැවේ දුම් බට තුළින් යන දුම නැව ඉදිරියට ධාවනය වෙන ලෙස පෙනෙන පරිදි පසුපසට හමාගෙන යන ලෙස සැකසීමට ද ඔවුන්ගේ අවධානය යොමුවුණා. සත්‍ය ටයිටැනික් නෞකාවේ ඉදිරියේ සිට සිව්වන දුම්බටය බොයිලේරු හා සම්බන්ධ නොවුණු අතර හුදෙක් අලංකාරය වෙනුවෙන් නැවට එක්කරන ලද්දක් වුණා. චිත්‍රපටය වෙනුවෙන් නිර්මාණය කළ ආකෘතියේද එළෙස දුම් පිට නොවන ලෙස සිව්වන බටය නිර්මාණය කර ඇති බව හොඳින් බැලුවොත් ඔබට දකින්න ලැබෙනු ඇති.

වම්පස ඇත්තේ ටයිටැනික් සවුත්හැම්ටන් වරායෙන් පිටවන අවස්ථාවේ ඡායාරුපයක්. එය චිත්‍රපටය සඳහා ප්‍රතිනිර්මාණය කළ අන්දම දකුණු පස පින්තුරයෙන් දැක්වේ.

නැව ගිලි යද්දී එය විනාශ වන ආකාරය නිර්මාණය කිරීමට මුළුමනින්ම පරිගණක ආශ්‍රිත දෘෂ්‍යකරණ යොදාගැනීමට කැමරන් එතරම් කැමැත්තක් නො දැක්වූ නිසා , චිත්‍රපටයේ අවසන් ජවනිකා කිහිපය වෙනුවෙන් එම දැවැන්ත ආකෘතිය ආනත කරමින් සහ පහත් කරමින් ජලයේ ගිල්විමට හැකි පරිදි විශාල යාන්ත්‍රණයක් තටාකය තුළ සකස් කෙරුණා. නැවේ අවරය හෙවත් පසුපස කොටස වෙනමම සකස් කෙරුණු අතර එහිද ආනතිය වෙනස් කළ හැකි ලෙස සහ මුළුමනින්ම ජලය තුළට ගිල්විය හැකි ලෙස සකසනු ලැබුවා. සියගණනක් නළු නිළියන් සමඟින් රූගත කරන අතර දැවැන්ත දර්ශන තලය ක්‍රමිකව ජලයේ ගිල්විමේ අවශ්‍යතාවය ඉටුකර ගැනීමේදී ටයිටැනික් චිත්‍රපට කාර්ය මණ්ඩලය ආරක්ෂාව පිළිබඳ අගනා පුර්වාදර්ශයක් සපයා තිබෙනවා.

නැව ගිලෙන දර්ශන රූගත කිරීමේදී, දර්ශන තල බොහෝ දුරට විනාශ වී යාමට ඉඩ ඇති නිසා සියල්ල එක්වර නිවැරදිව රූගත කිරීමේ අභියෝගාත්මක වාතාවරණයකට මුහුණදීමට එයට සම්බන්ධ වූ රංගන සහ තාක්ෂණික ශිල්පින්ට සිදුවුණා. කෙසේ හෝ අවසන් ජවනිකා කිහිපය රූගත කළ පසුව ටයිටැනික් පසුතල වලට බෙහෙවින් හානි වූ නිසා සංරක්ෂණය කළහැකි මට්ටමක නොතිබුණු හෙයින් එය මුළුමනින්ම ගලවා ඉවත් කෙරුණු අතර එසේ විනාශ නොවුණු ඇතැම් දර්ශන තල සංරක්ෂණය කර ටයිටැනික් අනුස්මරණ කෞතුකාගාර වල තැන්පත් කරනු ලැබුවා. මා විසින් මීට පෙර උපසිරැසි නිර්මාණය කළ Titanic 20 Years Later with James Cameron (2017) වාර්තා වැඩසටහනේ මේ පිළිබඳව තොරතුරු ඇතුළත් වුණා.

නැවේ එන්ජින් කාමරයේ දර්ශන රූගත කිරීම වෙනුවෙන්, 1944 දී නිපදවනු ලැබූ SS Jeremiah O’Brien නෞකාවේ එන්ජින් කාමර යොදාගනු ලැබුවා. ඒ මෙම නෞකාවේ එන්ජින් කාමරය ටයිටැනික් නෞකාවේ එන්ජින් කාමරයට බෙහෙවින් සමාන වුණු නිසයි. එහෙත් ටයිටනික්ට වඩා මෙහි එන්ජින් වල විශාලත්වය තුනෙන් පංගුවක් පමණ වුණා. මෙහි කුඩා පරිමාණ විදුලි බුබුළු සහ වෙනත් කොටස් එක්කරනු ලැබුවා. පසුව ඊට පරිමාණයට අනුව කුඩා කළ මිනිස් රූප සහ සත්‍ය නෞකාවට අදාළ වෙනත් පසුතල පරිගණක තාක්ෂණයෙන් ආදේශ කෙරුණා. කුඩා පිස්ටන් වලට බර ගතියක් එකතු කිරීමට සීග්‍ර රූපරාමු මාලාවකින් පටිගත කර තරමක් මන්දගාමී ස්වරූපයට වීඩියෝ සකසනු ලැබුවා. තෙමහල් ගොඩනැඟිල්ලක් තරම් විශාල වන ටයිටැනික් එන්ජින් චිත්‍රපටය වෙනුවෙන් සජිවිකරණය කෙරුණේ ඒ ආකාරයටයි.

SS Jeremiah O’Brien නෞකාව (වමේ) සහ එහි එන්ජින් රූගත කර චිත්‍රපටය වෙනුවෙන් ප්‍රතිනිර්මාණය කළ ටයිටැනික් වාෂ්ප එන්ජින් කාමරයේ දර්ශනයක් (දකුණේ)

1995 දී උතුරු අත්ලාන්තික් සාගරයේ ගැඹුරු මුහුදේ කෙරුණු ගවේෂණයකින් පසුව ලබාගත් ගිලුණු නැවේ වීඩියෝ දර්ශන චිත්‍රපටය වෙනුවෙන් යොදාගැනීමට කැමරන් පියවර ගත්තා. එළෙස ලබාගත් දිය යට දර්ශන වලට අමතරව, සිනමාපටය සඳහා ඇතැම් දිය යට දර්ශන නිර්මාණය කෙරුණේ දුමින් පුරවා, ඉතා අවම ලෙස ආලෝකවත් කළ අඳුරු කාමරයක් තුළ ස්ථානගත කළ, ගිලී දිරාගිය නෞකාවේ කුඩා ප්‍රමාණ අනුරුවක් භාවිතා කරමිනුයි. වඩා පහසුවෙන් කැමරා චලන සහ ආලෝකකරණ කටයුතු කිරීමට සුන්බුන් නැවේ කුඩා ආකෘතිය යටිකුරු කර සිවිලිමේ සවිකර රූගත කිරීම් ද සිදුකලා. අතිශය ගැඹුරු සාගර පතුළේ රිසි ලෙස ලබාගත නොහැකි ස්ථාන රූගත කිරීමට සජීවී ප්‍රමාණයේ සුන්බුන් නැවේ කොටස් ද සාදා ඒවා තටාකයක ගිල්වා ඒවායේ ද රූගත කිරීම් කෙරුණා. මේ සියලු දර්ශන එකකට එකක් ළඟින් ඡේදනය වන රූපරාමු නිසා තාක්ෂණික ශිල්පීන්ට අභියෝගාත්මක වුණේ ඒවායේ පැහැදිලි වෙනසක් නොවන සේ සකස් කරගැනීමටයි. ටයිටැනික් වල සුළු රූපරාමුවක් වුවත් කෙතරම් අභියෝගාත්මක වූවාද යන්න ඔබට සිතාගැනීමට මේ තොරතුරු ප්‍රමාණවත් ඇතැයි මම සිතනවා.

ටයිටැනික් චිත්‍රපටයේ රෝස්ගේ සුප්‍රකට සිතුවම ඔබට මතක ඇතැයි මම සිතනවා. චිත්‍රපටය අනුව එය නිර්මාණය කරන්නේ ජැක් ඩෝසන්. ඒ චරිතය නිරුපණය කරන්නේ ලියනාඩෝ ඩිකැප්‍රියෝ. ලියනාඩෝ චිත්‍ර ශිල්පියෙක් නොවන බව දන්නා ප්‍රේක්ෂකයන් ඒ කිසියම් වෙනත් චිත්‍ර ශිල්පියෙක් විසින් කළ සිතුවමක් ලෙස සිතුවා. එහෙත්, රෝස්ගේ නග්න සිතුවම ද ඇතුළත්ව ජැක්ගේ සියලු සිතුවම් නිර්මාණය කලේ, ජැක් ඩෝසන් චරිතය නිර්මාණය කළ අධ්‍යක්ෂක ජේම්ස් කැමරන් විසින්ම බව ඔබ දන්නවාද? චිත්‍රපටයේ රෝස්ගේ සිතුවම නිර්මාණය කරන ලෙස පෙන්වන්නේ අධ්‍යක්ෂක කැමරන්ගේම දෑතයි.

ටයිටැනික් ගිලියාමේ රූගත කිරීම් අතරතුර අධ්‍යක්ෂක කැමරන්, නළු නිළියන්ට කිසිසේත්ම දර්ශන තලයෙන් ඉවත්ව යාමට ඉඩක් ලබා නොදුන් බවත්, මුළු කාලය තුලම කැමරන් තදබල ආතතියකට මුහුණ දෙමින් අධ්‍යක්ෂණ කටයුතු වල නිරත වුණු බවත් කේට් වින්ස්ලට් පසුව මාධ්‍යයට පවසා සිටියා. සත්‍ය ටයිටැනික් නැව ගිලි ගිය රාත්‍රියේ මුහුදු ජලයේ උෂ්ණත්වය කෙතරම් අඩු වූවාද යත් මගීන් ශීතලෙන් මිදී මියයාමට ලක්වුණු බව අපි දන්නා කරුණක්. චිත්‍රපටය වෙනුවෙන් එම ඉතා අඩු උෂ්ණත්වය වඩා තාත්විකව රංගන ශිල්පින් තුලින් පිළිබිඹු කරන්නට එම තටාකයේ ජලය හිතාමතාම ශීතලව තබාගන්නට ඔවුන් උත්සහ දරා ඇති අතර, ශීත ජලයේ බොහෝ වෙලාවක් රූගත කිරීම් කළ නිසා නළු නිළියන් විවිධ රෝගාබාධ වලටද ලක්වී තිබෙනවා.

මෙතරම් දැවැන්ත ප්‍රයත්නයක් යොදා කළද, ටයිටැනික් චිත්‍රපටය අසාර්ථක වනු ඇති බවට එහි නිෂ්පාදකයන් සැක කළා. ඇතැම් අවස්ථා වලදී කැමරන් පවා සිතුවේ ඩොලර් මිලියන 200 ක සුපිරි නිෂ්පාදන වියදමකින් තැනුණු පැය තුනක් පමණ දිගු චිත්‍රපටය නිසා ස්ටුඩියෝව පාඩු ලබනු ඇති බවයි. එහෙත් එය ලොවපුරා තිරගත වෙද්දී, එතෙක් පැවති සියලු ආදායම් වාර්තා බිඳ හෙළමින් ඩොලර් බිලියන 2 ක ආදායම ඉක්මවූ ලොව පළමු සිනමාපටය බවට පත්වූවා පමණක් නොව,1997 සිට 2009 දක්වා සිට පුරා 12 වසරක් තිස්සේ ලොව ඉහළම ආදායම ලද සිනමාපටය ලෙසත් වාර්තාගත වන්නට ටයිටැනික් සමත් වුණා. ඔස්කා සම්මාන 14කට නිර්දේශ වී ඉන් 11ක් ම දිනාගන්නටත්, ගෝල්ඩන් ග්ලෝබ් සම්මාන 04ක් ඇතුළුව තවත් සම්මාන ගණනාවක් දිනාගන්නට ද ටයිටැනික් සමත් වුණා. ටයිටැනික් නරඹන අතර ඔබ මොහොතකට කල්පනා කර බැලුවාද චිත්‍රපටයේ ඔබ නරඹන සෑම මිනිත්තුවක් සඳහාම ඩොලර් මිලියනයක් බැගින් (ඊට තරමක් වැඩි ගණනක්) නිෂ්පාදකයින් විසින් වැය කර ඇති බව?

එසේනම් Titanic The Final Word With James Cameron (2012) දැන් ඔබට සිංහල උපසිරැසි සමඟින් රස විඳිය හැකියි. මට මතක ඇති අන්දමින් මේ මගේ හැට වන උපසිරැසි නිර්මාණයයි. ප්‍රමාණවත් තරම් සීඩ්ස් ඇති 720p පිටපතක් නොතිබූ හෙයින් මා මෙහි සිංහල උපසිරැසි සපයා ඇත්තේ T i t a n i c . T h e . F i n a l . W o r d . W i t h . J a m e s . C a m e r o n . 2 0 1 2 . 1 0 8 0 p . B l u R a y . H 2 6 4 . A A C – R A R B G   [ 1 . 8 4   G B ] පිටපතට වන අතර මෙම නමින් ගූගල් සෙවුමක් කර පිටපතේ ටොරන්ට් එකක් ඔබට සොයාගත හැකිවනු ඇති. එසේ නම් යළිත් උපසිරැසියකින් හමුවන තුරු ඔබට ආයුබෝවන්! තෙරුවන් සරණයි!

 

 

Due to copyright issues, we do not provide any torrent links.

ලබා දී ඇති උපසිරසිය Blu-Ray පිටපත් සඳහා අදාළ වේ.

 width=

මේ ලබා දී ඇති සිංහල උපසිරැසි පිළිබද “ප්‍රබුද්ධ කේ්‍සර විතානගේ” සොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank

BRONZE MEMBER
JOINING DATE – 2016-02-26
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.

Check Also

Batman: The Long Halloween Part Two (2021) Sinhala Subtitles | දිගු හැලෝවීනය කෙසේ අවසන් වෙයිද? [සිංහල උපසිරසි]

කොහොමද, යාලුවනේ? මෙන්න එහෙනම් DC ෆෑන්ස්ලා එනකන් බලන් හිටිය චිත්‍රපටය අරගෙන ආවා. DCEU එක කෙසේ …

Leave a Reply to charith harshana Cancel reply

Your email address will not be published.

17 comments

  1. ජේම්ස් කැමරන් ගේ

    The Abyss 1989

    ෆිල්ම් එකටත් සබ් දෙන්න පුලුවන්ද?

  2. බොහොම ස්තූතියි සිංහල උපසිරැසියට. ජය෴෴ 😛 😛

  3. Thanks for the sub

  4. Buddhika Lakmal

    බොහෝම ස්තූතියි උපසිරැසියට… ලිපිය කියෙව්වමත් ඇති වගේ…. good work machannn… thankssssssssss

  5. Sangeeth Samarasinghe

    lipiya Godak Watinawa.. Thanks for sub

  6. thanks..

  7. charith harshana

    ලිපියට ස්තුතියි

  8. lipua maruuuuuuuuuuuuu

  9. නියම විස්තරයක්.
    සබට තුති වේවා!!

  10. … ගොඩක්ම ස්තූතියි. …
    ඔබට සහ ඔබ පවුලේ සැමට
    තෙරුවන් සරණ ලැබේවා..!
    Request :
    Run Hide Fight (2020) – IMDb
    The White Tiger (2021)

  11. ගොඩක් ඉස්තුති දිගටම වාර්තා චිත්‍රපටි වලට උපසිරසි දෙන්න.

  12. බොහෝම ස්තුතියි මෙවැනි වාර්ථාමය වැඩසටහන් වලට සබ් දෙන එකට. එකේන් අපිට ලොකු දැනුමක්, අවබෝධයක් ලැබෙනවා චිත්‍රපටියක් නරබනවට වඩා. ඔබට නැවතත් බොහෝම ස්තුතියි. පුළුවන් නම් The Tesla Files , Hunting Hitler , වගේ ඒවටත් සබ් දෙන්න පුළුවන් නම් නිය්මයි

  13. උපසිරැසියට බොහොම ස්තූතියි සහෝ.

    හැකිනම් Robert Liebermain අධ්‍යක්ෂණය කරපු
    Titanic – 1996 ෆිල්ම් එකටත් උපසිරැසි දෙන්න පුලුවන්ද? Yts සයිට් එකේ Bluray පිටපත තියනවා.

  14. මේ වගේ වාර්තා වැඩසටහන් වගේම මහන්සි වෙලා ලියන විස්තර සාමාන්‍ය චිත්‍රපටි දෙක තුනක් තරම් වටිනවා. ප්‍රබුද්ධ සහෝ කවදත් ගේන්නේම ඒ වගේ උපසිරස නිර්මාණ.
    බොහොම ස්තුතියි.❤️
    ජය ✌

  15. Supun Kaushalya

    තෑන්ක්ස් සහෝ මේ වගේ ඒවට සබ් කරන එක ගොඩක් වටිනවා

  16. සබ් එකට බොහොම ස්තූතියි සහෝ….!

  17. අචින්ත

    ලිපිය කියෙව්වෙත් ඇති වගේ..
    බොහෝම ස්තුතියි මචෝ මහන්සියට
    පට්ට වැඩක් අනිවා බලනවා.

error: Alert: Content is protected !!