The Trial of the Chicago 7 (2020) Sinhala Subtitles | ඇමෙරිකානු රජය අපකීර්තිමත් කළ නඩු විභාගය [සිංහල උපසිරසි] (18+) 100*

සුබ නව වසරක් වේවා බයිස්කෝප් සිංහලෙන් යහළුවෝ යෙහෙලියෝ හැමෝටම..

සෑහෙන කාලෙකට පස්සේ ඔන්න සිංහල උපසිරසියක් අරගෙන උපසිරසි මහගෙදරට ආවා. මේ චිත්‍රපටය ගැන මට මුලින්ම හඳුන්වලා දුන්නේ නිරෝෂ් සහෝදරයා. දැන් සෑහෙන දවසක් වෙනවා කියලා. අවුරුද්දකටත් වැඩියි. වැඩිය කැමති පැරණි චිත්‍රපට වලටම නිසා දවසින් දවස මේ උපසිරසිය කල්ගියා. ඒත් නිරෝෂ් සහෝදරයගේ ඉල්ලීම අහක දාන්න හිත දුන්නෙත් නෑ. ඉතින් අන්තිමේදි මං මේ චිත්‍රපටය මගේ සියවන උපසිරසිය විදිහට තෝරගත්තා. චාමර සම්පත් සහෝදරයා චිත්‍රපටය වෙන් කරලා දුන්නේ ඔක්තෝබර් මාසේ. සේරම වැඩත් එක්ක හම්බවෙන පොඩි වෙලාවෙත් උපසිරසිය හදන්න පටන් ගත්තා. මේ අතරේ කොවිඩ් යම්තාක් දුරට පාලනය වී ඔක්තෝබර් 21 වනදා ඉඳන් අපිට වැඩ පටන් ගන්න වුනා. ඉතින් මේ වැඩ වැඩිත් එක්ක උපසිරසිය දවසින් දවස කල්දාන්න වුනා. අන්තිමේ අළුත් අවුරුද්දට දෙන්න හිතාගෙන හිටියත් ඒකත් හරිගියේ නෑ.

ඉතින් කොහොම හරි මෙන්න මගෙන් 2022 අවුරුද්දට දෙන පළවෙනි උපසිරසිය. ඒ වගේම බයිස්කෝප් සිංහලෙන් මහගෙදර දෙවනි කඩඉම.

දෙවන කඩඉමට නැත්නම් 100 වෙනි උපසිරසියට මේ චිත්‍රපටය වෙන්කරගෙන ටික ටික උපසිරසිය හදද්දි අශාන් විමුක්ති සහෝදරයා රූපවාහිනී කතා මාලාවක එපියක් කරන්න කතාකලා. ඒත් මං කිව්වා මං 100 ගහන්න ඉන්නේ කියලා. අවුලක් නෑ ඔන්න ඔහේ කරමු කියලා කියපු නිසා මට Alice in Borderland රූපවාහිනී කතා මාලාවට සම්බන්ධවෙන්නත් පුළුවන් වුනා. වැඩ වැඩි නිසාම අශාන් සහෝදරයා මට ළඟ එපියකුත් දුන්නා.

ඉතින් පළවෙනි සිංහල උපසිරසියේ ඉඳන් මේ වෙනකන් උපසිරසි නිර්මාණය කරන්න අඩවියේ සහෝදරයින්ගෙන් ලැබුණු උදව් උපකාර, උපදෙස් ගුරුහරුකම් වලට මං ගෞරවපූර්වකව ස්තුතිය පුද කරනවා. මේ වෙනකන් අඩවියේ අඳුරගන්න ලැබුණු විමුක්ති, මයුර, ලශේන්, සිසිල, මලිත්, තිසර, රවිඳු, චාමර, දිල්ශාන්, හසන්ත, රොයිලි, ඉසුරු, ලහිරු, මධුකප්‍රිය, පසිඳු, රවිඳු, සංජන, සමන්, සොහාන්, යුරාන්, ඔලිවර්, ප්‍රියන්ත ඇතුළු සහෝදරවරුන්ට මගේ අවංක ආදර ස්තුතිය පුද කරනවා. ඒ වගේම හැමදාම අපිව දිරිමත් කරපු ශාමල්, හසිත, සුපුන්, උදය, කවිඳු, කසුන්, ලහිරු, තිශාන්, බුද්ධික, ශෂිත් ඇතුළු සහෝදරවරුන් හැමෝටමත් මගේ හෘදයාංගම ස්තුතිය පුද කරනවා. නිරෝෂ් ගුණසේකර සහෝදරයා සහ අඩවියේ මුලින්ම අඳුරගත්ත අශාන් විමුක්ති සහෝදරයා නිසා තමයි, එදා දුන්න උපදෙස් නිසා තමයි මේ වගේ දුරක් ආවේ. ඔය දෙන්නට මගේ විශේෂ ස්තුතිය පුද කරනවා.

ඉතින් මෙන්න මගේ 100 වෙනි සිංහල උපසිරසිය.

The Trial Of The Chicago 7 (2020)
ඇමෙරිකානු රජය අපකීර්තිමත් කළ නඩු විභාගය

පසුගිය 2020 වසරේ පැවති අමෙරිකානු ජනපතිවරණයෙන් ඩිමොක්‍රටික් පක්ෂයේ අපේක්ෂක ජෝ බයිඩන් මහතා අමෙරිකා එක්සත් ජනපදයේ 46 වැනි ජනාධිපතිවරයා ලෙස තේරී පත්විය. ඒ මහතා ජනාධිපති ලෙස තේරී පත්වීමට මාස කිහිපයකට පෙර (2020 අගෝස්තු) ඩිමොක්‍රටික් පක්ෂයේ ජාතික සම්මේලනයේදී එම පක්ෂයේ ජනාධිපති අපේක්ෂක ලෙස නාමයෝජනා වී සම්මත විය. මෙය සිය ජනපති සහ උප ජනපති අපේක්ෂකයන් තෝරා ගැනීම සඳහා වසර ගණනාවක් තිස්සේ ඩිමොක්‍රටික් පක්ෂය විසින් පැවැත්වෙන නිල සමුළුවක් වන අතර මීට වසර 52 කට පෙර 1968 වසරේ අගෝස්තු මාසයේද චිකාගෝහිදී මෙවැනිම සමුළුවක් එම පක්ෂය විසින් සංවිධානය කර තිබිණි.

ඩිමොක්‍රටික් පක්ෂය එවකට පැවති අමෙරිකානු-වියට්නාම යුද්ධයට පක්ෂපාතී ස්ථාවරත්වයක් දැරූ අතර රට පුරා ඇවිළුණු විරෝධතාවයන්ගේ දිගුවක් ලෙස මෙම සමුළුව ඉදිරිපිට ඊට විරෝධතාවය දැක්වීමට ඇබී හොෆ්මන්, ජෙරී රූබින්, ටොම් හේඩන්, රෙනී ඩේවිස්, ඩේවිඩ් ඩෙලින්ජර්, ලී වයිනර්, ජෝන් ෆ්‍රොයින්ස් සහ බොබී සීල් යන පුද්ගලයෝ සූදානම් වූහ. සමුළුවෙන් මාස පහකට පසු ඔවුන් අටදෙනා අත්අඩංගුවට ගැනුණු අතර අදාළ සමුළුවේදී කැරළි කෝලාහල ඇති කිරීමේ අරමුණින් කුමන්ත්‍රණය කිරීම සහ රාජ්‍ය සීමාවන් තරණය කිරීම ඔවුන්ට විරුද්ධ චෝදනා විය.

පසුගිය 2020 සැප්තැම්බර් 25 වැනිදා සිට තිරගත වීම ඇරඹි ආරොන් සෝකින් විසින් රචනා කොට අධ්‍යක්ෂණය කරන ලද ‘ද ට්‍රයල් ඔෆ් ද චිකාගෝ 7’ මෙම සිද්ධි දාමය අලළා නිමැවුණු චිත්‍රපටයකි.

ජනප්‍රිය රංගන ශිල්පීන් රාශියක් මෙහි චරිත නිරූපණය කරන අතර යාහියා අබ්දුල්-මාටීන් (දෙවන), ඩැනියෙල් ෆ්ලහර්ට්, සාචා බාරොන් කොහෙන්, මයිකල් කීටන්, ජෝන් කැරොල් ලින්ච්, ජෝශප් ගෝර්ඩන්-ලෙවිට්, ෆ්‍රෑන්ක් ලැන්ගෙල්ලා, එඩී රෙඩ්මයින්, නෝවා රොබින්ස්, මාක් රයිලන්ස්, ඇලෙක්ස් ෂාප් සහ ජෙරමි ස්ට්‍රෝන් එම රංගන ශිල්පීහු වෙති.

අමෙරිකානු රජය අපකීර්තිමත් කළ නඩු විභාගයක් ලෙස ඉතිහාස ගත වන මෙම සිද්ධිය අවසානයේ විත්තිකරුවන් 7 දෙනෙකුගෙන් 5 දෙනෙකුට පමණක් කැරලි ඇති කිරීම සම්බන්ධයෙන් දඬුවම් පැමිණ විණි. කෙසේ නමුත් පසුව පැවති නඩු විභාගයන් හිදී එම දඬුවම්ද අවලංගු වුණු අතර බොහෝ චෝදනාකරුවන්ටත් ඔවුන්ගේ නීතීඥයන්ටත් නඩු විභාගය අතරතුරේදී උසාවියට අපහාස වන අන්දමින් ක්‍රියා කිරීම යන චෝදනාව යටතේ දිගු සහ කෙටි කාලීන දඬුවම් පමණක් පැමිණවිණි.

නෙට්ෆ්ලික්ස් විසින් බෙදාහරිනු ලැබූ අමෙරිකානු ඩොලර් මිලියන 35 ක පිරිවැයක් යොදා නිමැවුණු මෙම චිත්‍රපටය විනාඩි 130ක ධාවන කාලයකින් යුක්තය. කොවිඩ් 19 වසංගතය නිසා වාණිජමය වශයෙන් ඉතා දුර්වල ආදායමකට හිමිකම් කියන බව සඳහන් වුවත් මේ වන විට මෙම චිත්‍රපටය ඩොලර් මිලියන 115 ක පමණ බොක්ස් ඔෆීස් ආදායමක් උපයා ඇත. ඒ කෙසේ නමුත් විචාරක ප්‍රතිචාර අතින් ඉහළින්ම වැජඹෙන චිත්‍රපටයක් වන මෙය IMDb 7.8 ක් සහ Rotten Tomatoes 89% ක අගයක් ලබාගෙන ඇත. රොට්න් ටෝමැටෝස් හි පොදු විචාරය පවසන ආකාරයට මෙහි චරිත මැවූ රංගන ශිල්පීන් මෙම ඉතිහාසගත කතාව ජීවමාන කරන ලද අතර අධ්‍යක්ෂවරයාගේ දක්ෂතාවයක් විදහා දැක්වීමටද හොඳ තෝතැන්නක් වී ඇත.

එහෙනම් අදට මං ගිහින් එන්නම්. පහුගිය දවස් ටිකේ වැඩත් එක්ක උපසිරසියක් අරන් එන්න බැරි වුන නිසා අදටත් පැරණි චිත්‍රපට රසවිඳින කීප දෙනෙක්ම මගෙන් ඇහුවා දැන් සබ් හදන්නේ නැද්ද, අඩවියෙන් අයින් වෙලාද කියලා. ඔයාල හැමෝටම කියන්නේ, එහෙම වෙලා නෑ. ඇත්තටම කාලය ගැන ගැටළුවක් විතරයි තිබුනේ. මගේ විනෝදාංශය අතෑරලා නෑ. ඉදිරියේදී තවත් පැරණි චිත්‍රපට වලට සිංහල උපසිරසි අරන් මං එන්නම්. දැනටමත් පැරණි චිත්‍රපටයක් වෙන් කරගෙන ඉවරයි. ඒකත් ළඟදීම අරගෙන එන්නම්.

ආපහු දවසක මේ වගේම තවත් චිත්‍රපටයකට සිංහල උපසිරසියක් අරන් එනකන් ඔයාල හැමෝටම නිරෝගිමත් සුව දවසක් වේවා…

~ ජය වේවා ~

 

 

 

Due to copyright issues, we do not provide any torrent link.

මෙම ලබා දී ඇති උපසිරැසි WEB පිටපත් සඳහා අදාළ වේ.

 

Subtitle Contributor Rank

GOLD MEMBER
JOINING DATE – 2019-03-30
SUB-MAKER RATING BY ADMINS