Friday , May 29 2020
Breaking News

අපගේ සම්පත් දායකයෙකු ලෙසින් අප සමඟ එක්වන්න ඔබටත් ඉඩක්…

බයිස්කෝප් සිංහලෙන් අඩවියට නිතර ඇවිල්ලා යන ඔබටත් දැන් පුළුවන් අපිත් එක්ක එකතු වෙන්න. මුලින්ම කියන්න ඕන අප විසින් කිසිදු ගෙවීමක් කරන්නෙ නැහැ මේ වෙනුවෙන්. අප වෙබ් අඩවිය තුලින් උපසිරැසි ලබාදීම සහ ඔබව අපගේ සම්පත් දායකයෙකු ලෙසින් බඳවා ගැනීම යන සියල්ලම නොමිලේ සිදුවන කටයුත්තක්. ඒ සඳහා ඔබට මුලිකවම ඉංග්‍රිසි හෝ දෙවැනුව හින්දි, දමිළ, මලයාලම්, තෙළිඟු, කන්නඩ, කොරියන් ආදී විවිධ භාෂාවන්හි දැනුමක් තියනවනම්, ඔබ බලපු, ඔබේ සිත් ඇද ගත්ත, ලස්සණ ෆිල්ම් එකක් හෝ ටීවී සිරිස් එකක් තියනවනම්, ඒක හැමෝමත් එක්ක සිංහල උපසිරැසි සමඟ බෙදාහදා ගන්න කැමතිද?

එහෙමනම් කරන්න තියෙන්නේ ඔබ රසවිඳපු ඒ ෆිල්ම් එකේ නම සබ්ජෙක්ට් එක ලෙසින් යොදා [email protected] වන අපගේ නිල විද්‍යුත් ලිපිනයට එම සිනමාපටය වෙනුවෙන් උපසිරැසි ගැන්වීමට ඔබට හැකිදැයි අසා ඊ මේල් පණිවුඩයක් යොමු කරන්න. ඉන්පසුව ඊට අපගෙන් ලැබෙන පිළිතුර අනුව කටයුතු කරන්න. කිසිම විටෙක අපගෙන් එසේ නො-විමසා තම හිතු මනාපයට සිනමාපට තෝරාගනිමින් උපසිරැසි ගැන්වීම් සිදු නොකරන්න. මක්නිසාදයත් ඒ වනවිටත් අප ඒ වෙනුවෙන් උපසිරැසි ගැන්වීම වෙනත් අයෙකුට බාරදී තිබුණහොත් ඔබ විසින් අපෙන් නොවිමසා සිදුකල උපසිරැසිය වෙබ් අඩවියේ පලකිරීමට අපට සිදු නොවනු ඇති බැවිනි. ඉංග්‍රිසි උපසිරැසිය සිංහලට පරිවර්තනය කර ඒ උපසිරැසි ගොණුව සමඟ, දැනට වෙබ් අඩවියේ පළවී ඇති ආකාරයේ ලිපියක් ලියල පහළ තියන ඊමේල් ලිපිනයට එවන්නයි (උපසිරැසි යොදන ආකාරය පිළිබඳව විස්තර මෙතනින් බලන්න). නමුත් වෙබ් අඩවියට උපසිරසි කරුවෙක් විදියට ඇතුලත් කර ගන්නවාද නොගන්නවාද අවසන් තීරණය ඇඩ්මින් මඩුල්ල සතු බව සලකන්න. කිසිදු විටෙක ගූගල් ට්‍රාන්ස්ලේට් වැනි දෑ භාවිතා කරමින් උපසිරැසි පරිවර්තන කටයුතු සිදුනොකරන්න. එවැනි දෑ භාවිතා කරමින් එවන උපසිරැසි අප විසින් භාරගනු නොලැබේ.

ලිපියක තියෙන්න ඕනා කරුණු ගැනනම් දැනට අඩවියේ පළවී තියන ලිපියක් බැලුවාම තේරෙනවනේ. ඒ විදියට තිබුනාම ඇති. හැබැයි ලිපියක් ලියන්න, උපසිරැසි පරිවර්තනය කරන්න කලින් සලකා බැලියයුතු කරුණු කීපයක් නම් තියනවා.. ඒවා තමයි.

  • අදාල ෆිල්ම් එකට හොඳට සීඩ් තියන ටොරන්ට් එකක් තියෙනවද බලන්න.
  • නිතරම අන්තර්ජාලයේ පවතින BR, Web හෝ HD පිටපත් සඳහාත්, ඊට අමතරව යම් සිනමාපටයක Extended පිටපතක් නිකුත් වී ඇත්නම් අනිවාර්යෙන්ම ඒ සඳහාත් උපසිරැසි ගැන්වීමට ක්‍රියා කරන්න.
  • දැනට අප වෙබ් අඩවියේ අදාළ සිනමාපටය හෝ රුපවාහිනී කතා මාලාව වෙනුවෙන් සිංහල උපසිරැසියක් පළවෙලා නැති බවට Search box එකෙන් හොයලා සහතික කර ගන්න.
  • ඔබ උපසිරැසි යොදන්න බලාපොරොතුවෙන චිත්‍රපටය වෙනත් කෙනෙක් බාරගෙනද යන වග අනිවාර්යෙන්ම අපෙන් විමසා දැනගන්න.
  • චිත්‍රපට සඳහා ඔබ උපසිරැසි කරන්න ගන්න විට නිතරම තෝරාගන්න සැලකිලිමත් වෙන්න, විනාඩී 30ට වඩා ධාවන කාලයක් ඇති චිත්‍රපට සහ උපසිරැසි ලයින් 300 ට වඩා ඇති චිත්‍රපට පමණක්.
  • තනි තනි වශයෙන් කෙටි චිත්‍රපට ලබාදෙන එක අප සීමා කර ඇත. ඒ නිසා ඔබ අපට කෙටි චිත්‍රපට වලට උපසිරැසි නිර්මාණය කර එවන්නේ නම් එවන් චිත්‍රපට දෙකක් හෝ තුනක් එකවර එවන්න. එවිට ඒ සියල්ල එක් පෝස්ට් එකක් ලෙස අප පළකරන්න සූදානම්. එවිට අපගේ ගණනයන්වලදී එය එක උපසිරැසියක් ලෙස ගණනය වේ.
  • දෙදෙනෙකු එකතු වි උපසිරසි පරිවර්තනයක් සිදු කරන්නේ නම් එම උපසිරසියේ අවම වශයෙන් ලයින් 1500ක් තිබිය යුතුය.
  • උපසිරැසි පරිවර්තනයේදී එහි ඇති Idioms, Slang Words, Phrase සහ Military Vocabulary පිළිබඳව දැඩි අවධානයක් යොමු කරන්න.
  • නිතරම සිනමාපටයේ එන සිදුවීමට ආසන්නතම හැඟීම එන පරිද්දෙන් උපසිරැසි පරිවර්තනය සිදු කිරීමට වගබලාගන්න. උදාහරණයකට, “I will kill you” යැයි යමෙක් කෝපයෙන් පවසන්නේ නම් “මම උඹව මරනව” ආදී ලෙසින් යෙදීමට උත්සුක වන්න.
  • තම හිතු මනාපයට කතාවට හානිවන අයුරින් සමාජ ජාලාවන්හි වයිරල් වන වදන් කිසිදු විටක යොදා නොගන්න. උදාහරණයකට සිනි කුරුල්ලන්, පු* මන්තා වැනි විවිධ වදන්.
  • කිසිදු ලෙසකින්වත් අසැබි වදන් නොයොදන්න. එවැනි වදන් සඳහා *#%$& වැනි සංඛේතක් යොදන්න.
  • තම තමන්ට ආවේණිකවූ “මක්කයි කොරන්නේ, එන්ට, කරනවයි? ” ආදී ප්‍රාදේශීය ව්‍යවහාරයන් දීමෙන් වලකින්න. ග්‍රාමීය ඉන්දීය  සිනමාපට සඳහා සමහර අවස්ථාවන්හිදී මෙවැනි බසක් යොදාගැනීමේ ගැටළුවක් නැහැ. නමුත් ඉන්දීය සිනමාවෙන් එපිට කිසිදු සිනමාපටයක් සඳහා මෙවැනි බසක් යොදාගැනීම කිසිම අවස්ථාවකදී සිදුකරන්න එපා.
ඔය කාරණා ටික සිතෙහි තබාගෙන උපසිරැසිය නිම කොට, සිනමාපටය සම්බන්ධව සාරවත් ලිපියක් සමඟ අපට එවන්න. ඔබ එවන ලිපිය බයිස්කෝප් අඩවියේ පළවූ පෝස්ට් එකක් තරම් දිගු ලිපියක් වෙන්න ඕනා. මීට කලින් පළවෙලා තියෙන සාමාන්‍ය ලිපියක් දිහා බලපුවහම තේරෙවිනේ දෙන්න ඕනා ප්‍රමාණය.
මීට අමතරව, ඔබ අප අඩවියේ ඇති මීට පෙර අප විසින් විචාරයක් ලබා දුන් චිත්‍රපටයකට උපසිරැසි යෙදීමට අදහස් කරන්නේ නම්, එය පළ කිරීම සඳහා අප කටයුතු කරන්නේ පහත පරිදිය. 
  • එය අලුත් ලිපියක් ලෙස පල කරන්නේ නැත.
  • එය අඩවියේ ලබාදී ඇති විචාරාත්මක ලිපියටම ඔබ විසින් එවන ලිපියත් උපසිරසියත් අලුතෙන් එකතු කරනු ලැබේ. ( උදාහරණය)
  • උපසිරැසි යෙදූ ඔබගේ නම ලිපියට එකතු කරනු ලැබේ.
  • බයිස්කෝප් අඩවියට අයත් සමාජ ජාල අඩවිවල ඒ පිළිබඳව ප්‍රචාරයක් ලබා දේ…

ඔබ සිංහල උපසිරැසියක් නිර්මාණය කර අප වෙත එවූ සැනින් පලවීමක් නම් සිදු නොවේවි. මක්නිසාද යත්, අප හැමවිටම අපට උපසිරැසි ලැබුන පිළිවලට තමා අඩවියේ පළකිරීම සිදුකරන්නේ. ඉතින් සමහරවිටක ඔබේ උපසිරැසිය ඔබ අප වෙත එවා දිනක් දෙකක් ගතවී පළවීමට ඉඩ තිබේ.

සැ.යු.: අන් අය විසින් පරිවර්තන කල උපසිරැසි වෙනත් අඩවියකින් ලබාගෙන තමන්ගේ නමින් අප වෙත එවීමෙන් වලකින්න. එය ඒ නිර්මාණය කල අයට කරන බලවත් අසාධාරණයක් මෙන්ම ඔබේ ලැජ්ජා නැතිකම පෙන්වීමකි. එලෙස ඔබ පළමුවර අන් කෙනෙකුගේ එකක් එවා එය හෙලි වූ පසු නැවත ඔබ ඔබගේම උපසිරැසියක් එව්වත් අප එය බාර නොගනී.

මේල් එක එවන විටදී අපේ පහසුව සඳහා මේ කරුනුත් සලකා බලන්න.

  • Subject විදියට අදාල ෆිල්ම් එකේ නම දාන්න. (උපසිරැසි ලබාදීමට අවසර පැතීම වෙනුවෙන් එවන මේල් වලදීද මේ විදියට කරන්න)
  • ලබාදෙන ලිපිය වෙනුවෙන් ගැලපෙන සිංහල මාතෘකාවකුත් එවන්න.
  • ලිපිය මේල් බොඩියෙම දමන්න. (word, Notepad, etc.. ආදියේ නැතිව)
  • ඔබේ නම පළවියයුතු ආකාරය දන්වන්න.
  • පළමුවරට උපසිරැසියක් එවීමේදී හෝ දැනට අප අඩවියේ පලවන ඔබගේ ජායාරුපය වෙනස් කිරීමට අවැසි නම් පමණක් අප වෙත ඔබගේ 100x 100 ප්‍රමාණයේ ජායාරුපයක් එවන්න. නිතරම ජායාරුපය වෙනස් කිරීමෙන් වැළකීමට කාරුණිකවන්න.
  • උපසිරැසිය ගැලපෙන්නේ කුමන පිටපතටද යන්න සඳහන් කර එවන්න අමතක කරන්න එපා.
  • සබ් ෆයිල් එක මේල් එකට අමුණා එවන්න.
මේ අඩවිය ගැන ආයෙමත් කියනව නම්, මේක සේවයක් විදියට කරන දෙයක් මිසක් මුදල් ඉපයීමට කරන දෙයක් නෙවෙයි. ඒ නිසා අපිට වගේම ඔයාලටත් මේ අඩවියට සම්බන්ධ උනා කියල මූල්‍යමය වාසියක් ලැබෙන්නෙ නෑ. අප අඩවියේ පළවන වෙළඳ දැන්වීම් අවම වෙළඳපොල මිල ගණන් යටතේ තමයි අපි පළකරන්නේ. ඉන් ලැබෙන මුදල් අපගේ වෙබ් අඩවියේ නඩත්තු කටයුතු සඳහා භාවිතා කරනවා. එහෙම භාවිතා කොට ඉතිරි මුදල් සියල්ලම අපි වාර්ෂිකව සමාජ සත්කාරයක් වෙනුවෙන් යොදවනවා. උපසිරැසි නිර්මාණය කිරීමෙන් සහ වෙබ් අඩවිය පවත්වාගෙන යෑමෙන් අපට මිල මුදල් නොලැබුනත්න හිතට දැනෙන නිරාමිස සතුට නම් බොහොමයි. ඉතිං මේ වැඩේට එකතු වෙන්න කැමති කට්ටිය පහළ තියෙන ඊමේල් ලිපිනයෙන් අපිව සම්බන්ධ කරගන්න.

[email protected]

(වෙබ් අඩවිය සම්බන්ධයෙන් ඕනම විවේචනයක්, අදහසක්, ගැටළුවක්, අප විසින් වැඩි දියුණු කරගතු යුතු දෑ ආදී විවිධ දේවල් මේකට එවන්න!) 🙂

 

error: Alert: Content is protected !!