Saturday , October 1 2022
Breaking News

Tamil Rockerz [S01 : E01] Sinhala Subtitles | හොරාට කොල්ල කන බල්ලෝ! [සිංහල උපසිරසි]

Rating: 9.7/10. From 3 votes.
Please wait...

Yennai Arindhaal (2015) චිත්‍රපටයේ වික්‍ටර් ලෙසින් ඉමහත් ජනප්‍රියත්වයට පත් වූ අරුන් විජයි රඟන කතා මාලාව තමයි මේ Tamil Rockerz. බොහෝ කාලයකට කලින්ම මේ නළුවා, පියාගේ සහය ඇතිව සිනමාවට පිවිසුණත් දිගින් දිගටම අසාර්ථක වුණා. කොටින්ම කිව්වොත්, අසුබ නළුවෙක් විදිහට ලේබල් ගහලත් තිබුණා. කොහොම වුණත් අරුන් සිනමාව අතැහැරලා දාලා ගියේ නැහැ. මුලින් කිව්වා වගේ අරුන් විජයිගේ ජීවිතය උඩු යටිකුරු කරන චිත්‍රපටය තමයි එන්නෛ අරින්දාල්. ඉන් පස්සෙ වාසනව අරුන්ගෙ අතේ තිබුණේ කිව්වොත් නිවරදියි. මොකද ඉන්දියාවේ වැඩි වියදම් දරමින් නිෂ්පාදනය වුණ චිත්‍රපටි අතර එක් චිත්‍රපටයක් වුණ, වර්ථමානයේ ලෝකයේ විශාලම වෙළෙඳපල සහිත ඉන්දීය නළු ප්‍රභාස්ගේ Saaho (2019) චිත්‍රපටයේ ඉතාමත් වැදගත් චරිතයක් ඉදිරිපත් කිරීමට අරුන්ට අවස්ථාව හිමි වෙනවා. ඉතින් බලමු හා හා පුරා කියලා අරුන් රඟපෑ මේ අලුත් කතා මාලාව කොහොමද ගලා යන්නෙ කියලා.

කෝඩම්බක්කම් ප්‍රදේශයේ වන සිදුවීමක්. ප්‍රසිද්ධ සිනමා තරුවක් වන ග්ලෝබල් ස්ටාර් අජයිගේ සිංගදුරයි චිත්‍රපටය නිකුත්වන නිසාවෙන් සිනමාශාලා ඉදිරිපිට මහත් සෙනඟක් එක් රොක් වී ඉන්නවා. ඊටත් වඩා අජයිගේ රසිකයන් එකතුවෙලා එම ප්‍රීතිය සමරනවා. බොහෝ රසිකයින් සිනමාශාලාවේ ඉඩ වෙන් කර ගනිද්දි තවත් සමහරකට ටිකට් නොලැබී අප්‍රසාදයෙන් සිනමාශාලාවෙන් පිටවී යනවා. ඒත් දැන් එහෙම වෙන්න අවශ්‍යතාවයක් නැහැ. මොකද ටැමිල් රොකර්ස් වෙබ් අඩවියෙන් නිකුත් වූ චිත්‍රපටය එසැනින්ම බාගත කර හෝ ඔන්ලයින් නැරඹීමේ හැකියාව ලැබෙනවා. ඉතින් චිත්‍රපටයේ මංකොල්ල කෑ පිටපත් ටැමිල් රොකර්ස් හරහා නිකුත් වීමත් සමඟම චිත්‍රපටය ඇත්තටම නැරඹීමට නොවටිනා චිත්‍රපටයක් බව දැනගන්නවා. ඒ නිසාම විචාරක සෘණාත්මක අදහස් පවා පලවෙනවා. මේ නිසාවෙන් ණයට මුදල් ගෙන සිංගදුරයි චිත්‍රපටය නිෂ්පාදනය කල නිෂ්පාදක තමන් ගත්ත ණය ගෙවාගන්න තිබූ එකම ක්‍රමය චිත්‍රපටය සාර්ථක වීමත්, චිත්‍රපටය පිටතට නිකුත් වීමත් සමඟ යෙදූ මුදල් නැවත චිත්‍රපටය මඟින් ලබාගත නොහැකි වන නිසා සියදිවි නසා ගන්නවා. මේ සම්බන්ධව නිෂ්පාදකවරුන්ගේ මඩුල්ලේ උණුසුම් සාකච්ඡා වාරයක් ඇති වනවා. ලඟ එන දීපාවලියට නිකුත් වීමට නියමිත චිත්‍රපටයේ නිෂ්පාදක මදී වියරු වැටී නිෂ්පාදක මඩුල්ලෙන් මේ ටැමිල් රොකර්ස් සම්න්ධව යම් ක්‍රියාමාර්ගයක් ගන්නා ලෙස ඉල්ලා සිටිනවා. එහෙත් නිෂ්පාදකවරුන්, බෙදාහරින්නන්ගෙන් ප්‍රතිචාරයක් නොලද නිසාවෙන් ඔහු කුණු හරුපද පාවිච්චි කරමින් බැන වැදී පිටවී යනවා. ලඟ එන දීපාවලියට නිකුත් වීමට නියමිතව ඇත්තේ තවත් තරුවක් වන ආදිත්‍යාගේ ගරුඬා චිත්‍රපටය. ආදිත්‍යාගේ තාත්තා ආදිත්‍යාගේ ඊලඟ චිත්‍රපටය ගැන බෙහෙවින් කල්පනාකාරී වුණා. ආදිත්‍යා බ්ලොක්බස්ටර් එකක් ගහන්න ඕනෑය කියන තැන නිෂ්පාදක මදී මත බර පැටවුණා. මදී දැනටමත් ඉ.රු. කෝටි 300ක් මුදලක් මූල්‍යණය කර(ණයට ගෙන) මේ සඳහා යොදාගෙන තිබුණේ. ඉතින් එක පැත්තකින් ටැමිල් රොකර්ස්ලා මේ ගරුඬා චිත්‍රපටය යහතින් සිනමාශාලාවල තිරගත වෙන්නට ඉඩ දෙයිද යන්න ආදිත්‍යාගේ තාත්තාගේ සැකයක්. මදී නම් කියන්නෙ චිත්‍රපටය ග්‍රැෆික්ස් බොහෝ වශයෙන් පාවිච්චි කල නිසා චිත්‍රපටයේ අත්දැකීම විඳින්න අනිවාර්යයෙන්ම සිනමා ශාලාවට යන්න ඕනේ කියලයි. කලින් චිත්‍රපටවල කැමරා පිටපත නිකුත් කල නිසා ඒ තරම් නරඹන්නන්ට රස වින්දනයක් ලබා දුන්නේ නැහැ. මදී නොයෙක් ආකාරයෙන් චිත්‍රපටිය පිට නොවෙන්න වග බලාගන්න කටයුතු කලා. ඉතින් මේ ගරුඬා චිත්‍රපටයට ටැමිල් රොකර්ස්ලා කුමන අකාරයක බලපෑමක් ඇති කරාවිද? නළු ආදිත්‍යාගේ වෘත්තියට ජීවිතය අවසන් වෙලා යාවිද?

ටැමිල් රොකර්ස් නැත්නම් තමිල් රොකර්ස් කියන වෙබ් අඩවිය ටොරෙන්ට්වලින් ෆිල්ම් ඩවුන්ලෝඩ් කරන අය හොඳින්ම දන්න වෙබ් සයිට් එකක්. දැන් නම් මේ සයිට් එක අක්‍රීය වෙලා තියෙන්නෙ. මෙයාලා දෙමළ, තෙළිඟු, මලයාලම්, හින්දි, කන්නඩ, ඉංග්‍රීසි වගේ භාෂාවලින් චිත්‍රපටි අප්ලෝඩ් කරලා ටොරෙන්ට් ක්‍රමයට ඩවුන්ලෝඩ් කරගන්න අපට සේවා සපයනවා. ඇත්තටම කිව්වොතින් ටැමිල් රොකර්ස් නිසා දෙමළ සිනමාවට පුළුල් පරාසයකට ලං වෙන්න පුළුවන් වුණා වගේම සිනමා කර්මාන්තයට විශාල වශයෙන් මූල්‍යමය පාඩු ඇති කරනවා. මෙයාලට විරුද්ධව සිනමාවේ විවිධ වෘත්තීයන්වල නියත අය පැමිණිලි විශාල ප්‍රමාණයක් ලබා දීලා තියෙනවා. ඒත් අවුරුදු ගණනාවක් තිස්සෙම පොලිසියේත්, සිනමා ශාලා හිමියන්, බෙදාහරිනන්ගෙන් ඇස්වලට වැලි ගසා ටැමිල් රොකර්ස් සෙල්ලම් කරනවා. බොහෝ නිෂ්පාදකවරුන් ආදී සිනමාවේ නියුතු අයගේ දෙස් දෙවොල් ඔවුන්ට ලැබෙද්දී, බොහෝ ජනකායකගේ උපකාරයද ඔවුන්ට ලැබුණා. ටැමිල් රොකර්ස් වෙබ් අඩවිය ආරම්භ කලේ දෙදෙනෙක් එකතු වෙලා කියලයි කියන්නෙ. මින් එක් අයෙක් සීඩී කඩයක් පවත්වාගෙන ගිය සීඩී පිටපත් ගැසීම ආදිය පිළිබඳ දැනුම ඇති අයෙක්. අනෙකා නිෂ්පාදක හා බෙදාහරින්නන් යටතේ සේවය කල කෙනෙක් බවත් කියැවෙනවා. මේ දෙන්නට සීඩී නිළ වශයෙන් නිකුත් වෙන්න කලින්ම විශාල වශයෙන් පිටපත් පිට කර විශාල ලාභයක් උපයා ගැනීමට හිතාගන්නවා.

ඉතින් මෙයාලගේ පලවෙනි කොල්ලකෑම 2007 දි නිකුත් වුණ රජිණිකාන්ත් රඟ පෑ Sivaji චිත්‍රපටයෙන් පටන් ගන්නවා. සිවාජි නිෂ්පාදනය කලේ AVM Productions හි සරවනන් විසින්. ඇයි නිෂ්පාදක ගැන කිව්වෙ ඇයි කියලා පස්සෙ දැනගන්න පුළුවන්. කොහොම හරි සිවාජි චිත්‍රපටියේ ඕඩියෝ තැටිය ඕඩියෝ ලෝන්ච් එකටත් කලින්ම මෙයාලා හොරට සීඩි ගහලා එලියට දානවා. ඉන් පස්සෙ සිවාජි චිත්‍රපටියේ මාස්ටර් කොපිය සොරාගෙන VCD වලට පිටපත් කරලා ඒ මාර්ගයෙන් මුදල් උපයා ගන්නවා. මේ කාරණාව දැනගත්ත සිවාජී චිත්‍රපට කණ්ඩායම පොලිසියේද සහය ඇතිව තමිල්නාඩුවේ සියලුම සීඩී කඩ වසා දමා සිවාජි චිත්‍රපටියේ ඕඩියෝ සීඩී සහ චිත්‍රපටයේ පිටපත් භාරයට අරගන්නවා. මේ නිසාවෙන්ම හොර සීඩී ගැහීමත් එන්න එන්නම අඩුවුණා. පසුව කාලයකදී දියුනුවත් එක්කම අන්තර්ජාල භාවිතය පැමිණීමත් එක්කම නිළ වශයෙන් සීඩී නිකුත් කළ ආයතනවලින් තමන්ගේ සීඩී අන්තර්ජාලයේ තැන්පත් කරන්න ගත්තා. ඒ වගේම හොරට චිත්‍රපට නිකුත් කරමින් වෙබ් සයිට් කීපයකුත් ක්‍රියාත්මක වුණා. මේ කාලයේදී තවත් වෙබ් සයිට් නිර්මාණය වෙද්දි තමයි ටැමිල් රොකර්ස් වෙබ් අඩවිය නිර්මාණය වෙන්නෙ. එක් අවස්ථාවකදි හොරාට පිටපත් අන්තර්ජාලයට නිකුත් කල වෙබ් සයිට් එකක් පොලිසිය විසින් අල්ලා ගන්නවා. සුපරීක්ෂාකාරීව කල්පනා කරපු ටැමිල් රොකර්ස් එයාලගෙ වෙබ් අඩවියට විවිධ ආරක්ෂණ ක්‍රියාමාර්ග යොදා ගත්තා. තව දුරටත් හොඳ පිටපත් අරගන්න බැරි නිසා සිනමා ශාලාවට ගිහින් හොඳ තත්වයේ ෆෝන් එකකින් චිත්‍රපටිය රෙකෝඩ් කර ගන්නවා. ඊට පස්සෙදි ඒ වීඩියෝව අන්තර්ජාලයට අප්ලෝඩ් කරනවා. ටැමිල් රොකර්ස්ලාට විරුද්ධව කොපමණ චෝදනා, පැමිණිලි ගොනු කර නීතිමය ක්‍රියාමාර්ග ගෙන වෙබ් අඩවිය වසා දමා දැමුවත් සුළු මොහොතකින් ආයේමත් ඔවුන් අලුත් වෙබ් අඩවියක් නිර්මාණය කරනවා. ඉන් පස්සෙ තමිල්නාඩු පොලිසිය මෙයාලා හදන හැම වෙබ් සයිට් එකක්ම වහලා දාද්දි, මෙයාලා VPN සර්වර් පාවිච්චි කරලා විවිධ රටවල්වල වෙබ් අඩවි නිර්මාණය කරන්න ගත්තා. අපිට චිත්‍රපටි ඩවුන්ලෝඩ් කරන්න දෙන ලින්ක් සම්බන්ධ වෙන්නෙ බොහෝම දුර රටවල් වලට. නැත්නම් සමහරවිට ඉංග්‍රීසි දැනුම පවා නැති රටවල්වලට. මොකද අපරාධ විමර්ශනය කරන්න කාලය, වැය වෙන මුදල් එක්ක බලද්දි එයාලව හොයාගන්න එක අමාරු වැඩක්. ඒ වගේම එයාලව එහෙම අල්ලගත්තොත් ආයෙමත් වෙනත් රටක Domain එකකට මාරු වෙන්න ඉඩ හසර එයාලට ලැබෙනවා. සමහරවිට ඉන්නෙ ඉන්දියාවේම වෙන්නත් පුළුවන්. එක එක Domain වලට ලියාපදිංචි වෙලා වෙන වෙන රටවල්වල ඉන්නවා වගේ පෙන්වන්න පුළුවන්.

ෆෝන් එකෙන් මේක කැමරාවක් ගෙනිහින් සිනමා ශාලාවේ තියලා රෙකෝඩ් කරන තැනට පත් වුණා. මුලින් මුලින් ඒ ෆෝන් වලින්, කැමරා වලින් කරපු පිටපත්වල තනිකරම ප්‍රේක්ෂකයින්ගේ ඝෝෂාව විතරයි. දෙබස් ඇහෙන්නෙම නැති තරම්. ඒකටත් විසඳුමක් විදිහට වෙනත් රටක නැත්නම් වෙනත් ප්‍රාන්තයක සිනමා ශාලවකින් වීඩියෝව විතරක් රෙකෝඩ් කරලා, තමිල්නාඩුවේදී චිත්‍රපටයේ දෙමළ ඕඩියෝවත් රෙකෝඩ් කරගන්නවා. වීඩියෝව එක්ක තමිල්නාඩුවේදි රෙකෝඩ් කරපු ඕඩියෝ එක ගලපලා තමයි PreDVD පිටපත හදාගන්නෙ. කියන්නෙ නම් ටැමිල් රොකර්ස්ලා ඉන්දියාවේ වාසය කරන අය නෙවෙයි කියලයි. ඉන්දියාවේ වෙලාවට කලින් අදාල චිත්‍රපටියේ දර්ශනවාරය බලන්න පුළුවන් රටකදී ඒ චිත්‍රපටය රෙකෝඩ් කරලා පිට කරනවා කියන එකයි සැකය. සමහර වෙලාවට ඉන්දියාවේ පලවෙනි දර්ශනවාරය පටන්ගන්නත් කලින්ම චිත්‍රපටිය ටැමිල් රොකර්ස් එකෙන් පිටවෙන්න හේතුව ඒකයි. මෙහෙම දෙමළ භාෂා චිත්‍රපටි විතරක් කොල්ල කෑව මෙයාලා තෙළිඟු, මලයාලම්, හින්දි, කන්නඩ, ඉංග්‍රීසි භාෂා වලිනුත් චිත්‍රපටි මේ විදිහට පිටට දාන්න ගත්තා. මේ නිසා එයාලා ගෝලීය වශයෙන් බොහෝ ප්‍රසිද්ධියට පත් වුණා.

මෙයාලා මෙහෙම නීති විරෝධීව, නොමිලේ චිත්‍රපටි ඩවුන්ලෝඩ් කරගන්න දීලා මෙයාලට වෙන සෙතේ මොකක්ද? ලාභය/වාසිය මොකක්ද? එයාලට සෘජුවම කිසිම ආදායමක් ලැබෙන්නෙ නැහැ. සයිට් එකට ඇඩ් බ්ලොක් නොකර යනව නම් තිරය වැහෙන්නම පොප්-අප්ස් ඇඩ් වැටෙනවා දකින්න ඇති. ඒවා ක්ලික් උනාම දිගට දිගට ඇඩ් වැටෙන සයිට් වලට යනවා දකින්න ඇති. ඒ විදිහට ඩාර්ක් වෙබ් සයිට් වලින් ටැමිල් රොකර්ස් එකට ගෙවීමක් කරලා සයිට් එකට දාන්න ඇඩ් දෙනවා. ඒ විදිහට තමයි ටැමිල් රොකර්ස්ලට ආදායම ලැබෙන්නෙ. ටැමිල් රොකර්ස් කොයි තරම් උපයනවද කියන එක නම් ප්‍රශ්නාර්ථයක්. ඒ වගේම ටැමිල් රොකර්ස්ලට තිබුණ වෙබ් සයිට් එක ඇරෙන්න කිසිම සමාජ මාධ්‍යයක එයාලා නැහැ.

තවත් මට්ටමින් මට්ටමට දියුණු වෙමින් සිටිය ටැමිල්‍ රොකර්ස් චිත්‍රපටි කොල්ල කමින් HD පිටපත් විදිහටත් පිට කරන්න වුණා. 2017දි පෙබරවාරි මස 09 නිකුත් වීමට තිබුණ Singam 3 එදිනම ටැමිල් රොකර්ස් වෙබ් අඩවියෙන් ඔන්ලයින් නැරඹීමට ලබා දෙන බවට අභියෝග කර තිබුණා. මේක දැනගන්න ලැබුණ සිංගම් 3 චිත්‍රපටයේ නිෂ්පාදක K.E. ඥානවේල් රාජා Yaman (2017) චිත්‍රපටයේ ඕඩියෝ ලෝන්ච් එක වෙලාවෙදි ටැමිල් රොකර්ස් ඇඩ්මින්ලාට ප්‍රසිද්ධියේ අමු තිත්ත කුණුහරුපෙන් බනිනවා. ඒ වගේම එයාලව මාස හයක් ඇතුලත අල්ලා ගන්නවා කියලත් ධෛර්යයෙන් කියනවා. “අවුරුදු දෙකක් මහන්සිවෙලා තනපු චිත්‍රපටිය මට මූල්‍යමය ප්‍රශ්නයක් නිසා දිනය පහු කරන්න වේවිද නැද්ද කියලා දන්නෙ නැහැ. ඒත් ටැමිල් රොකර්ස් බල්ලෝ ආත්ම විශ්වාසයෙන් කියනවා අපි 09 දා තමයි චිත්‍රපටිය එලියට දාන්නෙ කියලා. මේක මමත් ඇතුලුව මුළු කර්මාන්තයම බලාගෙන ඉන්නවා. උඹලව තව මාස හයකින් අල්ලලා ඒක ලයිව් ස්ට්‍රීම් කරනවා” විදිහට ඕඩියෝ ලෝන්ච් එක වෙලාවෙදි අමතරව කුණුහරුප ටිකකුත් එක්කම කතාවක් කරනවා. මේ සිංගම් 3 චිත්‍රපටයේ නිෂ්පාදක ඥානවේල් රාජා, ශිවකුමාර් පවුලට වඩාත් සමීප කෙනෙක්. ඔහු සූරියා, කාර්තිගේ චිත්‍රපටි රැසකට නිෂ්පාදනයෙන් දායක වෙලා තියෙනවා. මේ කාරණා නිසාම දිස්ත්‍රික් චිත්‍රපට බෙදාහරින්නන්ගේ සංගමයක සභාපති වෙන්නත් මෙයා තරඟ කරලා තියෙනවා. ඒත් ඒ උත්සහය ව්‍යර්ථ වෙලා තියෙනවා.

 

නිෂ්පාදක K.E. ඥානවේල් රාජා සහ නළු සූරියා

මේ අතරෙදි “නඩිගර් සංගමයේ” මූලිකත්වයෙන් මේ කොල්ලකෑම් ගැන සොයා බලන්න කණ්ඩායමක් පත් කෙරුණා. Vivegam (2017) චිත්‍රපටිය නිකුත් වී මිනිත්තු කිහිපයකින් වාගේ ටැමිල් රොකර්ස් හරහා පිට වෙනවා. චිත්‍රපටය ඔන්ලයින් අප්ලෝඩ් කරපු කෙනාගේ IP ඇඩ්‍රස් එකෙන් ඒ අදාල පුද්ගලයා අල්ලා ගෙන පොලිසියට බාර දෙනවා. ඒත් විමර්ශන කිහිපයක්ම සිදු කිරීමෙන් අනතුරුව දැනගන්න ලැබෙනවා එම පුද්ගලයා ටැමිල් රොකර්ස් වැනිම වෙබ් අඩවියක් වූ Tamilgun අඩවියේ ඇඩ්මින් කියලා දැනගන්න ලැබෙන්නෙ.

ඒ වගේම ටැමිල් රොකර්ස්ලා එදා මෙදා නොවූ ඉතාමත් වටින ජයග්‍රහණයක් හිමි කරගන්නවා. ඒ විජේ දේවරකොන්ඩාගේ Taxiwala (2018) චිත්‍රපටය නිකුත්වීමට සතියකට පෙරම ටැමිල් රොකර්ස් හරහා පිට කිරීමට හැකිවීමයි. ටැමිල් රොකර්ස් පිටකල චිත්‍රපටයේ කාලය පැය 3.00 – 3.30ක් පමණ වනවා. ඒත් චිත්‍රපටයේ හැබෑම ‘ෆයිනල් කට්’ එක පැය 2.30ක්. ඉතින් ඒකේ තේරුම තමයි ටැක්සිවාලා චිත්‍රපටය නිල වශයෙන් නිකුත් කිරීමට නෙවෙයි, අවසන් සංස්කරණටත් පෙරම ඒ නිෂ්පාදන කණ්ඩායමේ පුද්ගලයෙකු විසින් පිටතට ලබාදීම.

ටැමිල් රොකර්ස් නිසා වුණ යහපත් දෙයක් විදිහට නවක අධ්‍යක්ෂක වරුන්ගේ චිත්‍රපටි වගේම නිසි අවධානයක් නොලැබුණ චිත්‍රපටිවලට ලැබෙන්නත්, තවත් චිත්‍රපටි අනිවාර්යයෙන්ම සිනමා ශාලාවට ගිහින් අත්දැකීම විඳගන්න ඕනේ කියලා හිතෙන විදිහටත් හිතන්න සැලැස්සුවා කියලයි සමාජ මාධ්‍යවල කියැවෙන්නේ. Ratsasan (2018) චිත්‍රපටය අසාර්ථක චිත්‍රපටයක් වීමට ඉඩ තිබුණත් ටැමිල් රොකර්ස් හි කැමරා පිටපත්වලින් නරඹා, නියම ත්‍රාසය විඳගන්න නම් සිනමා ශාලාවට ගිහින්ම බලන්න ඕනේ කියන අදහස ප්‍රේක්ෂකයින් හිතේ තැන්පත් කලා. ඒ නිසාම අවදානයක් නොතිබුණ රාට්චසන් වැනි චිත්‍රපට නැරඹීමට ප්‍රේක්ෂකයින් සිනමාශාලා කරා යෑමටත් ටැමිල් රොකර්ස් හේතුවක් වුණා. ඒ වගේම බොහෝ ඉල්ලුමක් තියෙන චිත්‍රපටිවලට ටිකට් නොලැබී යන්න පුළුවන්. එහෙම සල්ලි වියදම් කරගෙන බලන්න චිත්‍රපටිය සවුත්තුයි නම් සල්ලිත්, වෙලාවත්, මහන්සියත් අපරාදේ. ඒ නිසා චිත්‍රපටිය බලන්න වටිනවද කියන්නත් ටැමිල් රොකර්ස් මහඟු උපකාරයක් වුණා. ලංකාවේ ඉන්න අපේ බහුතරයත් ටිකට් වලට වියදම් නොකර ඒ ඒ භාෂවල චිත්‍රපටි බැලුවෙත් මේ ටැමිල් රොකර්ස් නිසා. කොහොම වුණත් අගය කලයුතු චිත්‍රපටිවලට ප්‍රේක්ෂකයින්ගේ අවදානය, ආකර්ෂණය අනිවාර්යයෙන්ම ලැබෙනවා කිව්වොත් නිවැරදියි. දැන් නම් මේ Tamil Rockerz අඩවිය නැත්තටම නැතිවෙලා තියෙන්නෙ. තවදුරටත් ඒ වෙබ් අඩවියෙන් චිත්‍රපට ඩවුන්ලෝඩ් කරගන්න පුළුවන් කමක් නැහැ. ඒ වෙනුවට දැන් වෙනත් ආදේශක වෙබ් අඩවි තිබෙනවා. මේ වෙබ් අඩවි කුමන නමකින් තිබුණත් අපි වගේ චිත්‍රපට රසිකයින්ගේ සහය ඔවුන්ට විශාල වශයෙන් ලැබෙනවා. මේ කොල්ලකෑම් කරන වෙබ් අඩවි, ඔබ, මම මේ ආකාරයට චිත්‍රපටි බලන හැමෝම මේ වෙනුවෙන් ඔවුන්ට සහය ලබා දෙනවා.

ඒ වගේම මේ කතා මාලාවේ එන සමහර සිදුවීම් නළු විජයි සෘජුවම ඉලක්ක කරලා තියෙනවා වගේම මෙහි චරිතයක් විජයිව පාදක කරගෙන තියෙනවා. ඒ ආකාරයටම කතා මාලාවෙදි විජයිගේ සැබෑ ජීවිතයේදි සිදු වූ සැබෑ සිදුවීම් ප්‍රතිනිර්මාණය කරලා තියෙනවා දකින්නටත් පුළුවන්. කොහොමින් හරි පහසු වෙන්නත් එක්ක උපැසිරැසිය යටින් වරහනක මම ඒ සම්බන්ධව ඉඟියක් සඳහන් කරලා තියෙනවා. ඉතින් කිව්වා වගේම විජේ රසිකයන්ගේ මහත් අප්‍රසාදය මේ කතා මාලාවට එල්ලවෙලා තියෙනවා. ඒ වගේම අධ්‍යක්ෂකවරු 40ක්ගෙන් කතා 40ක් ඇහුව නවක නළු අශ්වින් කුමාර් ගැනත් සඳහන් කරලා තියෙනවා.

මේ කතාමාලාවේ නිෂ්පාදනය පෙරදී සඳහන් කල Sivaji (2007) චිත්‍රපටය නිෂ්පාදනය කල AVM සරවනන් නිෂ්පාදකතුමාගේ ම්නිබිරියන් වන අරුණා ගුහාන් සහ අපර්ණා ගුහාන්. තවත් ආකාරයකට කිව්වොත් ටැමිල් රොකර්ස් ඇඩ්මින්ලා කියලා හඳුන්වන දෙන්නාගේ පලවෙනි ගොදුර වුණේ මේ නිෂ්පාදන ආයතනයේ චිත්‍රපටය. AVM ප්‍රඩක්ෂන්ස්ලාගේ නිෂ්පාදන කටයුතු දැන් අඩපණ වෙලා තියෙන්නෙ සමහර නළුවන්ගේම(2000න් පසු ජනප්‍රිය වූ) අක්‍රමවත් වැඩ පිළිවෙල නිසාවෙන්.

ඉතින් මේ කතා මාලාව ඔබ වෙත ගෙන එන්නෙත් එවැනිම ආකරයට කොල්ල කෑ වෙබ් අඩවියකින් තමයි. මේ සයිට් වල හොඳ, නරක විදිහට දෙපැත්තට බෙද බෙදා ඉන්න පුළුවන්. මේ කතා මාලාව Imdb අගය කිරීම විදිහට 6.8/10 ලබ ගන්නවා. හුදෙක් මේ කතා මාලාව අගය කිරීම්, ධනාත්මක විචාර ලබාගන්න නිර්මාණය වෙලා නැහැ කියලා දකින්න පුළුවන්. ඉතින් මෙතැන් පටන් කොටස් 8ක් අන්තර්ගත මේ කතා මාලාව බයිස්කෝප් වෙතින් ඔබට සිංහල උපසිරැසි ලබාගෙන නරඹන්න පුළුවන්. දිගටම රැඳී ඉන්න බයිස්කෝප් එක්කම. අදහස් උදහස් එහෙමත් කියන්න අමතක කරන්න එපා.

බුදු සරණයි! දෙවි දේවතාවුන්ගේ රැකවරණයි!

 

 

Due to copyright issues, we do not provide any torrent links.

මෙම ලබා දී ඇති උපසිරසි WEBRip පිටපත සඳහා අදාළ වේ.

 width=

මේ ලබා දී ඇති සිංහල උපසිරැසි පිළිබද “රවිඳු නවින්” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank

BRONZE MEMBER
JOINING DATE – 2017-06-14
SUB-MAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.

All BT1

Check Also

The Lord of the Rings: The Rings of Power [S01 : E05] Sinhala Subtitles | බෙදීම! [සිංහල උපසිරසි]

මේ එපිය නම් හොඳටම පමා වුණා 🙁 ඇත්තටම සමාවෙන්න ඕන මෙච්චර කාලයක් ගියාට මේක අරගෙන …

Leave a Reply

Your email address will not be published.

13 comments

  1. Supun Kaushalya

    තෑන්ක්ස් සබ් එකට

  2. හැමෝටම ස්තූතියි!

  3. එක හුස්මට ලිපිය කියෙව්වේ… බයිස්කෝප් බ්‍රෑන්ඩ්එකට ගහන්න අනිත් සයිට්වලට බැරි අන්න ඒකයි… ලිපියට වෙච්ච මහන්සියට රෙස්පට්….. ♥♥☻☻…බොහෝම ස්තූතියි උපසිරැසියට…☺☺♥♥

  4. Sub akta thanks

  5. Thanks for sub

  6. සබට තුති මචෝ. ලිපිය නම් මරු.

  7. Woooooow

  8. ammo… kollo.. lipiye diga.. thank you.. wede niyamai

  9. ලිපිය මරු ♥️

  10. උපසිරසියට තුති

  11. සබ් එකට වැඩිය ලිපියට මහන්සි වෙන්න ඇති
    එලකිරි සහෝ උබලට අපි පට්ටම ආදරෙයි❤️

  12. ගොඩක්ම ස්තූතියි. …
    ඔබට සහ ඔබ පවුලේ සැමටත්
    මෙම වෙබ් අඩවියේ සියලුම  සොයුරු සොයුරියන්ටත්
    බුදු සරණයි – දෙවි පිහිටයි……..!

    ස්තූතිය ප්‍රකාශකිරීම සිංහල උපසිරසි ලබාගන්නා
    නියම සිංහලයන්ගේ සිරිතකි ……..!!

error: Alert: Content is protected !!