Enemies Closer (2013) | මිතුරාට වඩා සතුරාව ළං කර ගන්න [සිංහල උපසිරැසි සමඟ]

ඔන්න යාළුවනේ ඔයාලට ටික දවසකට පස්සේ ඉස්සරහට එන්න තියෙන අළුත්ම සුපිරි ක්‍රියාදාම චිත්‍රපටියකට උපසිරැසි අරගෙන ආවා. මේ චිත්‍රපටිය නිකුත් වෙන දවස විදිහට සඳහන් වෙලා තියෙන්නේ 2014 ජනවාරි 24 වෙනිදා. ඒ නිසා තාම රේටින් මොකුත් නෑ. හැබැයි මේ සතියේ ලොව හොඳම චිත්‍රපටි 500 අතරේ 218 වෙනි ස්ථානයේ මේ චිත්‍රපටිය රැඳිලා තියෙනවා.

මේ චිත්‍රපටියේ ප්‍රධාන හතුරා වන ක්සැන්ඩර්ගෙ චරිතය රඟපාන්නේ අපි කවුරුත් හොඳින් දන්නා කියන Jean-Claude Van Damme. ඒ වගේම වීරයාගේ චරිතය වන හෙන්රි ගේ චරිතය රඟ දක්වන්නේ Dead Man on Campus (1998), Because I Said So (2007) වැනි චිත්‍රපටි වලට තම රංගන දායකත්වය සැපයූ Tom Everett Scott විසිනුයි. ඒ වගේම ඔහුගෙ සහායකයා වන ක්ලේ ගෙ චරිතය රඟ දක්වන්නේ Sleepy Hollow ටීවී කතා මාලාවේ Captain Frank Irving ගෙ චරිතය රඟ දක්වන Orlando Jones විසිනුයි. ඒ වගේම මේ චිත්‍රපටියේ ප්‍රධාන කාන්තා චරිතය වන කේලා ගෙ චරිතයට පණ පොවන්නේ Is Anybody There? (2008), Wild Child (2008) වැනි චිත්‍රපටි වල රඟ දැක්වූ සුපිරි නිළි Linzey Cocker විසිනුයි. ඉතින් Van Damme හතුරගෙ චරිතයට රඟපෑවත් මේ චිත්‍රපටිය සටන් ජවනිකා වලින් පිරිලා තියෙනවා කියලා අමුතුවෙන් කියන්න ඕන නෑනේ..

කතාවත් කෙටියෙන් කියන්නම්…. ඇමරිකානු සහ කැනේඩියානු දේශ සීමාවේ පිහිටා ඇති කැලයක් මැද්දේ තියෙන විලකට මත්ද්‍රව්‍ය ප්‍රවාහණය කරමින් තිබුනු ගුවන් යානයක් කඩා වැටෙනවා. මේ ගුවන් යානය කඩාගෙන වැටෙන විල මායිමේ කින්ග්ස් දිවයින නමින් දූපතක් පිහිටලා තියෙනවා. මේක සංචාරකයන් වෙනුවෙන් වෙන් වෙලා තියෙන රක්ෂිතයක්. ඒ රක්ෂිතයේ ආරක්ෂකයා විදිහට ක්‍රියා කරන්නේ හෙන්රි නැමති හිටපු හමුදා සාමාජිකයෙක්. එක දවසක් ඔහු කැලේ සංචාරය කරන අතරේ අනතුරකට ලක් වෙලා ඉන්න කේලා නැමති ගැහැනු ලමයෙක්ව ඔහුට මුණ ගැහෙනවා. ඉතින් හෙන්රි කේලාට උපකාර කරලා තමන් ලඟ තිබුන බෝට්ටුවකින් කේලාව ප්‍රධාන ගොඩබිම වෙත පිටත් කරනවා. කේලා යන්න පිටත් වෙන්නේ හෙන්රිට රෑ කෑමකටආරාධනයකුත් කරමින්.

හෙන්රි හමුදාවේ ඉන්න කාලේ ඔහු යටතේ සේවය කල සොල්දාදුවෙක් යුද්ධයේදි මිය යනවා. ඒ මිය ගිය සොල්දාදුවගෙ සහෝදරයා හිතන්නේ ඒකට වග කියන්න ඕන හෙන්රි කියලයි. ඒ නිසා ඔහු හෙන්රිව මරා දැමීමේ අභිප්‍රායෙන් හෙන්රිව හොයාගෙන මේ කැලේට එනවා. ඒ අතරේ ක්සැන්ඩර් නැමති මත්ද්‍රව්‍ය ජාවාරම්කරු තමන්ගෙ කල්ලියත් එක්ක මේ දිවයිනට එනවා අර කඩාගෙන වැටුන ගුවන් යානය හොයාගෙන. ඒ එන අතරේ හෙන්රිව අල්ලගත්ත අර හමුදා සොල්දාදුවගෙ සහෝදරයා හෙන්රිව මරන්න කියලා හිතාගෙන විල ඉවුරට අරගෙන එනවා. එහිදී ක්සැන්ඩර්ට ඔවුන් දෙන්නා හමුවෙනවා. එහිදි ඔවුන් දෙපාර්ශව අතර ඇති වන ගැටුමකින් ක්සැන්ඩර්ගෙ කිමිදුම්කරු මිය යනවා. හෙන්රි කියන්නේ හමුදාවේ හිටිය කෙනෙක් නිසා ඔහු කිමිදුම් කරුවෙක් බව හොයා ගන්න ක්සැන්ඩර් තමන්ගෙ මත්ද්‍රව්‍ය ටික ලබා ගන්න හෙන්රිව යොදා ගන්න සැලසුම් කරනවා.

ඉතිං යාළුවනේ. කවුද මේ කේලා කියන්නේ? ඇයට වෙන අනතුර ඇත්තටම සිදු වෙන එකක්ද? නැත්නම් ඒක සැලසුම් සහගතව කල දෙයක්ද? ඒක සැලසුම් සහගතව කල දෙයක් නම් හෙන්රිගෙන් කේලා බලාපොරොත්තු වෙන්නෙ මොනවද? හෙන්රිව මරලා දාන්න එන පුද්ගලයාට හෙන්රිව අල්ලගන්න පුළුවන් වේවිද? ඔහු හෙන්රිව මරා දාලා තමන්ගෙ පලිය ගනීවිද? ක්සැන්ඩර් කොහොමද හෙන්රි ගැන විස්තර හොයා ගන්නේ? ක්සැන්ඩර්ට හෙන්රිව අල්ලගෙන තම අරමුණ මුදුන්පත් කර ගන්න පුළුවන් වේවිද? නැත්නම් මේ කතාව කවුරුවත් නොහිතන විදිහකින් අවසන් වේවිද? කියලා කතාව බලලම දැනගන්න. හැමෝටම ජය වේවා!!!