Nikita [S01 : E01] |දිගු ගමනක කෙටි ඇරඹුම [සිංහල උපසිරසි සමඟ]

ගොඩාක් කාලෙකට පස්සේ ඔන්න තවත් රූපවාහිනී කතා මාලාවකට උපසිරැසි සපයන්න කියලා තමයි මේ මුලපුරන්නේ. The Mentalist කතා මාලාවෙන් පස්සේ සම්පූර්ණයෙන්ම උපසිරැසි වැඩේ නවත්තනවද නැතිනම් රෑපවාහිනී කතා මාලාවන් අතහැරලා චිත්‍රපටියකට බහිනවද කියලා කල්පනා කර කර ඉඳලා හිත වාවන්නේම නැති තැන පුරුදු විදියටම තවත් එකක් පටන් ගත්තා. ඔන්න අද පටන් ඒක තමයි මේ NIKITA නමින් ඔයාලාට මේ ඉදිරිපත් කරන්න මගේ සූදානම.

 මෙන්න කතාවේ අතීතය ගැන පොඩි විස්තරයක්…
==========================================

CW වලින් මේක විකාශය කරන්න පටන් ගත්තේ 2010 සැප්තැම්බර් 9 වෙනිදා. ඒ කියන්නේ දැනට ගොඩක් කාලෙකට කලින්. (ඔන්න ඉතිං කතාව පරණයි කියලා අතෑරලා දාන්නේ එහෙම නෑ… 🙂 ) මේ කතාව නිර්මාණය වෙලා තියෙන්නේ 1990  දී Nikita නමින් විකාශය වුනු ප්‍රංශ කතා මාලාවක් අනුසාරයෙන්. ඊට පස්සේ මේක ප්‍රති නිර්මාණයක් විදියට චිත්‍රපටයක් නිශ්පාදනය කලා 1993 දී Point of No Return නමින්. ඊටත් පස්සේ 1997 දී La Femme Nikita නමින් මේ කතාව නැවත වතාවක් ටෙලි තිරයේ වෙනස්ම නිර්මාණයක් විදියට පෙලගැස්වුනා. ඕන්න ඊටත් පස්සේ මේක ආපහු පරණ නමින්ම කලින් කතා වලටත් වඩා සුපිරි විදියට 2010 සැප්තැම්බර් 9 වෙනිදා CW නාලිකාව ඔස්සේ විකාශය කරන්නට යෙදුනා. අපේ ගොඩක් අය ෆිල්ම් වල ගුණාත්මක බව මනින විදියට IMDb මීටරෙත් මේ කතාව වෙනුවෙන් 7.7 ක් දක්වා කරකැවිලා තියෙනවා.

මෙහි පලමු සමය විකාශය කිරීම ආරම්භ කලේ 2010 සැප්තැම්බර් 9 වනදා කොටස් 22කින් යුක්තවයි. ඉන් පස්සේ දෙවනි සමය 2011 සැප්තැම්බර් 23 දින කොටස් 23කින් සමන්විතවත්, තෙවැනි සමය 2012 ඔක්තෝබර් 22 දින කොටස් 22කින් යුක්තවත්, අවසාන වශයෙන් සිව්වෙනි සමය කොටස් 6 කින් සමන්විතව 2013 නොවැම්බර් 22 දින විකාශය කරන්න කරන්නට යෙදුනා. සම්පූර්ණ කතා මාලාවටම කතාංගයන් 73ක් අඩංගුයි. අවසාන කතාංගය Canceled නමින් 2013 දෙසැම්බර් මස 27 දින විකාශය කර මේ කතා මාලාව සමාප්ත කරන්නට යෙදුනා. (ඒ කිව්වේ කතාව මග හිටියේ නෑ හොඳේ. ඉවරයක් වෙන්න පෙන්නනවා)

 කතාව ගැන පොඩි විස්තරයක්…
=========================

මේ කතාව ආවරණය කරන්නේ නිකීටා කියන ප්‍රධාන චරිතයක්. ඒ වගේම තමයි මේ කතාව මධ්‍යගත කරගෙන තියෙන්නේ රජයෙන් පවත්වාගෙන යන ඩිවිශන් (Division) නම් රහසිගත (Black Ops)ක්‍රියාන්විත සංවිධානයක්. මේ සංවිධානය විසින් සමාජයේ කැපී පෙනෙන්නේ නැති, විවිද දුරාචාරයන් වලට අසුවුනු හෝ අපරාධයන් සිදු කරලා හිරේට නියම වන තරුණ තරුණියන්ව රහසින් ඒ සංවිධානයට බඳවා ගන්නවා. ඒ කියන්නේ සැබෑ ලෝකයට මෙයාලා මැරුණූ අය පමණයි. මේ විදියට බඳවා ගන්න අයව මේ ඩිවිශන් විසින් සෑම අන්දමකම පුහුණුවන් සහිත ඔත්තුකරුවන් සහ ඝාතකයින්, මිනීමරුවන් විදියට පුහුණු කරනවා. මේ සංවිධානයේම පුහුණුව ලබපු කෙනෙක් තමයි අද ඉඳන් අපි මේ බලන්න සූදානම් වෙන කතාවේ කතා නායිකාවත්. නමුත් නිකීටාගේ විශේෂය තමයි මේ සංවිධානයෙන් පැනගත්තු පලමු කෙනා වීම. මේ විදියට මේ සංවිධානයෙන් පැනලා ගියෝතින් හෝ සංවිධානයට විරුද්ධව වැඩ කරනවා නම් එයාලව ඩිවිශන් විසින් කැන්සල් කරලා දානවා. (ඒ කියන්නේ මරලා දානවා). ඩිවිශන් කියන සංවිධානය පිහිටුවලා තියෙන්නේ රජයේ රහසිගත මෙහෙයුම් සිදු කරන්න. කොටින්ම කිව්වොත් මේ වගේ සංවිධානයක් තියෙනවා කියලා ඇමරිකාවේ ජනාධිපතිතුමාවත් දන්නේ නෑ. මේ ඩිවිශන් වල ප්‍රධානියා තමයි පර්සි කියලා කියන්නේ. නමුත් රජය වෙනුවෙන් වැඩ කරන මේ සංවිධානයෙන් ඇයි මේ නිකීටා පැනලා යන්නේ? ඒ වගේම ඇයි ඇය මේකට විරුද්ධව වැඩ කරන්නේ? ඒකට හේතුව තමයි, රජය වෙනුවෙන් වැඩ කරපු ඩිවිශන්, රජය වෙනුවෙන් පමණක් නැතිව විවිධ අපරාධ සංවිධාන වෙනුවෙන් කුලී වැඩ කරන තැනක් බවට පත්වීම. මේ නිසා මේ ඩිවිශන් වලින් විටින් විට තමුන්ගේම රජයට විරෝධීව පවා කටයුතු සිද්ධ කරනවා. නමුත් මේ පිලිබඳව මේ ඩිවිශන් තුල සිටින බොහෝ ආධුනිකයින් දන්නෙ නෑ. ඔවුන් හිතන්නේ තමුන් තමුන්ගේ රට වෙනුවෙන් සේවයක් කරනවා කියලා විතරයි. නමුත් මේ පිලිබඳව දැනගන්න නිසාවෙන් තමයි නිකීටා ඩිවිශන් වලින් පැනලා ගිහින් ඩිවිශන් විනාශ කිරීමේ අරමුණින් ඩිවිශන් වලට එරෙහිව වැඩ කරන්නේ.

කතාවේ මූලික චරිත ටිකක් තියෙනවා. ප්‍රධානතම චරිතය තමයි නිකීටා කියන්නේ. මැයගේ චරිතයට පණ පොවන්නේ අපි කවුරුත් දන්නා හඳුනන ප්‍රසිද්ධ නිලියක් වන Maggie Q. Naked Weapon, Mission Impossible III, Die Hard, Divergent, වැනි චිත්‍රපට වල මැයගේ රංගන දායකත්වයන් අපිට දකින්න ලැබෙනවා.

 අනිත් චරිත ටික තමයි
=====================

•ඇලෙක්ස් (Alex) – Lyndsy Fonseca.
Kick-Ass, Kick-Ass 2 චිත්‍රපටි වල වගේම Marvel’s Agent Carter වලත් දකින්න ලැබෙනවා.

•මයිකල් (Michael)- Shane West
අපි නම් මෙයාව ගොඩක්ම දන්නේ A Walk to Remember කතාවෙන් තමයි.

•පර්සි (Percy)- Xander Berkeley
The Mentalist කතාවේ තෝමස් මැකැලිස්ටර් චරිතයෙන් වගේම 24 රූපවාහිනී කතා මාලාවන් වලින් පවා අපිට මෙයාව බහුලව දකින්න ලැබෙනවා.

•බර්ක්ඕෆ් (Birkhoff) – Aaron Stanford
ප්‍රධාන වශයෙන් X-Men: The Last Stand චිත්‍රපටයෙන් සහ 12 Monkeys රූපවාහිනී කතා මාලාවෙන් අපිට මෙයාව දැකගන්න පුළුවන්.

•අමන්දා (Amanda)- Melinda Clarke
ගොඩක් කතා වල රඟපාලා තියෙනවා නම් තමයි. නමුත් විශේෂ වශයෙන් ප්‍රසිද්ධ වුනු චිත්‍රපටි වල නම් අපිට මැයව දැකගන්න ලැබෙන්නේ නෑ.

•ඔවන් (Owen) – Devon Sawa
Final Destination කතාවේ පොඩි කොල්ලෙක් විදියට මෙයාව දැකගන්න ලැබෙනවා.

•රයන් ෆ්ලෙචර් (Ryan Fletcher) – Noah Bean
12 Monkeys රූපවාහිනී කතා මාලාවේ අපිට මෙයාව දකින්න ලැබෙනවා.

=======================================================

ඔය විදියට මෙකී නොකී ගොඩක් චරිත ඉදිරියට හමුවෙවි තමයි මේ කතාව දිගට ගලාගෙන යන්නේ.

හොඳයි එහෙනං, මේ කිව්වා මදෑ…. දැන් ඉතිං කට්ටිය අද ඉඳන් නිකීටා බලන්නත් පටන් ගනිමු. දැනට නම් මේ කතාව ගොඩක් දෙනා බලලා ඇත්තේ. ඒත් නොබලපු අයට අද ඉඳන් සිංහල උපසිරැසිත් එක්ක කතාව බලන්න පුළුවන්. හැමදාම වගේ කට්ටියම මට දොසක් අඩුපාඩුවක් හරි කමක් නෑ, කමෙන්ට් එකක් දාලා යන්න එහෙම අමතක කරන්න එහෙම එපා.

බලාපොරොත්තුවෙන් හිටියේ කතාවේ ඔක්කෝම එකපාර දෙන්න, ඒත් ඉතිං කන කෑම වුනත් ජබස් ගාලා එකපාර බඩට හලාගන්නේ නැතුව ඩිංග ඩිංග කටින් කට කනකොටනේ රසේ තියෙන්නේ. එහෙම හිතලාම එකින් එක දෙන්න හිතාගත්තා. එහෙනං ඉතිං අද ඉදං හැමෝම කටින් කට බන්ඩිය පුරෝ ගන්නකෝ  🙂 🙂 🙂 (බඩගින්නේ තියන්නේ නෑ…. !)

 කතාව ගැන කිසිම අදහසක් තාමත් නැත්නං…
===============================

“ක්‍රියාදාම වලින් පිරුණු, ත්‍රාසජනක සටන් ජවනිකා වලින් පිරුණු රූපවාහිනී කතාමාලාවක්” කියලා අන්තිමටම කියන්නං…

ආයු – බෝ – වේවා !!!

 

 

 

140 MB (6.22GB Season 1-2 Complete 480p) කොපිය මෙතනින් බාගන්න

 

                              All Episodes                          Next Episode >>