The Amazing Spider Man 2 (2014) | මකුළු වීරයා නැවතත් කරළියට… [50][සිංහල උපසිරැසි සමඟ]

අද මගේ ජිවිතයේ යම් කඩඉමක් වෙත ලඟා වෙච්ච දවසක්. ඔබට මේ ලබා දෙන උපසිරැසියත් එක්කම මගේ උපසිරැසි 50 සම්පුර්ණ වෙනවා. මම හිතන්නේ අඩවියේ මේ කණිසම පහු කරපු මම 13 වැනියා වෙන්න ඕනේ. ඇත්තටම මට ගොඩක් සතුටුයි. කියන්න නම් ගොඩක් දේවල් තියෙනවා. ඔක්කොටොම කලින් කියන්න ඕනේ කවදාකවත් මුණ ගැහිලා නැති මේ අඩවියේ කාර්‍යමණ්ඩලය එක්ක වැඩ කරන්න ලැබුණු එක නම් ගොඩක් සතුටට කාරණයක්.

ගොඩක් කල් මේ අඩවියෙන් උපසිරසි බාගත කරගෙන ගිහින් අදහස් පළකරමින් ඉන්නකොට නිකමට වගේ හිතට ආපු අදහසක් අනුව 2013 සැප්තැම්බර් 21 වෙනිදා ඔයාලට පළමු උපසිරැසිය අරන් ආවා. පළවෙනි සබ් එක කරලා ඉවර වෙනකොට නම් මම කවදාවත් හිතුවේ නැහැ මේ පළමු කඩයිමට ලඟා වෙන්න පුළුවන් වෙයි කියලා.නමුත් මටත් හොරා මගේ ඇඟිලිතුඩු වැඩ කරා කියන්න ඕනේ. විනෝදාංශයක් වශයෙන් පටන් ගත්ත දේ අවසානයේදී ඇබ්බැහි වීමක් උනා. සමහර දවස්වල උදේ වෙනවා තේරුණේ නැති දවස් තියෙනවා. White House Down (2013) ෆිල්ම් එක මම එක දිගටම සබ් එක හදාගෙන ගිය ෆිල්ම් එකක්. ඒ අපේ “විකියා සහෝ” ගේ ඉල්ලීම අනුව තමයි.. අහ්හ්.. කියන්න ඕනේ විකියා ගැන.. ඔන්න සහෝ පට්ට ෆිල්ම් එකක් ඇවිත් තියෙනවා කරමු නේද? ඉතිං මොකද කියන්නේ.. බැහැ කියන්නත් මොකක්ද වගේ.. හා එහෙනම් කරමුකෝ.. එච්චරයි, ඊට පස්සේ කරලා දෙනකම් ඉවසිල්ලක් නැහැ 😛 ඔන්න ඔහොම තමයි මුලින් නම් උනේ. ඒ දවස් වල විකියා කියන්නේ කොටි වලිගයක්ම තමයි. ඒත් දැන් නම් විකියා වැඩිය පෙන්න නැහැ.

ඒ උනාට මේ දවස් වල අපිට වද දෙන්නේ අපේ “හසන්ත අයියා” 😛 කියන්න දෙයක් නැහැ. උදව්වක් ඕනේ ඕනෙම වෙලාවක හා කියන්න ලෑස්ති වෙලා ඉන්නේ. අනේ මංදා මෙව්වා කොහොම කරනවද කියලා. කීදෙනෙක් කියන එව්වට ඇහුම් කන් දෙන්නද? කොයි තරම් දේවල් මතක තියා ගන්නද? හැමෝම සහයෝගයෙන් තියා ගන්නත් ඕනේ. හැකි ඉක්මණින් සබ් දෙන්නත් ඕනේ. වෙලාවකට හිතෙනවා මෙහෙම දේකුත්. අපිත් එක්ක තරඟ කරන්න අපි වගේම තවත් තරඟකරුවෙකුත් හිටියා නම් හොඳයි කියලා, එතකොට මම දන්නවා අපේ යාළුවො මීට වඩා වේගයෙන් සබ් දෙනවා කියලා 😛 😛

මෙතෙක් ආ ගමන දෙස ආපසු හැරී බලන විට 100% ක්ම චිත්‍රපටි තුලින් මේ කාර්යය නිම කිරීමට හැකි වීම ගැන අවංක සතුටක් හිතට දැනෙනවා. මොකද සාපේක්ෂව චිත්‍රපටයක් උපසිරැසි ගැන්වීමට වැඩි කාලයක් හා ශ්‍රමයක් දරන්න වෙනව. ඒ වගේම කිසිම පරණ ෆිල්ම් එකක් දීලා නැහැ. ඔක්කොම අළුත් එව්වා. 🙂 ඒ අතර ඉංග්‍රීසි 31 ක් හින්දි 16 ක් සහ වෙනත් භාෂා 3 ක් තියෙනවා. ඒ අතරින් මම කැමතිම එක තමයි Rush (2013). නමුත් උපසිරැසි කලාවේ රජ්ජුරුවෝ වෙච්ච අපේ “රොයිලි අයියා” උපසිරැසි දුන්නු Revolution කතා මාලාව නිසා මම රූපවාහිනී කතා මාලාවක් මුළින්ම දිගටම ආසාවෙන් බැලුවා කියන්න ඕනේ. තව එකක් ආරාධනා ඇති තරම් ආවත් රූපවාහිනී කතා මාලාවක් කරන්න බාර නොගත්තේ, එහෙම උණා නම් හැමදාම සතියකට සැරයක් ඒක දෙන්න වෙනවා, මට ඒක කරන්න බැරි නිසා තමයි බාර ගන්නේ නැත්තේ. මම හිතන්නේ අඩවියේ මම විතරයි වෙන්න ඕනේ අළුත් චිත්‍රපට පමණක් කරන්නේ. 😉 😉 😉

තව ටික දවසකින් ශතකය ගහන්න සුදානම් වෙලා ඉන්න “සමීර කරුණාරත්න” සහෝත් මතක් කරන්න ඕනේ. සයිට් එකට ආපු දවස් වල මම දන්නේ නැති ගොඩක් දේවල් මට කියා දීලා තියෙනවා. මම උපසිරැසි ගැන්වූ ෆිල්ම්ස් වල වැඩිපුරම වැරදි කියලා තියෙන්නේ අපි කවුරුත් දන්නා “හේවා ලුණුවිලගේ” සහෝදරයා තමයි, ඔහුවත් ආදරෙන් මතක් කරන්න ඕනේ. ඔයාලා දන්නවනේ උදව් කරපු අය හැමෝම නම් වශයෙන් කියන්න බැහැ කියලා. ඒ වගේම තමයි මගේ උපසිරැසි බාගත කරගෙන මා වෙත අදහස් දැක්වූ ඔයාලා තමයි මට හැමදාමත් ශක්තියක් උනේ. ඒ සහයෝගය මම හැමදාටම බලාපොරොත්තු වෙනවා. 🙂 🙂 🙂

මුලින්ම කිව යුතුයි. මේ දීලා තියෙන්නේ “HDTS කොපියක්” මේක හොද මට්ටමක තියනවා. මේක නොබලන අය තව ඉවසන් ඉන්න. හොඳ පිටපතක් නිකුත් වෙච්ච සැනින් ඒ සදහා ගැලපෙන උපසිරැසි ලබාදෙන බව ඔයාලා හොඳටම දන්නවනේ. ඒ වගේම පිටපතේ සාම්පල් එකක් තියනවා මෙන්න. මෙතනින් 1, 2, 3, 4 බලන්න  තවත්  පින්තූර ටිකක් තියෙනවා. ඔයාලම තීරණය කරන්න දැන්ම බලනවද නැද්ද කියල?

සලරුව ගැන පොඩ්ඩක් කියනවා නම් නිකුත් වුණේ පසුගිය මැයි 2 වෙනිදා. IMDb එකට අනුව මේ වෙනකොට 7.4 ක් ලැබිලා තියෙනවා. හැරී කියන්නේ නොර්මන් ඔස්බෝර්න් ගේ පුතා. ඔහුටත් ඔහුගේ තාත්තට වගේ මැරෙන්න වෙලා තියෙන්නේ, ඒ නිසා ඔහු එකට පිලියමක් හොයා ගන්නවා. ඔහු හිතනවා ස්පයිඩර් මෑන් ට මකුළුවක් දෂ්ඨ කරලා මේ බලය ලැබිලා තියෙන්නේ කියලා, ඒ කියන්නේ තමන්ටම තුවාල සුව කරගැනීමේ හැකියාව ලබා ගන්න පුළුවන් කියලා. ඉතින් ඔහුට ස්පයිඩර් මෑන්ගේ ලේ ඕනේ කරනවා. මේ අතරේ මැක්ස් ඩිලන් කියන විදුලි ඉංජිනේරුවා හදිසි අනතුරකට ලක් වෙලා සුපිරි බලයක් තියෙන කෙනෙක් බවට පත් වෙනවා. ඒ තමයි ඉලෙක්ට්‍රෝ. හැරී මෙයාගේ සහය අරගෙන තමයි ස්පයිඩර් මෑන් ව අල්ලා ගන්න හදන්නේ. ඒ වගේම පීටර් ගේ පෙම්වතිය වුන ග්වෙන් ද මේ ඇබැද්දියෙන් බේරෙන්න පීටර් ට උදව් කරනවා. ඔය ඇති නෙහ්..ඔයාලම බලන්න.

අවසාන වශයෙන් කිව යුතුමයි මම මෙතෙක් කරගෙන ආපු දේ ගැන මට අවංකවම සතුටුයි. අපි ලඟ තියන දැනුම තවත් කෙනෙකුට දෙන්න පුලුවන් නම්, ඒ දැනුමෙන් කෙනෙකුගේ විඩාවට පත් වූ සිතට සතුටක් ගෙනදී සහනයක් වෙන්න හැකි නම්. එයයි වඩාත්ම වටින්නෙ. ඉතින් එයින් ලැබෙන ආත්ම තෘප්තිය මම වගේම අපේ අනෙකුත් සහෘද උපසිරැසි නිර්මාණකරුවනුත් අත් විඳල ඇති විඳිනවා ඇති කියලා මම දන්නවා. මේ කාර්යය සාර්ථකව කිරීමට මා හට නිරතුරුව දිරිදුන් එකී මෙකී නොකී ඔබ සැමට මගේ හදපිරි ප්‍රණාමය. හැමෝටම ආරාධනා කරනවා මගේ “FaceBook Page” එකෙන් මාව කෙළින්ම අමතන ලෙසට. ඔබ සැමට ජයෙන් ජයම පතනවා.හැමෝටම සුබ දවසක්.

670 MB (WEB) කොපිය මෙතනින් බාගන්න

1.00 GB (WEB) කොපිය මෙතනින් බාගන්න

930 MB (720p BR) කොපිය මෙතනින් බාගන්න

2.06 GB (1080p BR) කොපිය මෙතනින් බාගන්න

මේ ලබා දී ඇති සිංහල උපසිරැසි පිළිබද “සමීර චතුරංග” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.