Breaking News
Home / All / Monihara (1961) with Sinhala Subtitles | මැණික් මාලය [සිංහල උපසිරැසි සමඟ]

Monihara (1961) with Sinhala Subtitles | මැණික් මාලය [සිංහල උපසිරැසි සමඟ]

Monihara-(1961)

ප්‍රවීණ සිනමාකරු සත්‍යජිත් රායි විසින් නිර්මාණය කරන ලද තීන්කන්‍යා නම් චිත්‍රපට ත්‍රිත්වයේ තුන්වැන්න මොනිහාරා නම් චිත්‍රපටයයි. එක්දහස් නවසිය හැට එක වර්ෂයේ පළමුවෙන්ම ප්‍රදර්ශනය කෙරුණු මෙම චිත්‍රපටය සඳහා පාදක වී ඇත්තේ වංග මහා ලේඛක රවීන්ද්‍රනාථ ඨාකූරයන් විසින් රචනා කෙරුණු එම නමින්ම යුතු කෙටිකතාවයි. රසික, විචාරක දෙපාර්ශ්වයේම නොමද ප්‍රසාදයට ලක් වූ මෙම කෘතිය දෙස් විදෙස් සිනමා සම්මාන උලෙළ ගණනාවකදී ද ඇගයීමට ලක් වූවකි. මේ හා බැඳුණු අනෙක් සිනමා නිර්මාණ දෙක වන්නේ පෝස්ට් මාස්ටර් සහ සමාප්ති යන ද්විත්වයයි. මෙයින් පෝස්ට් මාස්ටර් (1961) සඳහා සිංහල උපසිරැසි මීට පෙර ඔබ වෙත ලබා දුන් නමුත් නැරඹීමට සුදුසු තරම් පැහැදිලි පිටපතක් සොයාගැනීමට නොහැකි වීම හේතුවෙන් සමාප්ති (1961) සඳහා උපසිරැසි නිර්මාණය කිරීම තව දුරටත් ප්‍රමාද වෙමින් පවතී. එවැනි පිටපතක් හමු වූ වහාම එම කෘතිය සඳහාද උපසිරැසි නිර්මාණය කොට ලබා දීමට අපේක්ෂාවෙන් සිටිමි.

මොනිහාරා යන්නෙහි සිංහල අර්ථය වන්නේ මැණික් මාලය යන්නයි. චිත්‍රපටයේ ප්‍රධාන චරිතයක් වන  පාණීභූෂණ සහා නම් සමින්දාර්වරයාගේ භාර්යාවගේ නම වශයෙන් සඳහන් වන්නේ ද මැණික් මාලය යන අර්ථයම දෙන මණිමාලිකා යන නාමයයි. රන් ආභරණවලට දැඩි කැමැත්තක් දක්වන ඇයට සැමියා විසින් අවසන් වතාවට රැගෙන එනු ලබන ආභරණය ද මැණික් මාලයකි. චිත්‍රපටයේ තේමාව හුවා දක්වනු පිණිස කතුවරයා විසින් මේ නම හිතාමතා යොදාගන්නට ඇතැයි සිතිය හැකි වුවත් උපසිරැසිකරණයේදී පුද්ගල නාම වෙනස් කළ නොහැකි බැවින් මේ හුවාදැක්වීම සිංහල පරිවර්තනයේදී සිදු කළ නොහැකිය. තවද, භාෂාව නුහුරු බැවින් මණිමාලිකා යන නම සිංහල ප්‍රේක්ෂකයන්ට මැණික් මාලයක් සිහිපත් කරන්නේද නැත. එබැවින් චිත්‍රපටය රස විඳීමට පෙර ඒ පිළිබඳව දැනුම්වත්ව සිටීම වැදගත් වනු ඇත.

පාලනය නොකළ ආශාවන් තුළින් අභාවයට යන පවුලක් සම්බන්ධ කතා පුවතක් මොනිහාරා චිත්‍රපටය තුලින් ඉදිරිපත් කෙරේ. පාණීභූෂණගේ බිරිඳ වන මණිමාලිකා තම පවුල, ස්වාමිපුරුෂයා සහ අනෙකුත් සියලුම සම්බන්ධතාවලට වැඩියෙන් ස්වර්ණාභරණ අගය කරන්නියකි. පවුලේ පරිහානියට වඩා ඇය බියපත් කරන කාරණය වන්නේ තම ස්වර්ණාභරණ අහිමිවනු ඇතැයි යන හැඟීමයි. තම බිරිඳ කෙරෙහි  අසීමිත ආදරයක් දක්වතත් පාණීභූෂණ ඇගේ මනස හඳුනාගැනීමට අසමත් ය. තෑගි බෝග ලබා දීමෙන් පමණක් භාර්යාවගේ ආදරය ලබාගත හැකිය යන අදහස ඔහුගේ ප්‍රායෝගික අවබෝධය මොට නොකරන්නට තම පවුල වෙත එළඹීමට සූදානම්ව සිටි ව්‍යසනය වලක්වා ගැනීමට ඔහුට හැකි වන්නට ඉඩ තිබිණි.

මනුෂ්‍ය සන්තානය විනිවිද දකින අතරතුරම බහුතර ප්‍රේක්ෂකයන්ට ගෝචර වන ආකාරයේ කුතුහල ජනක කතාන්දරයක් ඉදිරිපත් කිරීම මොනිහාරාවෙහි මා දකින විශේෂත්වයයි. ගෝවින්දලාල් චක්‍රවර්ති නම් ගුරුවරයා විසින් ගං ඉවුරෙහි හමුවන අමුත්තකු විෂයෙහි පැවසෙන කතාන්දරයක් ලෙස චිත්‍රපටය දිගහැරෙයි. මෙහි එන සමහර හොල්මන් දර්ශන කතාන්දරයට අනුව සැබෑවක්ද නැතහොත් හෂීස් පානයෙන් විකෘති වූ ගුරුවරයාගේ මනස අබිමුව මැවෙන්නක්ද යන්න තම අභිමතය පරිදි තීරණය කිරීම නිර්මාණකරුවා විසින් ප්‍රේක්ෂකයා වෙත භාර දී ඇත.

මොනිහාරා චිත්‍රපටය වෙනුවෙන් ඔබ වෙත ඉදිරිපත් කෙරෙන්නේ Teen Kanya Monihara full movie by Satyajit Ray 1961 යන නමින් යූටියුබ්හි ඇති පිටපත සඳහා ගැලපෙන පරිදි මා විසින් කාල රාමු සංශෝධනය වී සිංහලට නැගුණු උපසිරැසි ගොණුවක් බව ඔබගේ පහසුව සඳහා සිහිපත් කරමි.

මෙබඳු නිර්මාණයක් අප වෙත තිලිණ කිරීම සම්බන්ධයෙන් සත්‍යජිත් රායි සිනමාවේදියාණන්ට පළමුවෙන්ම මගේ හද පිරි ප්‍රණාමය පුද කරමි. එසේම මගේ නවවන නිර්මාණය ලෙස මෙම උපසිරැසිය ඔබ වෙත ගෙන එන්නට අවස්ථාව සලසා දුන් www.baiscopelk.com වෙබ් අඩවියටද මගේ විශේෂ ස්තූතිය පිරිනමමි. මා සමග එක්ව මේ චිත්‍රපටය රස විඳින ලෙස ඔබ සැමට ආරාධනා කරමින් නවතිමි.

පසු සටහන :

මේ සමග ඔබ වෙත දැනුම් දිය යුතු විශේෂ පණිවිඩයක් ඇත. සුබර්ණරේඛා (1965) චිත්‍රපටිය සඳහා මා විසින් උපසිරැසි සකස් කිරීමට යොදා ගන්නා ලද වීඩියෝ පිටපත, උපසිරැසිය ඔබ වෙත ගෙනෙන අතරතුර කාලයේදී යූ ටියුබ්වලින් ඉවත් කර තිබුණි. එබැවින් ඔබගේ පහසුව උදෙසා චිත්‍රපටයේ උපසිරැසි Subarnarekha – Bengali Full Movie – Ritwik Ghatak’s Film – Abhi Bhattacharya | Madhabi Mukhopadhya යන නමින් ඇති යූ ටියුබ් පිටපතට ගැලපෙන පරිදි යාවත්කාලීන කළෙමි. සිදුවූ අපහසුතාව සම්බන්ධයෙන් කණගාටුව ප්‍රකාශ කරන අතර නව උපසිරැසිය බාගත කොටගෙන චිත්‍රපටය රසවිඳින මෙන් කාරුණිකව ඉල්ලා සිටිමි. කෙසේ වුවත් ඔබට අවශ්‍යනම් පළමු උපසිරැසියට ගැලපෙන ගිගා බයිට් 1.36 ක් බරැති ඉතාමත්ම හොඳ පිටපතක් Subarnarekha (1965) de Ritwik Ghatak යන නමින් යුක්තව වෙනත් වෙබ් අඩවියකින් බාගත හැකිය.

Teen Kanya (1961) on IMDb

 

 

 

Due to copyright issues, we do not provide any torrent links.

 

(Teen Kanya Monihara full movie by Satyajit Ray 1961 යන යූ ටියුබ් පිටපත සඳහා උපසිරැසි නිර්මාණය කර ඇත.)

ලබා දී ඇති උපසිරසි ඉහත පිටපත සඳහා අදාළ වේ.

 

මේ ලබා දී ඇති සිංහල උපසිරැසි පිළිබද “වජිර රත්නායක” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

Leave a Reply

Your email address will not be published. Required fields are marked *

7 comments

  1. niayamai…thanks saho..sub ekata..digatama sub demu.jaya wewa……

  2. withanage priyantha

    වජිර සොයුර,
    සිනමාපටය ගැන පළකර ඇති ඉහත සඳහන් විස්තරය කලාත්මක ඒවා ප්‍රියකරන්නන්ට ගොඩක් වටිනවා. මෙයත් අනිවාර්යයෙන් නැරඹිය යුතු සිනමාපටයක් ලෙස මා දකිනවා. ස්තුතියි!

  3. ප්‍රේමකුමාර

    මෙම සලරුව ගැන අපගේ අවධානයට යොමු කළාටත් හෙළ බස‍ට නඟා දුන්නාටත් තුති පුදමි.

  4. බොහොම ස්තූතියි සහෝ සිංහල උපසිරැසියට. ජය෴෴ 😛 😛

  5. සිංහල උපසිරැසියට ගොඩාක් ස්තූතියි සහෝ! ජය වේවා! බුදු සරණයි!

  6. thanks mallli

  7. Thank saho sub ekata…