Eyes Wide Shut (1999) | ශෘංගාර රාත්‍රියක අතරමංවී. (18+) [සිංහල උපසිරැසි සමඟ]

බිල් හාෆඩ් නිව්යෝර්ක් නගරයේ ජීවත් වන කඩවසම් තරුණ වෛද්‍යවරයෙක්. ඔහු තමන්ගේ සුරූපී බිරිඳ සහ කුඩා දියණිය එක්ක ජීවත් වෙන්නේ සුඛෝපභෝහී මහල් නිවසක. ඔවුන් ඇසුරු කරන්නේ සමාජයේ ඉහළ පැළැන්තියේ ප්‍රභූවරුන්.දොස්තර බිල්ගේ මේ සුන්දර ලෝකය කැළඹීමට ලක් වෙන්නේ දිනක් රාත්‍රියේ ඔහුගේ බිරිඳ සිදු කරන හෙළිදරව්වක් සමගින්. එනම් වෙනත් පුරුෂයෙක් පිළිබඳව ඇය තුළ වසරකට පෙර ඇති වූ කාමුක සිතුවිල්ලක්. මින් කම්පනයට පත් වන ඔහු මහ රෑ නිව්යොර්ක් නගරය තුළ ඇවිද යන්නේ කෝපය, ඊර්ෂ්‍යාව සහ පළිගැනීම මුසු වූ මානසික තත්වයකින්. එහිදී ඔහු ලිංගිකත්වය හා බැඳුණු සිදුවීම් පෙළකට මුහුණ දෙනවා. මේ සිහිනයක් බඳු වූ රාත්‍රිය කෙළවර වෙන්නේ එක්තරා රහසිගත ප්‍රභූ සංගමයක් විසින් පවත්වනු ලබන කාම සාදයකට ඔහු අනවසරයෙන් ඇතුළු වීමෙන්.
කෙටියෙන් පැවසුවොත්, Eyes Wide Shut චිත්‍රපටයේ තේමාව වන්නේ විවාහක පිරිමින් සහ ගැහැනුන් තුළ තම සහකරුවා කෙරෙහි ඇති ඇල්මත්, විවාහයෙන් පරිබාහිර ලිංගික සම්බන්ධතාවන් ඇති කරගැනීමට ඇති ආශාවත් අතර දෝලනය වෙමින් පවතින මානසික ඝට්ටනය කිව්වොත් නිවැරදියි.

Eyes Wide Shut කියන්නේ සිනමා ලෝලීනට ආකාර කිහිපයකින් විශේෂිත වූ නිර්මාණයක්. ඉන් එකක් තමයි මෙය 2001: A Space Odyssey (1968), Full Metal Jacket (1987), The Shining (1980) වැනි නිර්මාණ ලොවට දායාද කළ Stanley Kubrick නම් වූ සුප්‍රකට සිනමාවේදියාගේ අවසන් නිර්මාණය වීම. මෙහි අවසන් සංස්කරණය වෝනර් බ්‍රදර්ස් සමාගමට භාර දී දින පහකට පසු ඔහු මෙලොවින් සමුගත්තා. ඔහු මේ සඳහා පාදක කරගෙන ඇත්තේ 1926 දී පළ වූ Dream Story නම් වූ නවකතාවක්. ඔහු එම කථාවේ අයිතිය 1960 ගණන් වලදී ලබා ගෙන ඇතත් චිත්‍රපටය නිර්මාණය වීම 90 දශකය දක්වා යටපත් වී තිබෙනවා.

තවත් විශේෂත්වයක් තමයි මෙහි වෛද්‍ය බිල් හාෆඩ් සහ ඔහුගේ බිරිඳ ලෙස රඟපාන සුපිරි හොලිවුඩ් තරු යුවලක් වන Tom Cruise සහ Nicole Kidman මෙම චිත්‍රපටය රූ ගත කල අවධියේදී සැබෑ ජීවිතයේද එකිනෙකා හා විවාහ වී සිටීම. එය ඔවුන් දෙදෙනා මෙහි සිදු කරන අනර්ඝ රංගනය සඳහා නිසැකවම රුකුලක් වෙන්නට ඇති. මෙය අනිවාර්යයෙන්ම ඔවුන් දෙදෙනා සිය වෘත්තීය ජීවිතය තුළ ඉදිරිපත් කර ඇති හොඳම රංගනයන්ගෙන් එකක් වන බව මෙය නරඹන විට ඔබට වැටහෙනු ඇත.

ඊට අමතරව මෙම චිත්‍රපටය නොකඩවා වැඩිම දින ගණනක් තිස්සේ රූ ගත චිත්‍රපටය ලෙස ගිනස් වාර්තාවක් ඉසිලීමත් විශේෂත්වයක්. එනම් දින 400ක්. සර්ව සම්පූර්ණවාදියෙකු (Perfectionist) ලෙස ප්‍රකට කුබ්‍රික් විසින් මෙහි තිර පිටපත රූගත කිරීම් අතරතුර නැවත නැවත ලිවීමත්, එකම දර්ශනය තමන් සැහීමට පත්වන තුරු නැවත නැවත රූ ගත කිරීමට පෙළඹීමත් මීට හේතු වී තිබෙනවා.

මිනිසුන්ගේ ලිංගිකත්වය හා බැඳුණු මානසික තත්වයන් මනාව විවරණය කරන අපූරු සිනමා කෘතියක් වන මෙය ඔබ ඉතා සංයමයෙන් හා අවධානයෙන් යුතුව නැරඹිය යුත්තක් බව නම් සඳහන් කළ යුතුමයි.

702 MB කොපිය මෙතනින් බාගන්න

992 MB කොපිය මෙතනින් බාගන්න

මේ ලබා දී ඇති සිංහල උපසිරැසි පිළිබද “rum2550” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.