Omar (2013) Sinhala Subtitles | අහස කඩා වැටේ… [සිංහල උපසිරසි සමඟ]

මුලින්ම ස්තූතිවන්ත වෙන්න ඕනෙ මම කලින් කරපු “ 15 MINUTES OF WAR (2019) මරු සිටින මානයේ…” උපසිරැසියට එක වචනෙකින් හරි මට ස්තූති කරපු හැම දෙනාටම. මොකද ඒ දිරි ගැන්වීම් නිසා තමයි මොන තරම් කාර්යබහුල උනත් මේ වෙනුවෙනුත් කාලය වෙන් කර ගන්න පුලුවන් උනේ.

සෑම වසරකදීම ලෝකය පුරාවට විවිධාකාර රටවල් වල විවිධාකාර භාෂා වලින් නිර්මානය වන්නාවූ දස දහස් ගනනක් වූ සිනමා පට අතුරින් බොහෝවිට අපේ නෙත ගැටෙනුයේ ඉංග්‍රීසි, කොරියානු, හිංදි, දමිළ ආදී සීමිත භාෂා ගණනකින් නිර්මාණය වූ එකම වර්ගයකට අයත් සිනමා නිර්මාණයන් කොටසක් පමණයි. මේ හේතුව නිසාවෙන්ම වෙනත් භාෂා වලින් නිර්මාණය කෙරෙන්නාවූ විශිෂ්ට සිනමාපට රැසක් අපට නොදැනීම මගහැරී යනවා. මේ උත්සාහය එසේ මගහැරී යන්නාවූ වෙනස්ම ආකාරයේ සිනමා සිත්තමක උපසිරැසියක් ලබා දෙන්නයි.

ලෝකෙ වටේ විවිධාකාර භාෂා වලින් නිර්මාණය උන සිනමා නිර්මාණ රසවිඳිනකොට හම්බ උන වෙනස්ම විදියේ පලස්තීනියානු සිනමා නිර්මාණයක් තමයි මේ පාර උපසිරැසියක් කරන්න තෝර ගත්තෙ. IMDb දර්ශකයේ 7.5ක් Rotten Tomatoes වර්ගීකරනයේ 89%ක් ලබා ගත්තු මේ සිනමා සිත්තම ” Hany Abu-Assad ” අධ්‍යක්ෂකතුමාගේ සිතේ එක්තරා රැයකදී මැවුන අදහසක් අනුව පැය හතරක් තුලදී කතාවේ කටු සටහනක් නිර්මාණය කරගෙන පසුව දවස් හතරක් තුලදී මේ සිනමා සිත්තමේ සම්පූර්ණ තිර පිටපතම ලියා අවසන් කර තිබෙනවා. අවසානයේ එදා ඒ රැයේදී සිතේ මැවුන ඒ අදහස නතර වන්නේ 2014 වසරේ පැවති ඔස්කාර් සම්මාන උළෙලේදී හොඳම විදේශ භාෂා සිනමා පටයට හිමි සම්මානය වෙනුවෙන් නිර්දේශිත අවසන් සිනමා පට පහ අතරටත් එක් වීමෙනුයි. එපමණකින් නොනැවතී 2013 වසරේදී පැවති ආසියානු – පැසිෆික් සිනමා සම්මාන උළෙලේදී හොදම සිනමා සිත්තම වශයෙනුත්, 2013 වසරේ කැනාස් සිනමා සම්මාන උළෙලේදී ජූරියේ විශේෂ සම්මානයකයටත් පාත්‍ර වීමෙනුයි. මේ සිනමා සිත්තම ලබාගත් සහ නිර්දේශ උන සම්මාන උළෙලවල් සහ සම්මාන ලැයිස්තුව ලියන්න ගියොත් එහෙම මේ ලිපියෙ දිග මදි වෙන නිසා ඒ කතාව මෙතනින් නවත්තන්නම්.

ඩේටා කාර්ඩ් දාගෙන අමාරුවෙන් තෝරා බේරාගෙන ෆිල්ම් බාන අයත් ඉන්න නිසා මම මෙහෙම කියන්නම්. පෞද්ගලිකවම මම මේ අවුරුද්දෙදි බලපු ෆිල්ම් වලින් තවමත් මගේ හොඳම එක මේ ෆිල්ම් එකයි. අවංකවම කිව්වොත් ෆිල්ම් එක ඉවර වෙලත් විනාඩි පහක් විතර යනකල් මේ මොන මල හත් ඉලව්වක්ද යකෝ මේ උනේ කියලා මමත් ගල් ගැහිලා බලන් හිටියා. පුංචි අවවාදයක් දෙන්නම්, කුතුහලය මොන තරම් උපරිම උනත් මොනම හේතුවක් නිසාවත් මේ ෆිල්ම් එකේ අවසානය බලලා මුල බලන්නවත්, කෑලි ඇර ඇර ඉස්සරහ බලන්නවත් යන්න එපා. කාලෙකින් ඔලුව කරකවලා අතාරින නියපොතු හප හපා ඉබේම පුටුවේ හිටවෙන ජාතියේ ෆිල්ම් එකක් බැලුවෙ නැත්නම් මෙන්න ඒකට හොඳම අවස්ථාව.

මේ සිනමා සිත්තමේ කතාව කියන එක නං හරිම අමාරු වැඩක්. මොකද මේක නරඹලා මිසක් කියවලා රසවිඳින්න පුලුවන් ජාතියේ සිනමා සිත්තමක් නොවෙන නිසා. මම පුංචි ප්‍රශ්නයක් අහන්නං, “අප්‍රිකාවෙ දඩයක්කාරයො වඳුරො අල්ල ගන්නෙ කොහොමද කියලා දන්නවද?” පුලුවන් නම් මේ ෆිල්ම් එක ඉවර වෙනකොට ඇත්තටම දඩයක්කාරයා කවුද වඳුරා කවුද කියලා හොයා ගන්න උත්සාහ කරන්න. මම මීට වඩා නං වැඩේ ලේසි කරන්නෙ නෑ. ෆිල්ම් එක බලලා උත්තරේ හොයා ගන්න බැරි උනොත් ඇවිත් කමෙන්ට් එකක් දාල යන්න. තවත් දෙයක් මේ ෆිල්ම් එක දිහා හොඳ අවධානෙන් බලන් හිටියොත් ෆිල්ම් එකේ උඩින් අපිට පෙන්නන කතාවට අමතරව ඊශ්‍රායල යටත්විජිතවාදී පාලනයටත් අනෙක් පසින් පලස්තීන විමුක්තිකාමීන්ටත් ඇගට පතට නොතේරෙන්න හීනියට ඔලුව අත ගගා ටොකු අනින හැටි ලස්සනට බලා ගන්න පුලුවන්.

” සිය මව්බිමේ නිදහස වෙනුවෙන් සටන් වැදි දේශප්‍රේමීන් පිරිසක්….
   ත්‍රස්තවාදයට එරෙහිව සටන් වැදි ඊශ්‍රායල විශේෂ නියෝජිතයෙක්….
  උපන්දා සිට එකටම සිටි සටන්කාමීන් තිදෙනෙක්….
  එකම මලකට පෙම් බැඳි මිතුරන් දෙදෙනෙක්….
  පලස්තීන විමුක්තිකාමී සංවිධානයක්….
  වෙස්වලාගත් ඊශ්‍රායල රහස් පොලිස් නිළධාරියෙක්….
  බේකරියක සිටි පිටි අනනා කොලුවෙක්….
  සැඟවුණු පාවා දෙන්නෙක්….
  ද්විත්ව ඔත්තුකරුවෙක්….
  ඊශ්‍රායල හමුදා මුර පොළකට නොසිතූ මොහොතක එල්ල වන ප්‍රහාරයක්….
  වසර දෙකකට පසු හෙලි වන රහසක්…
  සිය මවුබිමේ නිදහස උදෙසා දිවි පරදුවට තබා සටන්කල දේශප්‍රේමීන් සහ……
  ආත්මාර්ථකාමී වූ දේශ ද්‍රෝහීන්….
  සතුරන් මිතුරන් සහ පාවා දෙන්නන් මැදින් දිවෙන එක්තරා ආදර කතාවක්…..
  අවසරයි නරඹන්න, ” අහස කඩා වැටේ….. “

තවමත් මේ ෆිල්ම් එක බලන්න ඕනෙ කියල හිතුනෙ නැත්තන් ෆිල්ම් එකේ ට්‍රේල බලලම තීරණයක් ගන්න. නැත්නම් මගේ ලිපි ලිවීමේ නොහැකියාව නිසා පට්ටම ෆිල්ම් එකක් මිස් වෙයි. වාසනාවන්තයෝ නරඹත්වා….! මම බලාපොරොත්තු කඩ කරල නං පහලින් තියෙනව කමෙන්ට් තීරුව… ඇවිත් කැමති තරමක් බැනල යන්න පුලුවන්.

තවත් වෙනස්ම විදියේ ඊශ්‍රායල සිනමා නිර්මාණයක උපසිරැසියත් සමඟින් නැවත හමුවෙමු. ඔබට ජය…!

ප.ලි .
සබ් කරන්න මග ඇරුන පරන උනත් හොද ෆිල්ම් තියෙනවා නං පහලින් කමෙන්ට් එකක් දාලා යන්න. පුලුවන් විදියකට කරන්නම්.

 

 

 

 

 

Due to copyright issues, we do not provide any torrent link.

මෙම ලබා දී ඇති උපසිරසි Blu-ray පිටපත් සඳහා අදාළ වේ.

 

Subtitle Contributor Rank

BRONZE MEMBER
JOINING DATE – 2017-01-07
SUBMAKER RATING BY ADMINS