The Pilot. A Battle for Survival (2021) AKA Letchik Sinhala Subtitles | සැබෑ මිනිසෙකුගේ කතාවක්…! [සිංහල උපසිරසි]

මුලින්ම ස්තූතිවන්ත වෙන්න ඕනෙ මම කලින් කරපු ” Paradise Now (2005) පාරාදීසය ගිනිගනී… ” උපසිරැසියට එක වචනෙකින් හරි ස්තූතියි කියල යන්න, අදහසක් දක්වලා යන්න නතර වෙලා ගියපු හැම දෙනාටම. මොකද ඒ දිරි ගැන්වීම් නිසාවෙන්ම තමයි මොන තරම් කාර්යබහුල උනත් මේ වෙනුවෙනුත් කාලය වෙන් කර ගන්න පුලුවන් උනේ.

පහුගිය අවුරුද්දේ අවසාන කාලේ දවසක අන්තර්ජාලයේ සැරිසරනකොට අහම්බෙන් නෙතගැටුන එක්තරා රුසියානු හමුදා සිනමා සිත්තමක පූර්ව ප්‍රචාරක පටයක් එහෙමත් නැත්තං ට්‍රේලර් ( Trailer) එකක් නිසා මටත් අමතක වෙලා තිබුන හරිම සුන්දර අතීතෙකට මගෙ හිත නිකම්ම ඇදිල ගියා.

” ළා හිරිකඩ වැස්සක් වැටුන එක හවස් වරුවක දොඩං ගෙඩි දෙක තුනක් තරමේ උස බටු ඇට සයිස් හිච්චි කොලුවෙක්, බයිසිකලේකුත් පැදගෙන කලබලෙන් වගේ හතිත් දාගෙන ගමේ පුස්තකාලෙට ගොඩ වැදුනා.
ඒකෙ පිරිල තිබුන පොත් රාක්ක ටික දැකල කොලුවගෙ ඇස් දෙක දිලිසෙන්ඩ ගත්තෙ හරියට නිකං නිධන් දූපතට ගොඩ බැස්ස මූදු කොල්ලකාර කැප්ටන් ජැක්ගෙ වගෙයි. කොලුවා පහේ සිස්සත්තෙ පාස් උනොත් එහෙම ගෙදරින් ලැබෙන්ඩ නියමිතව තිබුන තෑග්ග තමයිලුනෙ ඔය ගමේ පුස්තකාලෙ සාමාජික කාර්ඩ් එක. ඉතිං හා හා පුරා කියල තෑගි හම්බුන කාර්ඩ් එකත් කොලුවා සාක්කුවෙං පොඩ්ඩක් එළියට ඇද්දේ මමත් දැං ලොකු මිනිහෙක් කියලා හැමෝටම ආඩම්බරේ පෙන්නන්ඩ වෙන්න ඕනෙ. කොහොමින් කොහොම හරි කොලුවත් ආසාවෙං පොත් රාක්ක ගානෙ පොත් අත ගගා ඇවිදින්ඩ ගත්තයි කියමුකෝ. රැව්ල දෙපැත්තෙං ගෝනුසු වලිග කට් එකට කරකවපු පුස්තකාල මහත්තයගෙ රේඩාර් එකට ඔන්න දැං තමයිලු මේ පොත් අවුස්ස අවුස්ස පුස්තකාලෙ පුරාවටම කරක් ගහන නාහෙට නාහන කොලුවව අහු වෙන්නෙ…

– ඔය ළමයා මොකද මේ කරන්නෙ…?
– මම මේ පොතක් ගන්නයි කියලා…
– ඉතිං පුස්තකාලෙ පොත් නැතුව පාං දෙනවයි කියලද හිතුවෙ…?
– පානුත් තියේනං දෙන්න, අම්ම රාත්තලක් ගේන්න කිව්වා…
(පොඩ්ඩක් නළල රැළි ගස්සලා කණ්නාඩි කුට්ටමටත් යටිං බලපු පුස්තකාල මහත්තයා…,)
– දැං ඔය ළමයා පොතක් තෝර ගත්තද…?
– තාම එකක් තෝර ගන්න බැරි උනානෙ…
( ටිකක් උස රාක්කෙක උඩිං තිබුන නිල් පාට පිටකවරයක් තිබුන පොතක් තෝරලා අතට ගත්තු පුස්තකාල මහත්තයා ඒ පොත අර කොලුවගෙ අතට දුන්නා…)
– ඔය ළමයා එහෙමනං මුලින්ම මේක කියවල එන්නකෝ…
(කොළුවා පොත අතට අරං බැලුව පිටකවරෙ දිහා, ලස්සන නිල්පාට කවරෙ මැද්දෙ මෙන්න ඉන්නවා ගුවන් නියමුවෙකුත්. කොලුවට ආස හිතුනා…)
– බරිස් පලෙවොයිගේ ” සැබෑ මිනිසෙකුගේ කතාවක් ” පරිවර්තනය කරල තියෙන්නෙ දැදිගම වී. රුද්‍රිගු

ඔන්න ඔහොමයිලු මේ කොලුවගෙ පුස්තකාල පාඨක ජීවිතේ පළවෙනිම පොත අතට පත් වෙන්නෙත්, පුස්තකාල මහත්තයයි මේ කොලුවයි හොඳ යාලුවො බවට පත් වෙන්නෙත්. හැබැයි ඒකෙන් පස්සේ ඒ කොලුවා අදටත් රුසියන් පොත් පිස්සෙක් වගේම හොඳම ජාතියේ පොත් ගුල්ලෙක්ලු… ” ඔය පහලින් දාල තියෙන්නෙ පොඩි කාලෙදි ඒ කොලුවව පිස්සු වට්ටපු තවමත් අහු උන වෙලාවට පිටුවක් දෙකක් හරි කියවන ඒ අරුම පුදුම පොත…

අලෙක්සේයි මෙරේස්යෙව්, සෝවියට් ගුවන් හමුදා ප්‍රහාරක යානා නියමුවෙක්. කවුරුවත්ම නොහිතපු විදියට අවාසනාවන්ත එක දවසක අලෙක්සේයිගෙ යානය ජර්මානුවන් සමග සිදු උන ගුවන් සටනක් අතරතුරදී ප්‍රහාරයකට ලක් වෙලා මහා හිම කතරක් මැදට කඩා වැටෙනවා. අලෙක්සේයිට දිවි බේරා ගැනීමට හැකි වේවිද…? අලෙක්සේයිට නැවත පියාසර කල හැකි වේවිද…? නොපසුබස්නා වීර්යය සහ අධිෂ්ඨානය සමග අලෙක්සේයිගේ සිහිනයන් ජය ගත ගැකි වේවිද…? අවසරයි නරඹන්න, ” සැබෑ මිනිසෙකුගේ කතාවක්…! “

Imdb දර්ශකයේ 6.0 ක් සහ Rotten Tomatoes දර්ශකයේ 78% ලබාගත්තු මේ අපූරු රුසියානු සිනමා සිත්තමේ කතාව කියන එක නම් හරිම අමාරු දෙයක්. මොකද මේ සිනමා සිත්තම නරඹලා මිසක් කියවලා රසවිඳින්න බැරි එකක් නිසා. මගේ ලිපි ලිවීමේ නොහැකියාව නිසාවෙන් තවමත් මේ සිනමා සිත්තම රස විදින්න හිතුනෙ නැත්තං මේ සිනමා සිත්තමේ ට්‍රේලර් ( Trailer) එක බලලා එන්න. තෝරා බේරාගෙන රසවිඳීම ඔබට බාරයි…

ළිපිය දික් උනානං ඒකට සමාවෙන්න ඕනෙ. අතීතකාමය හරිම රහයිලුනේ. ඒකයි…, පොත දැක්කනං, පොතේ නම ඇහුනනං හැමෝම වගේ දන්නව ඇති මේ සිනමා සිත්තම මොකද්ද කියලා. ඒ පොත ඇසුරින් මේ සිනමා සිත්තම නිර්මාණය උනා උනත්, යම් යම් නිර්මාණාත්මක අවශ්‍යතාවන් මත සමහර කොටස් පොතට වඩා ටිකක් වෙනස් කරල තියෙනවා. පස්සෙ මට බැනුම් අහන්න වෙයි කියලයි දැන්මම කිව්වෙ. ඒ කොහොම උනත් මට නං පොතේ තිබුන කතාව තරමටම ආසාවෙන් මේකත් රසවිඳිනත් පුලුවන් උනා. තීරණය ඔබ සතුයි…!

තව දෙයක්, මේ සිනමා සිත්තම රිලීස් වෙන්නත් කලින්ම ආසාව වැඩි කම නිසාම වැඩේ බාර ගත්තා උනත් පහුගිය කාලය පුරාවටම වැඩත් එක්ක සෑහෙන්නම කාර්යබහුල උන නිසා හිතපු විදියට වැඩේ ඉවර කරන්න බැරි උනා. ඒ නිසා මෙතෙක් කල් මගේ ප්‍රමාදය ඉවසා වදාරපු ඇඩ්ඩිං මඩුල්ල ඇතුලු හැමෝම සමා වෙන්න ඕනෙ මගෙ ප්‍රමාදයට. ඒ වගේම විශේෂ ස්තූතියක් පිරිනමන්න ඕනෙ අන්තර්ජාලයේ හමු උන මා නොදුටු මිතුරෙකු වන ලක්මාල් ජීවන්තටත්. තිබුන උනන්දුව නිසාම ෆිල්ම් එක රිලීස් වෙන්නත් කලින් ඉදලාම මේකේ හොද කොපියක් හොයල දෙන්න කියල එයාට කරපු කරදරය ඉවසා වදාරගෙන කොහොම හරි මට හොඳ කොපියක් රිලීස් උන ගමන්ම හොයල එවපු එක වෙනුවෙන්. ඒත් අන්තිමේ මගෙ අතිනුයි ප්‍රමාද උනේ…

පලි,

සබ් කරන්න මග ඇරුන අලුත්, පරණ භාෂා බේදයක් නැතුව හොද ෆිල්ම් තියෙනව නං පහලින් කමෙන්ට් එකක් දාල යන්න. එහෙමත් නැත්තං ” [email protected] ” එකට මේල් එකක් දාන්න. වෙලාව ලැබෙන විදියට, පුලුවන් විදියකට කරන්නම්…

කාලයේ වැලි තලාවෙන් මැකිලා සැගවිලා ගියපු, හරි අපූරු ආදරණීය දකුණු කොරියානු සිනමා සිත්තමක උපසිරැසියක් සමගින් ළගදීම නැවත හමු වෙමු…

ඔබට ජය…!

 

 

 

Due to copyright issues, we do not provide any torrent link.

මෙම ලබා දී ඇති උපසිරසි WEBRip පිටපත් සඳහා අදාළ වේ.

 

Subtitle Contributor Rank

BRONZE MEMBER
JOINING DATE – 2017-01-07
SUBMAKER RATING BY ADMINS