Devdas (2002) Sinhala Subtitles | මියෙන්නට පෙර නුඹව දකින්නම් [සිංහල උපසිරැසි සමඟ]

ඔන්න ආයෙත් ටික කාලෙකට පස්සේ දීර්ඝ ව්‍යාපෘතියක් ඉවර කළා. රොයිලි අයියත් හිටපු ගමන් කියන්න වගේ අපිව මතකද මංදා කට්ටියන්ට. කෝකවෙතත් මම මේ ෆිල්ම් එක කරන්න උන්නේ නම් තනියම නෙවි. අපේ දිල්ශාන් කාලිංග එක්ක. ඒත් පොරගේ කාර්යබහුලත්වය නිසා මේ ෆිල්ම් එක තනියමම කරන සෞභාග්‍යය මට හම්බුනා. ඒ වගේම පහළින් චිත්‍රපටය සම්බන්දව කරලා තියෙන සම්පූර්ණ විග්‍රහය ඩිල්ශාන් කාලිංගගෙන්මයි. ඉතිං වැඩි කතා ඕනේ නැහැ. ලස්සන දෙබස්, ලස්සන ගීත වලින් පිරුණු මේ සුන්දර ආදර අන්දරය බලන්න කියලා ආරාධනා කරනවා. ඒ වගේම Shreya Ghoshal ඇගේ චිත්‍රපට පසුබිම් ගායන දිවිය ඇරඹේන්නේ උදිත් නාරායන් සමඟ මෙම චිත්‍රපටයට ගැයූ “බේරී පියා…” ගීතයෙනුයි. ඉතිං, ලිපියේ අන්තිමේට කිව්වට වැඩක් නැති නිසා ඔන්න මුලින්ම කියලා දානවා…කමෙන්ට් එකක් එහෙමත් දාගෙනම යන්න කියලා.

ඔබට පුලුවන්ද ආදරේ විග්‍රහ කරන්න….? මගේ උත්තරේ නම් “බෑ” කියන එක.මොකද ඒක ලෝකේ තියන සංකීර්ණම භාෂාවක්. ඔව්, ඉතින් මම දැන් කියන්න යන්නෙත් ඒ සංකීර්ණ භාෂාව එක එක මිනිස්සු විග්‍රහ කරන විදිය ගැන. ඒත් මෙතන තියෙන්නේ එක විදියක් විතරයි. ඒත් ඒ විග්‍රහ කිරීම අතරේ ආදරේ මිහිරියාව, සුන්දරත්වය මොනවට පැහැදිලි වන බව නම් විශ්වාසයි. මිනිස්සු හරිම පුදුමාකාරයි….සමහරවෙලාවට ඔවුන් ජීවත් වෙන්නේ එකම එක අරමුණක් වෙනුවෙන්, ඉතින් ඒ අරමුණ ඉටු නොවුනම ඔවුන්ට මේ ලෝකේ කරන්න තවත් දෙයක් නැති වෙලා යනවා. ඔවුන්ට හිතෙනවා ඔවුන්ගේ ජීවිතෙන් තවත් ප්‍රයෝජනයක් නැහැ කියලා.

ඉතින් මේ “එකම එක අරමුණ” “ආදරය” වුනොත් මොනවා වෙයිද…….?

එක ආදරයක් වෙනුවෙන් ජීවත් වෙලා, ඒ ආදරේ නැතිවුනාම ඇතිවන දුක විරහවෙන් වහන්න හදන දේව්දාස්ලා අප අතරෙත් නැතිවාම නෙමෙයි. මම ඒකයි මුලින්ම කිව්වේ ආදරේට එක එක අය දෙන අර්ථකතන විවිධාකාරයි කියලා. සමහරු තමන්ගේ ආදරේ කැපකරලා ඒ ආදරේ වෙනතැනක සතුටින් ඉන්න හැටි බලාගෙන ජීවත් වෙනවා. දැන් ඔයාලා හිතයි එහෙම අය ඉන්නවද කියලා….එහෙම අය ඉන්නවා. හැබැයි ඉතාම අල්ප වශයෙන්. ඉතින් මම ඔබෙන් ඉල්ලන්නේ මේක නරඹලා ඔබත් එහෙම වෙන්න කියල නෙමෙයි, ඔබත් ඇත්තටම කෙනෙක්ට ආදරේ කරලා බලන්න, එතකොට තේරෙයි මේවා විකාරයක් නෙමෙයි කියලා. 

ඉතින් මම මේ කියන්න යන්නේ 2002 වසරේ තිරගත වුනු 1917 ලියවුනු නවකතාවක් පදනම් කරගෙන තැනුණු, IMDb 7.6 ක් සහ Rotten Tomatoes වල 88% ක් ලබාගනිපු, එදා මෙදා තුර Filmfare සම්මාන 9 ක්, ජාතික සමාන 5 ක් ඇතුළු සම්මාන 44 ක් ලබාගන්න සමත්කම් දක්වපු “දේව්දාස්” ගැන. මේ ආදරේ, අපි අර කතාවට කියනවා වගේ වැලි කෙළියේ පටන් ඇති වුනු ආදරයක්. අන්න ඒ දේ තමයි මේ ආදරේ මේ තරම් සෙනෙහෙවන්ත කරන්නේ. තම තමන්ගේ දේවල් විතරයි මිනිසුන්ට පේන්නේ කියන දේ පැහැදිලි කරමින් මේ කතාවේදීත් වෙන්නේ දෙව්දාස්ගේ අම්මගේ මහන්තත්වකම වෙනුවෙන් දෙව්-පාරෝ ගේ ආදරේ කැප කරන්න වෙන එක. මොකද මොවුන්ගේ ආදරේ හොඳින් තේරුම් ගන්න පාරෝගේ අම්මා, දේව්ගේ අම්මට දේව් වෙනුවෙන් විවාහ යෝජනාවක් අරගෙන එන්නේ දේව් ළඟ තියන දේපල වෙනුවෙන් නෙමෙයි.

ඒත් දේව් ගේ අම්මා හිතන්නේ ඒ විදියට, මේ දේවල් මෙහෙම වෙද්දීත් දේව්-පාරෝ ඉන්නේ දේව්ගේ අම්මට නොතේරෙන ආදර ලෝකයේ අතරමං වෙලා. ඉතින් දේව්ගේ අම්මගේ තීරණේ ගන්න උදව් කරන්නේ දේව්ගේ දේපල දිහා ඇහැගහගෙන ඉන්නේ, මේ දේවල් වල තාවකාලික බව නොවැහෙටෙන දේව්ගේම නෑනා. ඉතින් මෙතැනදී පාරෝගේ අම්මට වෙන නින්දාව ඇය ඉවසන්නේ, ශාපයක් සහ පොරොන්දුවක් සමඟින්. ඇය පොරොන්දු වෙනවා ඇයගේ දුවව දේව්ට වඩා ධනපතියෙක්ට විවාහ කරලා දෙන බවත්, ඇය හොඳින් සිටිනු ඇති බවත්. නමුත් දේව්ට සිදු වන්නේ නැති නාස්ති වී විනාශ වී යන්නට බවත්. ඉතින් ඇය ඒ විදියටම ඇයගේ පොරොන්දුව ඉටු කරනවා. පාරෝව මුදල් අතින් දේව්ට වඩා ධනපතියෙක්ට එහෙත් දේව්ගේ මෙන් ආදරයක් නැති කෙනෙක්ට විවාහ කරලා දීමෙන්.

මේ අවස්ථාවේ දේව් මුහුණ දෙන විදිය ඔබට මේ සළරුව නැරඹීමෙන් බලන්න පුළුවන්. මොකද මට ඒක වචනයෙන් විස්තර කරන්න බැරි නිසා. ඔබ දන්නවා දේව්ගේ චිරිතයට පණ පොවන ශාරුක් ඛාන්ගේ හැකියාව මොනතරම්ද කියන එක. එතන ඉඳන් පාරෝගේ මව කියූ හැටියට දේව්ගේ පරිහානිය ඇරඹෙන්නෙ. මොවුන්ගේ ජීවිත මෙහෙම ගලාගෙන යද්දී, මේ චරිත දෙක අතරට තව කෙනෙක් එනවා.

ඇය ගැහැණියක් මෙන්ම වෛශ්‍යාවක්.  ඇය දකිනවා පාරෝ වෙනුවෙන් දේව් ළඟ තියන ආදරේ මොන තරම්ද කියන එක. ඉතින් ඇය කෙසේ මේ චරිත එක්ක මුහු වෙනවද කියන එක බලන්න මම ඔබට ඉඩ දෙන්නම්. අවු.10 කට කලින් දේව්, පාරෝගෙන් වෙන් වෙලා නීතිය හදාරන්න එංගලන්තය කරා යද්දි, පාරෝ දේව්ගේ කරත්තය පස්සෙන් දුවනවා දේව් නතර කරන්න. එදා ඇයට දේව් නතර කරන්න බැරි වෙනවා. ඒ වගේම පාරෝට වුණු පොරොන්දුවක් ඉටු කරන්න දේව් එනවා පාරෝව හොයාගෙන. අපි බලමු පාරෝට මේ වතාවේදිවත් දේව් නතර කරගන්න පුළුවන් වෙයිද කියලා. අවසරයි ඔබටත් ආදරයට අර්ථකතනයක් දෙන්නට…..

ජීවිතය යනු මුදල්ද, ආදරය යනු මුදල්ද නොවුනත්, ජීවිතය යනු ආදරයද, ආදරය යනු ජීවිතයද විය හැක.

“තාත්තා කිව්වා “ගම අත්හරින්න” කියලා.
හැමෝම කිව්වා “පාරෝව අත්හරින්න” කියලා…
පාරෝ කිව්වා “මත්පැන් අත්හරින්න” කියලා.
අද ඔයත්(අම්මා) කිව්වා “වලව්ව අත්හරින්න” කියලා…
දවසක් ඒවි, එදාට ඔහුත්(දෙවියන්) කියාවී…
ලෝකෙත් අත්හරින්න” කියලා…”
“දේව්දාස්”

Due to copyright issues, we do not provide any torrent links.

මෙම ලබා දී ඇති උපසිරසි HD / Blu-Ray පිටපත් සඳහා අදාළ වේ.

මේ ලබා දී ඇති සිංහල උපසිරැසි පිළිබද “හේවා ලුණුවිලගේ” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.