Friday , October 23 2020
Breaking News

The Current War (2017) Sinhala Subtitles | විදුලියේ යුද්ධය! [සිංහල උපසිරැසි] *200*

Rating: 9.7/10. From 32 votes.
Please wait...

සුභ දවසක් හැමදෙනාටම. ඉතින් ලොකු කාලයක් ගතවෙලා හරි මේ මගේ 200 වෙනි සිංහල උපසිරැසි ගැන්වීම ඔයාලට නරඹන්න දෙන්නයි සූදානම.

ඉතින් 2013 ජූනි 07 වෙනිදා තමයි බයිස්කෝප් සිංහලෙන් අපේ මේ සයිට් එක හරහා මගේ සිංහල සබ්ටයිටල් එක්ක පලවෙනිම දවස. ඉතින් ඔහොම කාලයෙන් කාලය ගෙවිලා ගියා. 2013 අවුරුද්දේම නොවැම්බර් 04 වෙනිදා වෙනකොට මගේ 50ස් වෙනි සිංහල උපසිරැසිය බයිස්කෝප් අඩවියේ පලවුනා. මට මතකේ විදිහට මම හරිනම් ඒ වෙද්දි ටික කාලයකින් 50 ගහපු සයිට් එකේ එකම කෙනා මම වෙන්න ඕන. ඒ ගැන මම කියනවට වඩා මම මගේ 50වෙනි උපසිරැසියට දුන්න Krrish 3 උපසිරැසියටම ගිහින් ඒකේ තියෙන කමෙන්ට් කියවන්න කියලා ආරාධනා කරනවා. ඔහොම ඔහොම ඉතින් කාලය ගෙවිලා ගියා. හැබැයි ඉතිං 50ස් වෙනි උපසිරැසිය ලඟ නැමුවට 100 වෙනි එක එහෙම කරන්න බැරිවුනා. ටිකෙන් ටික වැඩ රාජකාරිත් එක්ක කොහොමෙන් කොහොම හරි ඉතිං ඇදගෙන ආවා. ඉතින් මගේ 100 වෙනි සිංහල උපසිරැසිය 2014 ජූනි 40 වෙනිදා The Iceman චිත්‍රපටියට ලබාදුන්න සිංහල උපසිරැසිය වෙනවා. ඉතින් ඔහොම ආපහු කාලය ගෙවිලා යනවා. නොයෙකුත් වැඩ රාජකාරි අස්සේ කොහොම හරි උපසිරැසි 150 දක්වා එනවා. 2015 මාර්තු 05 වෙනිදා වෙනකොට Exodus Gods And Kings චිත්‍රපටියෙන් මගේ ඒ 150 වෙනි කඩඉමත් පහු කරනවා.

ඉතින් බලාගෙන යනකොට තේරේවි කොහොමද මේ උපසිරැසිකරනය සිද්ධ වුනේ කියලා. පලවෙනි සිංහල උපසිරැසිය කරලා මාස 05කින් 50වෙනි උපසිරැසිය කරා. නමුත් 100 වෙනි උපසිරැසිය කරන්න ගියපු කාලය මාස 07ක්. එතකොට 150 උපසිරැසිය කරන්න ගියපු කාලය මාස 09ක් දක්වා දිග්වුනා. ඇයි ඉතිං අර විදිහටම ඉක්මනින්ම මාස හතරෙන් පහෙන් පනහා ගැහුවා වගේම ඉතුරු ටිකත් පනහා පනහා ගහන්න බැරිවුනේ?!

සල්ලි වලට කරන දෙයක් නෙමෙයිනේ මහත්තයෝ. මගේ වැඩත් එක්ක විනෝදයට කරන දෙයක්. හැබැයි ඉතිං ඔලුවේ පොඩි තරගයකුත් තියාගෙනයි කරන්නේ. මොකද ෆිල්ම් එකක් කරනවනම් ඒක රිලීස් වුන දවසේම දෙන්න ගොඩක් අය උත්සාහ කරනවා. ඒ වගේම TV සීරියස් එකක් කරන උපසිරැසිකරුවෙක්නම් අදාල එපිසෝඩ් එක ආපු දවසෙම සිංහල උපසිරැසිය දෙයි කියලා සෑහෙන්න දෙනෙක් බලාගෙන ඉන්නවා. එහෙම නොදුන්නාම අම්මලා පවා ඒ කාලේ මතක් කරපු මහත්තරුත් හිටියා.

ඉතින් ඔහොම හෙමින් හෙමින් උපසිරැසි කිරීම ඇදගෙන ඇවිත් 2015 ජූලි 01 වෙනිදායින් මම උපසිරැසි කරන එක නතර කරා. ඒ යෙදුන වැඩත් එක්ක තිබ්බ අපහසුතාවය මත. ඒ වෙද්දි කරපු රස්සාව එක්ක වැඩ ඇරිලා ගෙදර එන්නේ නිදාගන්න බලාගෙන. ඉතින් ෆිල්ම් එකක් බලන්න සෙට් වෙන්නෙත් බොහොම කලාතුරකින්. ඒ කරලා 2016 ජූනි 30 වෙනිදා ඒ කියන්නේ අවුරුද්දකට විතර පස්සේ ආපහු නිකං කල එලි බැස්සා වගේ උපසිරැසියක් දුන්නා. ඒත් එතනින් දිගටම කරගෙන යන්න බැරිවුනා. ඒත් ආපහු අවුරුද්දකට පස්සේ හරියටම 2017 අවුරුද්දේ මාර්තු 06 වෙනිදා ආපහු බයිස්කෝප් සිංහලෙන් සයිට් එකට මම සිංහල උපසිරැසියක් නිර්මාණය කරනවා.

නමුත් එතන ඉදන් 2020 අප්‍රේල් 21 වෙනකම් කිසිම උපසිරැසියක් කරගන්න ලැබුනේම නැහැ. ඒ කියන්නේ හරියටම අවුරුදු 03යි මාසයයි දවස් 15කට පස්සේ. ඉතින් මම දැන් රැකියාව කරන්නේ පිටරටක. හදිසියේ ලෝකයේ හැමෝටම බලපාමු කොරෝනා වෛරස් එක නිසා රැකියාව තාවකාලිකව නවත්තන්න මගේ සමාගමට අවශ්‍යය වුනා. ගැටළුවක් නැහැ. කාලා බීලා සැපේ ඉන්නවා ඉතිං. ඉතින් මෙහෙම ඉද්දි තමයි මතක් වුනේ ඉවර නොකරපු TV Series එකක් තියෙනවා කියලා මම භාරගත්තු. ඒකේ නම Better Call Saul. ඒ වෙනකොට පලවෙනි සීසන් එක විතරයි ඇවිත් තිබ්බේ. මම මේ කියන්නේ 2015 අවුරුද්ද ගැන. ඉතින් දැන් අවුරුදු 05ක් ගතවෙලා. නිකමෙට ඉන්ටර්නෙට් එකේ සර්ච් කරලා බලද්දි පස්වෙනි සීසන් එකකුත් ඇවිත්, ඒ සීසන් එක ඉවර වෙන්න තව කොටස් තුනක්ද හතරක්ද කොහෙද ඉතුරු වෙලා තිබුනේ. ඉතින් නිකං ඔහේ ඉන්න එකේ පටන් ගත්තු වැඩේ ඉවරයක් කරන්නම් හිතාගෙන ආපහු වැඩට බැස්සා. මේ වෙනකොට උපසිරැසි 184ත් 186ත් අතර ගාණක් කරලා තිබුනේ. ඉතින් ඊටපස්සේ මේ වැඩ ටික භාරගෙන කරන්න ගත්තා.

ඔන්න ඉතින් දැන් 200ත් ඇවිත්. ඇත්තම කිව්වොත් මේ 212ස් වෙනි සිංහල උපසිරැසිය. සයිට් එකේ අප්ලෝඩ් වෙන්න ඕන සිංහල උපසිරැසි වගයක් තාම පෙන්ඩින්. ඒකත් අර මම උඩින් කියපු ටීවී සීරියස් එකට අදාලව. ඒ වගේම මගේ 257 වෙනි සිංහල උපසිරැසිය මේක. බයිස්කෝප් සිංහලෙන් අඩවියට එකතු වෙන්න කලින් මම වෙනම පෞද්ගලිකව බ්ලොග් අඩවියකට සිංහල උපසිරැසි කරලා අප්ලෝඩ් කරා. ඊටපස්සේ තවත් සයිට් එකකට. ඒවා අදාල නැහැ. හැබැයි ඔය මගේ පෞද්ගලික බ්ලොග් අඩවියට මම කරලා දාපු උපසිරැසියෙන් තමයි මට මේ සයිට් එකට පය තියන්න අවස්ථාව ලැබුනේ. ඒකට ලොකුම හේතුව විකියා.

අනිවාර්යෙන්ම මතක් කරන්න ඕනි විකියාව අන්න ඒ නිසයි. ඒ වගේම අපේ හසන්ත අයියා, රොයිලි අයියා, උදා, ඒ දවස් වල හිටිපු සමීරයා, දිනිදු සම්පත්, විමා, හේවා, නලින් අයියා, අනිත් සමීරයා, සදුනා වගේ කට්ටිය තමයි එකතුවෙලා උපසිරැසි කරනයේ ගොඩක්ම යෙදුනේ. ඒ වගේම මේ සෙට් එක නිසා තමයි ආසාවෙන් කරගෙන ගියෙත්. ලැබුනු සපෝර්ට් එක නිසාම. ඒ වගේම දෙවනියට මට අමාරුම අවස්ථාවක් ආපුවාම උදව් කරපු උඩින් නම් සඳහන් නොකරපු ගයාන්, ෂෙරින් සමාධි කියන සහෝදර සහෝදරියන්ටත් ස්තූති වෙනවා. ඒ වගේම අපේ අනිත් සහෝදර සහෝදරියනුත් ආදරයෙන් මතක් කරනවා. එදා ඉදන්ම මතක නම් ටික තමයි ආපහු ආපහු මතක් කරේ. මොකද අවුරුදු ගාණක් ඉදලම සයිට් එකේ නැති නිසා.

ඒ වගේම තව දෙයක්. ඉස්සර චිත්‍රපටියක් වේවා, TV series එකක් වේවා ඩවුන්ලෝඩ් කී දාහක් තිබුනත් අඩුම කමෙන්ට් 250න් උඩවත් තිබුනා. අඩුම ස්තූතියි කියලවත්. නමුත් දැන් තේරෙන විදිහට ඩවුන්ලෝඩ් වැඩියෙන් තිබුනත් කමෙන්ට් ලැබෙන්නේ බොහොම අඩුවෙන්. අවුරුදු 07ක වෙනසක් ඉතින්. මේ සයිට් එකට කවුරුත් සල්ලි අරගෙන උපසිරැසි දෙන්නේ නැහැ. මම වගේම අනිත් අයත් කරන්නේ නොමිලේ සේවයක්. මොකද මම පෞද්ගලිකවම දන්නවා මම ඒ දවස් වල කරපු Baadshah චිත්‍රපටියේ සිංහල උපසිරැසි 2100ක් වගේ තිබුනා. ඉතින් දවල් පටන් ගත්තු වැඩේ ඉවරයක් කරනකොට පාන්දර වුනා. මට අද වගේ මතකයි වතුර පොදක් බොන්නේ නැතුව පුටුවේ ඉදගෙන රෑටත් නොකා කීබෝඩ් එක කොට කොටා කාපු කට්ට. ඉතින් මේ අනිත් උපසිරැසිකරුවනුත් එහෙමයි. ඔයාලා පැය දෙකකින් ඉවර කරන ෆිල්ම් එක, සිංහල උපසිරැසියෙන් රස විදින ෆිල්ම් එක, ටීවී සීරියස් එක සිංහලට පරිවර්තනය කරන්න කන කට්ට තේරුම් ගන්න බොහොම අමාරු දෙයක්. ඉතින් 200ට අදාල දෙයක් නොවුනත් හිතනවා මේ ලිපිය කියවනවනම් ඔයා අද ඉදලවත් අඩුම ස්තූතියි කියලවත් තමන් ගන්න උපසිරැසියට අදාලව පහලින් තියෙන කමෙන්ට් බොක්ස් එකේ සටහන් කරලා යයි කියලා.

ඉතින් එහෙනම් අවසානෙට කියන්නේ, මේ වෙනකම් මාත් එක්ක රැදිලා හිටපු, අත හිත, උදව් පදව් කරපු, කමෙන්ට් කරපු, බැනපු, කෑගහපු හැමෝටම බොහෝම ස්තූතියි. එකතුවෙමු තවත් වැඩ කීපයකුත් එක්කම.

එහෙනම් අද උපසිරැසිය පැත්තට හැරෙමු. කියන්න ඕන, උඩ දාලා තියෙන සටහනත් එක්ක මේ චිත්‍රපටිය ගැන විස්තර කරන එකත් එක්ක ලිපිය මාගලක් වගේ වෙන්න පුලුවන්. හැබැයි මේ චිත්‍රපටිය මම 200ට කරන එකක්. ඒ වගේම අපි හැමෝම පාවිච්චි කරන දෙයක් ගැන කියවෙන චිත්‍රපටියක්. මේ නිසාම මේ කතාවට අදාල අලගිය මුලගිය හැමදෙයක්ම හොයලා බලලා කරුණු කාරනා ඉදිරිපත් කරන්න ඕන කියලා මට හිතුනා. ඒ නිසා අපි කරුණෙන් කරුණ බලලා හිමීට චිත්‍රපටිය ඇතුලේ කතාව ගලාගෙන යන විදිහ ගැනත් බලමු.

ඔයා කවදා හරි ෆිජ් එකක් දිහා බලලා “මාරයිනේ, කොහොමද මේක වැඩකරන්නේ” කියලා හිතලා තියෙනවද? ඉතින් ඒකට උත්තර වෙන්නේ විදුලිය කියන එකයි. තෝමස් එඩිසන් තමයි අපිට පොඩිකාලේ ඉස්කෝලේ කියලා දුන්න විදිහට විදුලි බල්බය හොයාගත්ත ඒ විශිෂ්ඨ, ශ්‍රේෂ්ඨ පුද්ගලයා. මොන තරම් වීරයෙක්ද?! ඒ මනුස්සයා මුලු ලෝකයම එලිය කරානේ.

මුලින්ම මොකක්ද අපේ විදුලි යුද්ධය එහෙමත් නැතිනම් The Current War කියන්නේ කියන එක ගැන දැනගමු.

විදුලියේ යුද්ධය, නැත්නම් සමහර තැන්වල විදුලියේ සටන විදිහට කතා වෙන මේ ඉතිහාස කතාව 1880 වර්ෂ වල අගභාගය සහ 1890 වර්ෂ වල මුල් භාගය අතර ඇතිවුන තරඟකාරී විදුලි බල සම්ප්‍රේෂණ පද්ධති හඳුන්වාදීම සම්බන්ධ සිදුවීම් මාලාවක් වෙනවා. මේ කතාව ගොඩනැගෙන්නේ 1870 වර්ෂ වල අගභාගයේ සහ 1880 වර්ෂන් වල මුල් භාගයේ සංවර්ධනය කරන ලද ආලෝක කරණ පද්ධති දෙකක් වටායි. අධි වෝල්ටීයතා ප්‍රත්‍යාවර්ත ධාරාව (High voltage Alternating Current – AC) මත ක්‍රියාත්මක වන වීදි ලාම්පු අලෝකය සහ මහා පරිමාණ අඩු වෝල්ටීයතා සෘජු ධාරාව (Large scale low voltage Direct Current – DC) ගෘහස්ථ තාපදීප්ත ආලෝකකරණය කිරීම යන ක්‍රමයන් දෙකම අලෙවි කරනු ලැබුවේ තෝමස් එඩිසන්ගේ සමාගම විසින්. මෙම සිදුවීම් 2012 වර්ෂයේ ක්වෙන්ටින් ආර්, ස්ක්‍රබෙක් හි ඇමරිකාවේ ව්‍යාපාර ක්ෂේත්‍රයන්හි වැදගත්ම සිදුවීම් 100 අතර තිබෙනවා. ඉතින් 1886දී එඩිසන්ට අලුත් ප්‍රතිවාදියෙක් එලියට එනවා. ඒ තමයි ජෝර්ජ් වෙස්ටිංහවුස් කියන්නේ. වෙස්ටිංහවුස්ගේ සමාගම විසින් වැඩි දුයුණු කරන ලද ප්‍රත්‍යාවර්ත ධාරා (AC) පද්ධතියක් විසින් එය ට්‍රාන්ස්ෆෝමර් භාවිතා කර අධි වෝල්ටීයතාවය අඩුකරමින් ගෘහස්ථ ආලෝකකරණය සඳහා AC විදුලිය භාවිතා කල හැකි ලෙස පෙන්වා දෙනු ලැබුවා. අධි වෝල්ටීයතාවයක් භාවිතා කිරීමෙන් වඩාත් කාර්යක්ෂම වගේම විශාල මද්‍යම ජනන මධ්‍යස්ථාන (generating stations) හරහා වැඩි දුරක් විදුලිය සම්ප්‍රේෂණය කරන්න AC පද්ධතියට හැකිවුනා. ඉතින් මේ ප්‍රත්‍යාවර්ත ධාරා එහෙමත් නැත්නම් AC විදුලි ධාරාවන් වේගයෙන් භාවිතා වෙනකොට, 1888 වර්ෂයේ මුල් භාගයේදී එඩිසන් එලෙක්ට්‍රික් ලයිට් සමාගම (Edison Electric Light Company) කිව්වා මේ AC විදුලි ධාරාවන් තියෙන පද්ධති භාවිතා කරන එකෙන් ඉහළ වෝල්ටීයතාවයක් ලැබෙන නිසා ඒක අනතුරුදායක බවත්, වෙස්ටිංහවුස්ගේ AC විදුලි ධාරාවන් DC විදුලි ධාරාවට වඩා බාල එකක් බවත්, පේටන්ට් බලපත්‍රයට හැංගිලා නීති උල්ලංඝණය කරන බවත් පවසනු ලබනවා.

1888 වර්ෂයේදී වසන්ත සෘතුවේදී, පාර දෙපස සවි කර තිබුනු ඉහළ විදුලි අගයක් තියෙන විදුලි රැහැන් බිමට ඇද වැටී අනතුරු සිද්ධ වෙන්න පටන් ගත්තා. මේකට ලොකුම හේතුවක් වුනේ මේ වීදි ලාම්පු සවි කර ආලෝකකරණය කරන්නට බාරගෙන තිබුන සමාගම්වල කෑදරකම සහ නිර්දය භාවය හේතුවෙනුයි. එම වර්ෂයේම ජූනි මාසය වෙනකොට නිව්යෝක් නගරයේ විදුලි ඉංජිනේරුවරයෙකු වන හැරල්ඩ් පී. බ්‍රවින් කිව්වා, AC විදුලිය පාවිච්චි කරමින් ක්‍රියාත්මක වෙන ආයතන නිසා ජනතාව අවදානමකට පත්වෙනවා කියලා මේ ඉහල විදුලි අගයක් තියෙන පද්ධති එල්ලී වැටෙන ආකාරයෙන් ස්ථානගත කරලා තියෙන නිසා. ඒවගේම බ්‍රවුන් උත්සාහ කරනු ලැබුවා AC විදුලිය DC විදුලියට වඩා ගොඩක් භයානකයි කියලා පෙන්නන්න. මේක ඔප්පු කරන්න එඩිසන් ඉලෙක්ට්‍රික් සමාගමේ තාක්ෂණික සහාය ඇතුව AC සහ DC විදුලි ධාරාවන් දෙකම සත්තුන්ට ප්‍රසිද්ධියේම එල්ල කරලා මොන ධාරාවෙන්ද සත්තු මියයන්නේ කියලා ඔප්පු කරන්න උත්සාහ කරා. එඩිසන් සමාගම සහ බ්‍රවුන් ඒකතුවෙලා AC විදුලිය භාවිතා කිරීම අඩු කිරීම සඳහා AC විදුලි රැහැන් ස්ථාපනය සහ වෝල්ටීයතාවය දැඩි ලෙස සීමා කිරීම සඳහා නීති සම්පාදනය කරන්නත් උත්සාහ කරනු ලැබුවා. නමුත් මේ දෙදෙනාම නැවත සැරයක් එකතුවෙලා වෙස්ටිංහවුස්ගේ AC විදුලිය ප්‍රධාන වශයෙන් භාවිතා කරමින් යන්ත්‍ර නිෂ්පාදනය කරන තොම්සන්-හූස්ටන් විදුලි සමාගම එක්ක එකතුවෙනවා. ඒ කරලා පළමු විදුලි පුටුව වෙස්ටිංහවුස්ගේ AC උත්පාදක (generator) යන්ත්‍රයකින් ක්‍රියාත්මක කරන්න මේ දෙන්නා වගබලා ගන්නවා.

1890 වර්ෂයන්හී මුල් භාගය වෙනකොට මේ යුද්ධය කෙමෙන් කෙමෙන් අවසන් වෙමින් තිබුනා. නිව්යෝක් නගරය තුල AC විදුලි රැහැන් නිසා සිඳුවන මරණයන් හේතුවෙන් විදුලි සමාගම්වලට ආරක්ෂිත ක්‍රම යොදාගන්න සිද්ධ වුනා. 1892 වර්ෂයේදී එඩිසන් ඉලෙක්ට්‍රික් සමාගම ඔවුන්ගේ ප්‍රධානතම AC විදුලිය ප්‍රයෝජනයට ගනු ලබන ප්‍රතිවාදියා වන තොම්සන්-හූස්ටන් සමාගම සමඟ එකතුවීම මඟින් ජෙනරල් ඉලෙක්ට්‍රික් (General Electric – GE) ඇතිවුනා. මේ නිසාම සමාගම් අතර තිබුන තරඟකාරිත්වය අඩු වුනා. මෙම නව සමාගම මේ වනවිට ඇමරිකාව තුල විදුලි ව්‍යාපාරයෙන් හතරෙන් තුනක් පාලනය කරනු ලබනවා. මේ අතර 1893 වර්ෂයේදී ලෝක කොලොම්බියානු ප්‍රදර්ශනය සඳහා විදුලි සැපයීමේ උත්සාහය වෙස්ටිංහවුස් දිනාගන්නවා. ඒ වගේම ඒ අවුරුද්ද අවසන් වෙනකොට නයගරා දිය ඇල්ලේ ජල ව්‍යාපෘතියක් ඉදිකිරීමේ කොන්ත්‍රාත්තුවේ ප්‍රධාන කොටස වෙස්ටිංහවුස් විසින් අත්පත් කරගන්නවා. (ජෙනරල් ඉලෙක්ට්‍රික් සමඟ ගිවිසුම අර්ථ වශයෙන් බෙදීයාම) DC වාණිජ බලශක්ති බෙදා හැරීමේ පද්ධති 20 වන සියවස පුරාවටම වේගයෙන් පහත වැටුණු නමුත් නිව්යෝර්ක් නගරයේ අවසන් DC පද්ධතිය 2007 වර්ෂයේදී වසා දමන ලදී.

චිත්‍රපටිය නරඹන කෙනෙක්ට සාමාන්‍යයෙන් ඇතිවෙන ඉතිහාසය ගැන ප්‍රශ්ණ කීපයකටත් උත්තර දීලම ඉන්නම්.

  • තෝමස් එඩිසන්ට ඇත්තටම පේටන්ට් බලපත්‍ර කීයක් තිබුනද?
    මේ The Current War කියන ඇත්තම කතාව ගැන බැලුවොත් ඉතිහාසයේ කියවෙන විදිහට එඩිසන්ට පේටන්ට් බලපත්‍ර 1093ක් තිබිලා තියෙනවා. 1877 වර්ෂයේදී Phonograph (ෆොනෝග්‍රැෆ්) කියන සංගීත තැටි ධාවකය සොයා ගැනීම, තාපදීප්ත විදුලි බුබුල 1879 වර්ෂයේ සොයා ගැනීම, යම් තරමක අංශක කීපයකට චලන පින්තූර ලබාගැනීමේ උපකරණය 1892 වර්ෂයේදී සොයා ගැනීම වගේ ප්‍රධාන කරුණු නිසා තෝමස් එඩිසන්ව විප්ලවීය නව නිපැයුම් භාණ්ඩ වල නියැයුම්කරු විදිහට ගෞරවයට පාත්‍ර වෙනවා. නමුත් කොහොම වුනත්, චිත්‍රපටියේ කියවෙන විදිහට එඩිසන්ට ගෞරවය හිමිවෙන හැම නව නිපැයුම් නිර්මාණයක්ම ඔහු විසින් කලේ නැහැ. ඒ කියන්නේ සමහර නිපැයුම් ඔහු විසින් තනියෙන් සොයාගත් ඒවා නෙමෙයි. ගොඩක් වෙලාවට එඩිසන් කරේ නව නිපැයුම් කරන පුද්ගලයාගෙන් පේටන්ට් බලපත්‍රය සල්ලි දීලා අරගෙන ඒ මිලදී ගත්තු නව නිපැයුමේ තියෙන අඩුපාඩු හදලා ඒ නිපැයුම සම්පූර්ණ කරපු එකයි. මේ අතරින් ෆොනොග්‍රැෆි කියන්නේ ලෝකය පුරාම එඩිසන්ට කීර්තියක් ගෙන දුන්න පලවෙනි නව නිපැයුම වෙනවා. ඔහු නිව් ජර්සි වල ඔහුගේ පලවෙනි රසායනාගාරය පිහිටුවා ගත්තාට පසුව ඔහුට “The Wizard of Menlo Park” (මෙන්ලෝ උයනෙ’ හි මායාකරුවා) කියන අනුවර්ථ නාමයද හිමිවෙනවා.


මේ පින්තූරයේ වම් පැත්තේ ඉන්නේ තෝමස් එඩිසන්. ඔහුගේ පලමු බිරිඳ අභාවප්‍රාප්ත වුන 1884 අවුරුද්දේ ගත්තු පින්තූරයක්. අපි කවුරුත් දන්න බෙනඩික්ට් කම්බර්බැච් තමයි (දකුණු පැත්තේ) මේ The Current War කියන චිත්‍රපටියේ එඩිසන්ගේ චරිතයට පණ පොවන්නේ.

 

  • තෝමස් එඩිසන් සහ ජෝර්ජ් වෙස්ටිංහවුස් ඇත්තටම කවදා හරි මුණ ගැහිලා තියෙනවද?
    නැහැ. මේ චිත්‍රපටිය තුල එඩිසන් (බෙනඩික්ට් කම්බර්බැච්) සහ වෙස්ටිංහවුස් (මයිකල් ෂැනන් චරිතය නිරූපණය කරනු ලබනවා) අතර නොවරදින ගැටුම් දෙකක් සහ එක් සංවාදයක් නිරූපණය කෙරෙනවා. මේ හමුවීම් සිදුවෙන්නේ උසාවියකදී සහ නැවත වරක් ලෝක ප්‍රදර්ශණයකදී හමුවෙනවා. මේ පිළිබඳ ඉතිහාසගත තොරතුරු හොයලා බලනකොට සැබෑ ජීවිතයේදී කවදාකවත් මේ දෙන්නා එකිනෙකාට හම්බවෙලා තියෙනවා කියලා කිසිදු වාර්තාවක් දකින්න ලැබෙන්නේ නැහැ.

 

  • තෝමස් එඩිසන් සහ ජෝර්ජ් වෙස්ටිංහවුස් අතර ඇතිවුන ආරවුල මොකක්ද?
    තෝමස් එඩිසන් තමයි සෘජු ධාරාවේ විදුලිය එහෙමත් නැත්නම් Direct Current (DC) කියන වර්තමානයේ වාණිජමය වශයෙන් තාපදීප්ත විදුලි බුබුලේ එහෙමත් නැත්නම් සාමාන්‍යයෙන් දැනට ගෙවල් වල පාවිච්චි කරන බල්බ් එකේ නිපැයුම්කරු වගේම පේටන්ට් බලපත්‍රයද හිමි පුද්ගලයා වෙන්නේ. එඩිසන්ගේ ඉලක්කය වුනේ විදුලිය ලබාගෙන, විදුලි බල්බ දල්වලා ඒක ලොකු ජනතාවක් අතර බෙදා දෙන එකයි. කොහොම වුනත් DC කියන මේ සෘජු ධාරාතික විදුලියට යම් සීමාවන් තිබුනා. ලොකුම හේතුව වැඩි දිගු දුරක් සම්ප්‍රේෂණය වෙනකොට එහි ශක්තිය අහිමි වීමක් සිදුවෙනවා. DC පාරිභෝගිකයන් සිටින තැනට සැතපුමක් වගේ දුරක ඇතුලත තියෙන්න වෙනවා හරියටම ආලෝකය ලබාගන්න නම්. මේ නිසා DC කියන විදුලි ක්‍රියාපටිපාටිය නගරවල වඩාත් හොඳින් ක්‍රියාත්මක වනු ලබනවා. මේ නිසාම එඩිසන් සර්බියානු-ඇමරිකානු ගණිතඥයෙකු හා ඉංජිනේරුවෙක වන නිකොලා ටෙස්ලාව කුලියට අරගන්නවා. ඒ එඩිසන්ට සෘජුවම නොකැඩී විදුලි ධාරාවක් ලබාදීමට උදව් කරන්න. කොහොම හරි, ටෙස්ලා විසින් තමන්ගේ අදහසකට අනුව DC වලට වඩා හොඳ පද්ධතියක් නිර්මාණය කරනවා. ඒක හැදුන්වූයේ Alternating Current එහෙමත් නැත්නම් ප්‍රත්‍යාවර්ත ධාරාව (AC) කියන නමින්. මේ හරහා පුලුවන් වුනා බලය විශාල වශයෙන් එකතු කරගෙන එක දිගටම ප්‍රදේශයන්ට ගැටළුවකින් තොරව විදුලිය ලබාදෙන්න.

එඩිසන් ටෙස්ලාගේ පද්ධතිය ගැන වැඩි උනන්දුවක් දැක්වූයේ නැහැ. ප්‍රත්‍යාවර්ත ධාරාව පිළිබඳ අදහස බැහැර කරමින් විශීෂ්ට නමුත් සම්පූර්ණයෙන්ම ප්‍රායෝගික නැති නිර්මාණයක් යනුවෙන් එඩිසන් මේ ටෙස්ලාගේ නිර්මාණයට පවසනවා. ඒවගේම එඩිසන්ට තම සමාගම විසින් ඒ වෙනකොටත් ස්ථාපනය කරලා තිබුන පද්ධති වලට ඔහුගේ වත්මන් පේටන්ට් බලපත්‍රයට ලැබෙන රාජකීයත්වය සහ ගෞරවය අහිමි කරගන්නට අවශ්‍යය වුනේ නැහැ. මේ නිසාම එඩිසන් ටෙස්ලාට මුදල් ගෙවන්න අකමැති වුනා. හේතුව වශයෙන් කියන්නේ එකඟ වුන දේ කරනවා වෙනුවට වෙනම ක්‍රියාවක් සිදු කරා කියලයි. මේ වෙනකොට ජෝර්ජ් වෙස්ටිංහවුස් තමන්ටම කියලා වෙස්ටිංහවුස් විදුලි හා නිෂ්පාදන (Westinghouse Electric and Manufacturing Company) කියන සමාගම පිහිටුවාගෙන තිබුනා. ඒ වගේම විප්ලවීය දුම්රිය වායු තිරිංග පද්ධතියක් නිර්මාණය කිරීම නිසා තමන්ට නමක් හිමිකරගෙන තිබුනා. ඉතින් මේ AC කියන විදුලියෙහි විභවය දකින ජෝර්ජ් ටෙස්ලාව කුලියට අරගෙන ඔහුගේ AC බලය සඳහා තිබුන පේටන්ට් බලපත්‍රය මිලදී ගන්නවා. වෙස්ටිංහවුස් කරන්නේ එඩිසන්ගේ DC ධාරාවට ලගාවෙන්න බැරි ප්‍රදේශ ගැන මුලින්ම අවධානය යොමු කරලා ඔහුට අයිතිව තියෙන AC ධාරිතාව ලබාදිය හැකි අයුරින් උපකරණ සෑම තැනකම ස්ථාපනය කරන එකයි. වෙස්ටිංහවුස් විසින් නිව් ඕර්ලියන්ස් වැනි විශාල නගරවලට AC බලය ගෙන ඒමත් එක්ක එඩිසන් එක්ක තිබුන ආරවුල තවත් වැඩිවෙන්න පටන් ගත්තා. ඒ වගේම වෙස්ටිංහවුස්ගේ ප්‍රතිවාදියා වෙන එඩිසන්ව පරද්දවන්න කරන සමහර වැඩ වලින් තමන් ලග තියෙන මුදල් සියල්ලක්ම පාහේ අහිමි වෙන තත්වයට වෙස්ටිංහවුස් ඇද වැටෙනවා.


මෙම ඡායාරූපයේ දැක්වෙන්නේ වම් පසෙන් නිකොලා ටෙස්ලාගේ 1885 වර්ෂයේදී ගනු ලැබූ ඡායාරූපයක් වන අතර දකුණු පසින් දැක්වෙන්නේ ටෙස්ලාගේ චරිතය මෙම චිත්‍රපටිය තුල නිරූපනය කරන නිකලස් හෝල්ට් ය.

  • වෙස්ටිංහවුස්ගේ AC බලයේ තියෙන අනතුරුදායක බව පෙන්වීම සඳහා එඩිසන් විසින් සුනඛයන් සහ අශ්වයන්ට විදුලි සැර වැද්දුවාද?
    ඔව්. එඩිසන් විසින් විවිධ උද්ඝෝෂණයන් පැවැත්තුවා. ඒ අතර එහිදී එඩිසන් හිතාමතාම අයාලේ යන සුනඛයන් සහ බළලුන්ව AC ධාරාව සමඟ විද්‍යුත්කරණය කරනු ලැබුවා. තේරෙන්න කියනවනම් අයාලේ යන බල්ලන්ටයි පූසන්ටයි AC කරන්ට් එක හිතලම වැද්දුවා. මොකද මේ ක්‍රමයම එඩිසන්ගේ ප්‍රතිවාදියා වුන ජෝර්ජ් වෙස්ටිංහවුස් පවා භාවිතා කරනු ලබපු නිසා. එතනින් නැවතුනේ නැති එඩිසන් කරේ ජනතාව තවත් බයට පත්කරවන්න ඕන නිසා ගවයන් සහ අශ්වයන්ටද මේ AC ධාරිතාවය යුත් විදුලිය විද්‍යුත්කරණය කරනු ලැබුවා. නමුත් නියමිත වාර්තා තිබුනත්, 1903 වර්ෂයේදී කෝනි දූපතේ ලූනා සත්ත්ව උද්‍යානය තුලදී ටොප්සි කියන අලියාට විදුලි සැර වැදීම සම්බන්ධයෙන් එඩිසන් වගකිව යුතු පුද්ගලයෙක් නොවෙන බවට ප්‍රසිද්ධ කරනු ලැබුවා. ඒකට හේතුව වෙන්නේ ටොප්සි කියන අලියාට ඇතිවුන හිරිහැර සහ කෝපය නිසා ඇතිවුන කලබලයෙන් මිනිසුන් තුන්දෙනෙකු මියගියා. මේ නිසාම මේ ටොප්සි කියන අලියාට ඇත්තම කිව්වොත් ගැහැණු සතෙක්. මැයට මරණ දඩුවම හිමිවුනා. ඒ වගේම මේ මරණ දඬුවමට යොදාගන්නේ එඩිසන් ඉලුමිනේටින් (Edison Illuminationg Co. of Brooklyn) කියන එඩිසන්ගේ සමාගමෙන් ලබාගෙන්නා විදුලිය මඟින්. නමුත් ටොප්සිගේ මරණය වර්තමානයේ ඇතිවන සත්ත්ව හිංසනය පිළිබඳ පවතින පෙලපාලි වල එඩිසන් විසින් මේ සිදුවීම කරා කියන එක ප්‍රත්‍යාවර්ථක නොවන දෙයක්. මේ සිදුවීම සිද්ධ වුනේ මේ විදුලි යුද්ධය එහෙමත් නැත්නම් The Current War ආරම්භ වෙලා අවුරුදු 10කට පසුවයි. ඉතින් මේ එඩිසන් සහ වෙස්ටිංහවුස් දෙන්නට දෙන්නා අපකීර්තියට පත්කරවන්න කරපු දේවල් වලින් අන්තිමටම මිනිස්සුන්ට තේරුම් ගියේ AC සහ DC කියන ධාරාවන් දෙකම භයානකයි කියලයි.

 

  • තෝමස් එඩිසන් විසින් තම ප්‍රතිවාදියාගේ AC ධාරා එසේත් නැත්නම් ප්‍රත්‍යාවර්ත ධාරා පද්ධතිය සීමා කිරීමට නීති පැනවීමට උත්සාහ කළාද?
    ඔව්. මේ කතාවේ සත්‍ය සිදුවීම පිළිබඳ හොයලා බලනකොට, දැනගන්න ලැබුන දෙයක් තමයි එඩිසන් නිව් යෝක් නගරයේ විදුලි ඉංජිනේරුවෙකු වුන හැරල්ඩ් පී. බ්‍රවුන් කියන පුද්ගලයා එක්ක එකතුවෙලා AC විදුලි ධාරා පද්ධති භාවිතය ඉවත් කිරීමට හා සීමා කිරීම සඳහා නීති සම්පාදනය කරන්නට වුනා. එහෙම කරන්න ප්‍රධානම මාතෘකාව වුනේ නොපැහැදිලි ස්ථාපනය හේතුවෙන් ඒවාගෙන් මහජන ආරක්ෂාවට තර්ජනයක් වනවා කියලයි. මේ නිසාම AC පද්ධතිය අහම්බයෙන්ම පුපුරලා යන්න පුලුවන් කියලා මේ දෙදෙනාම එකහෙලා ප්‍රකාශ කර සිටියා.

එඩිසන්ගේ මේ AC ධාරා පද්ධතිය නිසා අනතුරු සිද්ධ වෙනවා කියන මතය ඔප්පු කරන්න, එඩිසන් නිව් යෝක් ප්‍රාන්තයේ කමිටුවකට ආරාධනා කරලා ඔවුන් ඉදිරියේ එඩිසන් විසින් ගවයන් සහ අශ්වයන් ගණනාවකට විදුලි සැර වද්දවලා පෙන්වනවා. AC පද්ධති තහනම් කිරීම වෙනුවට, AC ධාරාවේ තියෙන ඵලදායීතාවය පිළිබඳව ඔවුන්ට තේරුම් කරන එඩිසන් කියන්නේ ඝාතනය කිරීම වෙනුවෙන් නව ක්‍රමයක් විදිහට මේ ධාරා පද්ධති භාවිතා කරන්න පුලුවන් කියලයි. නමුත් ජෝර්ජ් වෙස්ටිංහවුස්ට තමන්ගේ AC විදුලි පද්ධතිය හරහා ඝාතනයන් කරන්න අවශ්‍යය වුනේ නැහැ. ඒ සඳහා ඔහුගේ මේ නිපැයුම විකුණන එක ඔහු විසින් ප්‍රතික්ෂේප කරත්, නිව්යෝග් ප්‍රාන්තයෙන් ඔහුට එය කරන්නට කියලා තීරණය කරනු ලබනවා. ඔවුන් විසින් එඩිසන් සහ හැරල්ඩ් බ්‍රවුන් සමඟ වෙස්ටිංහවුස්ගේ AC ජනක යන්ත්‍ර (generators) පාවිච්චි කරලා විදුලි පුටුවක් (electric chair) හදන්න කටයුතු කරනු ලබනවා.

මහජනයා AC ධාරාවන්ට බියට පත් කිරීම සඳහා එඩින් කරපු හැම දෙයක්ම වැඩකට නැතුවුනා. අධි වෝල්ටීයතා ප්‍රත්‍යාවර්ත ධාරා පද්ධති සමඟ (AC) සම්බන්ධ වන පුද්ගලයින්ට විදුලිය විසන්ධි වීමකින් තොරව වැඩි විදුලි සැරක් වැදීම හේතුවෙන් අනතුරු වැඩිවෙන්න පටන් ගත්තා. තේරෙන්න කිව්වොත් AC කරන්ට් එක වැදුනාම ඒ විදුලි සැරය නොනවත්වාම ඇගට ඇතුලුවෙන නිසා අනතුරු වැඩිවුනා. මේ අනතුරු වලක්වාගන්න එඩිසන් කිව්ව විදිහටම දුර්වල විදිහට ස්ථාපනය කරලා තිබුන ඒකක වලට හැකියාවක් ලැබුනේ නැහැ. විදුලිය ගැන මිනිස්සු ලොකුවටම උනන්දු වෙන්න පටන් ගත්තේ 1888 වර්ෂයේදී මහා හිම කුණාටුවක් පතිත වීම නිසා, නගරය තුල අනතුරුදායක තත්වයක් නිර්මාණය වීම වගේම නගරයේ වැඩි කොටසකට දින ගණනාවක් විදුලිය නොමැතිව තිබීමත් නිසාවෙනි. මේ අතරම වෙස්ටර්න් යූනියන් හි සේවය කරපු ජෝන් ෆීක්ස් (Western Union lineman: John Feeks) (පහත දැක්වෙන පින්තූරය බලන්න) හට සේවය කරන අතරතුර විදුලිසැර වැදී සිදුවුන මියයාම නිසා මේ අවුරුද්ද බොහෝසෙයින් විදුලිය පිළිබඳ මිනිසුන්ගේ කුතුහලය අවුස්සන්න පුලුවන් වුනා. ඔහුගේ ශරීරය පිච්චී තිබුන අතර අදාල විදුලි කණුවද ගිණිගෙන තිබුනා. ඉතින් මේ AC ධාරිතාව පිළිබඳව ජනතාවට තිබුන බය 1889 වර්ෂයේදී මේ “විදුලි කම්බි භීතිකාව (ELectric Wire Panic)” නිසා තවත් වැඩිවුනා.


වම්පස ඇති පින්තූරය : 1888 වර්ෂයේ ඇතිවුන මහා හිම කුණාටුව අතරතුර නිව්යෝර්ක් නගරයේ වීදිවල විදුලි පණිවුඩ, දුරකථන සහ විදුලි රැහැන් අනතුරුදායක ලෙස පහතට වැටුණු අතර දින ගණනාවක් යනතෙක් විදුලිය විසන්ධිව තිබුනි.
දකුණු පස ඇති පින්තූරය : වෙස්ටර්න් යූනියන් හි කම්බි ඇදීමේ සේවකයෙකු වූ ජෝන් ෆීක්ස්ගේ මරණය පිළිබඳ සිතුවම් කරනු ලැබූ චිත්‍රයක්.

  • තෝමස් එඩිසන්ට භාර්යාවන් කී දෙනෙක් සිටියාද?
    චිත්‍රපටිය තුල පෙන්වන්නේ ඔහුගේ පලවෙනි බිරිඳ වන මේරි ස්ටිල්වෙල් විතරයි. නමුත් ඉතිහාස කතා ගැන හොයලා බලනකොට එඩිසන්ට ඇත්තටම භාර්යාවන් දෙන්නෙක් ඉදලා තියෙනවා. එඩිසන්ගේ පලවෙනි බිරිඳ වන මේරී 1871දී විවාහ කරගන්නවා. නමුත් නොදන්නා හේතුවක් නිසා 1884දී ඇය මිය යනවා. ඉතිහාසයේ සමහර කතා වල පැවසෙන විදිහට සමහරවිට මොළයේ ගෙඩියක් තිබීම නිසා හෝ මෝෆීන් විවිධ රෝග සඳහා ප්‍රතිකාර කිරීම සදහා නියම කරලා තිබුන නිසා මෝෆීන් අධික මාත්‍රාවක් අරගත්තු නිසා වෙන්න ඇති කියලා තියෙනවා. එඩිසන් ඔහුගේ දෙවෙනි බිරිඳ වන මීනා මිලර් එක්ක 1886 වර්ෂයේදී විවාහ වෙනවා. පුදුම හිතෙන දේ කියන්නේ එඩිසන් මේරිට තමන්ව කසාද බදින්න කියලා යෝජනා කරලා තියෙන්නේ මෝර්ස් කේතයන් (Morse codes) මගින් ඇගේ අතේ අල්ලට තම ඇගිලි වලින් “Will you marry me? (ඔබ මාව විවාහ කරගන්නවාද?)” කියන කේතය තට්ටු කරමිනුයි. එඩිසන් 1931 වර්ෂයේ ඔක්තෝම්බර් 18 වන දින දියවැඩියාව රෝගයෙන් මියයන තෙක්ම මීනා සමඟයි හිටියේ. මීනා 1947දී අභාවප්‍රාප්ත වුනා.

විදුලිය යම් පුද්ගලයෙකු/සත්ත්වයෙකු ඝාතනය කිරීමේ ක්‍රමවේදයක් ලෙස භාවිතා කිරීමේ අදහස ඉඳිරිපත් කරේ කවුද?
බෆලෝ නගරයේ දන්ත වෛද්‍යවරයෙකු වූ ඇල්ෆ්‍රඩ් පී. සවුත්වික් විසින් බේබද්දෙක් විදුලි ජනක යන්ත්‍රයකට ඇදවැටිලා සිදුවුන බිහිසුණු අනතුරක දැකපුවාම, විදුලි බලය මඟින් එල්ලා මැරීම වඩාත් මානුෂීය ක්‍රමයක් විදිහට භෘවිතා කරන්න පුලුවන් කියලා වටහා ගන්නවා. සවුත්වික් එඩිසන්ව සම්බන්ධ කරගන්නවා ඔහුගේ මේ අදහසට උදව් ඉල්ලගන්න. නමුත් එඩිසන්ට උවමනා වෙන්නේ නැහැ ඔහුගේ DC ධාරාවෙන් මරණයන් සිදු කරනවට. ඒ නිසා ඔහු සවුත්වික්ව වෙස්ටිංග්හවුස් වෙතට යොමු කරනවා ඔහුගේ AC ධාරා පද්ධතිය වෙනුවෙන්. එඩිසන් විශ්වාස කරනවා විදුලි පුටුව AC කරන්ට් එකෙන් ක්‍රියාත්මක කෙරෙව්වොත්, ඔහු විසින් වෙස්ටිංහවුස්ගේ AC විදුලි බද්ධතියේ කීර්ති නාමයට හානියක් කරනවා කියලා ඒවා අනාරක්ෂිතයි කියලා පෙන්නුම් කරන එකෙන්. එඩිසන් විසින් “වෙස්ටිංහවුස්ඩ් (Westinghoused)” යන යෙදුම පවා ඉදිරිපත් කරේ විදුලි ධාරාවෙක් යම් පුද්ගලයෙකු මිය යනවා කියන දේ විස්තර කරන්නයි.

තෝමස් එඩිසන් විසින් විදුලි සැර වැද්දවීමෙන් මරණයට පත්කරන්න නියම වූ පළමු පුද්ගලයයාගේ ජීවිතය බේරා ගන්න උත්සාහ කළාද?
ඔව්. අත්පොරවක් භාවිතා කරමින් තම පෙම්වතියව ඝාතනය කිරීමේ චෝදනාව මත වරදකරු වූ විලියම් කෙම්ලර් කියන පුද්ගලයා තමයි පලමු වතාවට විදුලි සැර වැද්දවීමෙන් මරණයට නියම කරනු ලැබූ පුද්ගලයා වෙන්නේ. කෙම්ලර්ව 1890 අගෝස්තු 06 වෙනිදා නිව් යෝර්ක් නගරයේ ඕබර්න් වලදී ජෝර්ජ් වෙස්ටිංහවුස්ගේ ප්‍රත්‍යාවර්ථ ධාරා (AC) ඒකක මඟින් ඝාතනය කරනු ලැබුවා. වාර්තා වලට අනුව, එඩිසන් කෙම්ලර් වෙනුවෙන් ඩොලර් 100,000කට වඩා වියදම් කරලා තියෙනවා නීතීඥ ගාස්තු වශයෙන්. හේතුව වෙන්නේ එතකොට කෙම්ලර්ට පුලුවන් වෙනවා එයාට ලැබුන තීන්දුව ගැන ඉහළ අධිකරණයට අභියාචනා කරන්න පුලුවන් වෙන නිසා. නමුත් ඒ එඩිසන්ගේ උත්සාහය සාර්ථක වුනේ නැහැ. නමුත් කෙම්ලර්ගේ සුභසාධනය ගැන එඩිසන්ට එච්චරටම වැදගත් වුනේ නැහැ. එඩිසන්ට ගොඩක් වැදගත්වුනේ වෙස්ටිංහවුස්ගේ ප්‍රත්‍යාවර්ත ධාරා (AC) පද්ධති යක්ෂයින් බවට පත්කරවන්න පුලුවන් වුන එක ගැනයි මිනීමරුවෙකුගේ ජීවිතය බේරාගන්නවට වැඩියෙන්. හැමදේකටම පස්සේ, එඩිසන් සම්බන්ධ වුනා කෙම්ලර්ව ඝාතනය කරන්න නිර්මාණය කරපු විදුලි පුටුව හදන්න. ඒ වෙස්ටිංහවුස්ගේ AC ධාරා උපයෝගී කරගනිමින් පිටුවට බලය සැපයීම මගිනුයි.


ප්‍රථම විදුලි පුටුව ලෙස විශ්වාස කරන ඡායාරූපය වම්පසින්ද, The Current War චිත්‍රපටය තුල පෙන්නුම් කරනු ලබන විදුලි පුටුවේ ඡායාරූපය දකුණු පසින්ද දිස්වේ.

  • විදුලි පුටුව යොදාගෙන කරනු ලැබූ පලමු ඝාතනය සිදුකලේ නිව්යෝක් ප්‍රාන්තයේද?
    ඔව්. මෙම විදුලි යුද්ධයේ සත්‍ය කතාවට අනුකූලව මිනීමැරීමකට වැරදිකරු වුන විලියම් කෙම්ලර් පළමුවැනියටම පෙර සඳහන් කරනු ලැබූවා මෙන් ඝාතනය කෙරූ බවයි. වෝල්ට් 1000ක විදුලියක් තත්පර 17ක කාලයක් තිස්සේ ලබාදීම තුලින් කෙම්ලර්ට පණ නැතිවෙලා තියෙනවා. පස්සේ ආපහු සැරයක් විදුලි උත්පාදක යන්ත්‍රය නැවත ආරෝපන්‍ය කිරීමෙන් පසුව ආපහු සැරයක් විදුලි සැර වද්දලා තියෙනවා. ඒ අවස්ථාවේ කෙම්ලර්ගෙන් ලේ ගලලා තියෙනවා, ඔහුගේ කොණ්ඩය පිච්චෙන්න පටංගෙන තියෙනවා, ඒ වගේම ඔහුගේ මස් පිච්චෙන දුගඳ පවා වාතය හරහා ඇවිත් තියෙනවා. එතන හිටපු සාක්ෂිකරුවන් ඒ ඇතිවුන ගඳට සහ දැකපු දේට සමහර පුද්ගලයන් වමනය කරලා තියෙනවා වගේම සමහර අයට කලන්තය හැදිලත් තියෙනවා. කෙම්ලර්ගේ ශරීරය සිසිල් වීමට පැය ගණනාවක් ගතවෙලා තියෙනවා. මේ සිද්ධියෙන් එඩිසන්ගේ AC ධාරාවන් ගැන තියෙන කාරණා සනාථ කරනු ලැබුවා. AC ධාරාව භයානක හා අමානුෂීය දෙයක් වුනා. “ඔවුන්ට පොරවකින් මීට වඩා හොඳට මේ ක්‍රියාදාමය කරන්න තිබුනා” කියලා තමන්ගේ බිරිදව මරණ්න භාවිතා කරපු අත් පොරව පෙන්නලා පිළිකුල්සහගතව එඩිසන් කරුණු දක්වලා තියෙනවා.

 

  • ජෝර්ජ් වෙස්ටිංහවුස් විසින් තෝමස් එඩිසන්ව පරාජය කරලා 1893 වර්ෂයේදී චිකාගෝ වල පැවැත්වූ ලෝක ප්‍රදර්ශනයට විදුලිය සැපයීමේ කොන්ත්‍රාත්තුව දිනා ගත්තාද?
    ඔව්. කොහොම වුනත් ඒ වෙද්දි, එඩිසන්ගේ DC පද්ධතියට දුන්න ප්‍රමුඛතාවය හේතුකොට ගෙන ලාභ අඩුවෙන්න පටන් ගෙන තිබුනේ. එඩිසන් කරේ තොම්සන් – හූස්ටන් එක්ක 1892දී එකතුවෙලා ජෙනරල් ඉලෙක්ට්‍රික් (General Electric – GE) කියන ධාරාව බවට පත්වුනා. මේ සමාගම AC ධාරිතාවයෙන් ක්‍රියාත්මක වෙන උපකරණ සාදන ආයතනයක්. එඩිසන් වෙස්ටිංහවුස්ගේ AC ධාරාවේ කීර්තිනාමය විනාශ කරන එක පැත්තකට දාලා වෙනත් ව්‍යාපෘති වලට අවධානය යොමු කරන්න පටන් ගත්තා. 1893දී වෙස්ටිංහවුස් විසින් චිකාගෝ වල පැවති ලෝක ප්‍රදර්ශනයට විදුලි බලය ලබාදීමේ කොන්ත්‍රාත්තුව දිනා ගන්නවා. ඉතිහාස කතා වල තියෙන විදිහට ටෙස්ලා විසින් නිර්මාණය කරපු AC ධාරාවෙන් විදුලිය ලබා දීමට ඔහු ඩොලර් 399,000ක ලන්සුවක් ඉදිරිපත් කරලා තියෙනවා. ඒ වගේම එඩිසන්ගේ GE ධාරා පද්ධතියෙන් විදුලිය ලබාදීමට ඩොලර් 554,000ක ලන්සුවක් ඉදිරිපත් කරලා තියෙනවා. ඉතින් මෙතනින් GE පරදවා AC වලට ජයග්‍රහණය හිමි වෙලා චිකාගෝ ලෝක ප්‍රදර්ශනයට විදුලිය සැපයීමේ කොන්ත්‍රාත්තුව වෙස්ටිංහවුස්ට ලැබෙනවා. මේ ප්‍රදර්ශනයෙන් වෙස්ටිංහවුස්ගේ AC ධාරා පද්ධතිය සඳහා ජනතාවගේ ලොකු කැමැත්තක් ඇතිවෙනවා. මිනිස්සු හිතන්න පටන් ගන්නවා විදුලිය කියන්නේ තව දුරටත් සුඛෝපභෝගී දෙයක් නෙමෙයි කියලා.


1893 වර්ෂයේදී පැවති චිකාගෝ ලෝක ප්‍රදර්ශනයේදී “Court of Honor” (ගෞරවනීය අධිකරණය) ලෙස හැඳින්වූ ජනරජයේ ප්‍රතිමාව ද ආලෝකමත් කරමින් AC බලයෙන් ක්‍රියාත්මක වන විදුලි පහන්.

  • තෝමස් එඩිසන් චිත්‍රපට නිර්මාණය කළාද?
    මේ ගැන හරියටම කියන්න බැහැ. මේ විදුලි යුද්ධය අවසාන වෙන්න ලංවෙනකොට එඩිසන් චිත්‍රපට සංවර්ධනය කිරීම කෙරෙහි අවධානය යොමු කරලා තියෙනවා කියලා අපිට දැකගන්න ලැබෙනවා. ඒකෙන් තේරෙන්නේ එඩිසන් විසින් චලන රූප (motion pictures) නිර්මානය කළා කියන එකයි. එඩිසන්ගේ චාලක විද්‍යාව (Kinetograph) සහ චාලක දර්ශනය (Kinetoscope) අනුක්‍රමික චලිතයන් (sequential motions) පටිගත කර ප්‍රදර්ශනය කළ පළමු උපාංග නෙමෙයි. ඒත් චාලක දර්ශනය මගින් සිදුරු කරන ලද සෙලියුලොයිඩ් පටලයක් (celluloid film) ආලෝක ප්‍රභවයක් හරහා ගමන් කිරීම අනාගත චිත්‍රපට ප්‍රක්ෂේපණය (projection) සදහා ප්‍රමිති රාමුවක් හදලා දීලා තියෙනවා. එඩිසන් විසින් කුඩා සිනමා ගාරයක් (movie studio) ඉඳිකරනු ලැබූ අතර ඔහුට පුලුවන් වෙනවා භ්‍රමණය වීම මඟින් හිරු එළිය ග්‍රහණය කරගැනීමටත්. 1893 වර්ෂයේ මැයි මාසයේදී එඩිසන් විසින් ඔහුගේ උපාංගයේ පළමු නිරූපණය ඉඳිරිපත් කරනු ලැබුවා. ඔහුගේ මේ චිත්‍රපටිය තුල කම්කරුවන් තිදෙනෙකු විසින් කම්මල්කරුවන් ලෙස පෙනී සිටිනු ලැබුවා. කොහොම වුනත්, චාලක දර්ශනයන්ට ඒ තුල යම් සීමාවක් තිබුනා. එහි පීප්හෝල් යනුවෙන් හඳුන්වන කොටසක් තිබුනු අතර එයින් වරකට එක් පුද්ගලයෙක්ට පමණක් මෙම චිත්‍රපටය නැරඹීමේ හැකියාව ලැබුනා.

ප්‍රංශ ජාතික සහෝදරයන් වන ඔගස්ටේ (Auguste) සහ ලුවීස් ලුමියර් (Louis Lumiere) යන දෙදෙනා විසින් සිනමා කැමරාවක් සහ ප්‍රොජෙක්ටරයක් නිර්මාණය කරනු ලැබූ අතර, සිනමාටෝග්‍රැෆි (Cinematographe) අයුරින් කරනු ලැබූ නිර්මාණයන් ඒ උපකරණයන් නිසා බොහෝ දෙනෙකුට එකවර චිත්‍රපටය නැරඹීමට අවස්ථාව සැලසුනා. අනිකුත් කැමරාවන් සහ ප්‍රක්ෂේපක යන්ත්‍ර 1800 වර්ෂයට පසුව එලිදැක්වෙන්න ආරම්භ වුනා. අවසානයේදී, එඩිසන්ගේ චාලක දර්ශනය කැපී පේන දෙයක් වුනා වගේම, ඔහු විසින් චිත්‍රපට නිර්මාණය කල බව කීම අතිශයෝක්තියක් වනු ලබනවා.

  • සෘජු ධාරා (Direct Current – DC) අදටත් භාවිතයේ තියෙනවද?
    ඔව්. ගොඩක් දේවල් වල භාවිතා වෙනවා. අපි අතර තියෙන ගොඩක් දේවල් AC බලයෙන් ක්‍රියාත්මක වුනත්, පරිගණක, සූර්ය කෝෂ, LED සහ විදුලි වාහන (electric vehicles) වැනි සමහර භාණ්ඩ DC බලයෙන් තමයි ක්‍රියාත්මක වෙන්නේ. මෑත කාලයේ DC ධාරාවේ සුළු පුනරුදයක් එහෙමත් නැත්නම් පොඩි ආපහු ඉහළ යාමක් ඇතිවෙලා තියෙනවා. ඒකට හේතුව වෙන්නේ DC ධාරාවේ ස්ථායිතාව නිසා සමාගම් වලට අධි වෝල්ටීයතාවයක් තියෙන දෘජු ධාරාවක් (HVDC) භාවිතා කල හැකි මාර්ගයක් සොයා ගන්න හැකියාව ලැබිලා තියෙන නිසා. අපිට පේන්න තියෙන දේ තමයි AC සහ DC ධාරිතාවයන්ගෙන් ආධිපත්‍යය වෙනුවෙන් සටන් කරනවා වෙනුවට දෙකම එක විදිහට පාවිච්චි කරන එකෙන් හොඳ නිර්මාණ එලිදක්වන්න පුලුවන් වෙනවා කියන එකයි.

 

  • නයගරා දියඇල්ලේ ජල විදුලි බලාගාරයක් සඳහා වායු උත්පාදක යන්ත්‍ර (Hydro-electric power plant) ඉඳිකිරීට වෙස්ටිංහවුස් ලබාගත්ත කොන්ත්‍රාත්තුව නිසා විදුලිබල යුද්ධය අවසන් වුනාද?
    ඔව්. චිත්‍රපටිය තුල තියෙන ඓතිහාසික පසුබිමේ නිරවද්‍යතාවය ගැන හොයලා බලනකොට, නයගරා දිය ඇල්ලේ තියෙන බලාගාරය ඉදලා සැතපුම් 26ක් ඈතින් තියෙන බෆලෝ නගරයට AC විදුලි ධාරාව ලබා දෙන්න පටන් ගත්තහම, මේ විදුලිබල යුද්ධය නිල නොවන වශයෙන් ජයග්‍රහණය කර අවසාන වෙනවා. වෙස්ටිංහවුස්ගේ AC විදුලි ධාරාව විදුලි බල කර්මාන්තයේ ප්‍රමිතිව බවට පත්වෙනවා.


වම්පස ඡායාරූපයේ සිටින්නේ සැබෑ ජෝර්ජ් වෙස්ටිංහවුස් වන අතර දකුණු පස ඡායාරූපයෙන් දිස්වෙන්නේ ඔහු වෙනුවෙන් මෙම චිත්‍රපටයේ රඟපෑමින් දායක වන මයිකල් ෂැනන් ය.

ඒ වගේම මේ කතාවේ ඉන්න ප්‍රධාන චරිත කිහිපයක් ගැන ඔබේ දැනුමට අවශ්‍යය වන ඇත්තම විස්තර ටිකක් කියන්නම්.

  • තෝමස් එඩිසන් (Thomas Edison)
    උපන් දිනය: 1847 පෙබරවාරි 11
    උපන් ස්ථානය: ඇමරිකාවේ මිලාන් නගරයේ ඔහාවෝ ප්‍රදේශයේ
    මරණය: 1931 ඔක්තෝම්බර් 18 වනදා දියවැඩියා රෝගය නිසා
    මරණය සිදුවූ ස්ථානය: ඇමරිකා එක්සත් ජනපදයේ නිව් ජර්සි ජනපදයේ

 

  • ජෝර්ජ් වෙස්ටිංහවුස් (George Westinghouse)
    උපන් දිනය: 1846 ඔක්තෝම්බර් 06
    උපන් ස්ථානය: ඇමරිකාවේ නිව්යෝක් නගරයේ සෙන්ට්‍රල් බ්‍රිඩ්ජ් වලදී
    මරණය: 1914 මාර්තු 12 වනදා හෘද රෝගයකින්
    මරණය සිදුවූ ස්ථානය: ඇමරිකාවේ නිව්යෝක් නගරයේදී

 

  • නිකෝලා ටෙස්ලා (Nikola Tesla)
    උපන් දිනය: 1856 ජූලි 10
    උපන් ස්ථානය: ඕස්ට්‍රියානු අධිරාජ්‍යයේ ස්මිල්ජන් හිදී
    මරණය: 1943 ජනවාරි 07 වනදා කිරීටික ධමනි වල ලේ කැටි ගැසීම නිසා
    මරණය සිදුවූ ස්ථානය: ඇමරිකාවේ නිව්යෝක් නගරයේදී

 

  • සැමුවෙල් ඉන්සල් (Samuel Insull)
    උපන් දිනය: 1859 නොවැම්බර් 11
    උපන් ස්ථානය: එංගලන්තයේ ලන්ඩන් හිදී
    මරණය: 1938 ජූලි 16 වනදා හෘදයාබාධයකින්
    මරණය සිදුවූ ස්ථානය: ප්‍රංශයේ පැරිස් හිදී

 

  • මේරි එඩිසන් (Mary Edison)
    උපන් දිනය: 1855 සැප්තැම්බර් 06
    උපන් ස්ථානය: ඇමරිකාවේ නිව් ජර්සි ප්‍රාන්තයේ නිවෝක් හීදී
    මරණය: 1884 අගෝස්තු 09 වනදා (හේතුවක් නොදනී)

 

  • මාගරීට් වෙස්ටිංහවුස් (Marguerite Westinghouse)
    උපන් දිනය: 1842
    උපන් ස්ථානය: ඇමරිකාවේ නිව්යෝක් නගරයේ රොක්ස්බරි හිදී
    මරණය: 1914 ජූනි 23 වනදා හදිසි ආබාධයකින්
    මරණය සිදුවූ ස්ථානය: ඇමරිකාවේ මැසචුසෙට්ස් නගරයේ ලෙනොක්ස් හීදී

හොඳයි එහෙනම්. විස්තර ටිකක් දැනගන්න ඇති කියලා හිතනවා. ඉතින් දැන් බලපු මේ අද බලන්න හදන චිත්‍රපටිය ගැන විස්තර ටිකක්.

The Current War කියන්‌නේ 2017 වර්ෂයේදී 42වන Annual Toronto International Film Festival (TIFF) හිදී විශේෂ චිත්‍රපටයක් විදිහට එලිදක්වලා 2019 ඔක්තෝම්බර් 25 වෙනිදා මුලු ලෝකයටම බලන්න එලිදක්වපු චිත්‍රපටියක්. ලිපිය සම්පූර්ණයෙන්ම කියවපු කෙනෙක්නම් මේ වෙනකොට දන්නවා ඇති මේ චිත්‍රපටිය ගෙතිලා තියෙන්නේ 19 වෙනි සියවසේ පැවති විදුලිය පිළිබඳව තෝමස් එඩිසන් සහ ජෝර්ජ් වෙස්ටිංහවුස් අතර තිබුන සටන පාදක කරගෙනයි කියලා. මේ චිත්‍රපටිය අධ්‍යක්ෂණය කරන්නේ ඇල්ෆොන්සෝ ගෝමස්-රෙන් විසින්. රචනා කරන්නේ මයිකල් මිට්නික් විසින්. මේ චිත්‍රපටයේ නළුවන් විදිහට එඩිසන් ලෙස බෙනඩික්ට් කම්බර්බැච්, වෙස්ටිංහවුස් ලෙස මයිකල් ෂැනන්, නිකොලා ාටස්ලා ලෙස නිකලස් හෝල්ට්, සැමුවෙල් ඉන්සුල් ලෙස ටොම් හොලන්ඩ් සහ කැතරින් වෝටර්සන්, ටුපන්ස් මිඩ්ල්ටන්, මැතිව් මැක්ෆැඩියන් සහ ඩේමියන් මොලෝනි කියන නළු නිළියන් ප්‍රධාන චරිත වලට රංගනයෙන් දායක වෙනවා. ඒ වගේම මේ චිත්‍රපටයේ විධායක නිෂ්පාදකයන් විදිහට මාටින් ස්කොර්සෙස් සහ ස්ටීවන් සයිලියන් දායක වෙනවා.

මෙහෙම චිත්‍රපටියක් හදනවා කියලා 2012 මැයි මාසයේදී නිවේදනය කරත්, 2015 සැප්තැම්බර් මාසයේදී තමයි ගෝමස්-රෙජොන් විසින් හරියටම මේ The Current War කියන චිත්‍රපටිය නිර්මාණය කරනවා කියලා තහවුරු කරන්නේ. කම්බර්බැච්, ෂැනන් සහ හෝල්ට් 2016 ඔක්තෝම්බර් මාසය වන විට මේ චිත්‍රපටියට රංගනයෙන් දායක වෙන්න එකතුවුනා වගේම රූගත කිරීම් එංගලන්තයේදී ආරම්භ කරනවා. කලින් කිව්වා වගේම මේ චිත්‍රපටියේ සේරම වැඩ අවසන් කරලා 2017 සැප්තැම්බර් 09 වෙනිදා ටොරොන්ටෝ ජාත්‍යන්තර චිත්‍රපට උළෙලේදී තිරගත කරනවා.

සම නිෂ්පාදනය හාර්වි වින්ස්ටයින් විසින් කරන ලද අතර මුලින්ම බෙදා හැරීමට නියමිතව තිබුනේ The Weinstein Company එක හරහායි. ඒත් හාවි වෙයින්ස්ටයින්ට එල්ලවුන ලිංගික අපයෝචන චෝදනාවලින් පස්සේ ඔහුගේ චිත්‍රපටය 2017 නොවැම්බර් මාසයේදී අත්හිටවලා විකුණලා දානවා. අන්තිමට මේ චිත්‍රපටිය මිලදී ගන්නේ ලැන්ටර්න් එන්ටර්ටේනිමන්ට් (Lantern Entertainment) ආයතනය විසින්. ඊටපස්සේ දේශීය වශයෙන් මේ චිත්‍රපටිය බෙදාහැරීමේ අයිතිය 101 Studios වෙතට පවරනවා. මේ ප්‍රශ්ණ නිසාම ස්කොර්සෙස්ගේ කොන්ත්‍රාත්තුවේ තිබුන අවසාන වරප්‍රසාද වගන්තිවලට අනුව, ගෝමස්-රෙජොන් ඔහුට තේරුම් කරවනවා මේ චිත්‍රපටිය නැවත සකස් කරලා ඒ වෙද්දි තිබුන ධාවන කාලයෙන් විනාඩි 10කුත් අයින් කරන්න කියලා. ඉතින් මෙහෙම බාධක මැද්දේ අවසන් වුන චිත්‍රපටිය අන්තිමට 2019 ඔක්තෝම්බර් 25 වන දින ඇමරිකාවේ රිලීස් වුනා.

ඉතින් කතාව මොකක්ද කියලා අමුතුවෙන් කියන්න ඕනි නැහැනේ. උඩ තියෙන විස්තර බැලුවනම් තේරෙනවා තෝමස් එඩිසන් සහ ජෝර්ජ් වෙස්ටිංහවුස් කියන විදුලි බලයේ පතාකයන් විසින් තමන්ගේ නිර්මාණයන් තමයි හොඳම කියලා ලෝකයා ඉදිරියේ ඒත්තු ගන්වන්න හදන කතාව තමයි මේ ගෙතෙන්නේ කියලා.

ඉතින් අවසානයට කියන්න තියෙන්නේ, ඔබ අනිවාර්යෙන්ම නැරඹිය යුතු චිත්‍රපට ගොඩට ඇතුලත් විය යුතුම චිත්‍රපටියක් විදිහට මම මේ චිත්‍රපටිය සලකනවා. ඒ වගේම මේ විස්තර හොයාගෙන ලෙටර් එක ලියන්නත් මට ඇත්තටම පැය 02කට වඩා ගතවුනා. උපසිරැසි කරන්න ගත වුන කාලය ගැන මම කියන්න යන්නේ නැහැ. උඩින් මම කියලා තියෙනවනේ කොච්චර කට්ටක් ඒකට කනවද කියලා. ඉතින් එහෙනම් චිත්‍රපටිය බලන්න කියලා ආරාධනා කරනවා. තවත් උපසිරැසියකින් හමුවෙමු. ජයවේවා…!

 

 

Due to copyright issues, we do not provide any torrent links.

මෙම ලබා දී ඇති උපසිරසිය Directors Cut පිටපත සඳහා ලබා දි ඇත.

 width=

මේ ලබා දී ඇති සිංහල උපසිරැසි පිළිබද “චලිදු දේශන් (කිනා)” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank

PLATINUM MEMBER
JOINING DATE – 2013-06-07
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.

Check Also

The Trough (2018) Aka Di ya cao Sinhala Subtitles | කැලෑ නීතිය [සිංහල උපසිරසි සමඟ]

එහෙමනම් ඔන්න ආයෙම ටික දොහකට පස්සෙ සිනමාපටයක් අරගෙන ආවා. ඉතින් මේ පාරත් සබ් ගෙනාවේ චීන …

Leave a Reply

Your email address will not be published.

70 comments

  1. Thanks Bro

  2. More than sub,respect brother……

  3. Netflix එකේ බලන්න පුලුවන් විදියට මේ දෙන උපසිරැසි srt එකෙන් dfxp format එකට convert කරල දෙන්න කියල මම බයිස්කෝප් එකෙන් ඉල්ලා සිටිනව.

  4. සුබ පැතුම් කිනා !

    කොරෝනා නිසා සක්‍රිය වෙලා නතර උන කතා මාලාවක් සෙනික ගොඩ දාල 200 වාර්තා කලා එහෙනම්. ලිපි ගැන නම් අමුතුවෙන් කියන්න දෙයක් නැහැ. කම්මැලි නැතුව ලිපි ලියන දක්ෂයෙක් තමයි කිනා. කොරෝනා ඉවරයක් වෙන්න කලින් 250/300 කරා යන්න ලැබේවා!!!

  5. Thanks for sub!

  6. Wayantha Sandaruwan

    සුභ පැතුම් සහෝ
    උපසිරස වගේම ලිපියත් සුපිරියටම හදල
    ජය වේවා !!!

  7. Thany you very much for subtitle,…….

  8. Thank you…..so much for sub

  9. congratulations bro

  10. Dinuka Dilshan

    Thank You

  11. kamal Nandakumara

    Congratulation Puthe. adambarai daruwo..

  12. Thank you.. Keep it up good work.. 🙂

  13. godak mahansi vela tiyenava. tnx bro

  14. Congratulations brother. keep it up

  15. Supiri saho.. good luck.. tnx sub ekata

  16. සචින්ත කල්හාර බෙනට්

    200 වෙනි උපසිරැසියට සුබ පැතුම්, චලිදු අයියේ. මට මතක විදිහට ඔයාගේ සබ්වලින් මුලින්ම බැලුවේ Prison Break ද කොහේදෝ?! කොහොම හරි, සබ් 200 ක් කියන්නේ මාරම අමාරු වැඩක්. ඒ වගේම ඒක ලොකු ජයග්‍රහණයක්. ඉතිං තව තවත් කඩයිම් පහු කරන්න කාලය ශක්තිය ලැබේවා කියලා හදවතින්ම ප්‍රාර්ථනා කරනවා.

    ෴෴ජය වේවා…!෴෴

  17. සනිඳු ලක්ඛිත

    මුලින්ම සමාවෙන්න කියන්න ඕනි සුභ පතන්න මෙච්චර පරක්කු උනාට. බයිස්කෝප් අඩවියේ ප්‍රියතම උපසිරසකරුවන් අතරනින් එක්කෙනෙක් තමයි මචං උබ. ඔන්න එහෙනම් 200 වෙනි උපසිරස කඩඉමට හදවතින්ම සුභ පැතුම්. Better call එකත් ඉක්මනටම බලන්න ගන්න ඕනි. අපේ ප්‍රාර්ථනාවනම් තව තවත් උපසිරස කරන්න ලැබේවා කියන එක. සයිට් එකේ පරණම සාමාජිකයන්ගෙන් උපසිරසයක් කාලෙකට සැරයක් හරි වැටෙන්නම ඕනිනේ. මේ උපසිරසටත් ස්තූති. ලිපිය කියවලා ජිවිතේට අහලා නැති දේවල් සෑහෙන්න දැනගත්තා. ෆිල්ම් එක බලලා ඇවිත් ආයේ කියවන්න ඕනි බන්..ඒ තරම් පට්ට… එහෙනම්…ජීවිතේ හැම කටයුත්තක්ම සර්වප්‍රකාරයෙන්ම සාර්ථක වෙන්න කියලා හදවතින්ම ප්‍රාර්ථනා කරනවා…බුදුසරණයි…ජය වේවා…!

  18. Sohan Jayasooriya

    200 වෙනි කඩඉමට හදවතින්ම සුබ පතනව අයියේ.. දිගටම සබ් දෙමු.. ලිපියත් මරු ඈ ගොඩක් වටින විස්තරයක්.. ෆිලුම බලන්නම හිතුනා ලිපිය කියෙව්වම.. සබ් එක ගන්නවා එහෙනම් තෑන්ක්ස් හොදේ… ඉදිරි කඩඉම් වලටත් ඉක්මනට යන්න අවශ්‍ය ශක්තිය, කාලය ලැබෙන්න කියලා ප්‍රාර්ථනා කරනවා.. ජය වේවා!

  19. Pradeep Hashan Kumara

    sub ekata thank you ….
    200 weni sub ekata suba pathum …..
    digatama wade karan yan ……….

  20. මධුකප්‍රිය පෙරේරා

    200ට හෘදයාංගම සුබපැතුම්!
    හම්මේ ඉතින් අපි බයිස්කෝප් එක්ක එකතු වෙනකොටත්
    උපසිරසි 150ක් පන්නලා උන්නු හොදම බුලට් එකක් තමා මේ..
    එහෙනම් දැන් මේ ටිකේ පටන්ගත්තු ගේම අත නොහැරම ඉස්සරහට
    ගෙනිච්චානම් තමයි වටිනාකම තියෙන්නෙ. ඉක්මණින්ම අනිත් කඩයිම්වලට
    ළගා වෙන්න හැකියාව ලැබේවායි පතනවා. ඔබට ජයෙන් ජය!

  21. Useful information. thanks for this & sub

  22. Thanxxx bro congratulation

  23. romance is a bonus book me TV serial eke Sinhala sub denna..

  24. උපසිරැසියට බොහෝම ස්තුතියි
    200 වැනි උපසිරසියට සුභ පැතුම්

  25. විස්තර ටිකට බොහොම ස්තුතිය් සහෝදරයා

  26. 200 වෙනි උපසිරැසි නිර්මාණය වෙනුවෙන් සුබපැතුම් වේවා! සයිටේ හිටිය සබ් මැෂිමක් ආයෙත් වැඩට බැහැලා. තද කොර බ්‍රෝ… සබ් ගැන ඉතින් ආය කියන්න දෙයක් නෑනේ. සුපිරියි. කොරෝනා ඉවර වෙන්න කලින් 300ත් පහු කරලා අනිත් කඩඉම් වලටත් යන්න ලැබේවා… පෞද්ගලික ජීවිතේ වැඩ කටයුතුත් සාර්ථක වේවා කියලා ප්‍රාර්ථනා කරනවා. දිගටම සබ් දෙමු ආ…ජය!

  27. madawa Kariyaperuma

    විස්තර ටිකට තෑන්ක්ස් බ්‍රෝ……

  28. Indarathanathero

    Thanks

  29. thank you…

  30. නියමයි…සබ් එකට තැන්ක්ස්…
    200 වෙනි උපසිරසියට උණුසුම් සුබ පැතුම්!!!
    දිගටම සබ් කරමු…
    ෆිල්ම් එකනම් ආපු කාලෙම බැලුව…සුපිරිම ෆිල්ම් එකක්…

  31. thankyou verymuch.

  32. Thanks bro

  33. mekanm aniva blnna oni thq bn

  34. 200වන කඩඉමට සුබපැතුම් !!!!ගොඩක් මහන්සිවෙලා ලියපු ලිපියටත් උපසිරැසියටත් ස්තූතියි .

  35. 200’වැනි උපසිරැසි නිර්මාණයට උණුසුම් සුභපැතුම් කිනෝ.
    අපි මේකට එකතු වෙද්දී හිටිය එල බුලට් එකක් තමයි ඉතිං. ආයෙම වතාවක් ඇවිල්ලා පටන් ගත්ත වැඩේ නම් වටිනවා.
    මෙතැනින් නොනැවති ඉදිරි කඩයිම් වලටත් ඉක්මණින්ම ලගාවෙන්න කියලා ප්‍රාර්ථනා කරනවා.
    ඒවගේම මේ උපසිරැසියටත් හුගක් ස්තුතියි. ජය!!!

  36. Thanks mchn..

  37. isuru srinath sjs

    200 වෙනි සිංහල උපසිරැසියට හදවතින්ම සුබ පතනවා !! බොහොම ස්තුතියි සිංහල උපසිරැසියට ..ජය!!

  38. Supiri lipiyak.Mare maru.

  39. ela kina

  40. Thanks Machan <3

  41. Thank you…….!

  42. Anuja wikramasingha

    මරු….
    සුපිරි වැඩක්.

  43. චලිඳු දේශාන් කියන නම ඉතින් ඉස්සර නිතර දෙවේලේ දකින නමක්. සෑහෙන වේගෙකින් සබ් කරනවා නෙව. ඉතින් මගෙනුත් උණුසුම් සුභ පැතුම් 200ට. තව මාසයක් දෙකක්වත් යන එකක් නෑ මෙහෙම නිදහස තිබුණොත් සහෝට ඊළඟ කඩයිමටත් යන්න. එහෙනම් ඒකටත් කාලය සහ හැකියාව ලැබෙන්න කියලා ප්‍රාර්ථනා කරනවා.
    ජය… 😀

    අහ්හ් කමෙන්ට් ගැනනම් මොකට කියනවද! ඉස්සර උපසිරස නැතුව දුන්න ලිපි වලටත් ලැබිල තියෙනව දැන් කඩයිමකට ලැබෙනවට වඩා කමෙන්ට්… 🙁 

  44. විකියා

    උනුසුම් සුභ පැතුම් කිනා…. තවත් සබ් දාමු… ජයෙන් ජය !

  45. Tesla Kiyanne mama godak kemathi charithayak. Thanks aiye sub eka dunnata. Keep it up. Jaya weewa.

  46. උණුසුම් සුබ පැතුම් කිනෝ 200 වෙනි උපසිරැසියට. අර කිව්වත් වගේ කාලෙ එක්ක ගොඩක් දේවල් වෙනස් වෙලා. කමෙන්ට් කියන්නෙ නොලැබෙනම දෙයක්. ආසාවට කරන දේනේ, නවත්තන්න හිතෙන් නෑ. 😛 පරණ බුලට් එකක් ආපහු ආව එක ගැන අප්‍රමාණ සතුටුයි. සියලු වැඩ කටයුතු සාර්ථක වේවායි පතන ගමන්ම බොහොම ස්තූතියි සිංහල උපසිරැසියටත්. ජය෴෴ 😛 😛

  47. THANKS
    GODAK MAHANSI WELA THORATHURU DENNA

  48. better call soul ekata sub dena eka nawaththana epoo…….

  49. 200 වෙනි උපසිරසියට හදවතින්ම සුභ පතනවා…!!!

    … ගොඩක්ම ස්තූතියි. …
    ඔබට සහ ඔබ පවුලේ සැමට
    තෙරුවන් සරණ ලැබේවා..!

    Request :
    Trouble (2019)
    Miss Fisher & the Crypt of Tears (2020)
    The Night Clerk (2020)
    The Lovebirds (2020)
    (psarips(dot)one site eke thiyana
    honda aluth movies walata sub denna plz..)

  50. සිංහල උපසිරැසියට ස්තූතියි
    200 වෙනි උපසිරැසියට හදවතින්ම සුභ පතනවා
    250 න් නැවත හමු වෙමු
    ජය

  51. Amila Wickramasinghe

    Thank you very much, Brother. I appreciate your effort.

  52. bohoma sthuthiyi mcn

  53. අම්මෝ මගේ එකා..
    දන්නෙම නැතිව ඇස්ලේටරේ අල්ලලා….
    මීට අවුරුදු හතකට කලින් මහේෂ් බාබුගේ ලයින් තුන්දාහක Aagadu චිත්‍රපටය වරුවෙන් සබ් කරලා සයිටේ පෝස්ට් කරපු චලිඳුවා තාමත් එහෙමයි.. ඒ වේගේ එහෙම්මමයි.
    එදා වගේම තාමත් ආදරෙයි ඉතිං..
    දැන් ඉතින් අරාබියේ වැලි කනවනේ..
    ඉතුරු හරියත් ඔය ගැම්මටම අල්ලමු..
    කරන කියන පෞද්ගලික වැඩ කටයුතුත් සාර්ථක වෙන්න කියල ප්‍රාර්ථනා කරනවා.
    ගෙදර ඉන්නවා කියන්නේ ඊළඟ කඩයිම තව සතියකින් විතර දැකගන්න ඇහැකි..
    ආපු කලක සෙට් වෙමු.!
    උඹට ජය මගේ සහෝදරයා..!!!

  54. සබ් එකට බොහොම ස්තූතියි සහෝ….!
    ඒ වගේම 200 වෙනි කඩඉමටත් සුබ පැතුම්….!

  55. 200 වෙනි සිංහල උපසිරැසියට උණුසුම් සුබ පැතුම්! ඉදිරි වැඩ කටයුතු සාර්ථක වේවායි ප්‍රාර්ථනා කරනවා. මං කැමති කැටගරියේ චිත්‍රපටයක්. අනිවාර්‍යෙන්ම බලනවා.

  56. -චානක ඉඳුනිල්-

    කඩයිමට උණුසුම් සුභ පැතුම් සහෝ,
    ඒ වගේම උපසිරැසියටත් ස්තූතියි…
    ඉදිරි වැඩකටයුතු සාර්ථක වේවා!

  57. දැන් බැවා… baiscope Article එක කියෙව්වා සුපිරි. කිනා සහෝදරයට ගොඩාක් ස්තූතියි.
    Article එකට මාර මහන්සියක් වෙලා තියනවා….

  58. BOHOMA STUTHI.

  59. යුරාන් ධනුක (දනුවා)

    උපසිරැසියට බොහෝම ස්තූතියි සහෝ
    ඒ වගේම 200* වෙනි කඩයිමට උණුසුම් සුභ පැතුම්!!!
    ඉක්මනටම 300*ටත් යමු
    ඒ වගේම ලිපියත් සුපිරි !!!

  60. Bohoma sthuthi sahodaraya

  61. උදයංග සම්පත් හතරසිංහ

    ටිකක් පරක්කු වුණාට මොකද සෑහෙන වේගෙන් මේ ටිකේ සබ් කරලනෙ ❤. ඉතිං කොරෝනා නිසා නිදහස් වුණා වගේම ඉදිරියටත් උපසිරැසි ලබා දෙන්න හැකියාව ලැබෙන්න කියල ප්‍රාර්ථනා කරනව. 200 වැනි උපසිරැසිය වෙනුවෙන් සුබ පතනව. ලිපිය බැලුවම චිත්‍රපටිය බලන්න ආස හිතෙනව. එහෙනම් ඔහොම මේ දවස් ටිකේම 250 ගහමු. ජය වේවා..!

  62. අන්තිමේදී කොහොමහරි 200 ගැහුවා ඉතින් නෙහ්හ්.
    හදවතින්ම සුබ පතනවා අයියේ හතරවෙනි කඩඉමට.
    තවත් උපසිරැසි කරන්න කාලය ලැබේවා පතනවා.

  63. sabata godaaaaaaak Sthuthi saho Jaya wewa

  64. 200 වෙනි උපසිරැසියට උණුසුම් සුබ පැතුම්..!
    තව තවත් කඩයීම් හමුවේ යන්න හැකියාව ලැබෙන්න ඕනේ.
    ලිපිය ගැන නම් කතා කරලා වැඩක් නෑ. ගොඩක් දේවල් දැනගත්තා.
    උපසිරැසියට ස්තුතියි.!

error: Alert: Content is protected !!